MUKAPITA Aisrayeli m’nyatwa, iwo akhadungunyira Yahova. Yahova akhaatawira m’kuapasa atsogoleri acipapo towera kuaphedza. Bibilya isacemera atsogoleri anewa atongi amiseru. Yobzwa akhali ntongi wamiseru wakutoma, na atongi amiseru anango nduli mwa iye akhacemerwa Otiniyeli, Ehudi na Samagara. Mbwenye anthu awiri adaphedzambo Israyeli akhali akazi akucemerwa Debora na Yaeli.

Debora akhali mprofeta wankazi. Yahova akhampasa mphangwa za ntsogolo, na iye akhapanga mbumba pikhalonga Yahova. Debora akhalimbo ntongi wamiseru. Iye akakhala pantsi pa ntundu unango wa ncindu m’cisa ca nthunda, na mbumba ikhaenda kuna iye kaphedziwa miseru yayo.

M’nzidzi uneule Yabini akhali mambo wa Kanani. Iye akhali na magareta ankhondo 900. Anyankhondo ace akhali akuwanga kakamwe kwakuti Aisrayeli azinji akakamizwa kukhala anzakazi a Yabini. Ntsogoleri wa anyankhondo a Mambo Yabini akhacemerwa Sisera.

Ntsiku inango Debora acemeresa Ntongi wamiseru Baraki, mbampanga: ‘Yahova alonga: “Kwata amuna 10.000 uende nawo ku Phiri ya Tabori. Kweneko ndinadzabweresa Sisera kuna iwe. Ndinadzakucitisa kupembera kwa iye na anyankhondo ace.”’

Baraki apanga Debora: ‘Ine ndinadzaenda ukaendambo na ine.’ Debora aenda naye, mbwenye alonga kwa Baraki: ‘Mbiri ya pembero nee inadzapaswa iwe, thangwi Yahova anadzapereka Sisera m’dzanja mwankazi.’ Ici ndico cidacitika.

Baraki atcita ku Phiri ya Tabori towera kugumanikana na anyankhondo a Sisera. Mwakudzidzimusa Yahova acitisa nzalo wamadzi, na azinji a anyankhondo anyamalwa alodzweswa. Mbwenye Sisera atcita pa gareta yace mbathawa.

M’nzidzi wakucepa Sisera afika ku nsasa wa Yaeli. Yaeli ampanga kuti apite, mbampasa nkaka. Nkaka unoyu wacitisa Sisera kukhala na citulo, na mwakukhonda dembuka iye agona citulo cikulu. Buluka penepo Yaeli abulusa cimuti pa nsasa mbacikhomera m’nsolo mwa mamuna unoyu wakuipa. Patsogolo, mudafika Baraki, Yaeli ampangisa Sisera wakufa! Natenepa mungakwanise kuona kuti pidalonga Debora pyacitika.

Pakumalisira Mambo Yabini aphiwambo, na Aisrayeli akhala pontho na ntendere m’nzidzi wakucepa.