1. Kodi mangasi a marelijiau anacitwa ku Afrika mbapi?

 CIFUPIFUPI munthu onsene ku Afrika asatawira kuti mphyakufunika kulambira Mulungu. Mbwenye, pana kusowa kubverana thangwi ya njira ya kumulambira. Alipo anaphembera m’nsikiti, anango asaenda ku nyumba yakuceneswa ya mwambo, anangombo asaenda ku gereja. Mbwenye pinakhala pyakudodoma kunyerezera kuti pana marelijiau matatu basi ku Afrika. Pakati pa Amwenyi, iripo miyambo na pikhulupiro pyakusiyana. Relijiau ya mwambo isasiyana kubulukira pa mbuto ibodzi na inango. Magereja anapithula Acikristu nkhabe phatana maka tayu. Kusiya makulumakulu, pana pikwi na pikwi pya magereja akutongereka peno aufulu ku Afrika onsene.

2. (a) Kodi ninji makamaka cinacitisa munthu kukhala m’relijiau iri iye? (b) Kodi ninji cinakhonda kupangiza kuti relijiau inacitefe isakomeresa Mulungu?

² Kodi ndi thangwi yanji anthu asalambira m’njira zenezi zinalambirewo? Anthu akuinjipa asatowera relijiau ya anyakuwabala. Pina, pyakucitika pya kale pisakhuya relijiau inacitawo lero. Bukhu yakuti The Africans—A Triple Heritage (Anthu a ku Afrika—Unthaka wa Utatu) isati: “Cisilamu cabalalika ku mulolo kwa Sahara kubulukira mwa kutapata, . . . Cikristu cabalalika kubangwe kwa Sahara kubulukira m’njira ibodzibodzi. Khala Cisilamu ku mulolo kwa Sahara cabalalika na supada, Cikristu kubangwe kwa Sahara cabalalika  na mfuti ya moto.” Kusiya pyenepi, cifupifupi ife tonsene tisakhulupira kuti relijiau inacitefe isakomeresa Mulungu. Mbwenye relijiau nkhabe kukhala yandimomwene peno yakulungama basi na thangwi yakuti isacitwa na anyakubala athu peno na thangwi yakuti yaikhwa mwakukakamiza kwa makholo athu na mphambvu inango yamadziko akunja.

3-5. Kodi ndi citsanzo cipi cinatiphedza kudzindikira kuti si marelijiau onsene tayu anapfunzisa undimomwene?

³ Marelijiau onsene asalonga kuti asapereka citsogolero cakukoyeka ca kutumikira Mulungu, mbwenye iwo nkhabe manyerezero akulandana. Asapfunzisa pinthu pizinji pyakusiyana pya Mulungu mbani na iye asadikhiranji kwa ife. Nyerezerani ipi: Tilonge kuti imwe mwagumana basa pa kompanyia ikulu kakamwe. Pa ntsiku yakutoma ya kuphata basa, imwe mwadziwa kuti nkulu wa basa abulukapo, ali pa kupuma. Natenepa, mwabvunza kwa anyabasa atatu kuti ndi basa yanji inafunikemwe kucita. Nyabasa wakutoma alonga kuti nkulu wa basa asafuna kuti mupswaire. Waciwiri alonga kuti musafunika kupintari nyumba. Wacitatu akutumani kukapereka matsamba.

⁴ Buluka penepo, imwe mwabvunza anyabasa pya nkulu wa basa wanu. Wakutoma alonga kuti iye ngwakulapha, mphale na waukali. Waciwiri alonga kuti iye ngwakubvira, wakugwesera na wadidi. Wacitatu akupangani kuti nkulu wa basa si wamamuna tayu—ndi wa nkazi. Panango, imwe mwafika pa kunyerezera kuti anyabasa onsene atatu awa halikulonga undimomwene tayu. Khala musafuna kukoya basa yanu ipswa ineyi, mwakukhonda penula munadzasaka kudziwa kuti mwandimomwene nkulu wa basa mbani na pinafuneye kuti imwe mucite.

⁵ Cibodzibodzi cisacitika na relijiau. Nakuti pana pizinji pinalongwa pa thangwi ya Mulungu mbani na asafunanji kwa ife, tisafunika kuonesa khala kulambira kwathu ndi kwakubverana na undimomwene. Kodi tinakwanisa tani kupfunza undimomwene wa pya Mulungu?