SAULI ayesera pontho kuphata Davidi. Akwata anyankhondo ace akupambulika 3.000 mbaenda kasaka Davidi. Mudadziwa Davidi pyenepi, atuma azondi towera akadziwe kukhafuna kugona Sauli na amunace masiku aneale. Buluka penepo Davidi abvunza awiri a amunace: ‘Kodi mbani mwa imwe anadzaenda na ine ku nsasa wa Sauli?’

Abisai atawira: ‘Ine.’ Abisai ndi mwana wa mwanankazi wa Davidi, Zeruya. Sauli na amunace mbakagona, Davidi na Abisai apita m’nsasa mwakumatama. Iwo akwata dipa ya Sauli na mulinga wace wa madzi, pikakhala kukhundu kwene kwa nsolo wa Sauli. Nkhabepo adaaona peno kuabva thangwi iwo onsene akhali ncitulo cikulu.

Onani mphapo Davidi na Abisai. Iwo abulukamo, mbafika mwadidi kuntsonga ya nthunda. Davidi akhuwa kwa nkulu wa anyankhondo a Israyeli: ‘Abineri, thangwi yanji iwe nkhabe tsidzikiza mbuyako, mambo? Yang’ana! Kodi dipa na mulinga wace wamadzi piri kupi?’

Sauli alamuka. Iye adzindikira fala ya Davidi, mbabvunza: ‘Kodi ndiwe, Davidi?’ Kodi musakwanisa kuona Sauli na Abineri kule pantsi?

Davidi atawira Sauli: ‘Inde, mbuyanga, mambo.’ Na Davidi abvunza: ‘Thangwi yanji musayesera kundiphata? Kodi ndi cakuipa canji cidacita ine? Dipa yanu iri pano, O mambo. Tumani mbodzi wa amuna anu adzaikwate.’

Sauli adzindikira: ‘Ndadawa. Ndacita upswiru.’ Natenepa Davidi aenda, na Sauli abwerera kunyumba. Mbwenye Davidi alonga ekha: ‘Ntsiku yace Sauli anadzandipha. Ndisafunika ndithawire ku dziko ya Afilisti.’ Iye acita pyenepi. Davidi akwanisa kunyengeza Afilisti m’kuacitisa kukhulupira kuti m’nzidzi uneule iye akhali ku khundu kwawo.

M’nzidzi unango mudamala citika ipi, Afilisti aenda kamenyana na Israyeli. Kunkhondo, aphiwa Sauli pabodzi na Jonatani. Pyenepi pyatsukwalisa Davidi kakamwe, mbalemba nyimbo yakubalika, mwenemo iye aimba: ‘Ndiri wakutsukwala thangwi ya iwe, mbale yanga Jonatani. Ndikhakufuna tani ine!’

Pakumala ipi Davidi abwerera ku Israyeli ku nzinda wa Hebroni. Kukhali nkhondo pakati pa amuna adasankhula mwana wa Sauli, Isiboseti, kuti akhale mambo na amuna anango akhafuna kuti Davidi akhale mambo. Mbwenye pakumalisira amuna a Davidi awina. Mudaikhwa Davidi kukhala mambo iye akhali na piaka 30 pyakubalwa. M’piaka pinomwe na miyezi mitanthatu iye atonga m’Hebroni. Angasi a ana amuna adabalirwa iye kweneku akhacemerwa Amnoni, Abisalomu na Adoniya.

Wafika nzidzi wakuti Davidi na amunace aende kakunde nzinda wakubalika wa Yerusalemu. Yoabu, mwana unango wa mwanankazi wa Davidi, Zeruya, atsogolera nkhondo ineyi. Davidi apasa Yoabu muoni m’kumuikha nkulu wa anyankhondo ace. Natenepa Davidi atoma kutonga m’nzinda wa Yerusalemu.