KUBVERA Mulungu Ntongi Wankulu Kakamwe ndi kwakufunika toera tikhale akukhunganyika kuti ticite cifuno ca Yahova. Ife tisadziwa kuti Mwanace ndi nsolo wa mpingo Wacikristu, pontho tisabvera ale anatitsogolera m’makhundu akusiyana-siyana a umaso wathu. Kubvera kweneku kusaphedza anthu onsene.

² Kufunika kwa kubvera ale anatsogolera kwatoma m’munda wa Edheni. Pyenepi pisalongwa m’matongero a Mulungu anagumanika pa Genesi 1:28 na 2:16, 17. Pinyama pyonsene pikhafunika kubvera anthu, Adhamu na Eva akhafunika kubvera Mulungu na utongi wace. Kubvera utongi wa Mulungu mbakudacitisa kuti pinthu pifambe mwadidi, mbakhala muntendere. Mukupita kwa ndzidzi kufunika kwakubvera ale anatsogolera kwagomezerwa pa 1 Akorinto 11:3. Mpostolo Paulu alemba: “Ndisafuna mudziwe kuti nsolo wa mamuna ndi Kristu; nsolo wa nkazi ndi mamuna; pontho nsolo wa Kristu ndi Mulungu.” Pyenepi pisapangiza kuti basi ene ndi Yahova wakuti nee asafunika kubvera munthu unango.

³ Lero anthu azinji nkhabe kubvera ale anatsogolera. Thangwi yanji? Pyenepi pyatoma m’munda wa Edheni, mu ndzidzi wakuti anyakubalathu akutoma Adhamu na Eva asankhula kukhonda kubvera Mulungu ninga ntongi  wawo. (Gen. 3:4, 5) Mbwenye pyenepi nee pyaacitisa kukhala na ufulu wakuthimizirika. M’mbuto mwace, atoma kutsogolerwa na anju wakuipa, Sathani Dyabo. Kukhonda kubvera kweneku kwacitisa kuti anthu akhale kutali na Mulungu. (Akol. 1:21) Thangwi ya pyenepi, anthu azinji lero ali m’manja mwa nyakuipa.—1 Juw. 5:19.

⁴ Tingapfundza undimomwene wa Mafala a Mulungu, mbaticita pinthu mwakubverana na undimomwene unoyu, ife tisasiya kutsogolerwa na Sathani. Tingaperekeka kuna Yahova mbatibatizwa, tisapangiza kuti iye ndi Ntongi Wathu Wankulu. Mambo Dhavidhi alonga kuti Yahova ndi “nsolo padzulu pa onsene,” pontho ife tisaphedzerambo pyenepi. (1 Kro. 29:11) Mwakucepeseka ife tisadzindikira kuti “Yahova ndi Mulungu. Ndiye adaticita, pontho ife ndife anthu ace. Ife ndife mbumba yace, pontho ndife mabira anakumbiza iye.” (Mas. 100:3) Ife tisadziwa kuti Yahova ndi wankulu, pontho tisafunika kumbvera na ntima onsene, thangwi ndiye adacita pinthu pyonsene. (Apok. 4:11) Ninga atumiki a Mulungu wandimomwene tisatowezera Yezu Kristu wakuti apangiza citsandzo cadidi kakamwe cakubvera Mulungu.

⁵ Kodi Yezu apfundzanji na nyatwa zidatamba iye pikhali iye pa dziko yapantsi? Lemba ya Ahebheri 5:8 isatawira: “Maseze iye akhali mwana wa Mulungu, apfundza kukhala wakubvera kubulukira mu nyatwa zidaona iye.” Yezu apitiriza kukhala wakukhulupirika na wakubvera kuna Babace wakudzulu, ngakhale mu ndzidzi ukhatamba iye nyatwa. Kusiyapo pyenepi, Yezu nee akhacita pinthu ninga mukhafunira iye, nee akhalonga pinthu pya munsolo mwace, pontho nee akhafuna kupasika mbiri. (Juw. 5:19, 30; 6:38; 7:16-18) Mu utumiki wace, Yezu akhakomerwa na kucita cifuno ca Babace maseze pyenepi pikhacitisa kuti anthu amulonge mwakuipa na  kuntcinga. (Juw. 15:20) Ngakhale tenepo, Yezu apitiriza kubvera Mulungu. “Iye acepeseka” mpaka “kufa pamuti wakusikimizira.” Thangwi yakubvera kwace Yahova mu pinthu pyonsene, Yezu apaswa cidzo cikulu kakamwe kupiringana cikhali na iye. Kusiyapo pyenepi, iye apasa mbiri Yahova, pontho atipasa cidikhiro cakukhala na umaso wakukhonda mala.—Afil. 2:5-11; Aheb. 5:9.

⁶ Tingabvera Mulungu mbaticita cifuno cace, nee tinakhala akudzudzumika kakamwe na pinthu pya umaso, pontho nee tinathabuka na nyatwa zinatamba ale anakhonda kubvera utongi wa Yahova. Ndzidzi onsene nyamalwa wathu Dyabo asatisaka toera kutidya. Tinatsidzikizika toera nyamalwa unoyu akhonde kuticita pyakuipa, tingapitiriza kukhala akuyang’anira, akucepeseka kuna Yahova mbatimbvera na ntima onsene.—Mat. 6:10, 13; 1 Ped. 5:6-9.

⁷ Mu mpingo Wacikristu ife tisadziwa kuti Kristu ndi ntsogoleri, pontho tisadziwa basa idapasa iye “m’bandazi wakukhulupirika na wandzeru.” Pyenepi pisatiphedza toera titsalakanane mwadidi unango na ndzace. Kubvera Mulungu mu mpingo kunatiphedza toera kubvera Mafala a Mulungu m’makhundu onsene aulambiri wathu. Kubvera kweneku kusaphataniza basa yathu yakumwaza mphangwa, kugumanika pa misonkhano, kutawira peno kucita khundu, kubvera akulu a mpingo na kutowezera pitsogolero pya gulu ya Mulungu.—Mat. 24:45-47; 28:19, 20; Aheb. 10:24, 25; 13:7, 17.

 ⁸ Kubvera kwathu Mulungu kusacitisa kuti mpingo Wacikristu ukhale na ntendere, citsidzikizo, pontho pinthu pyonsene pifambe mwadidi. Makhaliro adidi a Yahova asapangizika kuna ale anambvera. (1 Akor. 14:33, 40) Pinaona ife mu gulu ya Yahova pisaticitisa kulonga ninga pidalonga Mambo Dhavidhi. Pidamala iye kuona kusiyana kwa atumiki a Yahova na anthu akuipa, mwakutsandzaya Dhavidhi alonga: “Yakutsandzaya ndi mbumba yakuti Mulungu wawo ndi Yahova!”—Mas. 144:15.

⁹ Bhibhlya isalonga kuti pa banja, “nsolo wa nkazi ndi mamuna.” Iyo isalongambo kuti nsolo wa mamuna ndi Kristu, pontho nsolo wa Kristu ndi Mulungu. (1 Akor. 11:3) Nkazi asafunika kubvera mamunace, anapiana asafunika kubvera anyakubalawo. (Aef. 5:22-24; 6:1) Onsene pa banja angacita pyenepi, banja yawo inakhala yakutsandzaya.

¹⁰ Mamuna asafunika kutsogolera banja yace mwaufuni, angacita pyenepi akutowezera Kristu. (Aef. 5:25-29) Iye angakhonda kuphatisira mwakuipa cidzo cace pa banja, nkazi na ana anambvera mwakutsandzaya. Basa ya nkazi ndi kuphedzera mamunace. (Gen. 2:18) Nkazi angaphedzera mwakupirira mamunace na kumulemedza, mamunace asanfuna, pontho asapasa mbiri Mulungu. (1 Ped. 3:1-4) Mamuna na nkazi angabvera uphungu wa m’Bhibhlya unalonga pya nsolo wa banja, anapangiza citsandzo cadidi kuna anawo cakubvera Mulungu.

¹¹ Kubvera kwathu Mulungu kusaphatanizambo njira inaona ife “mautongi” akuti “ali mu mbuto zawo zakusiyana-siyana thangwi asatawiriswa na Mulungu.” (Aroma 13:1-7) Ninga anthu anabvera mautongi, Akristu asalipa misonkho toera kupereka ‘kuna Sezari pinthu pya Sezari, mbwenye pya Mulungu asapipereka kuna Mulungu.’  (Mat. 22:21) Kusiyapo pyenepi, masasanyiro akumwaza mphangwa mucisa consene asafunika kucitwa mwakubverana na mitemo ya dziko inakhondesa kulonga mphangwa zacibisobiso za anthu. Tingabvera mautongi mu pinthu pyonsene pyakuti nkhabe phonyana na mitemo yakulungama ya Yahova, tinakwanisa kuphatisira mwadidi mphambvu zathu m’basa yakumwaza mphangwa.—Marko 13:10; Mabasa 5:29.

¹² Akristu asabvera m’makhundu onsene a umaso wawo masasanyiro akulemedza ale anatitsogolera. Ife tisakhulupira kuti unadzafika ndzidzi wakuti anthu onsene anadzabvera Yahova Mulungu. (1 Akor. 15:27, 28) Ale akuti mwakutsandzaya asadziwa kuti Yahova ndi ntongi wankulu, mbapitiriza kumbvera, anadzapaswa nkhombo zizinji kwenda na kwenda.