MU TSAMBA yace yakutoma kuna Akorinto, mpostolo Paulu alonga undimomwene wakufunika kakamwe thangwi ya Mulungu. Iye alemba: “Mulungu nkhabe kucita pinthu mwakukhonda kulinganira, mbwenye iye ndi Mulungu wa ntendere.” Buluka penepo, thangwi ya misonkhano ya mpingo, iye alonga: “Pinthu pyonsene mbapicitwe munjira yadidi na yakulinganira.”—1 Akor. 14:33, 40.

² Khundu yakutoma ya tsamba ineyi, mpostolo Paulu aacenjeza thangwi yakukhonda kubverana kwa Akristu a mu mpingo wa ku Korinto. Paulu akulumiza abale toera ‘alonge mwakubverana,’ pontho ‘akhonde kukhala akugawana pakati pawo, mbwenye akhale akuphatana kakamwe.’ (1 Akor. 1:10, 11) Buluka penepo, Paulu aapasa uphungu thangwi ya makhaliro akusiyana-siyana akuti mbadapingiza kuphatana kwawo mu mpingo. Natenepa iye aphatisira kuphatana kwa manungo a munthu toera kugomezera kufunika kwa kuphatana na kubverana mu mpingo. Iye akulumiza Akristu onsene mu mpingo toera atsalakanane unango na ndzace mwaufuni mwakukhonda tsalakana basa iri na iwo. (1 Akor. 12:12-26) Mpingo ungakhala wakuphatana pisaphedza toera pinthu pifambe mwadidi.

³ Kodi pinthu pikhafunika kufamba tani mu mpingo Wacikristu? Mbani akhafunika kuukhazikisa? Ndi pitsogolero pipi pikhafunika iwo kutowezera? Mbani akhafunika kuphatisirwa toera kuutsogolera? Bhibhlya inatiphedza toera  kugumana mitawiro yakubveka mwadidi thangwi ya mibvundzo ineyi.—1 Akor. 4:6.

⁴ Mpingo Wacikristu wakhazikiswa pa ntsiku ya Pentekoste 33 P.K.K. Ninji pinadziwa ife thangwi ya mpingo wa mu ndzidzi wa apostolo? Ife tisadziwa kuti mpingo unoyu ukhadakhazikiswa, pontho ukhatsogolerwa na umambo (krátos) wa Mulungu (theós). Mafala anewa mawiri athumburuzwa ninga “mphambvu” na “Mulungu” pa 1 Pedhru 5:10, 11. Mbiri ineyi inalongwa m’Bhibhlya thangwi ya pidacitika mu Yerusalemu mu pyaka cifupi na 2.000 nduli, isapangiza pakweca kuti mpingo wa Akristu akudzodzwa ukhadakhazikiswa na Mulungu. (Mabasa 2:1-47) Mpingo unoyu ukhali nyumba ya Mulungu na anthu a panyumba yace. (1 Akor. 3:9; Aef. 2:19) Lero, mu mpingo Wacikristu pinthu pisacitwa munjira ibodzi ene ninga pikhacitwa mu ndzidzi wa apostolo.

⁵ Pidakhazikiswa mpingo Wacikristu ukhali na anyakupfundza cifupi na 120. Anthu anewa ndi adatoma kutsanulirwa nzimu wakucena toera kukwanirisa lemba ya Yoeli 2:28, 29. (Mabasa 2:16-18) Mbwenye pa ntsiku ibodzi ene anthu anango cifupi na 3.000 abatizwa mbacita khundu ya mpingo udakhazikiswa na nzimu. Iwo akhadatawira mafala analonga thangwi ya Kristu, pontho “akhapitiriza kubvera pipfundziso pya apostolo.” Buluka penepo, “Yahova akhapitiriza kuthimizira anthu pakati pawo ntsiku zonsene.”—Mabasa 2:41, 42, 47.

⁶ Mpingo wa mu Yerusalemu ukhadakula kakamwe, kwakuti kwacitisa nyantsembe wankulu Waciyuda kudungunya  mbalonga kuti anyakupfundza akhadadzadza nzinda wa Yerusalemu na pipfundziso pyawo. Pakati pa anyakupfundza apswa a mu Yerusalemu, pakhalimbo anyantsembe azinji Aciyuda akuti adzacita khundu ya mpingo Wacikristu.—Mabasa 5:27, 28; 6:7.

⁷ Yezu alonga: “Munadzakhala amboni anga mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:8) Pyenepi pyacitika mu ndzidzi ukhatcingwa kakamwe anyakupfundza mu Yerusalemu, Estevau mbadamala kale kuphiwa. Anyakupfundza anewa abalalika mbaenda ku Yudeya na ku Samariya. Mbwenye konsene kukhaenda iwo, akhapitiriza kumwaza mphangwa zadidi na kupfundzisa anthu kuphatanizambo Asamariya. (Mabasa 8:1-13) Mukupita kwa ndzidzi, mphangwa zadidi zamwazwa kuna anthu akukhonda kusidzwa akuti nee akhali Ayuda. (Mabasa 10:1-48) Basa ineyi yakumwaza mphangwa yacitisa kuti anthu azinji akhale anyakupfundza, pontho kunja kwa Yerusalemu kukhazikiswe mipingo ipswa.—Mabasa 11:19-21; 14:21-23.

⁸ Ndi masasanyiro api adacitwa toera mipingo yonsene ipswa icite pinthu mwakutsogolerwa na Mulungu? Na ciphedzo ca nzimu wakucena wa Mulungu, acitwa masasanyiro akukhazikisa akumbizi toera atsalakane mabira. Paulendo wawo wakutoma ninga amisionaryo, Paulu na Bharnabhe akhazikisa akulu a mpingo m’mipingo ikhacedzera iwo. (Mabasa 14:23) Nyakulemba Bhibhlya Luka alonga thangwi ya nsonkhano udacita Paulu na akulu a mpingo wa ku Efeso. Paulu aapanga: “Citani mphole-mphole thangwi ya imwe ene, mbamutsalakana mwadidi nkumbi onsene wa mabira, wakuti nzimu wakucena wakukhazikisani toera kukhala ayang’aniri, toera mukumbize mpingo wa Mulungu udagula iye na ciropa ca Mwanace.” (Mabasa 20:17, 28) Iwo akhadathema kukhala akulu a mpingo  thangwi akhabvera pinalonga malemba. (1 Tim. 3:1-7) Tito wakuti akhaphata basa pabodzi na Paulu, atawiriswa toera kukhazikisa akulu m’mipingo ya ku Kreta.—Tito 1:5.

⁹ Mu ndzidzi ukhathimizirika mipingo, apostolo na akulu a mpingo a mu Yerusalemu akhapitiriza kutumikira ninga ayang’aniri m’mipingo yonsene Yacikristu ya mu ndzidzi wa apostolo, yakuti ikhagumanika m’mbuto zakusiyana-siyana. Iwo akhatumikira ninga mathubo akutonga.

¹⁰ Tsamba idalembera iye mpingo wa ku Efeso, mpostolo Paulu afokotoza kuti mpingo ungacita pinthu mwakubverana na nzimu wa Mulungu, pontho ungabvera Yezu Kristu ninga nsolo, usakhala wakuphatana. Mpostolo Paulu akulumiza Akristu toera kukulisa n’khaliro wakucepeseka toera apitirize kukhala ‘akuphatana mwauzimu,’ pontho akhale muntendere na anthu onsene mu mpingo. (Aef. 4:1-6) Buluka penepo iye aphatisira mafala anagumanika pa Masalmo 68:18 toera kufokotoza pinacita Yahova pakukhazikisa amuna akuthema mu mpingo toera atumikire ninga apostolo, aprofeta, amwazi mphangwa, akumbizi na apfundzisi. Amuna anewa akuti akhali muoni wakubuluka kuna Yahova, mbadawangisa mpingo onsene toera ukhale wakukola mwauzimu, mbucita pinthu pinatsandzayisa Mulungu.—Aef. 4:7-16.

¹¹ Lero, mipingo yonsene ya Mboni za Yahova isatowezera pikhacita mpingo wakutoma. Mipingo ineyi ndi nsoka ubodzi wakuphatana pa dziko yonsene yapantsi wakuti watomeswa na nsoka ung’ono wa Akristu akudzodzwa. (Zak. 8:23) Ndi Yezu Kristu anacitisa kuti pyonsene pikwanisike. Ninga mudapikira iye, Yezu asapitiriza, pontho anadzakhala na anyakupfundzace akudzodzwa “ntsiku zonsene mpaka kumala kwa makhaliro a dziko.” Lero, anthu  anapita mu mpingo, asatawira mphangwa zadidi, asaperekeka na ntima onsene kuna Yahova, pontho asabatizwa mbakhala anyakupfundza a Yezu. (Mat. 28:19, 20; Marko 1:14; Mabasa 2:41) Iwo asadzindikira Yezu Kristu wakuti ndi “nkumbizi wadidi” anatsogolera nkumbi onsene wa mabira akuti ndi Akristu akudzodzwa na “mabira anango.” (Juw. 10:14, 16; Aef. 1:22, 23) ‘Nkumbi unoyu ubodzi’ ndi wakuphatana thangwi usadzindikira kuti Kristu ndi nsolo wawo, pontho usabvera “m’bandazi wakukhulupirika na wandzeru” adakhazikiswa na Kristu. Natenepa tisafunika kupitiriza kunyindira na ntimathu onsene m’bandazi unoyu adakhazikiswa na Yezu.—Mat. 24:45.

¹² Toera kupereka cakudya cauzimu pa ndzidzi wakuthema, pontho toera mphangwa zadidi za Umambo zimwazwe kumala mbakudzati kufika, yakhazikiswa misoka yakusiyana-siyana. Misoka ineyi isadziwika na mautongi a madziko akusiyana-siyana, pontho isaphata basa pabodzi. Isaphedzerambo kuti mphangwa zadidi zimwazwe mwakukhonda nentsa pa dziko yonsene yapantsi.

¹³ Ingakhazikiswa ofesi ya filiali, asasankhulwa abale atatu peno akupiringana toera kutumikira mu Komiti ya Filiali kuti ayang’anire basa inacitwa mu dziko yawo peno madziko anayang’anirwa na filiali yawo. M’bale m’bodzi mwa abale anewa atatu asatumikira ninga mbveranisi wa Komiti ya Filiali.

¹⁴ Mipingo inayang’anirwa na filiali isagawiwa mbikhala pisa. Pisa pyenepi pisagawiwa mwakubverana na mbuto, cilongero, na numero ya mipingo inayang’anirwa na filiali ineyi. Muyang’aniri wa cisa asakhazikiswa toera kucedzera  mipingo ya cisa cibodzi. Ofesi ya filiali isapasa muyang’aniri wa cisa pitsogolero pyakuti anacita tani basa yace.

¹⁵ Mipingo isatowezera pitsogolero pya gulu ya Mulungu pyakuti pisatiphedza ife tonsene. Iwo asabvera akulu akusiyana-siyana adakhazikiswa toera kuyang’anira mabasa ku ofesi ya filiali, mupisa na m’mipingo. Iwo asatambira cakudya cauzimu cinabuluka kuna m’bandazi wakukhulupirika na wandzeru, cinaperekwa pa ndzidzi wakuthema. Lero m’bandazi wakukhulupirika asabvera Kristu ninga nsolo wace, asatowezera pinalonga Bhibhlya, pontho asatsogolerwa na nzimu wakucena. Tingaphata basa pabodzi mwakuphatana tisatsandzaya, pontho tisakhala na nkhombo zibodzi zene ninga zidakhala na Akristu a mu ndzidzi wa apostolo. Bhibhlya isalonga: “Mipingo ikhapitiriza kuwangiswa cikhulupiro, pontho anyakupfundza akhathimizirika ntsiku zonsene.”—Mabasa 16:5.