KHUNDU 3
Umaso Ukhali Tani mu Paradizu?
Yahova apasa Adhamu na Eva pinthu pizinji pyadidi. Genesi 1:28
Yahova acita nkazi wakutoma, Eva, mbapasa Adhamu toera akhale nkazace.—Genesi 2:21, 22.
Yahova asasanya Adhamu na Eva na manyerezero pontho na manungo aungwiro, akusowa madawo.
Nyumba yawo ikhali munda wa Edeni—mbuto yakubalika kakamwe yakuti ikhali na mikulo, miti ya misapo na pinyama.
Yahova akhalonga na iwo pontho akhaapfunzisa. Mbadabvesera Yahova iwo mbadakhala na umaso wa kwenda na kwenda mu Paradizu pa dziko yapantsi.
Mulungu aakhondesa kudya nsapo wa muti ubodzi. Genesi 2:16, 17
Yahova apangiza Adhamu na Eva muti ubodzi wa nsapo wakuti ukhali m’munda na aapanga kuti angadya nsapo wa muti unoyu, iwo mbadafa.
Anju m’bodzi asandukira Mulungu. Anju unoyu wakuipa ndi Sathani Dyabo.
Sathani nee akhafuna kuti Adhamu na Eva abvere Yahova. Natenepa iye aphatisira nyoka toera kulonga na Eva kuti angadya nsapo wa muti unoyu, iye nee mbadafa tayu, mbwenye mbadakhala ninga Mulungu. Mwandimomwene unoyu ukhali uthambi.—Genesi 3:1-5.
