KODI mwatoma cita pikiro patsogolo pace mbumuiona kukhala yakunensa kuikwanirisa? Pyenepi pyacitika na mamuna ali pa cithunzithunzi cino, na thangwi ineyi iye atsukwala kakamwe. Mamuna unoyu ndi ntongi wamiseru wacipapo wa Israyeli anacemerwa Yefita.

Yefita akhala maso m’nzidzi wakuti Aisrayeli nee akhalambirabve Yahova. Iwo akhacita pontho pinthu pyakuipa. Natenepa Yahova asiya mbumba ya Amoni mbiaphekesa. Pyenepi pyacitisa Aisrayeli kudungunyira Yahova: ‘Takudawirani. Taphata mwendo, tipulumuseni!’

Mbumba yatsukwala thangwi ya pinthu pyakuipa pidaciteyo. Yapangiza kutsukwala kwayo m’kulambira pontho Yahova. Natenepa Yahova aiphedza pontho.

Yefita asankhulwa na mbumba kuti akacite nkhondo na Aamoni akuipa. Yefita akhafuna kakamwe kuti Yahova amphedze ku nkhondo. Natenepa iye apikira Yahova: ‘Mungadzandipasa pembero kwa Aamoni, munthu wakutoma wa kunyumba kwanga anadza kagumanikana na ine m’kubwerera kwanga ku upemberi ndinadzampereka kwa imwe.’

Yahova abvesera pikiro ya Yefita, mbamphedza kupembera. Mudabwerera Yefita kunyumba, kodi musadziwa kuti mbani wakutoma kuenda kagumanikana na iye? Ndi mwanace wankazi, wakuti akhali mbodzi ene basi. Yefita alira: ‘Ah, mwananga! Ndi kutsukwala kwanji kunandidzesera iwe. Mbwenye ndapikira Yahova, na ine nkhabe bwerera nduli.’

Mudadziwa mwana wankazi wa Yefita pya pikiro ineyi, pakutoma atsukwalambo. Thangwi pikhabveka kuti iye mbadadzasiya baba na axamwali ace. Mbwenye iye mbadadzaphatisira umaso wace udasala m’kutumikira Yahova ku tabernakulu ku Silo. Natenepa apanga babace: ‘Khala imwe mwacita pikiro kwa Yahova, musafunika kuikwanirisa.’

Natenepa mwana wankazi wa Yefita aenda ku Silo, mbaphatisira umaso wace udasala m’kutumikira Yahova m’tabernakulu yace. Ntsiku zinai pa caka akazi a Israyeli akhaenda kweneku kamuona, mbatsanzaya pabodzi. Mbumba ikhafuna mwana wankazi wa Yefita thangwi akhali nzakazi wadidi wa Yahova.