YANG’ANANI Mozese anathawa ku Ijitu. Kodi musakwanisa kuona amuna ananthamangisa? Kodi musadziwa thangwi yanji iwo asafuna kupha Mozese? Tendeni tione khala tinapidziwa.

Mozese akula panyumba ya Farau, mambo wa Ijitu. Iye adzakhala mamuna wankulu na wanzeru kakamwe. Mozese akhadziwa kuti iye nee akhali Muijitu, mbwenye anyakubalace ene akhali mabitcu Aciisrayeli.

Ntsiku inango, mukakhala iye na piaka 40 pyakubalwa, Mozese atonga kuenda kaona kuti anthu ace akhali tani. Iwo akhatsalakanwa m’njira yakuipa kakamwe. Iye aona Muijitu mbakamenya bitcu Waciisrayeli. Mozese ayang’ana nkhundu, mudaona iye kuti nkhabepo munthu anayang’ana, amenya Muijitu, na Muijitu unoyu afa. Buluka penepo Mozese abisa ntembo ace m’tseca.

M’mangwana mwace Mozese aenda pontho kaona anthu ace. Iye akhanyerezera kuti mbadakwanisa kuwaphedza kuti akhonde kukhalabve mabitcu. Mbwenye aona amuna awiri Aisrayeli mbakamenyana, natenepa Mozese alonga kwa ule akhali wakudodomeka: ‘Thangwi yanji iwe usamenya mbale yako?’

Mamuna alonga: ‘Kodi mbani adakuikha kukhala mambo na ntongi wathu? Kodi usafuna kundipha ninga mudapherewe Muijitu?’

Natenepa Mozese agopa. Iye adziwa kuti anthu akhadadziwa pidacita iye kwa Muijitu. Farau ene akhadabva pyenepi, na atuma amuna kuti aphe Mozese. Ndi thangwi ineyi Mozese akakamizika kuthawa ku Ijitu.

Mudabuluka Mozese ku Ijitu, iye aenda kutali ku dziko ya Midiani. Kweneku agumana banja ya Yetero, na akwatira mbodzi wa ana akazi a Yetero anacemerwa Zipora. Mozese adzakhala nkumbizi na atsalakana mabira a Yetero. M’piaka 40 iye akhala m’dziko ya Midiani. Natenepa iye afika m’piaka 80 pyakubalwa. Ntsiku inango, Mozese mbakatsalakana mabira a Yetero, kwacitika cinthu cakudzumatirisa cidacinja umaso onsene wa Mozese. Phindulani tsamba tione kuti cinthu ceneci cakudzumatirisa ndi ninji.