1, 2. Kodi muyang’aniri wa cisa unango akhaona tani anthu akukhulupirika analongwa m’Bhibhlya na thangwi yanji iwo mbadakhala axamwali athu adidi?

Mulongo unango pakumala kubvesera nkhani ya muyang’aniri wa cisa wakugwesera alonga: “Iye asalonga pya anthu analongwa m’Bhibhlya ninga ndi axamwali ace akale.” M’bale unoyu asalonga munjira ineyi thangwi ali na pyaka pizinji mbakapfundza Mafala a Mulungu na kupfundzisa anango—natenepa, iye asalonga amuna na akazi acikhulupiro analongwa m’Bhibhlya ninga axamwali ace akale.

² Kodi si pyakuthema tayu kukhala na anthu azinji analongwa m’Bhibhlya ninga axamwali athu adidi? Kodi iwo ndi andimomwene kwa imwe? Nyerezerani kuti mbipidakhala tani kufamba na kucedza nawo, mbamukhala na ndzidzi wakudziwa amuna na akazi anewa ninga Nowa, Abhrahamu, Rute, Eliya na Estere. Nyerezerani kuti uphungu wadidi na mafala akuwangisa akhafuna kulonga iwo mbadakhuya tani umaso wanu!—Lerini Misangani 13:20.

3. (a) Tinaphindula tani mukupfundza pya amuna na akazi acikhulupiro analongwa m’Bhibhlya? (b) Ndi mibvundzo ipi inafuna ife kudzadinga?

³ Mwakukhonda penula, pa ndzidzi ‘wakulamuswa muli akufa kwa anthu akulungama,’ ntundu unoyu wa uxamwali unadzakwanisika. (Mac. 24:15) Mbwenye, ngakhale cincino, tinakwanisa kuphindula mukupfundza pya amuna na akazi acikhulupiro analongwa m’Bhibhlya. Munjira ipi? Mpostolo Paulu apereka ntawiro uyu wakuphata ntima: ‘Towezerani ale akuti thangwi ya cikhulupiro na kupirira kwawo asatambira pidapikirwa iwo.’ (Aheb. 6:12) Munapfundza ife pya amuna na akazi anewa acikhulupiro, tendeni tidinge mibvundzo mingasi inakhala na ife pakuleri mafala a Paulu: Cikhulupiro ninji na thangwi yanji ndi cakufunika kwa ife? Tinakwanisa tani kutowezera anthu akukhulupirika akale?

4. Kodi anthu azinji lero asanyerezera kuti cikhulupiro ninji na thangwi yanji manyerezero anewa ndi akuphonyeka?

⁴ Cikhulupiro ndi n’khaliro wakutundusa, wakuti amuna na akazi anafuna kudzapfundza ife m’bukhu ino akhauona kukhala wakufunika kakamwe. Anthu azinji lero asapwaza cikhulupiro, mbanyerezera kuti ico cisaphataniza kukhulupira pinthu pyakukhonda kukhala na umboni wandimomwene. Mbwenye, iwo asanyerezera mwakuphonyeka. Cikhulupiro cisaphataniza pizinji kupiri- ngana kukhulupira basi. Kukhulupira pinthu mwakukhonda kupidziwa mwadidi ndi kwakugopswa,  thangwi munthu anacita pyenepi nkhabe nentsa kucinja manyerezero ace. Ngakhale kukhulupira kuti Mulungu alipo nee ndi pyakukwana thangwi ‘mademonyo asakhulupirambo mbatetemera.’—Tya. 2:19.

5, 6. (a) Kodi cikhulupiro cathu cisaphataniza pinthu pipi piwiri pyakukhonda kuoneka? (b) Kodi cikhulupiro cathu cisafunika kukhala cakuwanga mpaka papi? Perekani citsandzo.

⁵ Bhibhlya isatipanga mabvekero acikhulupiro candimomwene. (Lerini Ahebere 11:1.) Paulu alonga kuti cikhulupiro cisaphataniza pinthu piwiri pyakuti ife nkhabe kwanisa kupiona. Cakutoma, cisaphataniza pinthu pyandimomwene ‘pyakukhonda kuoneka.’ Maso athu aunyama nkhabe kwanisa kuona pinthu pyakudzulu ninga Yahova Mulungu, Mwanace peno Umambo wakuti cincino ukutonga kudzulu. Caciwiri, cikhulupiro cisaphataniza “pinthu pinadikhira ife”—pinthu pyakuti pidzati kucitika. Lero, ife nkhabe kwanisa kuona dziko ipswa yakuti inadzabwereswa na Umambo wa Mulungu mwakukho- nda dembuka. Mphapo, pyenepi pisapangiza kuti tisakhulupira pinthu pyakuti nee tisapidziwa mwadidi?

⁶ Nkhabe! Paulu afokotoza kuti munthu wacikhulupiro candimomwene asadziwa pinakhulupira iye. Pidalonga iye kuti cikhulu- piro ‘ndi cidikhiro cakunyindirika,’ iye aphatisira mafala akuti anakwanisa kuthumburuzwa “tsamba inapangiza mwanaciro cinthu.” Toera kubvesesa pyenepi, nyerezerani kuti munthu unango asafuna kukupasani nyumba. Iye anakwanisa kukupasani tsamba yakupangiza kuti nyumba ndi yace, mbakupangani kuti “Nyumba yanu ipswa ndi iyi.” Iye nee asafuna kulonga kuti munadzakhala pa tsamba ineyi, mbwenye asafuna kulonga kuti tsamba ineyi ndi cipangizo cakunyindirika cakuti nyumba ndi yanu, pontho kuti kukhala na tsamba ndi sawasawa na kukhala na nyumba. Munjira ibodzi ene, cipangizo ca cikhulupiro cathu ndi cakunyindirika kakamwe, cakuti tinakwanisa kucilandanisa na cikhulupiro cathu cene.

7. Kodi cikhulupiro candimomwene cisaphatanizanji?

⁷ Natenepa, cikhulupiro candimomwene cisaphataniza kukhala na cinyindiro cakuwanga kuna Yahova Mulungu. Cikhulupiro cisaticitisa kumuona ninga Babathu waufuni na wakunyindirika wakuti anadzakwanirisa mapikiro ace onsene. Mbwenye cikhulupiro candimomwene cisaphataniza pizinji. Ninga cinthu caumaso cisafunika kutsalakanwa mwadidi toera cikhonde kufa, tisafunikambo kucita pinthu pinapangiza kuti tiri na cikhulupiro.—Tya. 2:26.

8. Thangwi yanji cikhulupiro ndi cakufunika kakamwe?

⁸ Thangwi yanji cikhulupiro ndi cakufunika kakamwe? Paulu apereka ntawiro wakuphata ntima. (Lerini Ahebere 11:6.) Ife nkhabe kukwanisa kufendedzera Yahova nee kunko- meresa tingasowa cikhulupiro. Natenepa, cikhulupiro ndi cakufunika kakamwe toera kukwanirisa cifuniro ca pyakucitwa pyonsene pyandzeru: kucita uxamwali na kupasa mbiri Babathu wakudzulu, Yahova.

9. Yahova asapangiza tani kuti asadziwa kuti tisafuna cikhulupiro?

 ⁹ Yahova asadziwa kuti tisafuna kakamwe cikhulupiro, natenepa asatipasa pitsandzo toera pitipfundzise kukulisa na kupangiza cikhulupiro. Iye asatipasa amuna akukhulupirika m’mpingo Wacikristu akuti asatitsogo- lera. Mafalace asalonga: ‘Towezerani cikhulupiro cawo.’ (Aheb. 13:7) Pontho iye asatipasa pizinji. Paulu alemba pya ‘ntambo ukulu wa amboni,’ amuna na akazi a ndzidzi wakale akuti asiya pitsandzo pyadidi pya cikhulupiro. (Aheb. 12:1) Anthu akukhulupirika adalembwa na Paulu m’bukhu ya Ahebere kapitulu 11, nee asaphataniza atumiki onsene akukhulupirika a Yahova. Bhibhlya iri na mbiri zizinji za amuna na akazi, anapiana na akulu, adapangiza cikhulupiro, pontho kutowezera cikhulupiro cawo kunatiphedza kakamwe n’dziko ino yakusowa cikhulupiro.

10. Kodi pfundziro ya munthu paekha inatiphedza tani toera kutowezera amuna na akazi akukhulupirika adalembwa m’Bhibhlya?

¹⁰ Imwe nkhabe kutowezera munthu khala mudzati kundziwa mwadidi. Pakuleri bukhu ino, munadzaona kuti tafufudza pinthu pizinji toera kukuphedzani kudziwa amuna na akazi anewa acikhulupiro. Ndiye tani kusakambo pya anthu anewa akukhulupirika? Pa pfundziro yanu mwekha, phatisirani mafaramentu ali na imwe toera kudziwa mwadidi anthu analongwa m’Bhibhlya. Munanyerezera imwe mwacidikhodikho pinapfundza imwe m’Bhibhlya, yeserani kunyerezera kuti pinthu pikhali tani pa ndzidzi unoyu na mbuto zidacitikira ipyo. Yeserani kunyerezera ninga muli kweneko mbamuona mbuto, kubva dzumbi na kununkhira. Cakufunika kakamwe, yeserani kudzindikira mabvero a anthu anewa. Mu ndzidzi unadzindikira imwe pya amuna na akazi akukhulupirika anewa, iwo anadzakhala andimomwene kwa imwe, kuadziwa mwadidi—panango anango anadzakhala ninga axamwali anu akale.

11, 12. (a) Munacitanji toera kuona Abhrahamu na Sara ninga axamwali anu? (b) Munaphindula tani na citsandzo ca Yana, Eliya peno Samweli?

¹¹ Mungadziwa mwadidi anthu anewa, munadzafuna kuatowezera. Mwacitsandzo, nyerezerani kuti mwapaswa basa ipswa. Imwe mwaphembwa na gulu ya Yahova toera kuthimizira utumiki wanu munjira zinango. Panango mwaphembwa toera kuenda ku cisa cakuti ciri na kufuna kukulu kwa amwazi mphangwa, peno toera kuyesera ntundu unango wa utumiki wakuti mudzati kuudziwa mwadidi peno wakunentsa. Munanyerezera imwe pya basa ineyi na kucita phembero thangwi ya pyenepi, kunyerezera mwacidikhodikho pya citsandzo ca Abhrahamu kunakuphedzani. Thangwi yakukhala kwawo dzololo toera kusiya umaso wadidi ukhali na iwo ku Uri, Abhrahamu na Sara adzapaswa nkhombo zizinji. Mungacitambo ninga pidacita iwo, mwakukhonda penula munadzaona kuti musaadziwa mwadidi cincino kupiringana kale.

 ¹² Ndiye tani khala xamwali peno wacibale wanu asakutsalakanani mwakuipa mpaka kukucitisani kukhonda funa kuenda ku miso- nkhano? Kunyerezera citsandzo ca Yana mbamuona kuti acita tani pikhaidwa iye na Penina, kunakuphedzani toera kucita pisankhulo mwandzeru—mbumuona Yana ninga xamwali wanu wapantima. Munjira ibodzi ene, khala mwafewa manungo thangwi yakuoneka ninga wakukhonda thema, mphyadidi kupfundza citsandzo ca Eliya na kunyerezera nyatwa zace, pontho njira idaphatisira Yahova toera kumbalangaza. Aphale na atsikana akuti asathimbana na makhaliro akuipa a andzawo a kuxikola, anakwanisambo kupfundza kuti Samweli athimbana tani na makhaliro akuipa a ana a Eli ku tabhernakulu.

13. Kodi kutowezera cikhulupiro ca anthu analongwa m’Bhibhlya kunacitisa cikhulupiro canu kukhala cakukhonda funika? Fokotozani.

¹³ Kodi kutowezera cikhulupiro ca anthu anewa analongwa m’Bhibhlya kunacitisa cikhulupiro canu kukhala cakukhonda funika kwa Yahova? Nkhabe! Kumbukani kuti Mafala a Yahova asatiwangisa toera kutowezera anthu acikhulupiro. (1 Akor. 4:16; 11:1; 2 Ates. 3:7, 9) Kusiyapo pyenepi, anthu anango anafuna ife kupfundza m’bukhu ino atowezerambo cikhulupiro ca anango akuti akhalipo iwo mbadzati kubalwa. Mwacitsandzo, tinadzaona mu Nsolo 17 wa bukhu ino kuti mafala anango adalonga Mariya akhali a Yana, mukupangiza pakweca kuti iye akhamuona ninga citsandzo. Kodi pyenepi pisapangiza kuti cikhulupiro ca Mariya nee cikhali cakuwanga? Nkhabe! M’mbuto mwace, citsandzo ca Yana caphedza Mariya toera kuwangisa cikhulupiro cakuti cancitisa kukhala na dzina yadidi pamaso pa Yahova Mulungu.

14, 15. Kodi ndi pinthu pipi pinango piri m’bukhu ino na tinapiphatisira tani mwadidi?

¹⁴ Bukhu ino yacitwa toera kukuphedzani kuwangisa cikhulupiro canu. Misolo inatowerera ndi kubvungazwa kwa misolo yakuti “Towezerani Cikhulupiro Cawo” idabuluswa mu A Sentinela kutomera caka 2008 mpaka 2013. Mbwenye, mphangwa zinango zathimizirwa. Misolo yonsene iri na mibvundzo yakuti inatiphedza kudinga na kuona kuti tinaphatisira tani mphangwa zenezi. Pithu- ndzithundzi pyakubalika na pya unyomonyomo uzinji pyaikhwa m’bukhu ino, pontho pinango pyakuti pikhalipo kale pyasasanyirwa papswa. Mwaikhwambo pinthu pinango pyakufunika kakamwe, ninga midzidzi idacitika pinthu na mapa. Bukhu yakuti Towezerani Cikhulupiro Cawo yacitwa toera kuipfundza pathu tekha, pabanja na m’mpingo. Panango mabanja mazinji anakomerwa basi ene na kuleri pabodzi mbiri zenezi mwakugaluza.

¹⁵ Tisadikhira kuti bukhu ino inadzakuphedzani toera kutowezera cikhulupiro ca atumiki akukhulupirika a Yahova akale. Pontho inadzakuphedzani kukulisa cikhulupiro canu na kufendedzera cifupi kakamwe Babanu wakudzulu, Yahova!