Musafuna kudinga malemba toera kuthimizira cidziwiso canu ca Bhibhlya? Musafunisisa kudziwa pya lemba peno munthu, mbuto na pinango pidalongwa m’Bhibhlya? Peno musabvundzika khala Mafala a Mulungu anakwanisa kukuphedzani toera kutsalakana pinthu pinakudzudzumisani? Natenepa munakwanisa kuphatisira bibliyoteka ya pa Nyumba ya Umambo.

Musagumanika maferamentu akuphedza toera kudinga mwacidikhodikho. Panango imwe nee muli na mabukhu onsene a Mboni za Yahova akuti alipo mu cilongero canu. Mbwenye m’bibliyoteka ya pa Nyumba ya Umambo musagumanika mabukhu mazinji adabuluswa cincino. Musagumanikambo Mabhibhlya akuthumburuzwa mwakusiyana-siyana, disionaryo yadidi, na mabukhu anango akuphata basa. Mbamudzati kutoma peno pakumala misonkhano, muli wakusudzuka toera kuphatisira mabukhu anagumanika m’bibliyoteka. Khala m’bibliyoteka muli na ntcini wandzeru, panango musagumanika Watchtower Library. Ineyi ndi programu ya mu ntcini wandzeru yakuti musagumanika mabukhu athu mazinji, pontho ndi yakukhonda nentsa kuiphatisira basi ene mungasaka nsolo wa mphangwa, fala peno lemba inafuna imwe.

Isaphedza anyakupfundza anacita makhundu pa nsonkhano wa Umaso Wathu Wacikristu na Utumiki. Bibliyoteka ya pa Nyumba ya Umambo inakuphedzani toera kukhunganyika makhundu anu. Muyangʼaniri wa nsonkhano wa Umaso Wathu na Utumiki ndiye ananyangʼanira bibliyoteka. Iye ali na basa yakuonera khala mabukhu mapswa aikhwa, pontho khala onsene asaikhwa mwadidi. Iye peno mpfundzisi wanu wa Bhibhlya anakwanisa kukupangizani kuti munagumana tani mphangwa zinafuna imwe. Natenepa, nkhabepo bukhu isafunika kubuluswa mu Nyumba ya Umambo. Mwandimomwene, tisafunika kutsalakana mwadidi mabukhu mbatikhonda kuikha pidzindikiro peno kulemba m’mabukhu.

Bhibhlya isafokotoza kuti toera kugumana cidziwiso ca Mulungu, tisafunika kucisaka ninga “pya upfumi wakubisala.” (Misangani 2:1-5) Bibliyoteka ya pa Nyumba ya Umambo inakuphedzani kutoma kudinga mwacidikhodikho malemba.

• Ndi maferamentu api anagumanika m’bibliyoteka ya pa Nyumba ya Umambo toera kudinga malemba?

• Mbani anafuna kukuphedzani toera kuphatisira mwadidi bibliyoteka?