Ninji pinacita iwe ungagopa?—Panango usasaka ciphedzo kuna pai wako na mai wako. Mbwenye alipo munthu unango wakuti anakwanisa kukuphedzambo. Iye ndi wamphambvu kakamwe kupiringana munthu onsene. Usandziwa munthu unoyu?—Inde, ndi Yahova Mulungu. Tende tidinge pya mphale anacemerwa Dhavidhi m’Bhibhlya. Iye akhadziwa kuti Yahova mbadamphedza ndzidzi onsene, natenepa, iye nee akhagopa.

Pikhali iye mwana, Dhavidhi apfundziswa na anyakubalace toera kufuna Yahova. Pyenepi pyaphedza Dhavidhi toera kukhonda gopa, ngakhale m’midzidzi ikhacitikirwa iye na pinthu pyakugopesa. Iye akhadziwa kuti Yahova akhali xamwali wace, pontho Iye mbadamphedza. Ntsiku inango, Dhavidhi akhatsalakana mabira, nkhalamu ikulu yaluma bira ibodzi! Usadziwa ninji pidacita Dhavidhi? Iye atowerera nkhalamu mbaipha na manja ace! Buluka penepo, pa ndzidzi udaphatwa bira na ditiringwe, Dhavidhi aipha pontho! Usanyerezera kuti mbani adaphedza Dhavidhi?—Inde, ndi Yahova.

Pa ndzidzi unango Dhavidhi apangiza cipapo kakamwe. Aisraele akhamenyana na anthu akhacemerwa Afilisti. M’bodzi wa anyankhondo a Afilisti akhali mamuna wakulapha kakamwe, cimphona! Dzina yace ikhali Goliati. Mamuna unoyu akhapwaza anyankhondo a Israele na Yahova. Goliati aphemba anyankhondo a Israele toera kumenyana na iye. Mbwenye anyankhondo onsene a Israele akhagopa kakamwe kumenyana naye. Pidabva Dhavidhi pyenepi, apanga Goliati: ‘Ine ndinamenyana na iwe! Yahova anadzandiphedza, pontho ndinadzakukunda!’ Usanyerezera kuti Dhavidhi akhali wacipapo?—Inde, akhali wacipapo kakamwe. Usafuna kudziwa pidacitika?

Dhavidhi akwata funda yace na miyala mixanu yakubulungika, mbaenda kamenyana na cimphona. Pidaona Goliati kuti Dhavidhi akhali mwana kakamwe, iye ampwaza! Mbwenye Dhavidhi ampanga: ‘Iwe uli kudza kuna ine na supada, mbwenye ine ndiri kudza kuna iwe na dzina ya Yahova!’ Buluka penepo, iye  aikha mwala mu funda yace, athamanga kuenda kuna Goliati, mbamponyera. Mwala wamenya pa nkhope ya Goliati! Iye agwa pantsi, mbafa! Afilisti agopa kakamwe, mbathawa onsene. Pyakwanisika tani kuti mphale ninga Dhavidhi akunde cimphona?—Yahova amphedza, Yahova akhali wamphambvu kakamwe kupiringana cimphona!

Unapfundzanji kubulukira ku mbiri ya Dhavidhi?—Yahova ndi wamphambvu kakamwe kupiringana munthu onsene. Iye ndi Xamwali wako. Natenepa, ungabva kugopa, kumbuka kuti Yahova anakwanisa kukuphedza toera kukhala wacipapo!