YANG’ANANI mphale analonga na amuna akugwesera. Iwo ndiwo apfunzisi m’templo ya Mulungu ku Yerusalemu. Na mphale ndi Yezu. Iye akhadathuthuka pang’ono. M’nzidzi uneule akhali na piaka 12.

Apfunzisi adzumatirwa kakamwe nakuti Yezu akhadziwa pizinji kakamwe pya Mulungu na pinthu pyakulembwa m’Bibilya. Mbwenye thangwi yanji Zuze na Mariya nee akhalimbo pano? Kodi akhali kupi? Tendeni tione.

Piaka pyonsene Zuze akhakwata banjace mbaenda ku Yerusalemu ku phwando yakupambulika yakucemerwa Paskwa. Ndi ulendo wakulapha kubuluka ku Nazareti mpaka ku Yerusalemu. Nee mbodzi akhali na motokala, na nee pakhali na maxitima. Nee pikhalipo m’ntsiku zenezire. Anthu azinji akhafamba na miyendo, na iwo akhakwata cifupi na ntsiku zitatu kuti afike ku Yerusalemu.

Mbwenye m’nzidzi uneule Zuze akhali na banja ikulu. Natenepa pakhali ang’ono a Yezu amuna na akazi kuti aatsalakane. Inde, caka cenecire Zuze na Mariya aenda na anawo pa ulendo wakulapha wakubwerera kwawo ku Nazareti. Iwo akhanyerezera kuti Yezu akhafamba pabodzi na anyaulendo anango. Mbwenye mudalimira iwo pakumala kwa ntsiku, hadagumana Yezu tayu. Iwo ansaka pakati pa acibale na axamwali awo, mbwenye iye hakhali na iwo tayu! Natenepa Zuze na Mariya abwerera ku Yerusalemu kansakasaka.

Pakumalisira iwo agumana Yezu pano na apfunzisi. Iye akhaabvesera na akhaacita mabvunzo. Na anthu onsene adzumatirwa na kuona nzeru zikhali na Yezu. Mbwenye Mariya alonga: ‘Mwana, thangwi yanji waticitira pyenepi? Babako na ine tanenseka kakamwe na kukusaka.’

Yezu atawira: ‘Kodi thangwi yanji mwandisaka? Kodi nee mukhadziwa kuti ndisafunika kukhala m’nyumba ya Babanga?’

Inde, Yezu akhakomerwa kukhala m’mbuto yakuti iye mbadakwanisa kupfunza pya Mulungu. Kodi ife nkhabe kufunikambo kupibva tenepa? Kwawo ku Nazareti, Yezu akhaenda sumana na sumana ku misonkhano towera kukalambira. Nakuti nzidzi onsene akhabvesera, apfunza pinthu pizinji pya Bibilya. Tendeni tikhale ninga Yezu na kutowerera citsanzo cace.