Nyerezerani cakucitika ici: Dhavidhi ali kufamba na motokala mu nseu wakuti nkhabe kuudziwa mwadidi. Pidzindikiro pya nseu pisapangiza kuti iye atayika. Dhavidhi apita na nseu wakuti siwo tayu, cincino ali kutali kakamwe.

Mbamudakhala Dhavidhi, mbamudacitanji?

Muli na maonero mangasi:

1. Kuphemba pitsogolero.

2. Kuona mapa, peno kuphatisira GPS.

3. Kupitiriza kucita ulendo na cidikhiro cakuti munagumana nseu unafuna imwe.

Maonero C nee anaphedza.

Maonero B ndi adidi kakamwe kupita maonero akutoma. Natenepa, kuphatisira mapa peno GPS mphyadidi pakucita ulendo, kunakuphedzani toera kukhonda kutayika.

Bhibhlya inakwanisa kukuphedzani munjira ibodzi ene!

Bukhu ineyi yakuti isagumanika mu dziko yonsene inakwanisa

• kutsogolera umaso wanu m’midzidzi ya nyatwa

• kukuphedzani toera kudingika mwekhene na kukhala munthu wadidi

• kukupangizani kuti munakhala tani na umaso wakutsandzayisa kakamwe

Mu ndzidzi unapfundza ife kulonga mbitiri ana, tisacita mibvundzo.

• Thangwi yanji thambo ndi yakuthundwira?

• Kodi nyenyezi zacitwa nanji?

Mu ndzidzi unakula ife tisatoma kucita mibvundzo thangwi ya pinthu pinaona ife.

• Thangwi yanji pasaoneka pinthu pyakuipa?

• Thangwi yanji anthu asafa?

Ndiye tani khala matawiro a mibvundzo ineyi asagumanika m’Bhibhlya?

Anthu azinji asalonga kuti Bhibhlya yadzala na pithankano, pontho ndi yakale kakamwe peno ndi yakunentsa kakamwe kuibvesesa. Mwandimomwene, Bhibhlya ndi yakunentsadi kuibvesesa, peno ndi pire pinadziwa anthu thangwi ya iyo? Kodi anthu asapangwa mwakuphonyeka?

Mwacitsandzo, anthu asanyerezera kuti Bhibhlya isalonga kuti ndi Mulungu akuonera dziko. Kodi pyenepi mphyandimomwene? Pa dziko ino pasacitika pinthu pizinji. Iyo yadzala na nyatwa, mautenda, kufa, utcerengi na pidengwa. Kodi Mulungu waufuni anakwanisa tani kucitisa pinthu pyenepi?

Musafuna kudziwa ntawiro? Panango imwe munadzumatirwa na pinalonga Bhibhlya thangwi ya anaonera dziko!

Ninga mwaona, uphungu unagumanika m’bruxura ino wabuluswa m’Bhibhlya. Mboni za Yahova ziri na cinyindiro cakuti Bhibhlya ndi phata ya pitsogolero pyakunyindirika. Iwo ali na cinyindiro ceneci thangwi Bhibhlya ‘yapumirwa na Mulungu, natenepa ndi yakuphindulisa toera kupfundzisa, kusandika na kulungamisa pinthu pyonsene.’ (2 Timoti 3:16, 17) Cinthu cadidi cakuti munakwanisa kucicita ndi kudinga Bhibhlya, bukhu yakale yakuti isalonga pinthu pyacincino!