MUDAKWATWA Zuze kuenda ku Ijitu, iye akhali na piaka 17 basi pyakubalwa. Kweneku aguliswa kwa mamuna anacemerwa Potifara. Potifara akhaphatira basa mambo wa Ijitu, anacemerwa Farau.

Zuze akhaphatira basa kakamwe mbuyace, Potifara. Natenepa mudakula Zuze, Potifara amuikha kukhala muyang’aniri wa nyumbace yonsene. Kodi thangwi yanji, mphapo, Zuze ali nkaidi umu? Ndi thangwi ya nkazi wa Potifara.

Zuze akula mbakhala mamuna wakubalika kakamwe, na nkazi wa Potifara akhafuna kuti iye agone naye. Mbwenye Zuze akhadziwa kuti pyenepi mphyakuipa, mbakhonda kupicita. Nkazi wa Potifara aipirwa kakamwe. Natenepa mudafika mamunace panyumba, iye annamiza mbati: ‘Zuze unoyu wakuipa ayesera kugona na ine!’ Potifara akhulupira nkazace, mbaipirwa kakamwe na Zuze. Natenepa amuikhisa nkaidi.

M’nzidzi wakucepa muyang’aniri wa kaidi aona kuti Zuze ndi munthu wadidi. Natenepa amuikha muyang’aniri wa anyakaidi anango onsene. Patsogolo pace Farau aipirwa na nyakupereka pyakumwa wace na nyakucita mikate, mbaaikha nkaidi. Namasiku anango mbodzi na mbodzi akhala na ndota yakupambulika, mbwenye iwo nee akhadziwa mabvekero a zindota zawo. Mangwana mwace Zuze alonga: ‘Ndipangeni zindota zanu.’ Mudamala iwo kumpanga, na ciphedzo ca Mulungu, Zuze afokotoza mabvekero a zindota zawo.

Kwa nyakupereka pyakumwa, Zuze alonga: ‘M’ntsiku zitatu unadzabuluswa nkaidi, mbudzakhala papswa nyakupereka pyakumwa wa Farau.’ Natenepa Zuze athimizira: ‘Ukabuluka, panga Farau pya ine, undiphedze kubuluka muno.’ Mbwenye kwa nyakucita mikate, Zuze alonga: ‘M’ntsiku zitatu basi Farau anadzagwandisa nsolo wako.’

M’ntsiku zitatu pyacitika ninga mukhadapilonga Zuze. Farau agwandisa nsolo wa nyakucita mikate. Nyakupereka pyakumwa abuluswa nkaidi mbatoma papswa kupasa mambo pyakumwa. Mbwenye nyakupereka pyakumwa aduwala pyonsene pya Zuze! Nee alonga pya Zuze kwa Farau tayu, natenepa Zuze akhafunika kukhala nkaidi.