1-3. (a) Lemba ya Misangani 13:20 isatipfundzisanji? (b) Thangwi yanji tisafunika kusankhula axamwali mwandzeru?

MWAONA kale kuti khombwani asayang’ana tani anyakubalace? Ngakhale nkhabe kwanisa kulonga, iye asakoya pyonsene pinabva iye na pinaona iye. Munakula iye asatoma kutowezera anyakubalace ngakhale mwakukhonda funa. Pyenepi pisacitikambo na akulu. Ife tisatowezera malongero na macitiro a anthu anakhala na ife ndzidzi uzinji.

² Lemba ya Misangani 13:20 isalonga: “Anafamba na anyakudziwisa anadzakhalambo na udziwisi.” Mafala akuti ‘kufamba na’ munthu asaphataniza kumala ndzidzi uzinji na munthu unoyu. Pyenepi pisabveka pizinji kupiringana kumwanyika. Nyakudziwisa unango wa Bhibhlya alonga kuti kufamba na munthu pisabveka kunfuna na kucita naye uxamwali wa ponda ndipondembo. Tingamala ndzidzi uzinji na munthu unoyu tisatowezera makhaliro ace makamaka khala tisanfuna.

³ Axamwali athu anaticitisa kucita pinthu pyadidi peno pyakuipa. Misangani 13:20 isalongambo: ‘Munthu anafamba na mapswiru anadzakhala pswiru.’ Mu Cihebheri, mafala akuti ‘kufamba na’ munthu asabveka “kukhala na” munthu peno kucita naye uxamwali. (Misangani 22:24; Atongi 14:20) Axamwali akuti  asafuna Mulungu anatiphedza toera tipitirize kukhala akukhulupirika kuna iye. Toera tikwanise kusankhula axamwali mwandzeru, tendeni tione kuti mbani anasankhula Yahova toera akhale axamwali ace.

4. (a) Thangwi yanji ndi mwai ukulu kukhala xamwali wa Mulungu? (b) Thangwi yanji Yahova acemera Abhrahamu “xamwali wanga”?

⁴ Yahova ndi Ntongi Wakudzulu na Pantsi. Iye asatipasa mwai ukulu wakukhala axamwali ace. Yahova asasankhula mwadidi axamwali ace. Iye asasankhula ale ananfuna, pontho ale akuti asan’khulupira. Nyerezerani pya Abhrahamu. Iye akhali dzololo toera kucita pyonsene pikhafuna Mulungu. Ndzidzi onsene Abhrahamu akhapangiza kuti akhali wakukhulupirika na wakubvera. Akhalimbo dzololo toera kupereka mwanace Izaki ninga ntsembe. Abhrahamu akhakhulupira kuti ‘Mulungu ali na mphambvu za kulamusa anthu muli akufa.’ (Ahebheri 11:17-19; Genesi 22:1, 2, 9-13) Abhrahamu akhali wakukhulupirika na wakubvera, pontho Yahova ancemera “xamwali wanga.”—Izaiya 41:8; Tiyago 2:21-23.

5. Yahova asaona tani axamwali ace akukhulupirika?

⁵ Yahova asaona kuti axamwali ace ndi akufunika. Axamwali ace asawangisira toera kukhala akukhulupirika kuna iye kupiringana pinthu pyonsene. (Lerini 2 Samwele 22:26.) Iwo ndi akukhulupirika, pontho ndi akubvera thangwi asanfuna. Bhibhlya isalonga kuti Mulungu ndi xamwali wa anthu ‘akulungama,’ akuti asambvera. (Misangani 3:32) Yahova asacemera axamwali ace toera akhale alendo “n’nyumba” mwace. Iye  asaacemera toera amulambire, pontho acite phembero kuna iye ndzidzi onsene.—Masalmo 15:1-5.

6. Tinapangiza tani kuti tisafuna Yezu?

⁶ Yezu alonga: “Munthu angandifuna, anadzabvera mafala anga, pontho iye anadzafuniwa na Babanga.” (Juwau 14:23) Natenepa, toera kukhala axamwali a Yahova tisafunika kufuna Yezu na kucita pidatipfundzisa iye. Mwacitsandzo, tisabvera pidatipanga Yezu toera kumwaza mphangwa zadidi na kucita anyakupfundza. (Mateu 28:19, 20; Juwau 14:15, 21) Nakuti tisafuna Yezu ‘tisatowezera manyalo ace.’ (1 Pedhru 2:21) Yahova asatsandzaya angaona kuwangisira kwathu toera kutowezera mwanace mu pyonsene pinalonga ife na pinacita ife.

7. Thangwi yanji tisafunika kukhala na cinyindiro cakuti axamwali athu ndi axamwali a Yahova?

⁷ Axamwali a Yahova ndi akukhulupirika, akunyindirika, akubvera, pontho asafuna Mwanace. Kodi ife tisatowezera Yahova pakusankhula axamwali? Khala axamwali anu asatowezera Yezu, pontho asawangisira toera kumwaza mphangwa za Umambo wa Mulungu, anakwanisa kukuphedzani toera kukhala munthu wadidi mbamupitiriza kukhala wakunyindirika kuna Yahova.

8. Ninji pinakomerwa na imwe pa uxamwali wa Rute na Naomi?

⁸ M’Bhibhlya muli na pitsandzo pizinji pya axamwali andimomwene. Tendeni tione citsandzo ca Rute na mebzwalace Naomi. Akazi anewa akhali a madziko akusiyana, akuzwa munjira zakusiyana, pontho Naomi akhali nkulu kupiringana Rute. Mbwenye iwo adzakhala axamwali a ponda ndipondembo thangwi  onsene akhafuna Yahova. Pikhafuna Naomi kubuluka ku Moabhu toera kubwerera ku Izraeli, “Rute akhonda kusiyana na iye.” Iye apanga Naomi: ‘Mbumba yanu inadzakhala mbumba yanga, pontho Mulungu wanu anadzakhala Mulungu wanga.’ (Rute 1:14, 16) Rute akhatsalakana mwadidi Naomi. Pidafika iwo ku Izraeli, Rute akhaphata basa yakuwanga toera kuphedza xamwali wace. Naomi akhafuna kakamwe Rute, pontho ampasa uphungu wadidi. Rute ambvera, natenepa onsene atambira nkhombo zizinji.—Rute 3:6.

9. Ninji pinakomerwa na imwe pa uxamwali wa Dhavidhi na Yonatani?

⁹ Dhavidhi na Yonatani ndi citsandzo cinango ca axamwali adidi akuti akhali akukhulupirika kuna Yahova. Yonatani akhali nkulu kupiringana Dhavidhi, iwo akhadasiyana pyaka 30. Yonatani mbadakhala mambo wakutowera wa Izraeli. (1 Samwele 17:33; 31:2; 2 Samwele 5:4) Mbwenye pidadziwa iye kuti Yahova asankhula Dhavidhi toera kukhala mambo, iye nee akhala na ntcanje peno bibvu. M’mbuto mwace, iye acita pyonsene toera kuphedza Dhavidhi. Mwacitsandzo, pikhali Dhavidhi pangozwi, Yonatani am’phedza ‘mbampasa cipapo mu dzina ya Yahova.’ Iye aikha umaso wace pangozwi toera kuphedza Dhavidhi. (1 Samwele 23:16, 17) Dhavidhi akhalimbo wakunyindirika kuna xamwali wace. Iye apikira kuti mbadatsalakana banja ya Yonatani, pontho akwanirisa pikiro ineyi ngakhale pidamala kufa Yonatani.—1 Samwele 18:1; 20:15-17, 30-34; 2 Samwele 9:1-7.

10. Mwapfundzanji kubulukira ku citsandzo ca axamwali atatu Acihebheri?

¹⁰ Sadhrake, Misake na Abhedhinego akhali aphale  Acihebheri akuti akhadakwatwa kuenda ku Bhabhilonya mbali aphale. Pikhali iwo kutali na acibale awo iwo akhaphedzana toera kupitiriza kukhala akukhulupirika kuna Yahova. Pidakula iwo, cikhulupiro cawo cayeserwa na Mambo Nabhukodhonozore. Iye apanga aphale anewa toera kulambira dzimunthu ya ouro. Sadhrake, Misake na Abhedhinego akhonda kulambira dzimunthu mbapanga mambo: ‘Ife nee tinalambira alungu anu, pontho nee tinalambira dzimunthu ya ouro idasasanya imwe.’—Danyele 1:1-17; 3:12, 16-28.

11. Tisadziwa tani kuti Paulu na Timoti akhali axamwali adidi?

¹¹ Mu ndzidzi udaona mpostolo Paulu m’phale Timoti, iye akwanisa kuona kuti Timoti akhafuna Yahova, pontho akhafuna anthu mu mpingo. Natenepa Paulu apfundzisa Timoti toera kuphedza abale na alongo m’mbuto zakusiyana-siyana. (Mabasa 16:1-8; 17:10-14) Timoti aphata basa mwaphinga, na thangwi ineyi Paulu alonga: “Iye atumikira ninga bitcu pabodzi na ine toera kuendesa kutsogolo mphangwa zadidi.” Paulu akhadziwa kuti Timoti mbadatsalakana mwadidi abale na alongo. Mukhatumikira iwo Yahova pabodzi, Paulu na Timoti adzakhala axamwali adidi.—Afilipi 2:20-22; 1 Akorinto 4:17.

12, 13. (a) Thangwi yanji tisafunika kucita mphole-mphole pakusankhula axamwali ngakhale mu mpingo? (b) Thangwi yanji mpostolo Paulu apereka cenjezo inagumanika pa 1 Akorinto 15:33?

¹² Mu mpingo tinakwanisa kupfundza kubulukira kwa abale na alongo mbatiphedzana unango na ndzace toera tikhale akukhulupirika. (Lerini Aroma 1:11, 12.) Mbwenye ngakhale mu mpingo tisafunika kucita  mphole-mphole pakusankhula anthu toera akhale axamwali athu a ponda ndipondembo. Tiri na abale na alongo a makhaliro akusiyana-siyana akuti akuzwa munjira zakusiyana. Anango ndi apswa mu mpingo, mbwenye anango ali kutumikira Yahova mu pyaka pizinji. Mwacitsandzo, pisakwata ndzidzi toera nsapo utokote. Munjira ibodzi ene, pisakwata ndzidzi toera uxamwali wa munthu na Yahova ukhale wakuwanga. Natenepa, tisafunika kukhala akupirira mbatifunana unango na ndzace, pontho ndzidzi onsene tisafunika kusankhula axamwali mwandzeru.—Aroma 14:1; 15:1; Ahebheri 5:12–6:3.

 ¹³ Midzidzi inango pasaoneka pinentso mu mpingo. Pyenepi pingacitika tisafunika kucita mphole-mphole. Panango m’bale peno mulongo akucita pinthu pinalonga Bhibhlya kuti mphyakuipa. Panango munthu anatoma kudungunya mbacitisa anthu kukhala kukhonda kuphatana mu mpingo. Pyenepi nee ndi pyacilendo, thangwi m’midzidzi inango mu ntsiku za apostolo pikhacitikambo. Na thangwi ineyi, mpostolo Paulu acenjeza Akristu: “Lekani kunyengezwa. Kucita uxamwali na anthu akuipa kusafudza makhaliro adidi.” (1 Akorinto 15:12, 33) Paulu acenjezambo Timoti toera acite mphole-mphole pakusankhula axamwali. Ife tisafunikambo kucita pibodzi pyene.—Lerini 2 Timoti 2:20-22.

14. Kusankhula kwathu axamwali kunakhuya tani uxamwali wathu na Yahova?

¹⁴ Tisafunika kutsidzikiza uxamwali wathu na Yahova. Uxamwali wathu na Yahova ndi wakufunika kakamwe. Natenepa tisacalira kucita uxamwali na munthu wakuti anafewesa cikhulupiro cathu na kufudza uxamwali wathu na Yahova. Ife takhala ninga thonje. Thonje ingabvikwa m’madzi akupswipa, iyo isadzala na madzi akupswipa. Munjira ibodzi ene, tingakhala na axamwali akuipa pinakhala pyakunentsa kucita pinthu pyadidi. Tisafunika kucita mphole-mphole pakusankhula axamwali.—1 Akorinto 5:6; 2 Atesalonika 3:6, 7, 14.

15. Munacitanji toera mukhale na axamwali adidi mu mpingo?

¹⁵ Mu mpingo, tisagumana anthu akuti asafunadi Yahova. Iwo anakwanisa kukhala axamwali anu apantima. (Masalmo 133:1) Lekani kusaka axamwali a thunga yanu basi peno anakomerwa na pinthu pinakomerwa  na imwe. Kumbukani kuti Yonatani akhali nkulu kupiringana Dhavidhi, pontho Naomi akhali nkulu kupiringana Rute. Ife tisafuna kubvera uphungu wa m’Bhibhlya: ‘Fungulani mitima yanu.’ (2 Akorinto 6:13; lerini 1 Pedhru 2:17.) Natenepa, mungatowezera Yahova, anango anadzafuna kukhala axamwali anu.

16, 17. Khala munthu atitsukwalisa mu mpingo, tisafunika kucaliranji?

¹⁶ Mpingo ndi ninga banja: m’bodzi na m’bodzi ali na makhaliro na maonero akusiyana, pontho asacita pinthu munjira yakusiyana na andzace. Kusiyana kweneku ndi kwakufunika, pontho tinakwanisa kupfundza pizinji kubulukira kwa anango. Mbwenye kusiyana kweneku kunacitisa kukhonda bverana na abale na alongo athu peno kuipirwa nawo. Panango tinatsukwala peno kuipirwa thangwi ya pidacita iwo. (Misangani 12:18) Kodi tisafunika kutawirisa kuti pinentso pyenepi pitifewese peno piticitise kusiya kuenda ku misonkhano ya mpingo?

¹⁷ Nkhabe. Ngakhale munthu atitsukwalise, ife nee tisafunika kusiya kuenda ku misonkhano ya mpingo thangwi nee tatsukwaliswa na Yahova. Iye atipasa umaso na pinthu pyonsene toera tikhale akutsandzaya. Ife tisafunika kunfuna na kukhala akukhulupirika kuna iye. Iye athema kucitirwa pyenepi. (Apokalipse 4:11) Mpingo ndi muoni wakubuluka kwa Yahova toera kutiphedza kuti tipitirize kukhala na cikhulupiro cakuwanga. (Ahebheri 13:17) Cipo tinasiya kuenda ku misonkhano ya mpingo basi ene thangwi munthu atitsukwalisa.—Lerini Masalmo 119:165.

18. (a) Ninji pinafuna kutiphedza toera tikhale akubverana na abale na alongo athu? (b) Thangwi yanji tisafunika kulekerera anango?

 ¹⁸ Ife tisafuna abale na alongo athu, pontho tisafuna kubverana nawo. Yahova asadziwa kuti anthu onsene ndi akusowa ungwiro. Tisafunikambo kukhala na maonero mabodzi ene. (Misangani 17:9; 1 Pedhru 4:8) Tonsene tisadodoma, mbwenye ufuni unatiphedza toera tipitirize ‘kulekererana na ntima onsene.’ (Akolose 3:13) Ufuni unatiphedza toera tikhonde kucitisa kuti nkandzo ung’ono ukule. Ndimomwene kuti tingatsukwaliswa na munthu mphyakunentsa kupiduwala. Pontho pinaticitisa kuipirwa mu ndzidzi uzinji. Mbwenye pyenepi pinaticitisa kukhala akukhonda kutsandzaya. Munjira inango, tingalekerera munthu adatitsukwalisa tinakwanisa kukhala na ntendere wa m’manyerezero, kukhala akuphatana mu mpingo, pontho tinakhala na uxamwali wakuwanga na Yahova.—Mateu 6:14, 15; Luka 17:3, 4; Aroma 14:19.

19. Ndi mu ndzidzi upi unafunika ife kusiya kucita uxamwali na munthu mu mpingo?

¹⁹ M’banja yaufuni, m’bodzi na m’bodzi asacita khundu yace toera anango akhale akutsandzaya. Nyerezerani kuti mwana m’bodzi nkhabe funa kubvera. Anthu onsene m’banja asayesera kum’phedza, mbwenye iye asakhonda ciphedzo. Iye anasankhula kubuluka panyumba peno babace anampanga toera abuluke panyumba. Pyenepi pinakwanisa kucitika mu mpingo. Panango munthu anasankhula kupitiriza kucita pinthu pinatsukwalisa Yahova mbabweresa nyatwa mu mpingo. Iye asakhonda ciphedzo, pontho asapangiza na macitiro ace kuti nkhabe funabve kucita khundu ya  mpingo. Panango iye anasankhula kusiya ekhene mpingo, peno anabuluswa mu mpingo. Pyenepi pingacitika, Bhibhlya isalonga pakweca kuti: “Musiye kucita uxamwali” na munthu unoyu. (Lerini 1 Akorinto 5:11-13; 2 Juwau 9-11) Pyenepi pisanentsa kakamwe khala munthu unoyu ndi xamwali peno wacibale wathu. Mbwenye mu pinthu ninga pyenepi, tisafunika kukhala akukhulupirika kuna Yahova tayu kuna munthu unango.—Onani Cidzindikiro Cakumalisa 8.

20, 21. (a) Ninji pinapangiza kuti masasanyiro akubulusa munthu mu mpingo ndi aufuni? (b) Thangwi yanji ndi pyakufunika kusankhula axamwali mwandzeru?

²⁰ Kubulusa munthu mu mpingo ndi masasanyiro aufuni a Yahova. Masasanyiro anewa asatsidzikiza mpingo toera ukhonde kukhala na anthu akukhonda kubvera Yahova. (1 Akorinto 5:7; Ahebheri 12:15, 16) Tingalemedza masasanyiro anewa tisapangiza ufuni kuna Yahova, kuna dzina yace yakucena na midida yace inalonga pya makhaliro adidi. (1 Pedhru 1:15, 16) Pontho masasanyiro akubulusa munthu mu mpingo ndi cipangizo caufuni kuna munthu adabuluswa mu mpingo. Kulanga kweneku kwa Yahova panango kunam’phedza kudzindikira kuti pinacita iye ndi pyakuipa, mbacinja. Azinji akuti akhadabuluswa mu mpingo, mukupita kwa ndzidzi adzabwerera pontho kuna Yahova mbatambirwa na manja mawiri mu mpingo.—Ahebheri 12:11.

²¹ Ninga pidapfundza ife axamwali athu anaticitisa kucita pinthu pyadidi peno pyakuipa. Natenepa, mphyakufunika kakamwe kusankhula axamwali mwandzeru. Tingafuna anthu anafuna Yahova, tinadzakhala na axamwali akuti anatiphedza kukhala akukhulupirika kwenda na kwenda.