ONANI maunyolo ana Paulu, na yang’anani nyankhondo Waciroma anamuonera. Paulu ndi nyakaidi ku Roma. Paulu asadikhira mpaka Kaisara wa ku Roma atonge pinafuna kucitwa iye. Mukakhala iye nyakaidi, anthu akhatawiriswa kuenda kamuona.

Ntsiku zitatu pakumala Paulu kufika ku Roma, iye atumiza mphangwa towera atsogoleri angasi Aciyuda aende kamuona. Ninga phindu, Ayuda azinji a ku Roma aenda. Paulu amwaza mphangwa kwa iwo thangwi ya Yezu na pya umambo wa Mulungu. Anango akhulupira mbadzakhala Akristu, mbwenye anango hadakhulupira tayu.

Paulu amwazambo mphangwa kwa anyankhondo akusiyana akakhala na basa yakumuonera. M’piaka piwiri pidakhala iye kweneko ninga nyakaidi, Paulu amwaza mphangwa kwa onsene akakwanisa iye. Ninga phindu, ngakhale banja ya Kaisara yabva mphangwa zadidi za Umambo, na anango a iwo adzakhala Akristu.

Mbwenye mbani mulendo uyu analemba pa meza? Kodi mungakwanise kulotera? Inde, ndi Timoti. Timoti akadakhalambo nkaidi thangwi ya kumwaza mphangwa za pya Umambo, mbwenye iye akhali pontho m’ufulu. Iye aenda kweneko kaphedza Paulu. Kodi musadziwa pinalemba Timoti? Tendeni tione.

Kodi musakumbuka mizinda ya Filipi na Efesu m’Mbiri 110? Paulu aphedza kutomesa mipingo Yacikristu m’mizinda ineyi. Mphapo, mukakhala iye nkaidi, Paulu alembera matsamba Akristu aneale. Matsamba anewa ali m’Bibilya, na iwo asacemerwa Aefesu na Afilipi. Paulu mphapo akhapanga Timoti pikhafunika kulembera axamwali awo Acikristu ku Filipi.

Afilipi akhala akukoma ntima kakamwe na Paulu. Iwo antumizira muoni ku kaidi, natenepa Paulu apereka takhuta kwa iwo thangwi ya pyenepi. Epafrodito ndi mamuna adaenda na muoni. Mbwenye iye aduwala kakamwe duzi na kufa. Mbwenye iye akhala pontho mwadidi dzololo towera kubwerera kunyumba. Iye mbadadzakwata tsamba ire ya Paulu na Timoti mukabwerera iye ku Filipi.

Mukakhala Paulu nkaidi iye alemba matsamba anango mawiri ali na ife m’Bibilya. Ibodzi towera Akristu a ku nzinda wa Kolose. Kodi musadziwa kuti isacemerwa tani? Akolose. Inango ndi tsamba idalembera iye xamwali wace wa paduzi anacemerwa Filemoni akakhalambo ku Kolose. Tsamba isalonga pya Onesimu, nzakazi wa Filemoni.

Onesimu akhadathawa Filemoni mbaenda ku Roma. M’njira inango Onesimu abva kuti Paulu akhali nkaidi kweneko. Iye aenda kamuona, na Paulu amwaza mphangwa kwa Onesimu. Mwakukhonda dembuka Onesimu adzakhalambo Nkristu. Mphapo Onesimu atsukwala thangwi ya kuthawa kwace. Natenepa, kodi musadziwa pidalemba Paulu m’tsamba ineyi kwa Filemoni?

Paulu aphemba Filemoni kuti alekerere Onesimu. Paulu alemba: ‘Ine ndikumbweza kwa iwe. Mbwenye cincino iye si nzakazi wako basi tayu. Iye ndi mbalembo wadidi Wacikristu.’ Mudabwerera Onesimu ku Kolose, iye akwata matsamba mawiri anewa, ibodzi kwa Akolose na inango kwa Filemoni. Tingakwanise kunyerezera kuti Filemoni akomerwa tani mudadziwa iye kuti nzakazi wace adzakhala Nkristu.

Mudalembera Paulu Afilipi na Filemoni, iye akakhaladi na mphangwa zadidi. Paulu apanga Afilipi: ‘Ndiri kukutumizirani Timoti. Mbwenye mwakukhonda dembuka ndinadzakuonanimbo.’ Kwa Filemoni iye alemba: ‘Khunganya mbuto towera ndikhale mwenemo.’

Mudasudzulwa Paulu, iye aenda kaona abale ace Acikristu amuna na akazi m’mbuto zizinji. Mbwenye m’kupita kwa nzidzi Paulu acitwa pontho nyakaidi ku Roma. Paulendo uno iye akhadziwa kuti mbadadzaphiwa. Natenepa iye alembera Timoti mbamphemba kuti aende mwakucimbiza kukakhala iye. Paulu alemba: ‘Ine ndakhala wakukhulupirika kwa Mulungu, na Mulungu anadzandipasa sagwati.’ Piaka pingasi mudamala Paulu kuphiwa, Yerusalemu afudzwa pontho, paulendo uno na Aroma.

Mbwenye m’Bibilya muli na pinango pizinji. Yahova Mulungu atuma mpostolo Juwau kulemba mabukhu akumalisa a Bibilya, kuphataniza bukhu ya Chidziwiso. Bukhu ineyi ya Bibilya isalonga pya ntsogolo. Cincino tendeni tipfunze pidakoyerwa ntsogolo.