YANG’ANANI mamuna m’madzi. Iye ali m’nyatwa zizinji, kodi si tenepa tayu? Ntsomba ire iri duzi na kummeza! Kodi musadziwa kuti mamuna unoyu mbani? Dzinace ndi Yona. Tendeni tione kuti apita tani m’nyatwa ikulu kakamwe.

Yona akhali mprofeta wa Yahova. Nee padapita nzidzi ukulu ene tayu pakumala kufa mprofeta Elixa mudalonga Yahova kwa Yona: ‘Ndoko ku nzinda ukulu wa Ninive. Uipi wa mbumba kweneku ndi ukulu kakamwe, na ndisafuna kuti iwe uapange thangwi ya pyenepi.’

Mbwenye Yona nee akhafuna kuenda tayu. Natenepa akwira m’bote ikhaenda kukhundu yakusiyana na Ninive. Yahova hadakomerwa na kuthawa kwa Yona tayu. Natenepa Iye acitisa conzi cikulu. Cikhali cakuipa kakamwe kwakuti bote yakhala pangobzwi ya kulobzweka. Amalinyero agopadi kakamwe, na iwo akhuwa kwa milungu yawo towera aphedzwe.

Pakumalisira Yona aapanga: ‘Ine ndisalambira Yahova, Mulungu adacita kudzulu na dziko yapantsi. Tenepa ndikuthawa kucita pidandipanga Yahova kucita.’ Natenepa amalinyero abvunza: ‘Kodi tisafunika kukucitiranji kuti conzi cilimire?’

Yona alonga: ‘Ndiponyeni m’bara, na bara inadzakhala pontho yakupfulika.’ Amalinyero hadafuna kucita pyenepi tayu, mbwenye mukhanyanya conzi, iwo amalisira na kuponya Yona m’madzi. M’nzidzi uneule ene conzi calimira, na bara yapfulika pontho.

Mukharirima Yona m’madzi, ntsomba ikulu yammeza. Mbwenye iye hadafa tayu. M’ntsiku zitatu na masiku matatu iye akhala m’mimba mwa ntsomba ire. Yona atsukwala kakamwe m’kukhonda bvera Yahova na kuenda ku Ninive. Natenepa kodi musadziwa cidacita iye?

Yona aphembera kwa Yahova kuphemba ciphedzo. Natenepa Yahova acitisa ntsomba kulukula Yona pa mataka akuuma. Buluka penepo Yona aenda ku Ninive. Kodi pyenepi nkhabe kutipfunzisa kufunika kwa kucita pyonsene pinatituma Yahova kucita?