1-3. (a) Thangwi yanji mai asafuna kuti mwanace akhale wakucena? (b) Thangwi yanji Yahova asafuna kuti atumiki ace akhale akucena?

NYEREZERANI mai wakuti akukhunganya mwanace toera aende kuxikola. Iye asaona khala mwanace asamba, peno khala nguwo zace ndi zakucena. Pyenepi pisapangiza kuti iye asatsalakana ungumi wa mwanace.

² Babathu Yahova, asafuna kuti tikhale akucena. (Masalmo 18:26) Iye asadziwa kuti pyenepi ndi pyakufunika kakamwe kwa ife. Pontho tingakhala akucena, tisamulemedza.—Ezekyele 36:22; lerini 1 Pedhru 2:12.

 ³ Kodi pisabvekanji kukhala akucena? Pontho thangwi yanji kukhala akucena ndi kwakufunika kwa ife? Matawiro a mibvundzo ineyi anatiphedza kuona khala iripo khundu inafunika ife kusasanyira mu umaso wathu.

4, 5. (a) Ndi ipi thangwi ikulu kakamwe inaticitisa kukhala akucena? (b) Kodi pinthu pidacitwa pisatipfundzisanji thangwi ya maonero a Yahova analonga pya unyai?

⁴ Cinthu cinaticitisa kukhala akucena ndi thangwi yakuti Yahova ndi wakucena. (Levitiko 11:44, 45) Yahova ndi citsandzo cathu, pontho tisafuna ‘kuntowezera.’—Aefesi 5:1.

⁵ Pinthu pidacitwa na Yahova pisapangiza kuti unyai ndi wakufunika kakamwe. Pinthu pinango pidacita Yahova pisakwanisa kucitisa kuti muya na madzi pikhale pyakucena. (Yeremiya 10:12) Nyerezerani njira zizinji zinapangiza kuceneseka kwa dziko maseze anthu asaipswipisa. Mwacitsandzo, Yahova acita mikrobhyu, pyakuti ndi ping’ono kakamwe pyakuti nee tinakwanisa kupiona na maso. Mikrobhyu zinango zisakwanisa kucinja pinthu pyakuti pinaikha pangozwi ungumi kudza pinthu pyadidi. Pyenepi mphyakudzumatirisa. Asiyentista asaphatisira mikrobhyu zenezi toera kucenesa mbuto zinango za dziko.—Aroma 1:20.

6, 7. Kodi Mwambo wa Mose usapangiza tani kuti atumiki a Yahova asafunika kukhala akucena?

⁶ Cinthu cinango cinaticitisa kukhala akucena ndi Ntemo udapereka Yahova kuna Aizraeli kubulukira kwa Mose. Mwacitsandzo, Mbumba ikhafunika kukhala yakucena toera Yahova atawire ulambiri wawo. Pa Ntsiku ya Kufudza Madawo, nyantsembe wankulu akhafunika kusamba kawiri. (Levitiko 16:4, 23, 24) Pontho  nyantsembe unango mbadzati kupita toera kupereka ntsembe, iye akhafunika kusamba manja na miyendo. (Eksodo 30:17-21; 2 Pya dziko ya Israele 4:6) Midzidzi inango, munthu wakuti nee akhabvera ntemo wa Mulungu unalonga pya unyai akhafunika kuphiwa.—Levitiko 15:31; Numero 19:17-20.

⁷ Mitemo idapereka Yahova kuna Aizraeli isatipfundzisa pizinji thangwi ya iye. (Malakiya 3:6) Iyo isapangiza pakweca kuti atumiki a Mulungu asafunika kukhala akucena. Ndiye tani lero? Yahova nee acinja. Lero iye asadikhirambo kuti atumiki ace akhale akucena.—Tiyago 1:27.

8. M’maonero a Yahova, pisabvekanji kukhala munthu wakucena?

⁸ M’maonero a Yahova, kukhala munthu wakucena pisabveka pizinji kupiringana kusamba, kufula nguwo zathu na kucenesa nyumba yathu. Pisaphataniza kukhala akucena mu pinthu pyonsene pinacita ife mu umaso wathu, kulambira kwathu, makhaliro athu na manyerezero athu. Cincino tendeni tidinge makhundu anewa.

9, 10. Tisafunika kucitanji toera ulambiri wathu ukhale wakucena?

⁹ Ulambiri wakucena. Nee tisafunika kucita khundu ya uphemberi wauthambi. Pikhali Aizraeli mu ubitcu ku Bhabhilonya, iwo akhadazungulirwa na anthu akuti akhalambira alungu authambi. Mprofeta Izaiya akhadalonga mwanyapantsi kuti Aizraeli mbadabwerera ku Izraeli toera kukhazikisa papswa ulambiri wakucena. Yahova aapanga: ‘Lekani phata pinthu pyakunyanyasa! Bulukani kweneko mbamukhala akucena.’ Ulambiri wawo kuna Mulungu nee ukhafunika kubvungazwa na pipfundziso, macitiro na misambo ya uphemberi wauthambi.—Izaiya 52:11.

 ¹⁰ Lero, Akristu andimomwene nee asacitambo khundu ya uphemberi wauthambi. (Lerini 1 Akorinto 10:21.) Pa dziko yonsene yapantsi, misambo mizinji ya anthu na pinakhulupira iwo pisabulukira mu pipfundziso pya uphemberi wauthambi. Mwacitsandzo, anthu azinji asakhulupira kuti munthu angafa ciripo cinabuluka mbicipitiriza kukhala maso, na thangwi ineyi pana misambo mizinji inacita anthu thangwi yakukhulupira pyenepi. (Koelete 9:5, 6, 10) Akristu asafunika kucalira misambo ineyi. Panango, acibale athu anatikakamiza toera kucita khundu m’misambo ineyi. Mbwenye nakuti tisafuna kukhala akucena pamaso pa Yahova, nee tisafunika kutawira mikakamizo ineyi.—Mabasa 5:29.

11. Tinapangiza tani kuti tiri na makhaliro akucena?

¹¹ Makhaliro akucena. Toera tikhale akucena pamaso pa Yahova, tisafunika kucalira ntundu onsene wa ulukwali. (Lerini Aefesi 5:5.) Yahova asatipanga toera ‘kuthawa pyaulukwali.’ Iye asalonga pakweca kuti ale anacita pyaulukwali mbakhonda kutcunyuka “nee anadzapita mu Umambo wa Mulungu.”—1 Akorinto 6:9, 10, 18; onani Cidzindikiro Cakumalisa 22.

12, 13. Thangwi yanji manyerezero athu asafunika kukhala akucena?

¹² Manyerezero akucena. Kazinji kene munthu asacita pinanyerezera iye. (Mateu 5:28; 15:18, 19) Manyerezero akucena anatitsogolera toera kucita pinthu pyadidi. Mbwenye nakuti ndife akusowa ungwiro, midzidzi inango tinakhala na manyerezero akuipa. Manyerezero anewa angatoma tisafunika kuacinja mwakucimbiza. Tingakhonda kucita pyenepi, mukupita kwa ndzidzi ntimathu unasiya kukhala wakucena mbatitoma kucita pinthu pikhanyerezera ife. Ndi thangwi yace tisafunika kudzadza manyerezero athu na pinthu pyakucena.  (Lerini Afilipi 4:8.) Tisafunikambo kucalira ubalangazi unapangiza pyaulukwali na pyauphanga. Tisafunika kucita mphole-mphole na pinthu pinaleri ife, pinaona ife na pinacedza ife.—Masalmo 19:8, 9.

¹³ Toera tipitirize kufuniwa na Mulungu, kulambira kwathu, makhaliro athu na manyerezero athu asafunika kukhala akucena. Mbwenye Yahova asafunambo kuti manungo athu akhale akucena.

14. Thangwi yanji mphyakufunika kutsalakana mwadidi manungo na pinthu pyathu?

¹⁴ Tingasamba, pontho tingacenesa pinthu pya panyumba pathu, ndi udidi kuna ife na kuna anango. Tinakhala akutsandzaya, pontho anango anakomerwa kukhala cifupi na ife. Mbwenye pana thangwi inango yakufunika kakamwe inaticitisa kukhala akucena. Tingakhala akucena tisapasa mbiri Yahova. Nyerezerani basi: Tingaona mwana wakuti ndzidzi onsene nkhabe samba, pontho asabvala nguwo zakupswipa, pyenepi pinaticitisa kunyerezera anyakubalace. Munjira ibodzi ene, tingakhonda kutsalakana mwadidi manungo athu, anthu anakhala na manyerezero akuipa thangwi ya Yahova. Paulu alonga: “Ife nkhabe kucita cinthu cakuti cinagwegwedusa munthu, toera anthu akhonde kuona madodo mu utumiki wathu; mbwenye munjira zonsene ife tisapangiza kuti ndife atumiki a Mulungu.”—2 Akorinto 6:3, 4.

15, 16. Tisafunika kucitanji toera manungo na nguwo zathu pikhale pyakucena?

¹⁵ Manungo na nguwo zathu. Ndzidzi onsene tisafunika kukhala akucena. Mwacitsandzo, tisadziwa kuti kusamba ndi kwakufunika, pingakwanisika tisafunika kusamba ntsiku zonsene. Tisafunika kusamba manja  na sabau, makamaka tingafuna kuphika, kudya, tingamala kuphatisira cimbuzi peno tingaphata cinthu cakupswipa. Kusamba manja kusaoneka ninga cinthu cing’ono, mbwenye ndi kwakufunika kakamwe toera kumalisa mabhakiterya na kucalira mautenda. Tingasowa cimbuzi, tinakwanisa kucita ninga Aizraeli. Iwo nee akhali na cimbuzi, ndi thangwi yace angafuna kuenda sintina, akhaenda mbuto yakuti ikhali kutali na mamidzi peno mbuto ikhatunga iwo madzi, pontho angamala akhafunika kufikira phondo yawo.—Deuteronomyo 23:12, 13.

¹⁶ Nguwo zathu nee zisafunika kukhala zakupambulika peno zakudhula kakamwe. Basi ene zisafunika kukhala zakucena na zamaonekero adidi. (Lerini 1 Timoti 2:9, 10.) Ndzidzi onsene maonekero athu asafunika kupasa mbiri Yahova.—Tito 2:10.

17. Thangwi yanji panyumba pathu na pinthu pyathu pisafunika kukhala pyakucena?

 ¹⁷ Panyumba pathu na pinthu pyathu. Mwakukhonda tsalakana mbuto inakhala ife, panyumba pathu pasafunika kukhala pakucena. Motokala wathu, njinga yathu na pinthu pinango pisafunika kukhala pyakucena, makamaka tingaenda kumisonkhano na m’basa yakumwaza mphangwa. Thangwi tingaenda kamwaza mphangwa, tisalonga na anthu pya paraizu, mbuto yakuti inadzakhala yakucena. (Luka 23:43; Apokalipse 11:18) Tingatsalakana mwadidi pinthu pyathu, pontho panyumba pathu pangakhala pakucena tinapangiza kuti tiri kukhunganyika toera kukhala n’dziko ipswa.

18. Thangwi yanji mbuto yathu yakulambira isafunika kukhala yakucena?

¹⁸ Mbuto yathu yakulambira. Tinapangiza kuti unyai ndi wakufunika kuna ife tingatsalakana mwadidi mbuto inaphatisira ife toera kucita misonkhano ya mpingo, ya cisa na ya gawo. Anthu angaenda ku Nyumba ya Umambo paulendo wakutoma, asakwanisa kuona kuti ndi yakucena. Pyenepi pisapasa mbiri Yahova. Natenepa tonsene tisafunika kuphedzera kucenesa Nyumba yathu ya Umambo na mu ndzidzi unasasanyirwa iyo.—2 Pya dziko ya Israele 34:10.

19. Ndi misambo ipi inafunika ife kucalira?

¹⁹ Bhibhlya nkhabe ndandanda ya misambo yonsene yakuipa inafunika ife kucalira. Mbwenye iri na midida yakuti isatiphedza kudziwa maonero a Yahova thangwi ya pinthu pyenepi. Mwacitsandzo, kuna Yahova mphyakuipa kumwa mwakupiringana midida, kufumali peno kutomali fodya na kuphatisira mitombwe yakuledzeresa. Khala  ndife axamwali a Mulungu, tinacalira kucita pinthu pyenepi. Thangwi yanji? Thangwi tisalemedza umaso. Misambo ineyi isaikha pangozwi umaso wathu, isaphekesa ungumi wathu, pontho isaphekesambo anthu anakhala cifupi na ife. Anthu azinji asasiya misambo ineyi thangwi nkhabe kufuna kuikha pangozwi ungumi wawo. Nakuti ndife axamwali a Yahova, cinthu cakufunika kakamwe cinaticitisa kusiya misambo ineyi ndi ufuni wathu kuna Mulungu. Ntsikana m’bodzi alonga: “Na ciphedzo ca Yahova ndakwanisa kukhala na umaso wadidi mbandisiya misambo yanga. . . . Ndisaona kuti nee mbindidakwanisa kucita pyenepi ndekhene.” Cincino tendeni tione midida mingasi ya m’Bhibhlya yakuti isaphedza anthu toera kusiya misambo yawo yakuipa.

20, 21. Ndi misambo ipi yakuti Yahova asafuna kuti tiicalire?

²⁰ “Nakuti tiri na mapikiro anewa, tisafunika kuceneseka, mbatisiya pinthu pyonsene pinapswipisa manungo athu na manyerezero athu, mbatithimiza kukhala akucena munjira inapangiza kuti tisagopa Mulungu.” (2 Akorinto 7:1) Yahova asafuna kuti tisiye misambo yakuipa yakuti inaphekesa manyerezero na manungo athu.

²¹ Cinthu cibodzi cakufunika kakamwe cinaticitisa “kuceneseka, mbatisiya pinthu pyonsene pinapswipisa” cisalongwa pa lemba ya 2 Akorinto 6:17, 18. Yahova asatipanga: “Lekani kuphata pontho pinthu pyakupswipa.” Buluka penepo apikira: “Ndinadzakutambirani. Pontho ine ndinadzakhala babanu, imwe munadzakhala ananga acimuna na acikazi.” Pyenepi pisapangiza kuti Yahova anadzatifuna ninga baba anafuna anace, basi ene tingacalira cinthu consene cakuti cinatipswipisa peno cinaticitisa kukhala akukhonda cena.

22-25. Ndi midida ipi ya Bhibhlya yakuti inakwanisa kutiphedza toera kucalira misambo yakuipa?

 ²² “Funa Yahova Mulungu wako na ntima wako onsene, na umaso wako onsene na ndzeru zako zonsene.” (Mateu 22:37) Anewa ndi matongero akufunika kakamwe kupiringana onsene. (Mateu 22:38) Yahova athema kuti tinfune na ntimathu onsene. Mphapo tinapangiza tani kuti tisanfuna na ntima onsene mu ndzidzi ubodzi ene mbaticita pinthu pyakuti pinaikha umaso wathu pangozwi peno kuphekesa ongo wathu? Na thangwi ineyi, tisafunika kucita pyonsene pinakwanisa ife toera kulemedza umaso udatipasa iye.

²³ ‘Yahova asapasa anthu onsene umaso, muya na pinthu pyonsene.’ (Mabasa 17:24, 25) Xamwali wanu angakupasani muoni wakufunika kakamwe, kodi munautaya peno kuugudjula? Umaso ndi muoni wakufunika kakamwe udatipasa Yahova. Na thangwi ineyi tisaulemedza kakamwe, pontho tisauphatisira munjira yakuti inapasa mbiri Yahova.—Masalmo 36:9.

²⁴ “Funa ndzako ninga iwe ene.” (Mateu 22:39) Misambo yakuipa nee isaphekesa ife basi. Isaphekesambo ale anakhala cifupi na ife, kazinji kene anthu anafuna ife kakamwe. Mwacitsandzo, munthu anakhala nyumba ibodzi ene na nyakufumali anakwanisa kukhala na utenda basi ene thangwi ya utci. Mbwenye tingasiya misambo yakuipa, tisapangiza kuna ale anakhala na ife kuti tisaafuna.—1 Juwau 4:20, 21.

²⁵ “Pitiriza kuakumbusa kuti asafunika kubvera mautongi na anyakutonga.” (Tito 3:1) Madziko mazinji, mwambo nee usatawirisa kukhala peno kuphatisira mitombwe yakuledzeresa. Nakuti Yahova asatipanga toera tibvere mautongi, ife tisabvera mitemo ineyi.—Aroma 13:1.

26. (a) Tisafunika kucitanji khala tisafuna kukhala axamwali a Yahova? (b) Thangwi yanji tisafunika kuwangisira toera kukhala akucena?

 ²⁶ Khala tisafuna kukhala axamwali a Yahova, tisafunika kucita macinjo tingaona kuti tiri na misambo ineyi. Pontho tisafunika kucita pyenepi mwakucimbiza. Pisanentsa kusiya misambo yakuipa, mbwenye mphyakukwanisika! Yahova apikira kuti anatiphedza. Iye alonga: ‘Ine Yahova, ndine Mulungu wanu, Ule anakupfundzisani toera kubulusa maphindu, Ule anakucitisani kufamba munjira inafunika imwe kufamba.’ (Izaiya 48:17) Tingacita pyonsene pinakwanisa ife toera kukhala akucena, tikupasa mbiri Mulungu.