YANG’ANANI pa pithunzithunzi pino. Cibodzi na cibodzi cisapangiza muliri udabweresa Yahova ku Ijitu. Pa cithunzithunzi cakutoma mungakwanise kuona Aroni mbamenya Nkulo wa Nilo na ndodo yace. Mudacita iye pyenepi, madzi m’nkulo asanduka ciropa. Ntsomba zafa, na nkulo watoma kununkha.

Patsogolo pace, Yahova acitisa mathese kubuluka m’Nkulo wa Nilo. Iwo akhali konsene kwene—m’nthano peno pyakuotcera mikate, m’pyakuphikira, m’matalimba aanthu—konsene kwene. Mudafa mathese Aijitu aagumanyiza m’makhuku makulu, na dziko yanunkha thangwi ya iwo.

Buluka penepo Aroni amenya pantsi na ndodo yace, na pfumbi yasanduka matcunya. Pyenepi ndi pinyamanyama pyakumburuka pinaluma. Matcunya akhali muliri wacitatu m’dziko ya Ijitu.

Miliri idasala yaphekesa Aijitu basi, tayu Aisrayeli. Wacinayi ukhali muliri wa ntcenje zikulu zikhadzala m’nyumba za Aijitu onsene. Muliri wacixanu wakhuya pinyama. Ng’ombe, mabira na mbuzi zizinji za Aijitu zafa.

Patsogolo pace, Mozese na Aroni akwata dotha mbaimwaza kudzulu. Iyo yacitisa maphute akupha kwa anthu na pinyama. Uyu ukhali muliri wacitanthatu.

Buluka penepo Mozese athukula dzanjace kudzulu, na Yahova atumiza matalala na kudhima. Ineyi ikhali mbvula yakuipa kakamwe ya matalala ikhadaoneka ku Ijitu.

Muliri wacisere ukhali ndumbo ukulu wa zinthete. Kusiyapo nzidzi uneule cipo paoneka zinthete zakuinjipa ninga zenezire. Izo zadya pyonsene pidakhonda fudzwa na matalala.

Muliri wacipfemba ukhali cidima. M’ntsiku zitatu cidima cikulu caphimba dziko, mbwenye Aisrayeli akhali na ceza kukakhala iwo.

Pakumalisira, Mulungu apanga mbumba yace kuti ikapire pa zintcici za misuwo na ciropa ca mwana mbuzi peno ca mwanabira. Buluka penepo anju wa Mulungu apita m’Ijitu. M’nyumba ikhaona anju ciropa, iye nee aphamo munthu tayu. Mbwenye m’nyumba zonsene zakusowa ciropa pa zintcici za misuwo, anju wa Mulungu apha mwana wautombo wa munthu na pinyama. Uyu ukhali muliri wa 10.

Mudacitika muliri unoyu wakumalisa, Farau apanga Aisrayeli kuti abuluke. Mbumba ya Mulungu ikhali dzololo kuti iende, pina namasiku aneale iyo yatoma ulendo wakubuluka ku Ijitu.