MUDAMALA Davidi kupha Goliati, Abineri, nkulu wa anyankhondo a Israyeli, aenda naye kwa Sauli. Sauli akomerwa kakamwe na Davidi. Iye amuikha kukhala nkulu wa anyankhondo ace mbankwata kuti akhale kunyumba ya mambo.

M’kupita kwa nzidzi, mudabwerera anyankhondo kukamenyana iwo na Afilisti, akazi aimba: ‘Sauli apha pikwi, mbwenye Davidi apha pikwi makhumi.’ Pyenepi pyacitisa Sauli kukhala na ntsanje, thangwi Davidi apaswa cilemedzo kupiringana Sauli. Mbwenye mwana wa Sauli, Jonatani, nee akhali na ntsanje tayu. Iye akhafunadi kakamwe Davidi, na Davidi akhafunambo Jonatani. Natenepa, awiri awa apikirana kuti adzakhale axamwali nzidzi onsene.

Davidi akhaimba mwadidi kakamwe jambe, na Sauli akhafuna nyimbo zikhaimba iye. Mbwenye ntsiku inango ntsanje ya Sauli yancitisa kucita cinthu cakugopswa. Davidi mbakhaimba jambe, Sauli akwata dipa yace mbaiponya, mbalonga: ‘Ndinadzapfeka Davidi pa pfufu!’ Mbwenye Davidi anzwenga, na dipa yakhwica. M’kupita kwa nzidzi Sauli akhwica pontho Davidi na dipa yace. Natenepa Davidi adziwa kuti akhafunika kucita mpholemphole kakamwe.

Kodi musakumbuka pikiro idacita Sauli? Iye alonga kuti mbadadzapasa mwanace wankazi kuti akhale nkazi wa mamuna ule anadzapha Goliati. Pakumalisira Sauli apanga Davidi kuti mbadakwata mwanace Mikala, mbwenye pakutoma akhafunika kupha anyamalwa 100 a Afilisti. Nyerezerani pyenepi! Mwandimomwene Sauli akhadikhira kuti Afilisti mbadadzapha Davidi. Mbwenye iwo hadapicita tayu, natenepa Sauli apereka mwanace kuti akhale nkazi wa Davidi.

Ntsiku inango Sauli apanga Jonatani na anzakazi ace onsene kuti asafuna kupha Davidi. Mbwenye Jonatani alonga kwa babace: ‘Lekani phekesa Davidi. Iye cipo akucitirani cakuipa. Mbuto mwa pyenepi, pyonsene pidacita iye pikhali ciphedzo cikulu kwa imwe. Iye aikha umaso wace pa ngobzwi mudapha iye Goliati, na mudapiona imwe, mwakomerwa.’

Sauli abvesera mwanace, mbampikira kuti nee mbadadzaphekesa Davidi tayu. Davidi abwereswa, mbatumikira pontho Sauli panyumba pace ninga mukhacita iye kalene. Mbwenye ntsiku inango, Davidi mbakaimba nyimbo, Sauli aponya pontho dipa yace kwa Davidi. Davidi anzwenga, na dipa yalasa pfufu. Uyu ndi ulendo wacitatu! Natenepa Davidi adziwa kuti iye akhafunika kuthawa!

Namasiku aneale Davidi aenda kunyumba kwace. Mbwenye Sauli atuma amuna angasi kuti akamuphe. Mikala adziwa cikhafuna kucita babace. Natenepa apanga mamunace: ‘Ungakhonda kuthawa masiku ano, mangwana unadzakhala wakufa.’ Namasiku aneale Mikala aphedza Davidi kuthawa na pa janela. Cifupi na piaka pinomwe Davidi afunika kubisala m’mbuto zakusiyanasiyana kuti Sauli akhonde kungumana.