Mbakhali m’ubitcu m’Babiloni, Aisrayeli akhali na mayesero mazinji a cikhulupiro cawo. Sadrake, Mesake na Abedinego aponywa m’ubvuni wakupisa wa moto, mbwenye Mulungu aabulusa aumaso. M’kupita kwa nzidzi, mudamala kundwa Babiloni na Amedi na Apersiya, Danyeli aponywa m’dzenje ya zinkhalamu, mbwenye Mulungu antsidzikizambo m’kufunga milomo ya zinkhalamu.

Pakumalisira, mambo wa m’Persiya Koresi asudzula Aisrayeli. Iwo abwerera ku dziko ya kwawo mudapitadi piaka 70 kutomera padakwatwa iwo kuenda ku Babiloni ninga mabitcu. Cibodzi ca pinthu pyakutoma cidacita iwo mudabwerera iwo ku Yerusalemu cikhali kutoma kumanga templo ya Yahova. Mbwenye, m’nzidzi wakucepa anyamalwa alimirisa basa yawo. Natenepa pakumalisira iwo amalisa templo cifupi na piaka 22 mudamala iwo kubwerera ku Yerusalemu.

Patsogolo pace, tinadzapfunza pya ulendo wa Ezara wa kubwerera ku Yerusalemu towera kukabalikisa templo. Ipi pyacitika piaka 47 kutomera pakumaliswa templo. Buluka penepo, piaka 13 pakumala ulendo wa Ezara, Neyemia aphedza kumanga papswa zingome zakugomoka za Yerusalemu. Khundu YACIXANU isaphataniza piaka 152 pya pyakucitika mpaka nzidzi uneule.