KODI iyi isaoneka ninga nyoka yandimomwene idalungira ntanda? Siyo tayu. Nyoka iyi yacitwa na nkuwa. Yahova apanga Mozese kuti aiikhe pa ntanda towera mbumba ikwanise kuiyang’ana mbipitiriza kukhala maso. Mbwenye nyoka zinango ziri pantsi ndi zandimomwene. Izo zaluma anthu mbiziacitisa kuduwala. Kodi musadziwa thangwi yanji?

Ndi thangwi yakuti Aisrayeli alongera mwakuipa Mulungu na Mozese. Iwo adungunya: ‘Watibulusiranji m’Ijitu towera tife m’thando muno? Muno nkhabe cakudya peno madzi. Pina ife nkhabe kwanisabve kudya mana awa.’

Mbwenye mana akhali cakudya cadidi. Yahova aapasa mana mwa cirengo. Mwa cirengo iye aapasambo madzi. Mbwenye mbumba nee ikhapereka takhuta m’njira ikhaatsalakanira Mulungu tayu. Na thangwi ineyi, Yahova atumiza nyoka izi zanyongo towera kulanga Aisrayeli. Nyoka zaaluma, na azinji a iwo afa.

Pakumalisira mbumba yaenda kwa Mozese mbilonga: ‘Tadawa, thangwi talongera mwakuipa Yahova na imwe. Natenepa phemberani kwa Yahova kuti abuluse nyoka izi.’

Natenepa Mozese aphemberera mbumba. Yahova apanga Mozese kuti acite nyoka iyi ya nkuwa. Iye ampanga kuti aikhe pa ntanda, towera mbodzi na mbodzi wakulumwa akwanise kuiyang’ana. Mozese acitadi pidampanga Mulungu. Anthu akulumwa ale ayang’ana nyoka ya nkuwa mbawanga pontho

Muno muli na pfunziro towera kupfunzirwa. Ife tonsene, m’njira inango, tiri ninga Aisrayeli ale adalumwa na nyoka zire. Tonsene tiri m’nkhaliro wakufa. Yang’anani dziko yapantsi, munadzaona kuti anthu akukalamba, kuduwala na kufa. Pyenepi ndi thangwi mamuna na nkazi akutoma, Adamu na Yeva, apeukira Yahova, na ife tonsene ndife ana awo. Mbwenye Yahova acita njira towera tikwanise kukhala na umaso wa kwenda na kwenda.

Yahova atumiza Mwanace, Yezu Kristu, pa dziko yapantsi. Yezu amanikwa pa muti, thangwi anthu azinji anyerezera kuti iye akhali wakuipa. Mbwenye Yahova apereka Yezu kuti atipulumuse. Tikayang’ana kwa iye, tikantowerera, tingakwanise kukhala na umaso okhonda mala. Mbwenye tinadzapfunza pizinji pya ipi kutsogolo.