NSOLO 1
Ufuni wa Mulungu Ndi Wakwenda na Kwenda
“Kufuna Mulungu ndi kubvera matongero ace; pontho matongero ace nee ndi akulemera.”—1 JUWAU 5:3.
1, 2. Thangwi yanji imwe musafuna Yahova Mulungu?
KODI imwe musafuna Mulungu? Panango, kufuna kwanu Mulungu kwakukulumizani toera kuperekeka kuna iye. Panango musapibva kuti iye ndi Xamwali wanu wapantima. Mbwenye mbamudzati kufuna Yahova, iye akhakufunani kale. Bhibhlya isalonga: “Ife tisafuna, thangwi ndiye adatoma kutifuna.”—1 Juwau 4:19.
2 Nyerezerani pinthu pyonsene pidacita Yahova pinapangiza kuti iye asatifuna. Iye atipasa dziko ino yakubalika toera ikhale mudzi wathu na pyonsene pinafuna ife toera titsandzaye. (Mateu 5:43-48; Apokalipse 4:11) Yahova asafuna kuti tikhale axamwali ace, pontho asatipasa mwai toera kupfundza pya iye. Mu ndzidzi unaleri ife Bhibhlya, tisabvesera pinalonga Yahova. Pontho tingacita phembero, iye asatibvesera. (Masalmo 65:2) Iye asaphatisira nzimu wace wakucena toera kutitsogolera na kutipasa mphambvu. (Luka 11:13) Yahova apereka Mwanace wakufunika toera kutisudzula m’madawo na kufa.—Lerini Juwau 3:16; Aroma 5:8.
3. Tinacitanji toera Yahova akhale xamwali wathu?
3 Nyerezerani pya xamwali wanu wapantima wakuti asakhala na imwe m’midzidzi yakunentsa na yakutsandzayisa. Toera uxamwali wanu ukhale wakuwanga musafunika kuwangisira kakamwe. Munjira ibodzi ene, toera Yahova akhale xamwali wathu wapantima tisafunikambo kuwangisira. Natenepa, uxamwali wathu na Yahova unakwanisa kukhala wakwenda na kwenda. Bhibhlya isatipanga: ‘Pitirizani kukhala mu ufuni wa Mulungu.’ (Yuda 21) Tinacita tani pyenepi? Bhibhlya isatawira: “Kufuna Mulungu ndi kubvera matongero ace; pontho matongero nee ndi akulemera.”—1 Juwau 5:3.
“KUFUNA MULUNGU” KUSABVEKANJI
4, 5. (a) “Kufuna Mulungu” kusabvekanji? (b) Mwatoma tani kufuna Yahova?
4 Kodi Bhibhlya isafuna kulonganji na mafala akuti “kufuna Mulungu”? Mafala anewa asabveka, tayu kufuniwa kwathu na Mulungu, mbwenye kunfuna kwathu. Kodi musakumbuka ndzidzi udatoma imwe kufuna Yahova?
Mungaperekeka kuna Yahova mbamubatizwa, munapangiza kuti musanfuna, pontho musafuna kumbvera kwenda na kwenda
5 Musakumbuka kuti mwapibva tani mu ndzidzi udapfundza imwe kuti Yahova asafuna kuti mukhale kwenda na kwenda mu dziko ipswa? Imwe mwapfundza pyonsene pidacita Yahova toera pyenepi pikwanisike, pontho mwadzindikira kufunika kwa muoni ukulu udatipasa Yahova mudatuma iye Mwanace mbabwera pa dziko. (Mateu 20:28; Juwau 8:29; Aroma 5:12, 18) Mwakukhonda penula, mu ndzidzi udapfundza imwe kuti Yahova asakufunani, imwe mwakulumizika toera kutoma kunfunambo.—Lerini 1 Juwau 4:9, 10.
6. (a) Kufuna munthu kusaphatanizanji? (b) Kufuna kwanu Mulungu kwakukulumizani toera kucitanji?
6 Mbwenye mabvero anewa akufuna Mulungu basi ene kukhali kutoma. Mwacitsandzo, tingafuna munthu tisacita pizinji kupiringana kulonga kuti “ndisakufuna.” Ufuni unatikulumiza toera kucita pinthu pyakuti pinatsandzayisa munthu unoyu. Munjira ibodzi ene, kufuna kwanu Yahova kunakukulumizani kucita pinthu toera kuntsandzayisa. Mu ndzidzi ukhakula ufuni wanu, panango mwakulumizika toera kuperekeka mbamubatizwa. Pyenepi pisabveka kuti, imwe mwapikira kutumikira Yahova kwenda na kwenda. (Lerini Aroma 14:7, 8.) Munakwanirisa tani pikiro ineyi?
‘TISABVERA MATONGERO ACE’
7. (a) Khala ife tisafuna Mulungu, tinacitanji? (b) Ndi api matongero anango a Yahova?
7 Nakuti tisafuna Yahova, ‘ife tisabvera matongero ace.’ Bhibhlya isatipfundzisa kuti toera kubvera Yahova tisafunika kucita pinafuna iye. Mwacitsandzo, iye asatipanga kuti mphyakuipa kuledzera, kuba, kulonga uthambi, kupita m’mabonde na munthu wakuti nee ndi ndzathu wa m’banja, peno kulambira munthu unango m’mbuto mwakulambira Yahova.—1 Akorinto 5:11; 6:18; 10:14; Aefesi 4:28; Akolose 3:9.
8, 9. Tinadziwa tani pinafuna Yahova mu pinthu pyakuti nkhabepo ntemo wa m’Bhibhlya unalonga pyenepi? Perekani citsandzo.
8 Mbwenye toera kukomeresa Yahova, nee tisafunika kubvera matongero ace basi. Iye nee atipasa ndandanda ya mitemo toera kuiphatisira mu pinthu pyonsene pinacita ife mu umaso wathu. Natenepa midzidzi inango nkhabe gumanika m’Bhibhlya ntemo unalonga pinafuna kucita ife. Mphapo tinacita tani cisankhulo cadidi? (Aefesi 5:17) M’Bhibhlya musagumanika midida. Midida ineyi ndi undimomwene wakutoma wakuti usatipfundzisa maonero a Yahova. Pontho mu ndzidzi unaleri ife Bhibhlya tisadziwa Yahova ninga Munthu. Ife tisapfundza kuti iye asanyerezera tani, kuphatanizambo pinthu pinafuna iye na pinaida iye.—Lerini Masalmo 97:10; Misangani 6:16-19; onani Cidzindikiro Cakumalisa 1.
9 Mwacitsandzo, tinasankhula tani maprogramu anafuna ife kuona mu televizau peno mu interneti? Yahova nkhabe kutipanga pyonsene pinafunika ife kucita mu pinthu pyenepi, mbwenye atipasa midida yakuti inatiphedza toera kucita pisankhulo pyadidi. Ubalangazi uzinji lero wadzala na pinthu pyauphanga na pyaulukwali. Bhibhlya isalonga kuti Yahova ‘asaida anthu anafuna uphanga,’ pontho “anadzatonga anthu anacita ulukwali.” (Masalmo 11:5; Ahebheri 13:4) Midida ineyi inatiphedza tani toera kucita pisankhulo pyadidi? Tisafunika kucalira cinthu cinaida Yahova peno cinaona iye ninga cakuipa.
10, 11. Thangwi yanji tisafunika kubvera Yahova?
10 Thangwi yanji tisafunika kubvera Yahova? Ife nee tisacita pyenepi toera kucalira kutcunyuswa peno kuona nyatwa thangwi ya pisankhulo pyakuipa. (Agalata 6:7) Tisabvera Yahova thangwi tisanfuna. Ninga mwana anafuna kutsandzayisa babace, ife tisafuna kutsandzayisa Babathu wakudzulu. Mphyadidi kakamwe kudziwa kuti Yahova asatsandzaya na pinacita ife!—Masalmo 5:12; Misangani 12:2; onani Cidzindikiro Cakumalisa 2.
11 Ife nee tisabvera Yahova basi ene pinthu pingakhala mwadidi peno khala nkhabepo njira inango. Pontho nee tisasankhula mitemo na midida toera kubvera, inango mbatikhonda kuibvera. (Deuteronomyo 12:32) M’mbuto mwace, tisabvera Yahova mu pinthu pyonsene, ninga nyamasalmo adalonga: ‘Ndisakomerwa na kubvera matongero anu, thangwi ndisaafuna na ntima wanga onsene.’ (Masalmo 119:47; Aroma 6:17) Ife tisafuna kukhala ninga Nowa adapangiza ufuni kuna Yahova mbacita pyonsene pidampanga iye. Bhibhlya isalonga kuti Nowa ‘acita ninga mudapangirwa iye.’ (Genesi 6:22) Kodi musafuna kuti Yahova alongembo pyenepi kuna imwe?
12. Tinatsandzayisa tani Yahova?
12 Ndi mabvero api anakhala na Yahova tingambvera? ‘Ntima wace’ usatsandzaya. (Misangani 11:20; 27:11) Nyerezerani basi! Ife tisatsandzayisa Nciti wa kudzulu na pantsi mu ndzidzi unambvera ife. Mbwenye iye nkhabe kutikakamiza toera kucita pyenepi. M’mbuto mwace, iye atipasa ufulu wakusankhula. Pyenepi pisabveka kuti ife tiri na ufulu wakusankhula kucita pinthu pyadidi peno pyakuipa. Yahova asafuna kuti kunfuna kwathu kutikulumize toera kucita pisankhulo pyadidi mbatikhala na umaso wadidi.—Deuteronomyo 30:15, 16, 19, 20; onani Cidzindikiro Cakumalisa 3.
“MATONGERO ACE NEE NDI AKULEMERA”
13, 14. Tisadziwa tani kuti matongero a Mulungu nee ndi akunentsa kakamwe toera kuabvera? Perekani citsandzo.
13 Ndiye tani khala tisanyerezera kuti kubvera Yahova ndi kwakunentsa kakamwe, pontho kuti nee kusatipasa ufulu? Bhibhlya isalonga: “Matongero ace nee ndi akulemera.” (1 Juwau 5:3) Fala Yacigerego yakuti ‘kulemera’ isaphatisirwa toera kulonga mitemo yakunentsa kakamwe kuibvera peno anthu anatonga andzawo mwakuipa. (Mateu 23:4; Mabasa 20:29, 30) Matongero a Yahova nkhabe ‘kulemera,’ peno nkhabe nentsa toera kuabvera. Iye nee asadikhira kuti ticite pinthu pyakuti nee tinapikwanisa.
14 Mwacitsandzo, nyerezerani kuti muli kuphedza xamwali wanu wakuti ali kufuluka. Iye amala kupaka pinthu pyace pyonsene m’mabokosi. Mabokosi anango ndi akululupa, mbwenye anango ndi akulemera kakamwe akuti asafunika kuthukulwa na anthu awiri. Kodi xamwali wanu mbadakuphembani toera muthukule bokosi yakulemera mwekhene? Nkhabe. Thangwi yanji? Thangwi iye nkhabe funa kuti imwe muthabuke. Ninga xamwali unoyu, Yahova cipo anatiphemba kucita cinthu cakunentsa kakamwe. (Deuteronomyo 30:11-14) Yahova asadziwa pinakwanisa ife kucita. Iye ‘asadziwa kuti tacitwa nanji; asakumbuka kuti ndife mataka basi.’—Masalmo 103:14.
15. Thangwi yanji tiri na cinyindiro cakuti matongero a Yahova asatiphedza?
15 Mose apanga Aizraeli kuti matongero a Yahova mbadaaphedza ‘kukhala mwadidi,’ pontho mbadaabvera ‘mbadapiritirza kukhala maso.’ (Deuteronomyo 5:28-33; 6:24) Munjira ibodzi ene, lero pyonsene pinatiphemba Yahova toera kucita ndi toera tikhale na umaso wadidi. (Lerini Izaiya 48:17.) Ndzidzi onsene, Babathu Yahova asadziwa pinthu pyakuti pinatiphedza toera tikhale akutsandzaya. (Aroma 11:33) Bhibhlya isalonga: “Mulungu ndi ufuni.” (1 Juwau 4:8) Pyenepi pisabveka kuti pyonsene pinalonga Yahova na pinacita iye pisakulumizwa na ufuni.
16. Tisadziwa tani kuti tinakwanisa kubvera Yahova ngakhale ndife akusowa ungwiro, pontho tikukhala n’dziko yakuipa?
16 Midzidzi inango mphyakunentsa kubvera Mulungu. Ife tikukhala n’dziko yakuipa yakuti isatongwa na Dyabo. Iye asakulumiza anthu toera kucita pinthu pyakuipa. (1 Juwau 5:19) Nakuti ndife akusowa ungwiro, tisathimbanambo na manyerezero na mabvero akuti anaticitisa kukhonda kubvera Mulungu. (Aroma 7:21-25) Mbwenye kufuna kwathu Yahova kusatipasa mphambvu toera kucita pinthu pyadidi. Iye asaona kuwangisira kwathu toera kumbvera, pontho asatipasa nzimu wace wakucena toera kutiphedza. (1 Samwele 15:22, 23; Mabasa 5:32) Nzimu wakucena unatiphedza kukulisa makhaliro akuti anatiphedza kubvera Yahova mwakukhonda nentsa.—Agalata 5:22, 23.
17, 18. (a) Tinadzapfundzanji m’bukhu ino? (b) Tinapfundzanji mu nsolo unatowera?
17 M’bukhu ino, tinadzapfundza kuti tinatsandzayisa tani Yahova. Tinadzapfundzambo kuti tinaphatisira tani midida ya m’Bhibhlya mu umaso wathu. Kumbukani kuti Yahova nee asatikakamiza toera kumbvera. Tingasankhula kukhala akubvera, tinakhala na umaso wadidi, pontho tinadzakhala na tsogolo yakutsandzayisa. Cinthu cakufunika kakamwe ndi cakuti kubvera kwathu Mulungu kusapangiza kuti tisanfuna kakamwe.—Onani Cidzindikiro Cakumalisa 4.
18 Toera kutiphedza kudziwa cadidi na cakuipa, Yahova atipasa cikumbuntima. Tingapfundzisa cikumbuntima cathu, ico cinatiphedza ‘kubvera matongero ace.’ Kodi cikumbuntima ninji, pontho tinacipfundzisa tani? Tinapfundza pyenepi mu nsolo unatowera.
