Kuna ale anafuna Yahova Mulungu na Mafalace, Bhibhlya:

Yezu alonga: “Imwe munadzadziwa undimomwene, pontho undimomwene unadzakusudzulani.” (Juwau 8:32) Nyerezerani kuti mwapibva tani pidapfundza imwe undimomwene unagumanika m’Bhibhlya! Pyakhala pyakutsandzayisa kakamwe kudziwa kuti ngakhale mu dziko ino yakudzala na uthambi mphyakukwanisika kupfundza undimomwene.—2 Timoti 3:1.

Yahova asafuna kuti ife tidziwe undimomwene. Nakuti tisafuna anthu, ife tisafunambo kuapanga undimomwene unoyu. Mbwenye kutumikira Mulungu kusaphataniza pizinji. Tisawangisira toera kukhala maso ninga Akristu thangwi tisalemedza pinalonga Yahova. Yezu afokotoza njira yakufunika yakuti tinakwanisa kupangiza kuna Mulungu kuti tisanfuna. Iye alonga: “Imwe mungabvera mitemo yanga, munadzapitiriza mu ufuni wanga, ninga ine ndisabverambo mitemo ya Babanga mbandipitiriza mu ufuni wace.”—Juwau 15:10.

Yezu asafuna kakamwe Babace, pontho asacita pyonsene pinam’phemba Babace. Tingatowezera Yezu mu umaso wathu, tinadzafuniwa na Yahova, pontho tinadzakhala na kutsandzaya kwa ndimomwene. Yezu alonga: “Cincino imwe musadziwa pinthu pyenepi, mbwenye munakhala akutsandzaya mungapicita.”—Juwau 13:17.

Tisadikhira kuti bukhu ino inakuphedzani toera kucita pinthu mwakubverana na undimomwene unagumanika m’Bhibhlya, pontho toera kukhala na uxamwali na Mulungu. Tisacita phembero toera kufuna kwanu Mulungu kupitirize kukula, pontho “mupitirize kukhala mu ufuni wa Mulungu . . . toera mutambire umaso wakukhonda mala.”—Yuda 21.