1-3. (a) Anthu azinji asaona tani basa inacita iwo? (b) Ndi mibvundzo ipi inafuna ife kutawira mu nsolo uno?

PA DZIKO yonsene yapantsi anthu asaphata basa mwakuwanga toera kutsalakana umaso wawo na banja yawo. Azinji nee asakomerwa na basa inaphata iwo, anango nkhabe funa kuphata basa ntsiku zonsene. Khala musapibvambo tenepo, musafunika kucitanji toera mutsandzaye na basa yanu?

² Yahova alonga: ‘Munthu onsene asafunika kudya, kumwa na kutsandzaya na basa yace yakuwanga. Ndi muoni wa Mulungu.’ (Koelete 3:13, NM) Yahova aticita na cifuno cakuphata basa. Iye asafuna kuti titsandzaye na basa inacita ife.—Lerini Koelete 2:24; 5:18.

³ Mphapo, ninji cinafuna kutiphedza toera tikomerwe na basa yathu? Ndi mabasa api akuti Nkristu asafunika kuacalira? Tinacitanji toera basa yathu ikhonde kupingiza kulambira kwathu Yahova? Ndi basa ipi yakufunika kakamwe yakuti tisafunika kuicita?

4, 5. Ndi api maonero a Yahova thangwi ya basa?

⁴ Yahova asakomerwa na kuphata basa. Lemba ya Genesi 1:1 isalonga: ‘Pakutoma, Mulungu acita kudzulu na dziko yapantsi.’ Pidamala Mulungu kucita dziko yapantsi na pyonsene piri mwenemu, iye alonga kuti pyonsene pidacita  iye pikhali ‘mwadidi kakamwe.’ (Genesi 1:31) Nciti wathu akhakomerwa na pinthu pidacita iye.—1 Timoti 1:11.

⁵ Yahova cipo asiya kuphata basa. Yezu alonga: “Babanga asapitiriza kuphata basa mpaka lero.” (Juwau 5:17) Maseze ife nkhabe dziwa pinthu pyonsene pyakudzumisa pinacita Yahova, mbwenye tisadziwa pingasi mwa ipyo. Iye ali kusankhula anthu anafuna kudzatonga na mwanace, Yezu Kristu, kudzulu. (2 Akorinto 5:17) Yahova asatsogolera anthu, pontho asaatsalakana. Mwacitsandzo, thangwi ya basa yakumwaza mphangwa, pikwi na pikwi pya anthu asapfundza pya Yahova, pontho ali na cidikhiro cakukhala kwenda na kwenda m’paraizu pa dziko yapantsi.—Juwau 6:44; Aroma 6:23.

6, 7. Kodi Yezu akhali nyabasa wa ntundu wanji?

⁶ Ninga Babace, Yezu asakomerwa na kuphata basa. Mbadzati kubwera pa dziko yapantsi, Yezu akhali m’phedzi wa Mulungu, mbaphedzera kucitwa kwa pinthu pyonsene kudzulu na pa dziko yapantsi. (Misangani 8:22-31; Akolose 1:15-17) Pikhali iye pa dziko yapantsi, Yezu apitiriza kuphata basa mwaphinga. Pikhali iye m’phale, Yezu apfundza basa yakupala matabwa, panango apfundzambo kumanga nyumba. Iye akhacita mwadidi kakamwe basa yace, ndi thangwi yace akhadziwika ninga “mesiri wakupala matabwa.”—Marko 6:3.

⁷ Ngakhale tenepo, basa yakufunika kakamwe idacita Yezu pa dziko yapantsi ikhali kumwaza mphangwa zadidi na kupfundzisa anthu thangwi ya Yahova. Iye akhali na pyaka pitatu na hafu toera kumalisa utumiki wace, pontho akhaphata basa mwaphinga kutomera macibese kakamwe mpaka masiku. (Luka 21:37, 38; Juwau 3:2) Yezu afamba makilometru mazinji na miyendo m’miseu  ya pfumbi toera kumwaza mphangwa kuna anthu azinji.—Luka 8:1.

8, 9. Thangwi yanji Yezu akhakomerwa na basa yace?

⁸ Kuna Yezu, kucita basa ya Mulungu kukhali ninga cakudya. Basa ineyi ikhampasa mphambvu, pontho ikhantsandzayisa. Midzidzi inango Yezu akhaphata basa mwaphinga kakamwe mbasowa ndzidzi toera kudya. (Juwau 4:31-38) Iye akhabandza miyai yonsene toera kupfundzisa anango thangwi ya Babace. Ndi thangwi yace iye alonga kuna Yahova: “Ine ndakupasani mbiri pa dziko yapantsi, mbandimalisa basa idandipasa imwe toera kucita.”—Juwau 17:4.

⁹ Pyenepi pisapangiza pakweca kuti Yahova na Yezu asaphata basa mwaphinga kakamwe, pontho asakomerwa na basa yawo. Ife tisafunika ‘kutowezera Mulungu,’ pontho tisafunika ‘kutowezera manyalo a Yezu.’ (Aefesi 5:1; 1 Pedhru 2:21) Ndi thangwi yace tisaphata basa mwaphinga mbaticita pyonsene pinakwanisa ife toera kucita mwadidi basa yathu.

10, 11. Ninji pinafuna kutiphedza toera tikhale na maonero adidi thangwi ya basa yathu?

¹⁰ Ninga atumiki a Yahova, tisaphata basa mwaphinga toera kutsalakana umaso wathu na banja yathu. Ife tisafunika kukomerwa na basa yathu, mbwenye midzidzi inango pisanentsa. Mphapo, tinacitanji khala nee tisakomerwa na basa yathu?

¹¹ Khalani na maonero adidi. Panango nee tinakwanisa kucinja basa peno mbuto inaphatira ife basa, mbwenye tinakwanisa kucinja maonero athu. Kubvesesa pinadikhira Yahova kuna ife kunatiphedza. Mwacitsandzo, Yahova asadikhira kuti mamuna acite pyonsene pinakwanisa iye  toera kutsalakana banjace. Bhibhlya isalonga kuti ule anakhonda kutsalakana banja yace “ndi wakuipa kakamwe kupiringana munthu wakusowa cikhulupiro.” (1 Timoti 5:8) Khala imwe ndimwe nsolo wa banja, musafunika kuphata basa mwaphinga toera kutsalakana banja yanu. Maseze mukhonde kukomerwa na basa yanu, kumbukani kuti mu ndzidzi unatsalakana imwe banja yanu muli kutsandzayisa Yahova.

12. Kodi kuphata basa mwaphinga na kukhala wakukhulupirika kunatiphedza tani?

¹² Khalani nyabasa waphinga na wakukhulupirika. Mungacita pyenepi, pinakhala pyakukhonda nentsa toera mukomerwe na basa yanu. (Misangani 12:24; 22:29) Mapatrau asakomerwa na anyabasa akuti ndi akukhulupirika thangwi nkhabe kuba kobiri, pinthu pya basa peno ndzidzi wa basa. (Aefesi 4:28) Mungakhala wakukhulupirika, patrau wanu anakunyindirani. Cakufunika kakamwe, Yahova asadziwa kuti ndimwe nyabasa wakukhulupirika. Imwe munakhala na cikumbuntima cakucena thangwi musadziwa kuti muli kukomeresa Mulungu anafuna imwe.—Ahebheri 13:18; Akolose 3:22-24.

13. Ninji pinafuna kucitika tingakhala akukhulupirika pabasa?

¹³ Kumbukani kuti makhaliro anu pabasa anakwanisa kupasa mbiri Yahova. Ineyi ndi thangwi inango inaticitisa toera kukomerwa na basa yathu. (Tito 2:9, 10) Thangwi ya citsandzo cathu cadidi pabasa, anyabasa andzathu anadzapangiza cifuno cakupfundza Bhibhlya.—Lerini Misangani 27:11; 1 Pedhru 2:12.

14-16. Tisafunika kunyerezeranji pakusankhula basa?

¹⁴ Bhibhlya nkhabe pereka ndandanda ya mabasa akuti Nkristu asafunika kuphata. Mbwenye iri na midida yakuti  inakwanisa kutiphedza toera kucita pisankhulo pyadidi thangwi ya basa. (Misangani 2:6) Pakuphatisira midida ya m’Bhibhlya, nyerezerani mibvundzo inatowera.

¹⁵ Kodi basa iyi inandikulumiza kucita pinthu pinalonga Yahova kuti ndi pyakuipa? Ife tapfundza pinthu pyakuti Yahova asapiida, ninga kuba na kulonga uthambi. (Eksodo 20:4; Mabasa 15:29; Aefesi 4:28; Apokalipse 21:8) Tisafunika kucita mphole-mphole toera tikhonde kutawira basa yakuti nkhabe bverana na pinalonga Yahova.—Lerini 1 Juwau 5:3.

¹⁶ Kodi basa ineyi isaphedzera peno isakulumiza kucita pinthu pinaida Yahova? Mwacitsandzo, nyerezerani  kuti mwaona basa toera kumanga magereja. Nee ndi pyakuipa kucita basa yakumanga. Mbwenye tisadziwa kuti Yahova asaida uphemberi wauthambi. Ndimomwene kuti nee mukucita khundu ya ulambiri wauthambi. Mphapo, kumanga gereja nee ndi sawasawa na kuphedzera cinthu cinaida Yahova?—Apokalipse 18:4.

17. Ninji pinafuna kutiphedza toera kucita pisankhulo pinakomeresa Mulungu?

¹⁷ Tingaphatisira pinalonga Bhibhlya, tinakhala ninga anthu analongwa pa Ahebheri 5:14, akuti “kubulukira mukuphatisira luso yawo yakudzindikira, apfundza kusiyanisa cinthu cadidi na cakuipa.” Natenepa, bvundzikani: ‘Ndingatawira basa ineyi, ndinafewesa cikhulupiro ca anthu anango? Basa ineyi inandicitisa kusiya banja yanga mbandienda ku dziko inango? Macinjo anewa anakhuya tani banja yanga?’

18. Thangwi yanji midzidzi inango pinakhala pyakunentsa kuikha ulambiri wathu pa mbuto yakutoma?

¹⁸ Mu ntsiku zino ‘zakumalisa na zakugopswa,’ m’midzidzi inango pinakhala pyakunentsa kuikha ulambiri wa Yahova pa mbuto yakutoma mu umaso wathu. (2 Timoti 3:1) Kugumana basa na kupitiriza kuiphata pinakwanisa kukhala pyakunentsa. Ndimomwene kuti tisafunika kutsalakana banja yathu, mbwenye kulambira kwathu Yahova kusafunika kukhala pa mbuto yakutoma. Ife nee tisafunika kutawirisa kuti pinthu pyakumanungo pikhale pyakufunika kakamwe mu umaso wathu. (1 Timoti 6:9, 10) Mphapo tinakwanisa tani ‘kudzindikira pinthu pyakufunika kakamwe’ mu ndzidzi ubodzi ene mbatitsalakana banja yathu?—Afilipi 1:10.

19. Thangwi yanji kunyindira Yahova kunatiphedza toera tikhonde kudzudzumika kakamwe thangwi ya basa?

 ¹⁹ Nyindirani Yahova na ntima onsene. (Lerini Misangani 3:5, 6.) Ife tisadziwa kuti Mulungu asadziwa mwadidi pinafuna ife, pontho iye asatitsalakana kakamwe. (Masalmo 37:25; 1 Pedhru 5:7) Mulungu asatipanga: “Mu umaso wanu, khalani anthu akukhonda kufuna kakamwe kobiri, mbwenye mukomerwe na pinthu piri na imwe. Thangwi iye alonga: ‘Ine cipo ndinadzakusiya, pontho cipo ndinadzakuthawa.’” (Ahebheri 13:5) Yahova nee asafuna kuti tipitirize kudzudzumika kuti tinatsalakana tani banja yathu. Iye apangiza kazinji kene kuti anakwanisa kutsalakana atumiki ace. (Mateu 6:25-32) Mwakukhonda tsalakana pinacitika pabasa, tisafunika kupitiriza kupfundza Bhibhlya, kumwaza mphangwa na kuenda ku misonkhano.—Mateu 24:14; Ahebheri 10:24, 25.

20. Tinakwanisa tani kukhala na umaso wakukhonda kufuna pizinji?

²⁰ Pitirizani kuyang’ana pinthu pyadidi. (Lerini Mateu 6:22, 23.) Pyenepi pisabveka kukhala na umaso wakukhonda kufuna pizinji toera tikwanise kutumikira Yahova. Tonsene tisadziwa kuti nee ndi pyandzeru kutawirisa kuti kobiri, umaso wakuthambaruka, peno mitcini ya ntengo ukulu kakamwe pikhale pyakufunika kakamwe kupiringana uxamwali wathu na Mulungu. Mphapo ninji pinafuna kutiphedza toera kuikha pinthu pyakufunika pa mbuto yakutoma? Citani pyonsene pinakwanisa imwe toera mucalire mangawa. Khala muli na mangawa, yeserani kuapungala peno kuamalisa. Tingakhonda kucita mphole-mphole, tinabvunga ndzidzi wathu mu pinthu pyakumanungo mbatisowa ndzidzi wakucita phembero, kupfundza Bhibhlya peno kumwaza mphangwa. M’mbuto mwakutawirisa kuti pinthu  pyakumanungo pidzudzumise umaso wathu, tisafunika kukomerwa na piri na ife, ninga “cakudya na cakubvala.” (1 Timoti 6:8) Kusiyapo pyenepi, mphyadidi midzidzi inango kudinga makhaliro athu toera tione khala pinakwanisika kuthimizira basa yathu yakutumikira Yahova.

21. Thangwi yanji tisafunika kusankhula mwadidi pinthu pinaikha ife pa mbuto yakutoma mu umaso wathu?

²¹ Ikhani pinthu pyakufunika pa mbuto yakutoma. Tisafunika kuphatisira ndzidzi wathu, mphambvu zathu na pinthu pyathu pyakumanungo mwandzeru. Tingakhonda kucita mphole-mphole, pinthu pyakukhonda funika  kakamwe, ninga mapfundziro akudziko peno kobiri pinakwanisa kutimalira ndzidzi uzinji. Yezu alonga: “Pitirizani kuikha pa mbuto yakutoma Umambo.” (Mateu 6:33) Pisankhulo pinacita ife, misambo yathu, mabasa anacita ife ntsiku na ntsiku na pifuno pyathu pisapangiza kuti ndi pinthu pipi pinaikha ife pa mbuto yakutoma mu umaso wathu.

22, 23. (a) Ninga Akristu, ndi basa ipi yakufunika kakamwe yakuti tinakwanisa kuicita? (b) Ninji cinafuna kutiphedza toera tikomerwe na basa yathu?

²² Basa yakufunika kakamwe iri na ife ndi kutumikira Yahova na kumwaza mphangwa. (Mateu 24:14; 28:19, 20) Ninga Yezu, tisafunika kucita pyonsene pinakwanisa ife m’basa ineyi. Anango acinja mbaenda kamwaza mphangwa ku cisa cakuti kusafunika amwazi mphangwa azinji. Anangombo asapfundza pilongero pipswa toera akwanise kumwazira mphangwa anthu analonga pilongero pyenepi. Cedzani na anthu adacita masasanyiro anewa, abvundzeni kuti akwanisa tani. Iwo anadzakupangani kutsandzaya kuli na iwo.—Lerini Misangani 10:22.

²³ Lero, azinji a ife asaphata basa ndzidzi uzinji toera akwanise kutsalakana mabanja awo. Yahova asadziwa pyenepi, pontho asakomerwa kakamwe na pyonsene pinacita ife toera kutsalakana banja yathu. Natenepa tendeni tipitirize kutowezera Yahova na Yezu mukuphata basa mwaphinga, mwakukhonda tsalakana ntundu wa basa inacita ife. Pontho tisafunika kukumbuka kuti basa yakufunika kakamwe ndi kutumikira Yahova na kumwaza mphangwa zadidi za Umambo wa Mulungu. Pyenepi pisatitsandzayisa kakamwe.