YANG’ANANI! bote iri pa nyatwa! Ikugwandika m’maphindi! Kodi musaona anthu adanumphira m’madzi? Anango amala fika kugombe. Kodi ule pale ndi Paulu? Tendeni tione kuti ndi ninji pidancitikira.

Kumbukani kuti Paulu akhala piaka piwiri nkaidi ku Cesareya. Buluka penepo iye na anyakaidi anango aikhwa m’bote, mbatoma ulendo wa kuenda ku Roma. Mukhapita iwo duzi na ntsuwa ya Krete, conzi cakugoswa caamenya. Mphepo yapepesa pikulu pene kwakuti amuna hadakwanisa kutsogolera bote. Na iwo hadakwanisa kuona dzuwa namasikati peno nyenyezi namasiku. Pakumalisira, pakupita ntsiku zizinji, ale akakhala m’bote ataya cidikhiro cakupulumuswa.

Buluka penepo Paulu alimira mbalonga: ‘Nee mbodzi wa imwe anadzaluza umaso wace; bote basi ndi inafuna kudzaluzika. Thangwi masiku a dzulo anju wa Mulungu abwera kuna ine mbandipanga, “Paulu, leka gopa! Iwe usafunika kulimira pamaso pa ntongi Waciroma Kaisara. Na Mulungu anadzapulumusa onsene adapakira na iwe m’bote.”’

Cifupi na pakati pa masiku a ntsiku ya 14 kutomera padatoma conzi, amalinyero aona kuti madzi akakhala akukhonda zika kakamwe! Thangwi ya kugopa kumenya miyala m’cidima, iwo agwesera manangula awo. Mangwana mwace namacibese iwo aona ntunda. Iwo atonga kukwata bote mbaenderatu nayo ku gombe kule.

Mwandimomwene, mudafika iwo duzi na gombe, bote yamenya nthunda yatseca mbitcerera. Buluka penepo mabimbi atoma kumenya bote, na iyo yatoma kugwandika m’maphindi. Tsacikunda wa anyankhondo akhaayang’anira alonga: ‘Imwe monsene munakwanisa kusambirira khalani akutoma kunumphira m’bara mbamusambirira mpaka kugombe. Na imwe anango numphani nduli mwawo, mbamukwata maphindi mangasi a bote towera akuphedzereni.’ Pyenepi ndipyo pidacita iwo. M’njira ineyi anthu onsene akakhala m’bote akukwana 276 afika kugombe mwakupulumuka, ninga mudapikira anju.

Ntsuwa isacemerwa Malita. Anthu a kweneko akhali akukoma ntima kakamwe, na iwo atsalakana ale akakhala m’bote. Mudacita mbwenye makhaliro a ntsiku, Paulu aikhwa m’bote inango mbaendeswa ku Roma.