YANG’ANANI basi banja ikulu iyi. Awa ndiwo ana 12 amuna a Yakobo. Iye akhalimbo na ana akazi. Kodi musadziwa madzina a ana anewa? Tendeni tidziwe angasi a iwo.

Leya abala Rubeni, Simeyoni, Levi na Yuda. Mudaona Rakeli kuti iye nee akhabala ana, atsukwala kakamwe. Natenepa iye apasa nzakazi wace wankazi, Bila, kwa Yakobo, na Bila abala ana awiri amuna anacemerwa Dani na Nafitali. Buluka penepo Leya apasambo nzakazi wace wankazi, Zilipa, kwa Yakobo, na Zilipa abala Gadi na Aseri. Pakumalisira Leya abala ana anango awiri amuna, Isakara na Zebuloni.

Na pakumalisa Rakeli akwanisa kubala mwana. Iye ancemera Zuze. Patsogolo tinadzapfunza pizinji pya Zuze, thangwi iye adzakhala munthu wakufunika kakamwe. Awa ndiwo ana 11 amuna adabalirwa Yakobo mukakhala iye na Labani, baba wa Rakeli.

Yakobo abalambo ana angasi akazi, mbwenye Bibilya isapereka dzina ya mbodzi basi wa iwo. Dzinace ikhali Dina.

Ukhadafika nzidzi udanyerezera Yakobo kulekana na Labani towera kubwerera ku Kanani. Natenepa iye agumanyiza banjace ikulu na mikumbi mikulu ya mabira na ya ng’ombe, mbatoma ulendo wakulapha.

M’nzidzi wakucepa, mudamala Yakobo na banjace kupita m’Kanani, Rakeli abala mwana unango wamamuna. Pyenepi pyacitika mukakhala iwo pa ulendo. Rakeli anenseka, na pakumalisira afa mukabala iye mwana. Mbwenye khombwani wamamuna akhali mwadidi. Yakobo ampasa dzina ya Benjamini.

Tisafunika kukumbuka madzina a ana 12 amuna a Yakobo thangwi mwa iwo yabuluka dziko yonsene ya Israyeli. Mwandimomwene, madzina a madzinza 12 a Israyeli akwatiwa kwa ana 10 amuna a Yakobo na ana awiri amuna a Zuze. Isaki akhala maso piaka pizinji pakumala balwa aphale anewa, na mphyakukwanisika kuti pyankomeresa kukhala na adzukulu azinji kakamwe. Mbwenye tendeni tione cidacitika na nzukulu wace wankazi Dina.