MPOSTOLO Tiyago alemba: “Fendedzerani Mulungu, iye anakufendedzeranimbo.” (Tiya. 4:8) Pyenepi pisapangiza kuti maseze Yahova ndi wankulu, pontho ali kudzulu kakamwe, mbwenye iye asabvesera maphembero athu mwakukhonda tsalakana kusowa kwathu ungwiro. (Mabasa 17:27) Mphapo tinafendedzera tani Mulungu? Ife tinakwanisa kucita pyenepi tingawangisa uxamwali wathu na Yahova, mbaticita phembero na ntima onsene. (Mas. 39:12) Njira inango yakuwangisa uxamwali wathu na Mulungu ndi kupfundza Bhibhlya mwakukhonda phonya. Natenepa, tinadziwa mwadidi Yahova Mulungu, cifuniro cace na pinafuna iye kuna ife. (2 Tim. 3:16, 17) Tingacita pyenepi, tinatoma kunfuna, pontho tinacalira kucita pinthu pyakuti pinantsukwalisa.—Mas. 25:14.

² Tinakwanisa kufendedzera Yahova basi ene kubulukira kuna Mwanace, Yezu. (Juw. 17:3; Aroma 5:10) Nkhabepo munthu wakuti mbadatiphedza kubvesesa mwadidi manyerezero a Yahova kupiringana Yezu. Iye akhadziwa mwadidi Babace, ndi thangwi yace iye alonga: “Nkhabe munthu anadziwa Mwana kupiringana Baba; pontho nkhabe munthu anadziwa Baba kupiringana Mwana na ule anafuna kupfundziswa na Mwana thangwi ya iye.” (Luka 10:22) Natenepa, tingapfundza Maevanjelyu toera kudziwa njira inanyerezera Yezu na mabvero ace, tikupfundzambo manyerezero na mabvero a Yahova. Udziwisi unoyu unatiphedza toera tikhale na uxamwali wakuwanga na Mulungu.

 ³ Tinakwanisambo kukhala na uxamwali wakuwanga na Yahova, tingapitiriza kucita khundu ya gulu ya Yahova ya pa dziko yapantsi yakuti isatsogolerwa na Mwanace, pontho isatiphedza toera kupfundza kucita cifuno ca Mulungu. Mwakubverana na Mateu 24:45-47 Mbuya Yezu Kristu akhazikisa “m’bandazi wakukhulupirika na wandzeru” toera apereke “cakudya pa ndzidzi wakuthema” kuna anthu a panyumba pace. Lero, m’bandazi unoyu wakukhulupirika asatipasa cakudya cauzimu cakunjipa kakamwe. Yahova asaphatisira m’bandazi unoyu toera kutipanga kuti tisafunika kuleri Bhibhlya ntsiku zonsene, kugumanika pa misonkhano mwakukhonda phonya na kumwaza “mphangwa zadidi za Umambo” mwaphinga. (Mat. 24:14; 28:19, 20; Yos. 1:8; Mas. 1:1-3) Maseze m’bandazi wakukhulupirika ndi wakusowa ungwiro, ife tisafunika kukhala na cinyindiro cakuti iye asatsogolerwa na Mulungu. Tisafunika kuwangisira toera tikhale akuphatana na khundu ya gulu ya Yahova ya pa dziko yapantsi na kubvera pitsogolero pinaperekwa na gulu ineyi. Pyenepi pinawangisa uxamwali wathu na Yahova, pinatiphedza toera tikhale akuwanga, pontho pinatitsidzikiza ngakhale mu ndzidzi wa mayesero.

⁴ Panango imwe mukutumikira Yahova mu pyaka pizinji. Khala ndi tenepo, musadziwa mwadidi kuti pisabvekanji kupirira mayesero acikhulupiro. Mbwenye khala imwe mwadziwa kwene Yahova cincino, pontho mwatoma kusonkhana na mbumba yace, imwe musadziwa kuti Sathani Dyabo asatcinga onsene anabvera utongi wa Yahova. (2 Tim. 3:12) Natenepa, mwakukhonda tsalakana khala mwapirira mayesero mazinji peno akucepa, nee muli na mathangwi toera kugopa peno kubwerera nduli. Yahova asapikira kuti anakuphedzani, pontho ntsogolo anadzakupasani  nkhombo ya umaso wakukhonda mala thangwi yakupirira kwanu.—Aheb. 13:5, 6; Apok. 2:10.

⁵ Ife tonsene panango tinatamba mayesero mu ntsiku zino zakumalisa za dziko ya Sathani. Kutomera pidakhazikiswa Umambo wa Mulungu mu caka 1914, Sathani nee asatawiriswabve kuenda kudzulu kuna Yahova. Iye pabodzi na aanju ace akuipa aponywa pa dziko yapantsi. Natenepa kuthimizirika kwa nyatwa pa dziko yapantsi na kutcingwa kwa atumiki a Yahova kusapangiza kuti Sathani aipirwa kakamwe, pontho tikukhala mu ntsiku zakumalisa za utongi wace wakuipa.—Apok. 12:1-12.

⁶ Sathani aipirwa thangwi asadziwa kuti ndzidzi wace wasala pang’ono basi. Iye na madimonyo ace asacita pyonsene pinakwanisa iwo toera kupingiza basa yakumwaza mphangwa za Umambo na kufudza kuphatana kwa atumiki a Yahova. Pyenepi pisaticitisa kumenya nkhondo yauzimu inalongwa m’Bhibhlya kuti ndi “nkhondo, tayu na anthu a manungo na ciropa, mbwenye tiri kumenyana na mautongi, atsogoleri, atongi a dziko ino yacidima, akuti ndi mphambvu za madimonyo mu mbuto zakudzulu.” Toera tiwine mbatikhala kukhundu ya Yahova, tisafunika kusasanyira pida pyathu pyauzimu mbatipitiriza kumenya nkhondo. Tisafunika “kupirira pakuthimbana na manyengerero” a Dyabo. (Aef. 6:10-17) Toera tikwanise kucita pyenepi tisafunika kupirira.

⁷ Kupirira ndi “luso yakukwanisa kuthimbana na pinentso peno nyatwa.” M’Bhibhlya n’khaliro unoyu usabveka kupitiriza kucita pinthu pyadidi mwakukhonda tsalakana nyatwa, kutcingwa peno pinthu pinango pyakuti pinacitisa kusiya kukhala akukhulupirika kuna Mulungu. Toera tikhale Akristu akupirira tisafunika kuwangisira. Pyenepi  pisakwata ndzidzi. Luso yathu yakupirira isathimizirika tingathambaruka mwauzimu. Tingapirira mayesero mang’ono anatamba ife kutomera pa ndzidzi udakhala ife Akristu, tinakhala akuwanga kakamwe, pontho tinakwanisa kupirira mayesero makulu anafuna kutamba ife ntsogolo. (Luka 16:10) Nee tisafunika kudikhira mpaka aoneke mayesero makulu toera tipangize kuti ndife akuwanga mu cikhulupiro, mbwenye tisafunika kukhunganyika cincino mbatidzati kuthimbana na mayesero. Toera kupangiza kuti kupirira kusafunika kupangizwa pabodzi na makhaliro anango akuti asakomeresa Mulungu, mpostolo Pedhru alemba: “Citani pyonsene pinakwanisa imwe toera pa cikhulupiro canu muthimizire makhaliro adidi, pa makhaliro anu adidi muthimizire cidziwiso, pa cidziwiso canu muthimizire kudzitonga, pa kudzitonga kwanu muthimizire kupirira, pa kupirira kwanu muthimizire kuperekeka kuna Mulungu, pa kuperekeka kwanu kuna Mulungu muthimizire kufuna abale, pa kufuna kwanu abale, muthimizire kufuna anthu onsene.”—2 Ped. 1:5-7; 1 Tim. 6:11.

⁸ Tiyago alonga thangwi yakufunika kwakukhala akupirira. Iye alemba: “Abale anga, khalani akutsandzaya mungathimbana na nyatwa zakusiyana-siyana, thangwi imwe musadziwa kuti cikhulupiro canu cingayeserwa munjira ineyi, cinabala kupirira. Mbwenye tawirisani kuti kupirira kumalise basa yace, toera mukhale akukwana na adidi mu pinthu pyonsene, mbamukhonda kusowa cinthu.” (Tiya. 1:2-4) Tiyago alonga kuti Akristu asafunika kutsandzaya angathimbana na nyatwa thangwi pyenepi pinatiphedza kukhala akupirira. Kodi imwe musanyerezerambo munjira ibodzi ene? Buluka penepo Tiyago apangiza kuti kupirira kusacita basa yace toera kutiphedza kuti tikhale na makhaliro adidi Acikristu mbatikhala akutawirika  kuna Mulungu. Mwandimomwene, kupirira kwathu kusawangiswa ntsiku zonsene tingathimbana na mayesero mbatiakunda. Kupirira kusatiphedza toera tikhale na makhaliro anango akufunika kakamwe.

⁹ Kupirira kwathu kusakomeresa Yahova, pontho thangwi yakupirira kweneku iye anatipasa umaso wakukhonda mala. Tiyago alonga: “Nyakutsandzaya ndi munthu anapitiriza kupirira nyatwa, thangwi angaoniwa kuti ndi wakuthema anadzatambira nthimba ya umaso, wakuti Yahova apikira toera kupasa ale anapitiriza kunfuna.” (Tiya. 1:12) Mwandimomwene ife tisapirira thangwi tiri na cidikhiro cakukhala na umaso wakukhonda mala. Tingakhonda kupirira nee tinakwanisa kupitiriza mu undimomwene. Tingakundwa na mayesero tinatoma kucita pinthu ninga anthu a dziko. Tingakhonda kupirira nee tinakhala na nzimu wakucena wa Yahova, pontho nee tinabala misapo ya nzimu unoyu mu umaso wathu.

¹⁰ Tingafuna kupirira nyatwa zinatamba ife mu ntsiku zino zakumalisa, ninga Akristu tisafunika kukhala na maonero adidi thangwi ya nyatwa zenezi. Kumbukani pidalemba Tiyago: “Khalani akutsandzaya mungathimbana na nyatwa.” Panango kucita pyenepi pinakhala pyakunentsa thangwi nyatwa zinango zisacitisa munthu kuthabuka peno kunentseka m’manyerezero. Mbwenye kumbukani kuti cakufunika kakamwe ndi umaso wathu wa ntsogolo. Pidacitikira apostolo pisatiphedza kubvesesa kuti tinakwanisa tani kutsandzaya pakuthimbana na nyatwa. Mbiri inagumanika m’bukhu ya Mabasa isalonga: “[Iwo] acemera apostolo, mbaakwapula. Buluka  penepo aapanga toera akhonde kulonga pontho pya dzina ya Yezu, mbaasiya toera aende. Natenepa, iwo abuluka mwakutsandzaya pa Thando Ikulu Yakutongera Miseru thangwi aoniwa kuti athema kuona nyatwa thangwi ya dzina ya Yezu.” (Mabasa 5:40, 41) Apostolo abvesesa kuti nyatwa zawo zikhali cipangizo cakuti akhabvera ntemo wa Yezu, pontho kuti iwo akhali akutawirika kuna Yahova. Mukupita kwa pyaka, pidalemba iye tsamba yace yakutoma, Pedhru afokotoza kufunika kwa kutamba nyatwa thangwi ya ulungami.—1 Ped. 4:12-16.

¹¹ Paulu na Sila apirirambo mayesero. Pikhatumikira iwo ninga amisionaryo ku Filipi, iwo amangwa mbapambizirwa kuti akudzudzumisa ntendere wa anthu mu nzinda, pontho akupfundzisa misambo yakuipa. Na thangwi ineyi, iwo amenywa kakamwe mbaikhwa nkaidi. Bhibhlya isalonga kuti “namasiku, cifupi na tcititciti” mu ndzidzi ukhali iwo nkaidi, pontho na pironda m’manungo, “Paulu na Sila akhacita phembero, mbaimba nyimbo toera kusimba Mulungu. Anango adafungirwambo nkaidi akhaabvesera.” (Mabasa 16:16-25) Paulu na ndzace akhaona nyatwa zikhatamba iwo thangwi ya Kristu, tayu basi ene ninga cipangizo cakukhulupirika kwawo kuna Mulungu na kuna anthu, mbwenye ninga njira yakucita pizinji m’basa yakumwaza mphangwa zadidi toera kuphedza ale akhafuna kubvesera. Umaso wa anthu anango ukhali pangozwi. Ntsiku ineyi namasiku nyakuonera kaidi na anthu onsene a panyumba pace abva mphangwa zadidi mbakhala anyakupfundza. (Mabasa 16:26-34) Paulu na Sila anyindira Yahova na mphambvu zace, pontho akhadziwa kuti Yahova akhafuna kakamwe kuaphedza mu nyatwa zawo. Iwo nee aphatiswa mwala.

¹² Lero Yahova asatipasambo pyonsene pinafuna ife toera kutiphedza mu ndzidzi unatamba ife mayesero. Iye  asafuna kuti tipirire. Yahova atipasa Mafalace toera tikhale na udziwisi wandimomwene thangwi ya cifuniro cace. Pyenepi pisawangisa cikhulupiro cathu. Ife tiri na nkhombo yakusonkhana na Akristu andzathu mbatitumikira Mulungu, pontho tiri na nkhombo yakukhala na uxamwali wakuwanga na Yahova kubulukira m’phembero. Iye asabvesera tingansimba na tingam’phemba na ntima onsene toera tipitirize kukhala akutawirika kuna iye. (Afil. 4:13) Pontho nee tisafunika kuduwala mphambvu inakhala na ife tinganyerezera mwadidi cidikhiro cathu ca ntsogolo.—Mat. 24:13; Aheb. 6:18; Apok. 21:1-4.

¹³ Mayesero anathimbana na ife lero ndi akulandana na adathimbana na anyakupfundza akutoma a Yezu. Lero, Mboni za Yahova zisatikanwa, pontho zisabvuyiwa na anthu akuti nkhabe dziwa undimomwene onsene thangwi ya Mboni za Yahova. Ninga mu ntsiku za apostolo, anacitisa kakamwe kuti Akristu atcingwe ndi atsogoleri auphemberi wauthambi, akuti pinthu pyauthambi pinapfundzisa iwo na makhaliro awo akuipa asalongwa pakweca m’Mafala a Mulungu. (Mabasa 17:5-9, 13) Midzidzi inango atumiki a Yahova asakhala muntendere thangwi yakuphemba ufulu wawo kuna mautongi. (Mabasa 22:25; 25:11) Mbwenye midzidzi inango, mautongi asakhondesa basa yathu yakumwaza mphangwa toera kuimalisa. (Mas. 2:1-3) Pyenepi pingacitika tisatowezera mwacipapo citsandzo ca apostolo akukhulupirika adalonga: “Pakutoma tisafunika kubvera Mulungu ninga ntongi, tayu anthu.”—Mabasa 5:29.

¹⁴ Nakuti anthu akupitiriza kudzikuza thangwi ya dziko yawo, ife tisapitirizambo kukakamizwa toera tisiye basa idatipasa Mulungu yakumwaza mphangwa zadidi. Pyenepi pisacitisa kuti atumiki onsene a Mulungu abvesese  mwadidi kufunika kwa cenjezo inagumanika pa Apokalipse 14:9-12 inalonga pya kulambira “cikala na dzimunthu ya cikala.” Pontho tisabvesesa mafala adalonga Juwau: “Kwa anthu akucena, ale anabvera matongero a Mulungu, mbatowezera cikhulupiro ca Yezu, pyenepi pisaphemba kupirira.”

¹⁵ Nkhondo, kusandukira utongi, kutcingwa na kukhondeswa kwa basa yathu, panango pinatipingiza toera tikhonde kulambira Mulungu mwaufulu. Panango tinacimwana kucita misonkhano ya mpingo. Panango tinacimwana kupita ncibverano na ofesi ya filiali, nee tinacedzerwa na muyang’aniri wa cisa, pontho nee tinatambira mabukhu. Cingacitika cibodzi mwa pinthu pyenepi, imwe musafunika kucitanji?

¹⁶ Ntawiro ndi wakuti citani pyonsene pinakwanisa imwe mwakubverana na makhaliro a ndzidzi unoyu. Panango pinakwanisika kucita pfundziro ya munthu paekha. Kazinji kene misoka ming’ono inakwanisa kucita misonkhano panyumba ya m’bale peno mulongo. Pa misonkhano ineyi tinakwanisa kuphatisira Bhibhlya na mabukhu anango adapfundza ife kale. Lekani kudzudzumika kakamwe peno kugopa. Kazinji kene Mathubo Akutonga asasaka njira mwakucimbiza toera kupita ncibverano na abale anatitsogolera.

¹⁷ Maseze mukhale kutali na abale na alongo anu onsene, kumbukani kuti nee muli kutali na Yahova pabodzi na Mwanace Yezu Kristu. Cidikhiro canu cinakwanisa kupitiriza kukhala cakuwanga. Yahova anapitiriza kubva maphembero anu, mbakuwangisani na nzimu wace. Sakani citsogolero cace. Kumbukani kuti ndimwe ntumiki wa Yahova, pontho ndimwe nyakupfundza wa Yezu Kristu. Natenepa, bandzani miyai yonsene toera kumwaza mphangwa. Yahova anapasa nkhombo kuwangisira kwanu,  pontho mwakukhonda dembuka panango anthu anango anagumanyikana na imwe mu ulambiri wandimomwene.—Mabasa 4:13-31; 5:27-42; Afil. 1:27-30; 4:6, 7; 2 Tim. 4:16-18.

¹⁸ Mbwenye imwe mungathuswa kuti munaphiwa ninga pidacitikira apostolo na anango, nyindirani “Mulungu, wakuti asakwanisa kulamusa anyakufa.” (2 Akor. 1:8-10) Kukhulupira kwanu kuti anyakufa anadzalamuswa kunakuphedzani toera kupirira, maseze mutcingwe kakamwe. (Luka 21:19) Kristu Yezu apangiza citsandzo cadidi; iye akhadziwa kuti kupirira kwace mayesero, mbakudaphedza anango toera kupirirambo. Munjira ibodzi ene, kupirira kwanu kunaphedzambo abale anu toera akwanise kupirira.—Juw. 16:33; Aheb. 12:2, 3; 1 Ped. 2:21.

¹⁹ Kusiyapo kutcingwa, panango musafunika kupirira nyatwa zinango. Mwacitsandzo, anango asatsukwala thangwi anthu mucisa cawo nee asabvesera mphangwa zadidi. Anango asathabuka na utenda wakuti nkhabe kuwanga, utenda wa m’manyerezero, peno asacimwana kucita pinthu pinango thangwi yakusowa ungwiro. Mpostolo Paulu atambambo nyatwa ninga zenezi zakuti zikhapingiza peno zikhacitisa utumiki wace kukhala wakunentsa. (2 Akor. 12:7) Epafrodhito wakuti akhali Nkristu wa ku Filipi wa mu ndzidzi wa apostolo ‘atsukwala thangwi axamwali ace abva kuti iye akhaduwala.’ (Afil. 2:25-27) Kusowa kwathu ungwiro na kwa anango panango kunacitisa kuti nyatwa zinango zikhale zakunentsa toera kuzipirira. Panango panaoneka pinthu pinafuna kucitisa kuti tikhonde kubverana na Akristu andzathu peno kukhonda kubverana na anthu a pabanja pathu. Mbwenye tingabvera uphungu wa Mafala a Yahova tinakwanisa kukunda pinentso pyenepi.—Ezek. 2:3-5; 1 Akor. 9:27; 13:8; Akol. 3:12-14; 1 Ped. 4:8.

²⁰ Tisafunika kutowezera na ntimathu onsene ule adakhazikisa Yahova ninga Nsolo wa mpingo, Yezu Kristu. (Akol. 2:18, 19) Tisafunika kucita pinthu mwakubverana na “m’bandazi wakukhulupirika na wandzeru” pabodzi na ale adakhazikiswa toera kutitsogolera. (Aheb. 13:7, 17) Tingabvera pitsogolero pya gulu ya Mulungu na pya ale anatitsogolera tinakhala akukhunganyika toera kucita cifuno ca Yahova. Tisafunika kuphatisira mwadidi mwai wakucita phembero. Kumbukani kuti nkhabepo mpanda wa kaidi peno kaidi inafungirwa munthu ekhene yakuti inaticimwanisa kulonga na Babathu wakudzulu peno kufudza kuphatana kwathu na Akristu andzathu.

²¹ Mwakupirira tendeni ticite pyonsene pinakwanisa ife m’basa yakumwaza mphangwa idapaswa ife, mbatikhala aphinga m’basa ineyi idapasa Yezu Kristu adalamuswa muli akufa anyakupfundzace, pidalonga iye kuti: “Natenepa, ndokoni mukacite anyakupfundza kuna anthu a madzindza onsene, mbamuabatiza mu dzina ya Baba, na ya Mwana na ya nzimu wakucena, apfundziseni toera abvere pinthu pyonsene pidakupangani ine.” (Mat. 28:19, 20) Ife tisafunika kupirira ninga pidacita Yezu. Tisafunika kuikha patsogolo pathu cidikhiro ca Umambo wa Mulungu na ca umaso wakukhonda mala. (Aheb. 12:2) Ninga anyakupfundza akubatizwa a Kristu, tiri na mwai wakuphedzera kukwanirisika kwa profesiya ya Yezu inalonga pya ‘kumala kwa makhaliro a dziko.’ Iye alonga: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.” (Mat. 24:3, 14) Tingaperekeka na ntima onsene toera kucita basa ineyi lero, tinakhala akutsandzaya na umaso wa kwenda na kwenda mu dziko ipswa yakulungama ya Yahova.