KODI musaona pinacitika apa? Onsene awa ndiwo amuna ankhondo a Israyeli. Amuna adakotama ali kumwa madzi. Mamuna uyu adalimira duzi na iwo ndi Ntongi wamiseru Gideyoni. Iye asayang’ana kuti iwo asamwa tani madzi.

Yang’anani mwapaduzi masiyaniro akumwa a amuna awa. Anango aikhiratu nkhope zawo m’madzi. Mbwenye mbodzi asatunga madzi na manjace, towera akwanise kuona pinacitika nkhundunkhundu mwace. Pyenepi mphyakufunika, thangwi Yahova apanga Gideyoni kuti asankhule amuna ale basi anamwa mbakayang’ana. Akusala ale, Mulungu alonga kuti asafunika aende kunyumba. Tendeni tione thangwi yanji.

Aisrayeli akhali pontho m’nyatwa ikulu. Thangwi yace ndi yakuti iwo hadabvera Yahova tayu. Mbumba ya ku Midyani pang’ono na pang’ono ikhatapata Aisrayeli, mbiaphekesa. Natenepa Aisrayeli adungunyira Yahova towera aphedzwe, na Yahova abvesera kudungunya kwawo.

Yahova apanga Gideyoni kuti agumanye anyankhondo, natenepa Gideyoni agumanyiza amuna ankhondo akukwana 32.000. Mbwenye pakhali anyankhondo akukwana 135.000 towera acite nkhondo na Israyeli. Ngakhale tenepa Yahova apanga Gideyoni: ‘Iwe uli na amuna akuinjipa kakamwe.’ Kodi thangwi yanji Yahova alonga pyenepi?

Thangwi Israyeli mbadawina nkhondo, mbadakwanisa kunyerezera kuti awina na mphambvu zawo. Mbadakwanisa kunyerezera kuti nee akhafuna ciphedzo ca Yahova kuti awine. Natenepa Yahova alonga kwa Gideyoni: ‘Panga amuna onsene anagopa kuti abwerere kunyumba.’ Mudacita Gideyoni pyenepi, 22.000 pya amunace ankhondo abwerera kunyumba. Pyenepi pyasiya Gideyoni na amuna 10.000 basi towera acite nkhondo na anyankhondo onsene awa akukwana 135.000.

Mbwenye, bveserani! Yahova alonga: ‘Uciri na amuna akuinjipa kakamwe.’ Natenepa iye apanga Gideyoni kuti acitise amuna kumwa madzi pa cinkulo ici na kubweza kunyumba anthu onsene ale adaikha nkhope zawo m’madzi pakumwa. Yahova apikira: ‘Ndinadzakupasa pembero na amuna 300 adamwa madzi mbakayang’ana.’

Wafika nzidzi wa nkhondo. Gideyoni agawa amunace 300 m’misoka mitatu. Iye apasa mamuna mbodzi na mbodzi nyanga na mulinga ukakhala na mwanikiro nkati mwawo. M’nzidzi wa tcititciti, iwo onsene agumanyikana mbazungulira misasa ya anyankhondo anyamalwa. Buluka penepo, m’nzidzi ubodziene, iwo aliza nyanga na kuswa milinga yawo, mbakhuwa: ‘Supada ya Yahova na ya Gideyoni!’ Mudalamuka anyankhondo anyamalwa, iwo akhala akudzudzumika na akugopa. Iwo onsene atoma kuthamanga, na Aisrayeli awina nkhondo.