KODI musakwanisa kuona nyenyezi ire yakuyetimira inathonya mbodzi wa amuna awa? Nyenyezi yaoneka mudabuluka iwo ku Yerusalemu. Amuna anewa abuluka Kumabulukiro dzuwa, na iwo asapfunza zinyenyezi. Iwo akhulupira kuti nyenyezi ineyi ipswa ikhaatsogolera kuenda kwa munthu wakufunika.

Mudafika amuna anewa ku Yerusalemu, iwo abvunza: ‘Ali kupi mwana anafuna kukhala mambo wa Ayuda?’ “Ayuda” ndi dzina inango ya Aisrayeli. Amuna alonga: ‘Pakutoma taona nyenyezi ya mwana mukakhala ife Kumabulukiro dzuwa, na tabwera kudzamulambira.’

Herodi, ule akhali mambo m’Yerusalemu, mudabva iye pyenepi, anenseka. Iye nee akhafuna kuti mambo unango akwate mbuto yace. Natenepa Herodi acemera anyantsembe akulu mbabvunza: ‘Anadzabaliwa kupi mambo ule adapikirwa?’ Iwo atawira: ‘Bibilya isalonga kuti ku Betelehemu.’

Natenepa Herodi acemera amuna adabuluka Kumabulukiro dzuwa, mbalonga: ‘Ndokoni mukasake mwana wang’ono. Mukangumana, bwerani mudzandipange. Ndisafuna kuenda kamulambirambo.’ Mbwenye, mwandimomwene, Herodi akhafuna kugumana mwana towera amuphe!

Buluka penepo nyenyezi yaenda kutsogolo kwa amuna anewa mpaka ku Betelehemu, mbilimira padzulu pa mbuto ikakhala mwana. Mudapita amuna m’nyumba, agumana Mariya na Yezu wang’ono. Iwo abulusa miyoni mbaipasa Yezu. Mbwenye m’kupita kwa nzidzi Yahova acenjeza amuna m’ndota kuti akhonde bwerera kuna Herodi. Natenepa iwo abwerera ku dziko yakwawo na njira inango.

Mudadziwa Herodi kuti amuna adabuluka Kumabulukiro dzuwa abwerera kunyumba, iye aipirwa kakamwe. Natenepa iye atonga kuti anapiana onsene amuna m’Betelehemu a piaka mpaka piwiri pyakubalwa aphiwe. Mbwenye mbusati fika nzidzi unoyu, Yahova acenjeza Zuze m’ndota, na Zuze aenda ku Ijitu na banjace. M’kupita kwa nzidzi, mudadziwa Zuze kuti Herodi afa, iye akwata Mariya na Yezu mbabwerera kwawo ku Nazareti. Ndi kweko kudakula Yezu.

Kodi musanyerezera kuti mbani adacitisa nyenyezi ineyi ipswa kuyetimira? Kumbukani kuti pakutoma amuna ale aenda ku Yerusalemu mudamala iwo kuona nyenyezi. Satana Diyabu akhafuna kupha Mwana wa Mulungu, na akhadziwa kuti Mambo Herodi wa Yerusalemu mbadadzayesera kumupha. Mwandimomwene ndi Satana adacitisa nyenyezi ineyi kuyetimira.