1. Kodi tisafunika kucitanji towera tikomerese Mulungu?

 KHALA tisafuna kuti Mulungu akhale xamwali wanthu wa pantima, nkhabe funika kukhala na uxamwali na ubodzi ene na relijiau yauthambi. Tisafunika kucita relijiau ya undimomwene. Lero anthu pikwi na pikwi kuzungulira dziko yonsene yapantsi asacita pyenepi.

2. Kodi Mboni za Yahova zisagumanika kupi, na zisacita basa yanji?

² Ninga pidalongweratu m’Bibilya, alambiri andimomwene ndiwo “mwinji ukulu” udabulukira ku “mitundu yonsene, na madzinza, na mbumba, na pilongero.” (Chidziwiso 7:9) M’madziko akukwana 235, pikwi na pikwi pya Mboni za Yahova ziri zaphinga m’kuphedza anango kupfunza njira zakufuna za Yahova na pyakufuna pyace.

3. Kodi Mboni za Yahova zisalambira ani, na zisacalira kulambira kwanji?

³ Mboni za Yahova zisadzindikira kuti adathema kulambirwa ndi Yahova basi. Zisakhonda kukotamira adzimunthu peno mafanikizo a marelijiau. (1 Juwau 5:21) Nkhabe kuza akufa m’kuphuphuza paciliro peno kucita miyambo inango inabalalisa pikhulupiro pyauthambi pya marelijiau na “mapfunziso a madimoni.” (1 Timoti 4:1) Ngakhale tenepa, asapasa cithondoso cakukwana kwa akuferwa, mbaafokotozera pikiro ya Mulungu yakuti kunadzakhala kulamuka muli akufa m’dziko yapantsi ya paradizu.—Juwau 5:28, 29; Machitiro 24:15.

4. Kodi anzakazi a Mulungu asaaona tani masalapita?

⁴ Mboni za Yahova zisacalira masalapita, peno ufiti, thangwi zisadziwa kuti pinthu pyenepi pyabulukira kwa Diyabu. Izo nkhabe nyindira masalapita ninga citsidzikizo—cinyindiro cawo ciri kwa Yahova.—Misanje 18:10.

5. Kodi ndi m’njira ipi yakuti Mboni za Yahova ‘nkhabe dzacita khundu ya dziko’?

⁵ Yezu alonga kuti anyakupfunza ace ‘nkhabe dzacita khundu ya dziko.’ (Juwau 17:16) Yezu maka akhonda kucita khundu ya ndale za ntsiku yace. (Juwau 6:15) M’njira ibodzibodzi, Mboni za Yahova nee zisapita m’ndale, m’kusankhulana ntundu na kukapulana kwa anthu a dziko ino. Mbwenye asalipa misonkho na asabvera miyambo ya m’dziko inakhalewo.—Juwau 15:19; Aroma 13:1, 7.

6. Kodi anzakazi a Mulungu asatoweza matongero api a ukwati na kumwalana?

⁶ M’kubvera matongero a utongi, Mboni za Yahova zisakhala na undimomwene wakuti ukwati wawo walembeswa. (Titu 3:1) Zisabvera matongero a Mulungu na thangwi ineyi zisathunda kupalakanya. (1 Timoti 3:2) Pontho, nakuti asaphatisira basa mipimo ya Bibilya m’umaso wawo, ukwati wa anzakazi a Mulungu uli na cidikhiro cakucepa cakumala m’kumwalana.

7. Kodi Mboni za Yahova zisaonesa tani kufunana?

⁷ Mboni za Yahova zisafunana. Kufunana kweneku, pabodzi na kufuna Mulungu, kusaaphataniza m’ubale wandimomwene, ngakhale kuti ziri za mitundu na madzinza mazinji. Pangacitika miliri peno pangafunika ciphedzo, Mboni mwakucimbiza zisaphedzana. Mboni zisaonesa kufuna m’makhaliro awo.—Juwau 13:35.

8. Kodi anzakazi a Mulungu asathunda mabasa api akuipa?

⁸ Anzakazi a Yahova asawangisira m’kukhala akuona ntima na adidi. Asathunda kuba, unthawatawa, kugonana, kuledzera na malonda akukhonda kuona ntima. Amuna nkhabe menya akazi awo. Anango, mbadzati kukhala Mboni za Yahova, akhacita pinthu pyenepi, mbwenye, asiya na ciphedzo ca Yahova. ‘Aceneswa’ pamaso pa Mulungu.—1 Akorintu 6:9-11.

9. Kodi bukhu inango yalonganji thangwi ya magereja auzimu a ku Afrika?

⁹ Andedi, marelijiau mazinji asalonga kuti ali na undimomwene. Panango angaonese mabasa akudzumatirisa towera kuphedzera malongero awo. Mwacitsanzo, kulonga za magereja anacemerwa auzimu ku Afrika, bukhu inango yalonga kuti: “Basa ya nyamasalapita peno ya ng’anga ku khundu ikulu yapitirwa mbuto na [misoka mipswa yacikristu]. . . . Iwo asalonga kuti asakwanisa kuprofetizari na kucita pirengo. Maprofeta awo ali na masomphenya pina asathumburuza zindoto. Asaphatisa basa madzi angwiro, mafuta akucena, dotha, mavela na ntsembe towera kukonza na kuthunda matenda.”

10, 11. Kodi ndi thangwi yanji pinacemerwa pirengo lero nkhabe pangiza kuti relijiau ndi ya Mulungu?

¹⁰ Anthu a m’marelijiau anewa asalonga kuti pirengo pisapangiza kuti relijiau yawo yapaswa nkhombo na Mulungu. Mbwenye pyenepi pinacemerwa pirengo nkhabe pangiza kuti relijiau iri yakutawiriswa na Yahova. Satana asapasa mphambvu alambiri anango authambi towera kucita ‘mabasa amphambvu.’ (2 Atesalonika 2:9) Kusiyapo pyenepi, Bibilya yalongeratu kuti masagwati akucita pirengo akubulukira kwa Mulungu, kuprofetizari, kulonga pilongero na cidziwiso, “mbipidadzamaliswa.”—1 Akorintu 13:8.

¹¹ Yezu acenjeza: “Si onsene ale analonga kuti: ‘Mbuya, Mbuya,’ anadzapita m’umambo wa kudzulu tayu, mbwenye ule anacita cifuno ca Babanga, ali kudzulu. Anthu azinji anadzalonga kuna ine: ‘Mbuya, Mbuya, kodi tidaprofetizari m’dzina yanu tayu, na tidabulusa madimoni m’dzina yanu tayu, na tidacita mabasa amphambvu m’dzina yanu tayu?’ Tenepa, ndinaapanga kuti: Cipo ndakudziwani! Bulukani pamaso panga, imwe akucita pyakuphonyana na mwambo.”—Mateyu 7:21-23.

12. Kodi mbani anadzapita m’Umambo wa kudzulu?

¹² Mphapo, kodi mbani anadzapita m’Umambo wa kudzulu? Ale anacita cifuno ca Yahova.

13. Kodi basa inafuna Mulungu kuti anzakazi ace aicite lero ndi ipi, na mbani anaicita?

¹³ Kodi cifuno ca Mulungu na anzakazi ace lero ndi cipi? Yezu ati: “Mphangwa izi zadidi za umambo zinati zimwazwe pa dziko yonsene yapantsi, m’umboni kwa anthu onsene.” (Mateyu 24:14) Iyi ndi basa inacita Mboni za Yahova mwa phinga.

14. Kodi Umambo wa Mulungu ndi ninji, na mbani anafuna dzatonga m’Umambo?

¹⁴ Kuzungulira “dziko yonsene yapantsi,” Mboni za Yahova zisamwaza kuti Umambo wa Mulungu ndi utongi wa kudzulu unafuna dzatonga dziko yonsene yapantsi mwa kulungama. Zisapfunzisa kuti Yahova asankhula Kristu Yezu ninga Mambo wa Umambo unoyu pabodzi na 144.000 anyakutonga anzace adasankhulwa mwa anthu onsene.—Danyeli 7:14, 18; Chidziwiso 14:1, 4.

15. Kodi Umambo unadzafudzanji?

¹⁵ M’kuphatisa basa Bibilya, Mboni za Yahova zisapagiza anthu kuti Umambo wa Mulungu unadzafudza dziko yonsene ya Satana. Unadzafudza pontho relijiau yauthambi pabodzi na pipfunziso pyayo pyakukhonda lemedza Mulungu na mbipipasa mbiri Diyabu! (Chidziwiso 18:8) Pontho mautongi onsene anapokanya Mulungu anadzafudzwa!—Danyeli 2:44.

16. Kodi anyakutogwa na Kristu Yezu mbani na anadzakhala kupi?

¹⁶ Pontho, Mboni za Yahova zisadziwisa kuti Kristu Yezu anadzabweresa maphindu kwa onsene anacita pinafuna Mulungu. Iwo anadzakhala anyakutongwa a pa dziko yapantsi. Bibilya isapikira: “Anadzaombola ntcerengi anabulurira ciphedzo, na wakunenseka wakusowa mphedzi. Anadzakhala na ntsisi na wakusowa na ntcerengi, na anadzapulumusa miyoyo ya atcerengi.”—Masalimo 72:12, 13.

17. Kodi mbani basi anamwaza Umambo wa Mulungu?

¹⁷ Nkhabepo nsoka unango wa anthu unacita cifuno ca Mulungu m’kumwaza mphangwa zadidi za Umambo. Ndi Mboni za Yahova basi zinadziwisa Umambo wa Mulungu m’dziko yonsene yapantsi.