1, 2. Bhalaamu aphatisira ng’ambo ipi toera kunyengerera mbumba ya Yahova?

NYAKUMEDZA asasaka mbuto yadidi yakuti anakwanisa kuphata ntundu wa ntsomba zinafuna iye. Iye asasankhula ng’ambo yadidi mbaponya cimedzo cace m’madzi. Iye asadikhira mwakupirira mpaka ntsomba ilume ng’ambo. Mu ndzidzi unoyu iye asafixula cimedzo mbabulusa ntsomba m’madzi.

² Munjira ibodzi ene anthu anakwanisa kunyengezwa. Mwacitsandzo, Aizraeli mbadzati kupita n’Dziko Yakupikirwa, akhala ndzidzi ungasi cifupi na dziko ya Moabu. Mambo wa ku Moabu apikira kupasa kobiri izinji mamuna akhacemerwa Bhalaamu toera kupasa dzedze Aizraeli. Nakuti nee pyakwanisika, Bhalaamu asaka njira inango, mbacitisa Aizraeli kupasika dzedze okhene. Iye asankhula ng’ambo yadidi. Iye atuma atsikana a ku Moabu toera kunyengerera amuna a ku Izraeli.—Numero 22:1-7; 31:15, 16; Apokalipse 2:14.

3. Kodi cifuno ca Bhalaamu cakwanirisika tani?

³ Kodi ng’ambo ya Bhalaamu yaphata basa? Inde. Amuna azinji Aizraeli ‘acita ulukwali na akazi a ku Moabu.’ Iwo atomambo kulambira alungu authambi, kuphatanizambo Bhaale wa ku Peori wakuti ndi mulungu  waulukwali. Pyenepi pyacitisa kuti Aizraeli akukwana 24.000 aphiwe mu ndzidzi wakuti akhali cifupi kakamwe na kupita n’Dziko Yakupikirwa.—Numero 25:1-9.

4. Thangwi yanji Aizraeli azinji acita ulukwali?

⁴ Thangwi yanji Aizraeli azinji agwa mu nsampha wa Bhalaamu? Iwo akhanyerezera basi ene pifuno pyawo, pontho aduwala pinthu pyonsene pidaacitira Yahova. Aizraeli akhali na mathangwi mazinji toera kukhala akukhulupirika kuna Mulungu. Mwacitsandzo, Yahova aabulusa mu ubitcu ku Ejitu, aapasa cakudya n’thando, pontho aatsogolera mpaka kufika cifupi na Dziko Yakupikirwa. (Ahebheri 3:12) Ngakhale tenepo, iwo aduwala pyonsene mbacita ulukwali. Mpostolo Paulu alonga: ‘Tikhonde kucita ulukwali ninga anango a iwo acita ulukwali, mbaphiwa.’—1 Akorinto 10:8.

5, 6. Tisapfundzanji na pidacitikira Aizraeli?

⁵ Ninga Aizraeli akhali cifupi kakamwe na kupita n’Dziko Yakupikirwa, ifembo tiri cifupi kakamwe na kupita n’dziko ipswa. (1 Akorinto 10:11) Anthu azinji lero asafuna kakamwe pinthu pyaulukwali kupiringana anthu a ku Moabu. Makhaliro anewa asakhuyambo mbumba ya Yahova. Mwandimomwene, ulukwali ndi ng’ambo yakuti Dyabo asaiphatisira kakamwe lero.—Numero 25:6, 14; 2 Akorinto 2:11; Yuda 4.

⁶ Bvundzikani: ‘Mphyadidi kuluza umaso wa kwenda na kwenda n’dziko ipswa thangwi yakufuna kutsandzaya na makhaliro akuipa mu ndzidzi wakucepa?’ Mphyadidi kuwangisira toera kubvera cenjezo ya Yahova: “Thawani pyaulukwali!”—1 Akorinto 6:18.

7, 8. Ninji ulukwali? Thangwi yanji ndi wakugopswa?

⁷ Lero, anthu azinji asapwaza mitemo ya Mulungu  inalonga pyakupita m’mabonde. M’Bhibhlya, fala yakuti ulukwali isabveka kupita m’mabonde kwa anthu awiri akuti nee amanga banja mwakubverana na Malemba. Pyenepi pisaphataniza kupita m’mabonde kwa amuna okha-okha, akazi okha-okha, peno munthu na cinyama. Pisaphatanizambo kupita m’mabonde nkanwa, kumatako peno kusendzeka na kumaso kwa munthu unango wakuti nee ndi ndzanu wa m’banja.—Onani Cidzindikiro Cakumalisa 23.

⁸ Bhibhlya isalonga pakweca kuti munthu anapitiriza kucita ulukwali nee asafunika kupitiriza mu mpingo. (1 Akorinto 6:9; Apokalipse 22:15) Munthu anacita ulukwali asaluza cilemedzo, pontho anthu nee asan’nyindira. Ndzidzi onsene ulukwali usabweresa nyatwa. Kazinji kene ulukwali usacitisa munthu kukhala na cikumbuntima cakupasika mulando, kukhala na mimba yakukhonda dikhira, nyatwa m’banja, utenda peno kufa. (Lerini Agalata 6:7, 8.) Munthu anganyerezera mwadidi nyatwa zinaoneka thangwi yakucita ulukwali, panango iye nee anacita ulukwali. Mbwenye kazinji kene munthu asacita pyenepi thangwi asanyerezera basi ene kukwanirisa pifuno pyace. Kuona ucipezipezi kusacitisa munthu kucita ulukwali.

9. Thangwi yanji kuona ucipezipezi ndi kwakugopswa?

⁹ Kuona ucipezipezi kusacitisa munthu kukhala na cifuno cakupita m’mabonde. Lero, ucipezipezi uli mbuto zonsene, m’marevista, m’mabukhu a ku dziko televizau na mu interneti. Anthu azinji asanyerezera kuti kuona ucipezipezi nee ndi kwakuipa, mbwenye undimomwene ndi wakuti ndi kwakugopswa kakamwe. Kuona  ucipezipezi kusacitisa munthu kunyerezera basi ene kupita m’mabonde peno kucita pinthu pinango pyakuipa. Munthu angakhala na nsambo wakuona ucipezipezi, anakwanisa kutoma nsambo wakusendzeka na kumaso. Munthu unoyu anakhalambo na nyatwa pabanja peno kumalisa banja.—Aroma 1:24-27; Aefesi 4:19; onani Cidzindikiro Cakumalisa 24.

10. Tiyago 1:14,15 inatiphedza tani toera kucalira ulukwali?

¹⁰ Mphyakufunika kudziwa pinacitisa munthu kucita ulukwali. Lemba ya Tiyago 1:14, 15 isalonga: “Mbwenye m’bodzi na m’bodzi asayeserwa thangwi yakukwatika mbapeuswa na kusirira kwace. Natenepa, kusirira kungakula, kusabala madawo; madawo angamala kucitwa, asabweresa kufa.” Natenepa, manyerezero akuipa angatoma acinjeni mwakucimbiza. Khala mwakukhonda dikhira mwaona cithundzithundzi cinapangiza ucipezipezi mu ntcini wandzeru peno mu programu ya televizau, yang’anani kukhundu, thimisani ntcini wanu peno cinjani programu ya televizau. Lekani kutawirisa kuti pifuno pyakuipa pipite muntima mwanu. Mungapitawirisa, pifuno pyenepi pinadzakhala pyakuwanga mbamucimwana kupikunda.—Lerini Mateu 5:29, 30.

11. Yahova anatiphedza tani tingakhala na manyerezero akuipa?

¹¹ Nkhabe munthu anatidziwa mwadidi kusiyapo Yahova. Iye asadziwa kuti ndife akusowa ungwiro. Asadziwambo kuti ife tinakwanisa kukunda manyerezero akuipa. Yahova asatipanga: “Natenepa, citisani kuti makhundu a manungo anu akhale akufa ku macitiro aulukwali, makhaliro akunyanyasa, kusirira kakamwe pyaulukwali, pifuno pyakuipa, na kufuna pyonsene, kwakuti ndi kulambira madzimunthu.” (Akolose 3:5) Ngakhale kucita pyenepi mphyakunentsa, Yahova ndi wa ufuni,  pontho anatiphedza. (Masalmo 68:19) Onani citsandzo ca m’phale m’bodzi adagwa mu nsampha wakuona ucipezipezi mbasendzeka na kumaso. Andzace akuxikola akhalonga kuti pyenepi nee ndi pyakuipa, pontho pisapangiza kuti munthu akula. Iye alonga: “Pyenepi pyaphekesa cikumbuntima canga, mbandicita ulukwali.” Iye adzindikira kuti akhafunika kucalira pifuno pyenepi, na ciphedzo ca Yahova akwanisa kupikunda. Mungadzindikira kuti manyerezero akuipa atoma muntima mwanu, phembani Yahova toera akupaseni “mphambvu yakupiringana yacibaliro,” toera kupitiriza kukhala na manyerezero adidi.—2 Akorinto 4:7; 1 Akorinto 9:27.

12. Thangwi yanji tisafunika ‘kutsidzikiza ntima wathu’?

¹² Salomoni alemba: ‘Kupiringana pinthu pyonsene, tsidzikizani ntima wanu, thangwi muntima ndimo muna umaso.’ (Misangani 4:23) Fala yakuti “ntima” isabveka uunthu wathu wa nkati, peno munjira inationera  Yahova. Tisafunika kutsidzikiza ntima wathu thangwi tisakhuyiwa na pinaona ife. Yobe alonga: ‘Ndacita cibverano na maso anga toera ndikhonde kusirira mwali.’ (Yobe 31:1) Ninga Yobe tisafunika kucita mphole-mphole na pinaona ife, pontho na pinanyerezera ife. Tisafunika kucita phembero ninga pidalonga nyamasalmo: ‘Thawisani maso anga toera akhonde kuona pinthu pyakunyanyasa.’—Masalmo 119:37.

13. Dhina asankhula axamwali a ntundu upi?

¹³ Axamwali athu anakwanisa kutikulumiza toera kucita pinthu pyadidi peno pyakuipa. Tingasankhula axamwali anabvera Mulungu, iwo anatiphedza kucitambo pibodzi pyene. (Misangani 13:20; lerini 1 Akorinto 15:33.) Pidacitikira Dhina mwana wa Yakobe, pisatipangiza kuti mphyakufunika kusankhula mwadidi axamwali. Iye akuzwa pabanja yakuti ikhalambira Yahova. Dhina nee akhali na makhaliro akuipa, mbwenye iye acita uxamwali na atsikana a ku Kanani akuti nee akhalambira Yahova. Anthu a ku Kanani akhali na maonero akusiyana thangwi yakupita m’mabonde, pontho mbumba ya Mulungu ikhadziwa kuti iwo akhali anthu aulukwali. (Levitiko 18:6-25) Thangwi ya axamwali ace, Dhina adziwana na Sikemu m’phale wa ku Kanani, iye aona kuti Dhina akhali wakubalika kakamwe. Sikemu akhali m’phale ‘wakulemedzwa kakamwe’ panyumba pawo. Mbwenye iye nee akhalambira Yahova.—Genesi 34:18, 19.

14. Ninji pidacitikira Dhina?

¹⁴ Sikemu acita pire pikhaona iye kukhala pyakutawirika. Iye akakamiza Dhina, ‘am’phata, mbapita naye m’mabonde mwakukakamiza.’ (Lerini Genesi 34:1-4.)  Pyenepi nee pyabweresa nyatwa basi ene kuna Dhina, mbwenye kuna acibale ace onsene.—Genesi 34:7, 25-31; Agalata 6:7, 8.

15, 16. Tinakwanisa tani kukhala andzeru?

¹⁵ Nee tisafunika kucita madodo mabodzi ene ninga adacita Dhina toera kupfundza kuti pitsogolero pya Yahova ndi pyadidi. ‘Ule anafamba na anthu andzeru anadzakhalambo wandzeru, mbwenye ule anafamba na mapswiru anadzakhalambo pswiru.’ (Misangani 13:20) Khalani dzololo toera kuphatisira Bhibhlya mbamubvesesa ‘njira zonsene zadidi,’ mungacita pyenepi munadzacalira nyatwa zizinji.—Misangani 2:6-9; Masalmo 1:1-3.

¹⁶ Tinakwanisa kukhala andzeru tingapfundza Mafala a Mulungu, tingacita phembero toera kucita pisankhulo pyadidi na kubvera uphungu unatipasa m’bandazi wakukhulupirika na wandzeru. (Mateu 24:45; Tiyago 1:5) Tisadziwa kuti ndife anthu akusowa ungwiro. (Yeremiya 17:9) Mphapo, munacitanji munthu angakucenjezani kuti pinthu pinacita imwe pinakutsogolerani toera kucita ulukwali? Kodi imwe munaipirwa, peno munatawira mwakucepeseka ciphedzo cace?—2 Amambo 22:18, 19.

17. Longani citsandzo cinapangiza kuti Nkristu ndzathu anakwanisa kupereka uphungu wakuti unatiphedza.

¹⁷ Nyerezerani citsandzo ici: Pa mbuto ya basa, mamuna m’bodzi asapangiza kuti asafuna mulongo Yana mbam’phemba toera abuluke pabodzi. Mamuna unoyu nee asalambira Yahova, mbwenye asaoneka ninga munthu wadidi, pontho wacitsalakano. Mulongo m’bodzi aona mulongo Yana pabodzi na mamuna unoyu okhene. Mukupita kwa ndzidzi mulongo unoyu ayesera cenjeza mulongo Yana thangwi ya ngozwi yakubuluka na mamuna unoyu. Kodi Yana anasaka mathangwi peno anatawira  cenjezo ineyi? Mulongo Yana asalonga kuti asafuna kakamwe Yahova, pontho asafuna kucita pinthu pyadidi. Mphapo, khala iye asapitiriza kucedza na mamuna unoyu, asapangiza kuti ‘akuthawa pyaulukwali’ peno asapangiza kuti ‘asanyindira ntimace?’—Misangani 22:3; 28:26; Mateu 6:13; 26:41.

18, 19. Zuze acitanji pidakakamizwa iye na nkazi wa Putifare?

¹⁸ Pikhali iye m’phale, Zuze akhali bitcu ku Ejitu. Ntsiku zonsene, nkazi wa Putifare akham’phemba toera kupita naye m’mabonde, mbwenye Zuze akhadziwa kuti pyenepi mphyakuipa. Zuze akhafuna Yahova, pontho akhafuna kuntsandzayisa. Ndzidzi onsene, nkazi wa Putifare akhanyengerera Zuze, mbwenye iye akhakhonda. Nakuti iye akhali bitcu nee mbadakwanisa kubuluka panyumba pa mbuyace. Ntsiku inango, nkazi  wa Putifare ayesera kukakamiza Zuze toera apite naye m’mabonde, mbwenye Zuze ‘athawa.’—Lerini Genesi 39:7-12.

¹⁹ Zuze mbadakhala na manyerezero akuipa peno kusirira nkazi wa Putifare, mbadacimwana kukunda mayesero anewa. Mbwenye Zuze akhadziwa kuti uxamwali wace na Yahova ndi wakufunika kakamwe kupiringana pinthu pyonsene. Iye apanga nkazi wa Putifare: ‘Mbuyanga, . . . apereka pinthu pyace pyonsene m’manja mwanga, nee cinthu cibodzi cidandikhondesa iye, kusiyapo imwe, thangwi ndimwe nkazace. Mphapo ndinakwanisa tani kucita cinthu ceneci cakuipa kakamwe, mbandidawira Mulungu?’—Genesi 39:8, 9.

20. Tisadziwa tani kuti Yahova atsandzaya na pidacita Zuze?

²⁰ Maseze Zuze akhali kutali na acibale ace, iye apitiriza kukhala wakukhulupirika kuna Mulungu, pontho Yahova ampasa nkhombo. (Genesi 41:39-49) Yahova atsandzaya kakamwe na kukhulupirika kwa Zuze. (Misangani 27:11) Midzidzi inango mphyakunentsa kuthawa pyaulukwali. Mbwenye kumbukani mafala awa: ‘Imwe anafuna Yahova, idani pyakuipa. Iye asatsidzikiza umaso wa atumiki ace akukhulupirika, mbaapulumusa m’manja mwa anyakuipa.’—Masalmo 97:10.

21. M’bale m’bodzi wakuti ndi m’phale atowezera tani citsandzo ca Zuze?

²¹ Ntsiku zonsene mbumba ya Yahova isapangiza cipapo toera ‘kuida pinthu pyakuipa mbafuna pinthu pyadidi.’ (Amosi 5:15) Mwakukhonda tsalakana thunga yanu, imwe munakwanisa kukhala akukhulupirika kuna Yahova. M’bale m’bodzi wakuti ndi m’phale ayeserwa kuxikola. Ntsikana m’bodzi apanga m’phale unoyu kuti angam’phedza kucita prova ya matimatika  mbadapita naye m’mabonde. M’bale unoyu acitanji? Iye atowezera citsandzo ca Zuze. Iye alonga: “Mwakucimbiza ndakhonda phembo yace. Nakuti ndapitiriza kukhala wakukhulupirika, ndisatsandzaya, pontho ndiri na cikumbuntima cakucena.” Kucita ulukwali kunakwanisa kukhala ‘kwakutsandzayisa mu ndzidzi wakucepa,’ mbwenye kazinji kene kusabweresa nyatwa zizinji. (Ahebheri 11:25) Ndzidzi onsene kubvera Yahova kusatsandzayisa.—Misangani 10:22.

22, 23. Yahova anatiphedza tani ngakhale tingacita madawo makulu?

²² Sathani anakwanisa kuphatisira ulukwali toera kutipeusa. Pyenepi pinakwanisa kukhala pyakunentsa toera kupikunda. Midzidzi inango, tonsene tisakhala na manyerezero akuipa. (Aroma 7:21-25) Yahova asadziwa pyenepi, pontho asakumbuka kuti “ndife mataka.” (Masalmo 103:14) Mphapo, ndiye tani khala Nkristu acita ulukwali? Khala ndi tenepo, pisabveka kuti iye nkhabebve cidikhiro? Nkhabe. Khala munthu apangiza kutcunyuka kwandimomwene, Yahova anam’phedza. Mulungu ali ‘dzololo toera kulekerera.’—Masalmo 86:5; Tiyago 5:16; lerini Misangani 28:13.

²³ Yahova apereka “amuna ninga miyoni” akuti ndi akulu a mpingo toera kutiphedza. (Aefesi 4:8, 12; Tiyago 5:14, 15) Iwo anakwanisa kutiphedza toera tikhale pontho axamwali a Yahova.—Misangani 15:32.

24, 25. Kukhala andzeru kunatiphedza tani toera kukhonda ulukwali?

²⁴ Toera kucita pisankhulo pyadidi, tisafunika  kudziwa kuti mitemo ya Yahova isaphedza. Nee tisafuna kukhala ninga m’phale analongwa pa Misangani 7:6-23. M’phale unoyu akhali ‘wakusowa ndzeru,’ thangwi yace agwa mu nsampha wakucita ulukwali. Kukhala wandzeru nkhwadidi kakamwe kupiringana kucenjera. Tingakhala andzeru, tinasaka kudziwa pinafuna Yahova, mbatipiphatisira mu umaso wathu. Kumbukani mafala awa: ‘Ule anagumana ntima wandzeru asafuna umaso wace. Ule anapitiriza kudzindikira anagumana udidi.’—Misangani 19:8.

²⁵ Kodi imwe musanyindira kuti pitsogolero pya Yahova mphyadidi? Musanyindira kuti kutowezera pitsogolero pyenepi kunakuphedzani toera kukhala wakutsandzaya? (Masalmo 19:7-10; Izaiya 48:17, 18) Khala imwe musapenula, nyerezerani pinthu pyonsene pyadidi pinakucitirani Yahova. ‘Yeserani muone kuti Yahova ndi wadidi.’ (Masalmo 34:8) Mungacita pinalonga lemba iyi, munadzaona kuti kufuna kwanu Mulungu kunathimizirika. Citani pyonsene pinakwanisa imwe toera kufuna pinafuna iye na kuida pinaida iye. Dzadzani manyerezero anu na pinthu pyakuti ndi pyandimomwene, pyakulungama, pyakucena, pyakuthema kufuniwa, pontho pyakuti ndi pyadidi. (Afilipi 4:8, 9) Tingacita pyenepi, tinakhala ninga Zuze wakuti apaswa nkhombo thangwi akhatowezera udziwisi wa Yahova.—Izaiya 64:8.

26. Tinapfundzanji mu misolo miwiri inatowera?

²⁶ Yahova asafuna kuti tikhale akutsandzaya mwakukhonda tsalakana khala ndife akumanga banja peno nkhabe. Misolo miwiri inatowera iri na mphangwa zakuti zinaphedza mabanja toera kukhala akutsandzaya.