ONANI anthu anasingirira mphale uyu. Kodi musadziwa kuti iye mbani? Ndi Yeremia. Iye ndi mprofeta wakufunika kakamwe kwa Mulungu.

M’nzidzi wakucepa mudatoma kwene Mambo Yosiya kufudza adzimunthu m’dziko, Yahova apanga Yeremia kuti akhale mprofeta Wace. Mbwenye Yeremia anyerezera kuti akhali mphale kakamwe kuti akhale mprofeta. Na Yahova ampanga kuti Iye mbadadzamphedza.

Yeremia apanga Aisrayeli kuti alimire na kucita pinthu pyakuipa. Iye alonga: ‘Milungu inalambirwa na anthu a madziko ndi yauthambi.’ Mbwenye Aisrayeli azinji akhafuna kulambira adzimunthu mbuto mwa kulambira Mulungu wandimomwene Yahova. Mudapanga Yeremia mbumba kuti Mulungu anadzaalanga thangwi ya kuipa kwawo, iwo anseka kwene.

Papita piaka. Yosiya afa, na mudapita miyezi mitatu mwanace Yehoyakimu adzakhala mambo. Yeremia apitiriza mbapanga mbumba: ‘Yerusalemu anadzafudzwa mungakhonda cinja njira zanu zakuipa.’ Anyantsembe aphata Yeremia mbakhuwa: ‘Iwe usafunika kuphiwa thangwi ya kulonga pinthu pyenepi.’ Buluka penepo iwo apanga akulu a Israyeli: ‘Yeremia asafunika kuphiwa, thangwi alonga mwakupomokera nzinda wathu.’

Kodi Yeremia mbadadzacitanji mphapo? Iye hadagopa tayu! Iye apanga onsene: ‘Yahova andituma towera ndilonge pinthu ipi kwa imwe. Mungakhonda cinja njira zanu zakuipa za makhaliro, Yahova anadzafudza Yerusalemu. Mbwenye dziwanidi ipi: Mukandipha, munadzapha mamuna wakukhonda cita cakuipa.’

Akulu asiya Yeremia kukhala maso, mbwenye Aisrayeli hadacinja njira zawo zakuipa tayu. M’kupita kwa nzidzi Nebukadinezara, mambo wa Babiloni, abwera mbacita nkhondo na Yerusalemu. Pakumalisira Nebukadinezara acita Aisrayeli anzakazi ace. Iye akwata pikwi pizinji kwenda ku Babiloni. Nyerezerani basi kuti mbipidakhala tani kuti anthu acilendo akukwatani kunyumba kwanu kwenda ku dziko yacilendo!