NINGA m’mwazi mphangwa waphinga, Yezu akhazikisa citsandzo cadidi kuna atowereri ace. Iye akhaenda kuna anthu, akhaamwazira mphangwa na kuapfundzisa m’manyumba mwawo na m’mbuto zikhagumanika anthu azinji. (Mat. 9:35; 13:36; Luka 8:1) Yezu akhalonga na munthu m’bodzi na m’bodzi paekha, akhapfundzisa anyakupfundzace paokha, pontho akhamwaza mphangwa kuna mwinji wa anthu. (Marko 4:10-13; 6:35-44; Juw. 3:2-21) Iye akhabandza midzidzi yonsene yakuthema toera kulonga mafala akuwangisa na a cidikhiro kuna anthu. (Luka 4:16-19) Ngakhale mu ndzidzi ukhafuna iye kupuma, Yezu akhabandza miyai yonsene toera kumwaza mphangwa. (Marko 6:30-34; Juw. 4:4-34) Tingaleri m’Bhibhlya pinthu pidacita Yezu mu utumiki, kodi nee tisakulumizika toera kuntowezera? Mwandimomwene ife tisakulumizika ninga pidacita apostolo.—Mat. 4:19, 20; Luka 5:27, 28; Juw. 1:43-45.

² Tendeni tione njira zinaphatisira Akristu mu ntsiku zino toera kucita basa idatomesa Yezu Kristu mu pyaka cifupi na 2.000 nduli.

³ Ninga Mboni za Yahova, tisadziwa kufunika kwa kumwaza mphangwa zadidi za Umambo nyumba na nyumba munjira yadidi. Ife kazinji kene tisaphatisira njira ineyi  yakumwaza mphangwa yakuti anthu asatidziwa nayo kakamwe. Kumwaza mphangwa nyumba na nyumba ndi njira yadidi kakamwe yakuti isatiphedza toera kugumana anthu azinji mu ndzidzi wakucepa. (Mat. 11:19; 24:14) Kumwaza mphangwa nyumba na nyumba ndi njira yakupangiza kuti tisafuna Yahova na andzathu.—Mat. 22:34-40.

⁴ Basa yakumwaza mphangwa nyumba na nyumba nee yatoma cincino na Mboni za Yahova. Mpostolo Paulu alonga kuti akhamwaza mphangwa m’manyumba mwa anthu. Pikhalonga iye na akulu a mpingo a ku Efeso thangwi ya utumiki wace, iye alonga: “Kubulukira pa ntsiku yakutoma idafika ine mu provinsya ya Azya, . . . ine ndakumwazirani mphangwa mbandikhonda kukubisirani cinthu cakufunika kuna imwe mbandipitiriza kukupfundzisani . . . nyumba na nyumba.” Munjira ineyi na zinango, Paulu apereka “umboni wakukwana kuna Ayuda na Agerego ene, kuti asafunika atcunyuke mbabwerera kuna Mulungu, pontho akhulupire Mbuyathu Yezu.” (Mabasa 20:18, 20, 21) Mu ndzidzi unoyu atongi Aciroma akhakulumiza anthu toera kulambira madzimunthu, pontho anthu azinji ‘akhalemedza kakamwe alungu.’ Natenepa mwakucimbiza iwo akhafunika kusaka “Mulungu adacita dziko na pinthu pyonsene piri mwenemu,” Ule wakuti “asapanga anthu onsene, mu mbuto zonsene kuti asafunika atcunyuke.”—Mabasa 17:22-31.

⁵ Lero, basa yakumwaza mphangwa zadidi isafunika kucitwa mwakucimbiza kakamwe thangwi kumala kwa makhaliro ano akuipa kuli dhuzi kakamwe. Kudziwa pyenepi kusatikulumiza toera kukhala aphinga m’basa yakumwaza mphangwa. Pisaoneka kuti kutomera kale nkhabepo njira inango yadidi kakamwe yakuphedza anthu toera kudziwa undimomwene kupiringana kumwaza mphangwa nyumba na nyumba. Njira ineyi isaphedza kakamwe ninga  mudaphedza iyo anthu mu ndzidzi wa Yezu na wa apostolo.—Marko 13:10.

⁶ Kodi musawangisira toera kumwaza mphangwa nyumba na nyumba? Khala ndi tenepo, dziwani kuti Yahova asakomerwa kakamwe na pinacita imwe. (Ezek. 9:11; Mabasa 20:35) Panango imwe musanentseka toera kumwaza mphangwa nyumba na nyumba thangwi ya ungumi wanu peno thangwi yakumwaza mphangwa mucisa cakuti anthu azinji nkhabe funa kubvesera, peno thangwi yakukhala mu dziko yakuti mautongi asakhondesa basa yathu. Kusiyapo pyenepi, panango muna manyadzo, pontho musanentseka toera kutomesa makani na anthu akuti nee musaadziwa. Na thangwi ineyi, ndzidzi onsene unaenda imwe kamwaza mphangwa nyumba na nyumba panango munadzudzumika pang’ono. Mbwenye lekani kufewa manungo. (Eks. 4:10-12) Abale athu a m’mbuto zizinji asanentsekambo na pibodzi pyene.

⁷ Yezu apikira kuna anyakupfundzace: “Onani! Ine ndiri na imwe ntsiku zonsene mpaka kumala kwa makhaliro a dziko.” (Mat. 28:20) Pikiro ineyi isatipasa mphambvu toera kucita basa yakupfundzisa anthu. Ife tisakhala ninga mpostolo Paulu adalonga: “Mu pinthu pyonsene, ine ndisakwanisa kukhala na mphambvu thangwi ya ule anandipasa mphambvu.” (Afil. 4:13) Phatisirani mwadidi masasanyiro onsene anacitwa pa mpingo toera kumwaza mphangwa nyumba na nyumba. Mungamwaza mphangwa na anango, iwo anakuphedzani, pontho anakuwangisani. Citani phembero kuna Mulungu toera akuphedzeni kukunda mipingizo yonsene, pontho wangisirani toera kumwaza mphangwa zadidi mwaphinga.—1 Juw. 5:14.

⁸ Mu ndzidzi unacedza imwe na anango thangwi ya mphangwa zadidi, musakhala na mwai wakuapanga pya “cidikhiro canu.” (1 Ped. 3:15) Pontho imwe munaona  mwadidi kusiyana kwa anthu akuti ali na cidikhiro ca Umambo na ale akuti nkhabe naco. (Iza. 65:13, 14) Munakhala akutsandzaya thangwi yakudziwa kuti musabvera ntemo wa Yezu wakuti “pangizani ceza canu kuna anthu,” pontho munakwanisa kuphedza anthu kuti adziwe Yahova na undimomwene unatsogolera anthu toera agumane umaso wakukhonda mala.—Mat. 5:16; Juw. 17:3; 1 Tim. 4:16.

⁹ Masasanyiro asacitwa toera kumwaza mphangwa nyumba na nyumba pakati pa sumana na pakumala kwa sumana. M’mbuto zakuti ndi pyakunentsa kugumana anthu panyumba namasikati, mipingo inango isacita masasanyiro toera kumwaza mphangwa ncidodo. Panango anthu asakhala akusudzuka kutambira alendo ncidodo kupiringana namacibese.

¹⁰ Yezu apanga anyakupfundzace toera ‘asake’ anthu anafuna undimomwene. (Mat. 10:11) Toera kugumana anthu anewa, Yezu nee akhamwaza mphangwa basi ene nyumba na nyumba. Iye akhabandza miyai yonsene toera kupereka umboni wantsusukano na wapakweca. (Luka 8:1; Juw. 4:7-15) Apostolo akhamwazambo mphangwa kuna anthu m’mbuto zakusiyana-siyana.—Mabasa 17:17; 28:16, 23, 30, 31.

¹¹ Lero, ife tisafuna kuti anthu onsene abvembo mphangwa za Umambo. Toera kucita pyenepi, tisafunika kutowezera njira ikhaphatisira Yezu na apostolo ace m’basa yakucita anyakupfundza, mbaticinja njira zenezi mwakubverana na ndzidzi na makhaliro a anthu a mucisa cathu. (1 Akor. 7:31) Mwacitsandzo, amwazi mphangwa azinji asagumana anthu anapangiza cifuno angaamwazira mphangwa pa mbuto yawo ya basa. M’madziko mazinji amwazi mphangwa asagumana anthu anapangiza cifuno angamwaza mphangwa m’miseu, m’mbuto zinakoyerwa  makaru na konsene kwene kunagumanika anthu. Mipingo inango isaphatisira meza na makarinya pakumwaza mphangwa. Kusiyapo pyenepi, panango ofesi ya filiali inacita masasanyiro toera kuphatisira abale a mipingo yakusiyana-siyana kuti amwaze mphangwa m’mbuto zinapita na anthu azinji. Pyenepi pisacitisa kuti ale anakhonda kugumanika panyumba abvembo mphangwa zadidi.

¹² Pakumwaza mphangwa m’mbuto zinapita na anthu azinji, tingagumana munthu adapangiza cifuno cakubvesera mphangwa za m’Bhibhlya, ife tisafunika kumpasa bukhu yakuti isabverana na pinafuna iye kudziwa. Toera kukulisa cifuno cace, tisafunika kumpasa numero yathu ya ntokodzi, kucita masasanyiro a ulendo wakubwereza, kumpangiza saiti jw.org peno kumpanga mbuto inacitirwa misonkhano ya mpingo dhuzi na kunakhala iye. Imwe munaona kuti kumwaza mphangwa m’mbuto zinapita na anthu azinji ndi njira ibodzi yakuthimizira utumiki wanu.

¹³ Mbwenye basa iri na Akristu lero nee ndi yakumwaza mphangwa basi. Toera kuphedza anango kutawira undimomwene unatsogolera ku umaso wakukhonda mala, tisafunika kucedzera kazinji kene ale anapangiza cifuno toera athambaruke mbakhala Akristu akukola mwauzimu.

¹⁴ Yezu apanga atowereri ace: “Munadzakhala amboni anga . . . mpaka kunkhomo kwa dziko yapantsi.” (Mabasa 1:8) Buluka penepo aapanga: “Ndokoni mukacite anyakupfundza kuna anthu a madzindza onsene, . . . apfundziseni toera abvere pinthu pyonsene pidakupangani ine.” (Mat. 28:19, 20) Kucita maulendo akubwereza kunaticitisa kukhala akutsandzaya kakamwe m’basa ya Yahova. Anthu adapangiza cifuno paulendo wakutoma udaamwazira imwe mphangwa panango anatsandzaya angakuonani pontho. Mungacedza nawo kazinji kene  thangwi ya Bhibhlya panango munaaphedza toera kuwangisa cikhulupiro cawo kuna Mulungu, pontho munaaphedza kudzindikira kuti asafunika kudziwa Mulungu. (Mat. 5:3) Mungakhunganyika mwadidi toera kucita ulendo wakubwereza, pontho mungafika pa ndzidzi wakuthema kuna iwo, panango imwe munakwanisa kutomesa pfundziro ya Bhibhlya. Kazinji kene, ceneci cisafunika kukhala cifuno canu pakucita maulendo akubwereza. Nee tisafunika basi ene kubzwala mbeu za undimomwene, mbwenye tisafunikambo kuzithirira.—1 Akor. 3:6.

¹⁵ Kuna anango panango pisanentsa kucita maulendo akubwereza. Panango imwe nkhabe nentseka toera kucedza mwacigwagwa na anthu thangwi ya mphangwa zadidi, pontho musakomerwa na kucita pyenepi. Mbwenye munganyerezera kubwerera toera kucedza pontho na munthu unoyu thangwi ya Bhibhlya, panango munaona ninga ndi pyakunentsa kakamwe. Kukhunganyika mwadidi kunakuphedzani toera mukhonde gopa. Phatisirani maonero anapangizwa pa nsonkhano wapakati pa sumana. Munakwanisambo kuphemba m’mwazi mphangwa waluso toera akuperekereni.

¹⁶ Pikhacedza iye na Muyuda wakuti akhaleri Mafala a Mulungu, m’mwazi mphangwa Filipi ambvundza: “Kodi musabvesesa pinaleri imwe?” Mamuna unoyu antawira: “Ndinapibvesesa tani ndingasowa munthu toera kundifokotozera?” Kapitulu 8 ya bukhu ya Mabasa, isapangiza kuti kutomera pa vesi ikhaleri mamuna unoyu, Filipi anfokotozera “mphangwa zadidi thangwi ya Yezu.” (Mabasa 8:26-36) Nee tisadziwa kuti Filipi acedza ndzidzi ungasi na  mamuna unoyu, mbwenye mphangwa zadidi zidalonga Filipi zancitisa kukhulupira, kuphemba kubatizwa mbakhala nyakupfundza wa Yezu Kristu.

¹⁷ Anthu azinji lero nkhabe dziwa mwadidi Bhibhlya. Na thangwi ineyi, tisafunika kucita maulendo akubwereza kazinji kene, kupfundza nawo Bhibhlya masumana mangasi, miyezi, ngakhale caka cibodzi peno kupiringana toera akhale na cikhulupiro cakuwanga mbakhala akuthema kubatizwa. Kupirira kwanu toera kuphedza anthu akuti asafuna na ntima onsene kukhala anyakupfundza pinakucitisani kukhala akutsandzaya ninga pidalonga Yezu: “Kupasa kusatsandzayisa kakamwe kupiringana kutambira.”—Mabasa 20:35.

¹⁸ Mwakukhonda penula, imwe musafuna kuphatisira ibodzi mwa mabukhu athu toera kucitisa pfundziro ya Bhibhlya. Mungaphatisira pitsogolero pinaperekwa pa nsonkhano wapakati pa sumana na kuphata basa pabodzi na amwazi mphangwa aluso mu mpingo, munakwanisa kucitisa mwadidi mapfundziro a Bhibhlya mbamuphedza anango toera akhale anyakupfundza a Yezu Kristu.

¹⁹ Mungafuna ciphedzo toera kutomesa na kucitisa pfundziro ya Bhibhlya, khalani wakusudzuka toera kucedza na m’bodzi wa akulu a mpingo peno m’mwazi mphangwa wakuti ali na maluso akucitisa pfundziro ya Bhibhlya. Maonero anagumanika mu Programu ya Misonkhano ya Umaso Wathu na Utumiki anapangizwa pa nsonkhano anakuphedzanimbo. Nyindirani Yahova, pontho citani phembero mbamumpanga kuti musafuna kukhala na pfundziro ya Bhibhlya. (1 Juw. 3:22) Natenepa, pingakwanisika khazikisani cifuno cakucitisa mapfundziro peno pfundziro ya Bhibhlya, kusiyapo inacita imwe na banja yanu. Mungacitisa mapfundziro a Bhibhlya, munathimizira kutsandzaya kwanu m’basa yakumwaza mphangwa.

²⁰ Tingaphedza anango toera kudziwa Yahova na kukhala anyakupfundza a Yezu Kristu, iwo asacita khundu ya mpingo. Anyakupfundza Bhibhlya anathambaruka mbakhala akukola mwauzimu angadzindikira kuti Yahova ali na gulu yace, mbaiphedzera. Ndi pyakufunika kakamwe kuapfundzisa kuti anacita tani pyenepi. Mavidhyu anango na bhruxura Mbani Anacita Cifuno ca Yahova Lero? pyacitwa na cifuno ceneci. Mphangwa zinango zakuthimizirika zisagumanika mu Nsolo 4 wa bukhu ino.

²¹ Mu ndzidzi unatoma imwe kupfundza Bhibhlya na munthu, m’phedzeni toera kudziwa kuti Yahova ali na gulu inaphatisira iye toera kumwaza mphangwa pa dziko yapantsi. M’phedzeni toera aone kufunika kwa mabukhu athu, mpangeni kuti asacitwa tani, pontho asagawirwa tani pa dziko yonsene na atumiki akuperekeka a Mulungu. Phembani nyakupfundza wanu toera aende pabodzi na imwe ku misonkhano ku Nyumba ya Umambo. Mpangeni kuti misonkhano isacitwa tani, pontho m’phedzeni toera adziwane na abale na alongo. Musafunikambo kum’phedza toera adziwane na abale na alongo anango pa misonkhano ya cisa na ya gawo. Pa misonkhano ineyi na inango, m’phedzeni toera aone ekhene kuti mbumba ya Yahova isapangiza tani ufuni, wakuti ndi cidzindikiro ca Akristu andimomwene. (Juw. 13:35) Nyakupfundza angatoma kufuna kakamwe gulu ya Yahova, iye anadzakhala xamwali wa Yahova.

²² Akristu akutoma akhamwaza Mafala a Mulungu mwaphinga. Iwo akhakopyari Malemba toera kuaphatisira munthu paekha na pakuapfundza mu mpingo. Iwo akhaphedza  anango toera apfundze undimomwene wa Mafala a Mulungu. Makopya anewa akhali akucepa, mbwenye akhali akufunika kakamwe kuna iwo. (Akol. 4:16; 2 Tim. 2:15; 3:14-17; 4:13; 1 Ped. 1:1) Lero, Mboni za Yahova zisaphatisira njira zipswa toera kucita na kudhinda Mabhibhlya na mabukhu mazinji kakamwe akuti asatiphedza kubvesesa pinalonga Bhibhlya. Pyenepi pisaphataniza matratadho, mabhruxura, mabukhu na marevista a pilongero pyakusiyana-siyana.

²³ Mu ndzidzi unamwaza imwe mphangwa zadidi kuna anango, wangisirani toera kuphatisira mabukhu a gulu ya Yahova akuti asatiphedza toera kubvesesa pinalonga Bhibhlya. Kudziwa kuti kuleri na kupfundza mabukhu anabuluswa na Mboni za Yahova kwakuphedzani tani, kunakukulumizani toera kugawirambo anango mabukhu anewa.—Aheb. 13:15, 16.

²⁴ Lero, anthu azinji asaphatisira interneti toera kusaka mphangwa. Natenepa, kusiyapo mabukhu athu, saiti yathu jw.org ndi njira yadidi kakamwe toera kumwaza nayo mphangwa zadidi. Anthu pa dziko yonsene yapantsi anakwanisa kuphatisira ntcini wandzeru peno ntokodzi toera kuleri na kubvesera audhyu ya Bhibhlya na ya mabukhu mu pilongero pyakusiyana-siyana. Ale akuti nkhabe kukhala akusudzuka toera kucedza na ife, peno ale anakhala m’mbuto zakuti nkhabe mwai wakucedza na Mboni za Yahova, anakwanisa kusaka mphangwa zinalonga thangwi ya pinthu pinakhulupira ife mu saiti jw.org uku ali m’manyumba mwawo.

²⁵ Na thangwi ineyi, ndzidzi onsene ife tisapanga anthu pya saiti jw.org. Munthu anacedza na ife angaticita mbvundzo thangwi ya pinakhulupira ife, tinakwanisa kuphatisira ntokodzi peno thabhuleti toera kugumana ntawiro mwakukhonda nentsa. Tingagumana munthu analonga cilongero cinango, kuphatanizambo cilongero ca manja,  tinakwanisa kumpanga pya saiti yathu toera agumane Bhibhlya na mabukhu anango mu cilongero cace. Amwazi mphangwa azinji asaphatisira mavidhyu ali mu saiti yathu toera atome kucedza thangwi ya Bhibhlya.

²⁶ Yezu apanga ale akhabvesera mafalace: “Imwe ndimwe ceza ca dziko. . . . Pangizani ceza canu kuna anthu, toera iwo aone mabasa anu adidi mbapasa mbiri Babanu wakudzulu.” (Mat. 5:14-16) Anyakupfundza anewa akhapangiza makhaliro a Mulungu thangwi iwo akhatowezera citsandzo ca Yezu, adalonga: “Ine ndine ceza ca dziko.” Yezu akhazikisa citsandzo cadidi kuna Akristu thangwi yakusiya kuti “ceza cakupasa umaso” ciyetimire toera kuphedza onsene akhambvesera.—Juw. 8:12.

²⁷ Mpostolo Paulu akhazikisambo citsandzo cadidi kuna ife. (1 Akor. 4:16; 11:1) Pikhali iye ku Atena ntsiku zonsene akhamwaza mphangwa kuna anthu akhagumana iye pa nsika. (Mabasa 17:17) Akristu a ku Filipi atowezera citsandzo cace. Ndi thangwi yace, mpostolo Paulu alemba kuti iwo akhali “pakati pa anthu akuipa akuti nkhabe kucita pinthu pyakulungama,” mbwenye iwo, ‘akhayetimira pakati pawo ninga ceza mu dziko ino.’ (Afil. 2:15) Lero, ife tinakwanisa kuphedzera toera undimomwene unalonga pya Umambo uyetimire kuna anthu kubulukira mu pinalonga ife na pinacita ife ndzidzi onsene unabandza ife mwai toera kulonga mphangwa zadidi kuna anango. Mwandimomwene, citsandzo cathu cadidi, kunyindirika kwathu na makhaliro athu adidi anakwanisa kupangiza kuna anthu kuti ndife akusiyana na dziko. Mbwenye tingaamwazira mphangwa zadidi, iwo anadziwa kuti thangwi yanji ndife akusiyana.

²⁸ Atumiki azinji a Yahova asamwaza mphangwa zadidi kuna ale anagumana iwo kubasa, kuxikola, pakucita ulendo,  peno m’mbuto zinango zinacita iwo mabasa awo a ntsiku na ntsiku. Pakucita ulendo, panango tinakhala na mwai wakucedza na ale anacita ulendo na ife. Tonsene tisafunika kuwangisira toera kucinja makani anacedza ife kuti timwaze mphangwa. Tisafunika kukhala akukhunganyika toera kumwaza mphangwa ndzidzi onsene pingakhala pyakuthema.

²⁹ Ife tinakulumizika toera kucita pyenepi tingadziwa kuti tisasimba Nciti wathu, pontho tisalemedza dzina yace. Kusiyapo pyenepi, tinakwanisa kuphedza ale anafuna kudziwa Yahova toera iwombo antumikire, pontho akhale na cidikhiro cakukhala na umaso wakukhonda mala thangwi yakukhulupira Yezu Kristu. Yahova asakomerwa na kuwangisira kweneku, pontho asaona basa ineyi ninga yakupambulika.—Aheb. 12:28; Apok. 7:9, 10.

³⁰ Yahova asafuna kuti mphangwa za Umambo zimwazwe pa dziko yonsene, m’mizinda na mupisa pyakutali na mizinda. Toera pyenepi pikwanisike, mipingo kuphatanizambo ale anatumikira m’mbuto zakutali asapaswa pisa na ofesi ya filiali toera kumwaza mphangwa. (1 Akor. 14:40) Pyenepi pisabverana na pitsogolero pidapereka Mulungu kuna Akristu akutoma. (2 Akor. 10:13; Agal. 2:9) Thangwi yakuthimizirika kwa basa ya Umambo mu ntsiku zino zakumalisa, ife tisakwanisa kucita pizinji mucisa ca mpingo khala ico cagawiwa mwadidi.

³¹ Anatsogolera masasanyiro anewa ndi muyang’aniri wa basa ya m’munda. Ntumiki wakutumikira anakwanisa kuphata basa yakugawira anthu pisa. Pana mitundu miwiri ya pisa, cisa ca nsoka na cisa ca munthu paekha. Khala cisa ca mpingo ndi cing’ono, ayang’aniri a misoka ya basa ya m’munda asapaswa pisa toera misoka yawo imwaze mphangwa mupisa pyenepi. Mbwenye khala mpingo uli na  cisa cikulu, m’mwazi mphangwa m’bodzi na m’bodzi anakwanisa kukhala na cisa cace.

³² M’mwazi mphangwa angakhala na cisa cace pisam’phedza toera kudziwa kuti anamwaza kupi mphangwa mu ndzidzi wakuti nsoka wace nee unabuluka m’munda, peno khala nee anakwanisa kubuluka pabodzi na nsoka. Mwacitsandzo, anango asaphemba cisa dhuzi na kunaphata iwo basa toera akwanise kumwaza mphangwa mu ndzidzi wakupuma peno angakotoka. Mabanja anango asaphemba cisa dhuzi na kunakhala iwo toera ntsiku zinango akwanise kumwaza mphangwa ncidodo. Cisa ca m’mwazi mphangwa cingakhala dhuzi, pinam’phedza toera kuphatisira mwadidi ndzidzi uli na iye toera kumwaza mphangwa. Cisa cakuti ciri na munthu, cinakwanisambo kuphatisirwa na nsoka toera kumwaza mphangwa. Mungafuna kukhala na cisa canu, phembani ntumiki anatsalakana pisa.

³³ Muyang’aniri wa nsoka wa basa ya m’munda angapaswa cisa ca nsoka wace peno m’mwazi mphangwa angapaswa cisa cace cene, asafunika kuwangisira toera kumwaza mphangwa n’nyumba zonsene. Masasanyiro akumwaza mphangwa mucisa consene asafunika kucitwa mwakubverana na mitemo ya dziko inakhondesa kulonga mphangwa zacibisobiso za anthu. Ayang’aniri a misoka peno ale adaphemba cisa cawo, asafunika kucita pyonsene pinakwanisa iwo toera amwaze mphangwa mucisa consene nkati mwa miyezi minai. Angamala kucimwaza mphangwa, asafunika kudziwisa ntumiki anatsalakana pisa. Mwakubverana na makhaliro, muyang’aniri wa nsoka wa basa ya m’munda peno m’mwazi mphangwa anakwanisa kupitiriza kumwaza mphangwa mucisa cidapaswa iye peno anacibweza kuna ntumiki anatsalakana pisa.

³⁴ Amwazi mphangwa onsene mu mpingo, angaphata basa pabodzi mwakubverana anakwanisa kumalisa cisa  consene. Pyenepi pinaphedzambo toera misoka miwiri ikhonde kumwaza mphangwa mucisa cibodzi cene mu ndzidzi ubodzi ene, thangwi pyenepi pinacitisa anthu mucisa kuipirwa. Tingamwaza mphangwa mucisa cidapaswa ife tinapangiza kuti tisatsalakana abale na alongo na anthu a mucisa cinamwaza ife mphangwa.

³⁵ Anthu onsene asafunika kupfundza thangwi ya Yahova Mulungu, Mwanace na Umambo wace. (Apok. 14:6, 7) Ife tisafuna kuphedza anthu a pilongero pyonsene kuti acemere dzina ya Yahova toera apulumuke, pontho abvale uunthu Wacikristu. (Aroma 10:12, 13; Akol. 3:10, 11) Kodi ndi pinentso pipi pinakhalapo tingamwaza mphangwa zadidi mucisa cakuti anthu asalonga pilongero pyakusiyana-siyana? Mphapo tinamwaza tani mphangwa mupisa pyenepi toera anthu onsene abve mphangwa za Umambo mu cilongero cinabva iwo mwadidi?—Aroma 10:14.

³⁶ Pisa pisagawiwa mwakubverana na cilongero ca mpingo. Mucisa cinalongwa pilongero pizinji, amwazi mphangwa a mipingo yakusiyana asamwaza mphangwa mucisa cibodzi cene. Pyenepi pingacitika, amwazi mphangwa a mpingo ubodzi na ubodzi asafunika kumwaza mphangwa basi ene kuna anthu analonga cilongero ca mpingo wawo. Pyenepi pisaphatambo basa mu ndzidzi wakugawira micemerero. Mbwenye pakupereka umboni wapakweca peno wantsusukano, amwazi mphangwa anakwanisa kumwaza mphangwa kuna anthu onsene na kugawira mabukhu mu pilongero pyonsene.

³⁷ Midzidzi inango, mipingo ya pilongero pinango isacimwana kumwaza mphangwa kazinji kene kuna anthu anakhala mupisa pyakutali. Pyenepi pingacitika, ayang’aniri a basa ya m’munda a mipingo ineyi asafunika kucedza toera  kuona kuti anacitanji toera kumwaza mphangwa mucisa consene. Pyenepi pinaphedza anthu onsene kuti abve mphangwa za Umambo, pontho pinaphedza toera amwazi mphangwa a mipingo yakusiyana-siyana akhonde kumwaza mphangwa kuna anthu abodzi ene.—Mis. 15:22.

³⁸ Tisafunika kucitanji khala munthu adagumana ife panyumba asalonga cilongero cinango? Nee tisafunika kunyerezera kuti amwazi mphangwa analonga cilongero cace anabwera kudzacedza naye. Amwazi mphangwa anango asapfundza njira zakukhonda nentsa toera kumwaza mphangwa mu cilongero cakuti kazinji kene cisalongwa mucisa cawo. Tinakwanisa kupangiza munthu unoyu kuti anakwanisa tani kuleri peno kubhaxari mabukhu mu cilongero cace mu saiti yathu jw.org, peno tinakwanisambo kum’bweresera mabukhu mu cilongero cace.

³⁹ Khala munthu asafunadi kupfundza, tisafunika kusaka munthu wakuthema wakuti anakwanisa kupfundza naye mu cilongero cace. Tinakwanisambo kumpanga mbuto inacitirwa misonkhano mu cilongero cace dhuzi na panakhala iye. Angafuna kucedzerwa na munthu analonga cilongero cace, tinakwanisa kumpangiza kuti anaphatisira tani saiti jw.org toera atumize mphangwa zace ninga dzina, cilongero na kunakhala iye. Natenepa, ofesi ya filiali inasaka m’mwazi mphangwa, nsoka peno mpingo wa mucisa cace toera apitirize kum’phedza.

⁴⁰ Ife tisafunika kupitiriza kuphedza munthu adapangiza cifuno mpaka atipange kuti atoma kucedzerwa na munthu analonga cilongero cace. Midzidzi inango ofesi ya filiali inadziwisa akulu a mpingo kuti nee akwanisa kugumana m’mwazi mphangwa analonga cilongero ca munthu unoyu. Pyenepi pingacitika tisafunika kupitiriza kum’phedza toera kukulisa cifuno cace. Pingakwanisika tinakwanisa kuphatisira bukhu ya cilongero cace toera kupfundza naye  Bhibhlya. Mu ndzidzi unapfundza ife Bhibhlya, tingaphatisira mwadidi mafoto mbatim’phemba toera aleri mavesi anagumanika m’bukhu, iye anadziwa pipfundziso pyakutoma pya m’Bhibhlya. Panyumba pawo pangakhala na munthu anadziwa cilongero cace, pontho asadziwa cilongero ca pacisa, munakwanisa kum’phemba toera athumburuze pinacedza imwe.

⁴¹ Toera munthu adapangiza cifuno adziwe gulu ya Mulungu, tisafunika kum’phemba toera agumanike pa misonkhano maseze nee asabva mwadidi cilongero. Khala iye ali na Bhibhlya mu cilongero cace, ife tinakwanisa kum’phedza kugumana malemba mu ndzidzi unalerwi iwo. Basi ene kugumanika kwace pa misonkhano pabodzi na mpingo kunakwanisa kum’phedza toera athambaruke mwauzimu.

⁴² Misoka ming’ono: Nsoka ung’ono ndi ule wakuti abale na alongo asamwaza mphangwa mu cilongero cakuti nee ndi ca mpingo, maseze nkhabepo nkulu wa mpingo peno ntumiki wakutumikira toera kutsogolera misonkhano masumana onsene mu cilongero ceneci. Ofesi ya filiali inakwanisa kutawirisa kuti mpingo uyang’anire nsoka ung’ono khala:

1.  (1) Pacisa pana anthu analonga cilongero cakusiyana na cinalongwa pa mpingo.

2.  (2) Pana amwazi mphangwa angasi anadziwa cilongero ceneci peno asafuna kupfundza cilongero ceneci.

3.  (3) Akulu a mpingo ali dzololo toera kutsogolera basa yakumwaza mphangwa mu cilongero ceneci.

 Nsoka wa akulu a mpingo ungafuna kuti mpingo wawo uyang’anire nsoka ung’ono, iwo asafunika kubvundzisa muyang’aniri wa cisa. Iye panango asadziwa mipingo inango yakuti ikuyeserambo kumwaza mphangwa mu cilongero ceneci, pontho anakwanisa kukupasani mphangwa  zakuti zinaphedzani kuona kuti ndi mpingo upi unafuna kuyang’anira nsoka unoyu ung’ono. Akulu a mpingo udasankhulwa asafunika kutumiza tsamba ku ofesi ya filiali toera pikhale pyakudziwika kuti mpingo wawo ukuyang’anira nsoka ung’ono.

⁴³ Misoka: Ofesi ya filiali inakwanisa kutawirisa kuti mpingo uyang’anire nsoka khala:

1.  (1) Pana anthu azinji ene adapangiza cifuno, pontho pisaoneka kuti anathimizirika.

2.  (2) Pana amwazi mphangwa analonga peno akupfundza cilongero ceneci.

3.  (3) Pana nkulu wa mpingo peno ntumiki wakutumikira wakuthema wakuti anatsogolera nsoka unoyu na kucitisa nsonkhano ubodzi pa sumana, angacimwana kucita yonsene, peno khundu ibodzi ya nsonkhano wakumala kwa sumana ninga nkhani yapakweca peno Pfundziro ya Ncenjezi mu cilongero ceneci.

 Khala pinthu pyenepi pyonsene piripo, nsoka wa akulu a mpingo usafunika kutumiza tsamba ku ofesi ya filiali yakuti iri na mphangwa zonsene zinafunika toera mpingo udziwike kuti ndiwo unayang’anira nsoka unoyu. Khala anatsogolera nsoka ndi nkulu wa mpingo anadziwika ninga “muyang’aniri wa nsoka,” khala ndi ntumiki wakutumika anadziwika ninga “ntumiki wa nsoka.”

⁴⁴ Nsoka ungakhazikiswa, nsoka wa akulu a mpingo usafunika kusankhula kuti ndi makhundu api a nsonkhano wa mpingo anafunika kuthimizirwa, pontho ndi misonkhano mingasi inafunika kucitwa pa mwezi. Asafunikambo kucitwa masasanyiro toera nsoka utome kumwaza mphangwa. Abale na alongo onsene a mu nsoka, anatsogolerwa na akulu a mpingo unayang’anira nsoka unoyu. Akulu a mpingo anapereka pitsogolero kuna abale na alongo  a mu nsoka, pontho anawangisira toera kuaphedza. Muyang’aniri wa cisa angaphata basa na nsoka mu ndzidzi unacedzera iye mpingo unayang’anira nsoka unoyu, iye analemba tsamba yacigwagwa inalonga pya kuthambaruka kwa nsoka na mphangwa zinango zakufunika mbatumiza ku ofesi ya filiali. Mukupita kwa ndzidzi, panango nsoka unoyu unadzakhala mpingo. Onsene angatowezera pitsogolero pya gulu, Yahova anatsandzaya kakamwe.—1 Akor. 1:10; 3:5, 6.

⁴⁵ Akristu onsene adaperekeka kuna Mulungu ali na basa yakumwaza mphangwa zadidi kuna anango. Pana njira zizinji zakucita pyenepi, mbwenye azinji a ife tisakomerwa kuenda kamwaza mphangwa na anango. (Luka 10:1) Ndi thangwi yace, mipingo isagumanyikana toera kucita nsonkhano wa basa ya m’munda pakati na pakumala kwa sumana. Ntsiku za mafiriyadu ndi zadidi toera kuenda kamwaza mphangwa ninga nsoka thangwi abale azinji nee asaenda kubasa. Komiti Yakuyang’anira Basa mu Mpingo inacita masasanyiro toera kucita nsonkhano wa basa ya m’munda namacibese peno namaulo na ncidodo.

⁴⁶ Kumwaza mphangwa ninga nsoka kusaphedza abale na alongo toera kuphata basa pabodzi, ‘mbawangisana unango na ndzace.’ (Aroma 1:12) Ale akuti ndi apswa anakwanisa kumwaza mphangwa na ale akuti ali na maluso toera apfundze. Mupisa pyakugopswa, pinakhala mwadidi kuti amwazi mphangwa awiri peno azinji aphate basa pabodzi. Ngakhale kuti mwacita masasanyiro toera mubuluke mwekhene basa ya m’munda, kugumanyikana pabodzi na nsoka kunawangisa onsene. Basi ene kudziwa kuti anango ali kumwaza mphangwa dhuzi na imwe kunakuwangisani kakamwe. Apainiya na anango nee asafunika kukakamizika toera kugumanika pa misonkhano yonsene  ya basa ya m’munda na mpingo, makamaka khala isacitwa ntsiku zonsene. Mbwenye iwo angakwanisa kugumanika pa misonkhano mingasi ya basa ya m’munda inacitwa masumana onsene pinakhala mwadidi kakamwe.

⁴⁷ Tonsene tisafunika kutowezera citsandzo ca Yezu na ca apostolo ace. Tinakwanisa kukhala na cinyindiro cakuti Yahova anatipasa nkhombo tingakhala aphinga m’basa yakufunika kakamwe yakumwaza mphangwa zadidi za Umambo.—Luka 9:57-62.