YANG’ANANI pinacitika! Ule ndi Mozese adatambalisa ndodo yace padzuludzulu pa Bara Yakufuwira. Awa adapulumuka na iye ku ntunda unango ndiwo Aisrayeli. Mbwenye Farau na anyankhondo ace akulobzeswa m’bara. Tendeni tione kuti pyacitika tani.

Ninga pidapfunzefe, Farau apanga Aisrayeli kuti abuluke m’Ijitu mudamala Mulungu kubweresa muliri wa 10 kwa Aijitu. Amuna akukwana 600.000 a Aisrayeli abuluka, pabodzi na akazi na ana azinji. Pontho, na cilengesero cikulu ca anthu anango, adakhulupira Yahova, cabuluka na Aisrayeli. Iwo onsene akwata mabira, mbuzi na ng’ombe zawo.

Mbasati kuenda, Aisrayeli aphemba Aijitu pyakubvala na pinthu pyakucitwa na ndalama na siliva. Aijitu akhagopadi kakamwe, thangwi ya muliri wakumalisa udaafikira. Natenepa Aijitu apasa Aisrayeli pyonsene pidaphemba iwo.

Pakumala ntsiku zingasi Aisrayeli afika ku Bara Yakufuwira. Kweneko iwo apuma. M’nzidzi unoyu, Farau na amuna ace atoma kudungunya thangwi ya kuthamangisa Aisrayeli. Iwo alonga: ‘Tasiya mabitcu athu mbaenda!’

Natenepa, Farau acinja pontho manyerezero ace. Akhunganya mwakucimbiza garetace yankhondo na anyankhondo ace. Buluka penepo atoma kuthamangira Aisrayeli na magareta 600 akupambulika, pabodzi na magareta anango onsene a ku Ijitu.

Mudaona Aisrayeli kuti Farau na anyankhondo ace alikudza kuna iwo, agopadi kakamwe. Nee pakhali njira yakuthawa tayu. Ku khundu yawo ibodzi kukhali Bara Yakufuwira, ku khundu inango Aijitu akadza kuna iwo. Mbwenye Yahova aikha ntambo pakati pa mbumba yace na Aijitu. Natenepa Aijitu nee akhakwanisa kuona Aisrayeli towera kuwakutira.

Mphapo, Yahova apanga Mozese kuti atambalise ndodo yace padzuludzulu pa Bara Yakufuwira. Mudacita iye, Yahova acitisa mphepo ikulu ya kumabulukiro dzuwa kupepesa. Madzi a bara agawika, na iwo aphatirira m’makhundu mawiri.

Buluka penepo Aisrayeli atoma kufamba m’bara pa mataka akuuma. Pakwata midzidzi mizinji kuti pikwi na pikwi pya anthu na pinyama pyawo pyonsene pifike mwakupulumuka ku ntunda unango wa bara. Pakumalisira, Aijitu akwanisa kuona pontho Aisrayeli. Mabitcu awo akhaenda! Natenepa Aijitu aapitira mwakucimbiza m’bara.

Mudapita iwo, Mulungu acitisa maroda a magareta awo kuti abuluke. Aijitu agopadi kakamwe na atoma kukhuwa: ‘Yahova akumenya nkhondo na ife m’kutsidzikiza Aisrayeli. Tendeni tibuluke muno!’ Mbwenye kukhali ndembulembu kakamwe.

Pyenepi pyacitika mudapangwa Mozese na Yahova kuti atambalise ndodo yace padzuludzulu pa Bara Yakufuwira, ninga mudaonemwe pa cithunzithunzi. Mudaitambalisa Mozese, mafufu amadzi atoma kubwerera mbaphimba Aijitu na magareta awo. Anyankhondo onsene akhadatowerera Aisrayeli m’bara. Nee mbodzi wa Aijitu abuluka wamaso!

Yakomerwa tani mbumba yonsene ya Mulungu thangwi ya kupulumuswa! Amuna aimba nyimbo ya kupereka takhuta kwa Yahova, mbalonga: ‘Yahova awina pembero yambiri. Iye aponya makavalu na anyakukwirawo m’bara.’ Mwanankazi wa Mozese, Miriamu, akwata usinde wace, na akazi onsene antowerera na mausinde awo. Mukhabvina iwo mwakukomerwa, akhaimba nyimbo ibodzibodzi ikhaimba amuna: ‘Yahova awina pembero yambiri. Iye aponya makavalu na anyakukwirawo m’bara.’