1, 2. Kodi ndi citsanzo cipi cinapangiza kufunika kwa mpimo ubodzi towera kusankhula pyakulonga pya relijiau?

 KODI tinakwanisa tani kufika pakunziwa Mulungu? Kodi tisafunika kudinga pyonsene pinapfunziwa na marelijiau mazinji? Mbapidakhala pyakucimwanika. Ngakhale tikakwanisa kucita pyenepi, kodi mbatidadziwa tani kuti ndi cipi cipfunziso candimomwene?

² Andedi, nakuti anthu onsene asaphonyana manyerezero pya Mulungu, tisafuna njira yakuti inakwanisa kutiphedza kudziwa undimomwene, ande, mpimo ubodzi wakuti anthu anakwanisa kuutawira. Mwacitsanzo: Tilonge kuti anthu akupokanyana thangwi ya ndida wa nguwo yakuguliswa m’nsika. Nyakugulisa asati nguwo ndi ya mametru matatu, mbwenye nyakugula asati nkhabe kwana mametru matatu. Kodi unamaliswa tani nseru unoyu? Mwakupima nguwo ineyi na ndodo ya kupima.

3. Kodi ndi thangwi yanji yalembwa Bibilya?

³ Kodi pana cinthu towera kupima naco, mpimo ubodzi towera kusankhula pinthu pya relijiau? Inde ulipo, unoyu ndi Bibilya. Mulungu acita kuti Bibilya ilembwe towera anthu m’mbuto zonsene akwanise kupfunza undimomwene wa pya iye. Mabibilya pikwi na pikwi adindwa. Iyo yathumburuzwa yonsene peno khundu ibodzi m’pilongero pyakupiringana 2.100. Cifupifupi munthu onsene anakwanisa kuleri undimomwene wa pya Mulungu m’cilongero cace cene.

4. Kodi ndi mphangwa zanji ziri m’Bibilya?

 ⁴ Bibilya ndi sagwanti wa ntengo ukulu yakubulukira kwa Mulungu. Isafokotoza pinthu pyakuti pakusowa iyo na cipo mbatidapidziwa tayu. Isatipanga pya anakhala m’mbuto yauzimu. Isapangiza manyerezero a Mulungu, umunthu wace, na cifuniro cace. Isalonga pya macitiro ace na anthu m’kupita kwa pikwi na pikwi pya piaka. Isalonga pinthu pinafuna dzacitika ntsogolo. Pina isapangiza kuti tinakwanisa tani kugumana njira ya ku umaso okhonda mala.

5. Kodi ndi citsanzo cipi cinapangiza kuti Bibilya isabverana na siyensiya?

⁵ Alipo mathangwi akuinjipa towera tikhulupire kuti Bibilya mwandimomwene ndi Mafala a Mulungu. Thangwi ibodzi njakuti Bibilya isabverana na siyensiya. M’midzidzi yakale, anthu m’dziko yonsene akhanyerezera kuti dziko yapantsi yatsamira pa cinthu cinango. Mwacitsanzo, ku Afrika wa Madokero dzuwa, anthu akakhulupira kuti dziko yapantsi yathukulwa na nyoka yakufunyika maulendo 3.500 padzulu pa dziko yapantsi na maulendo 3.500 pantsi pace. Mbwenye, m’kubverana na siyensiya, mulembi mbodzi wa Bibilya alemba piaka pyakupiringana 3.500 ndulimu kuti Mulungu “athasika dziko yapantsi papezi pene.”—Yobi 26:7.

6. Kodi ndi upi umboni ukulu kakamwe wakuti Bibilya njakubuluka kwa Mulungu?

⁶ Umboni ukulu kakamwe wakuti Bibilya ndiyodi ya Mulungu ndi undendemeri wace wa kulongeratu pya ntsogolo. Mwakusiyana na pyakulongerwatu na anthu, Mulungu ene asadziwa ntsogolo; consene cinalongeye midzidzi yonsene cisacitika.

7. Kodi mbapi maprofesiya anango a Bibilya adakwaniriswa ndulimu?

⁷ Madzana na madzana a maprofesiya a Bibilya akwaniriswa m’midzidzi yakale. Mwacitsanzo, piaka 700 Yezu mbadzati kubalwa ku nzinda wa Belemu, Bibilya yalonga pyenepi mwakundendemera, natenepa pyacitikadi. (Mika 5:2; Mateyu 2:3-9) Kuthimiza pa maprofesiya anango akuinjipa a pya Yezu, Bibilya yalongeratu pina kuti iye anadzabalwa na mwali nakuti patsogolo pace anadzaperekwa na makobiri 30 a parata. Maprofesiya anewa akwaniriswa pina. Mwandimomwene, nkhabepo munthu na mbodzi ene mbadakwanisa kulongeratu pinthu pyenepi!—Yesaya 7:14; Zakaria 11:12, 13; Mateyu 1:22, 23; 27:3-5.

8. Kodi mbapi maprofesiya anango a Bibilya anakwaniriswa lero nakuti asapereka umboni wanji?

⁸ Maprofesiya akuinjipa a Bibilya asakwaniriswa  m’ntsiku zathu zino. Ali pano mangasi a iwo:

•   “Mbumba ibodzi inadzamenyana na mbumba inzace, [m’nkhondo], na umambo na umambo unzace; panadzakhala piteketeke pikulu, ku mbuto ibodzi na inango, miliri na kucerera, kwa pyakudya.”—Luka 21:10, 11.

•   Panadzakhala “kuinjipa kwa kukhonda tongeka.”—Mateyu 24:12.

•   “M’ntsiku zakumalisa . . . anthu anadzakhala akupifuna okhene, akufuna kobiri, . . . akukhonda bvera akuwabala, . . . akusoa kupikhondesa, aukali, akusoa kufuna kwa udidi, . . . akudzadzwa na umbirimi, akufunisisa pyakutsanzaisa kupiringana akufuna Mulungu.”—2 Timoti 3:1-5.

 Kodi imwe nkhabe kutawira kuti pinthu pyenepi pisacitika lero? Undimomwene na undendemeri wa maprofesiya a Bibilya pisapangiza kuti Bibilya si bukhu yapezipezi tayu. Ndi Mafala akupepeserwa a Mulungu!—2 Timoti 3:16.

9, 10. Kodi ninji cinapangiza kuti Mulungu hadalekerera anthu kuti acinje Bibilya?

⁹ Tendeni tinyerezere kuti: Imwe ndimwe mwanaciro wa fabirika natenepa mwapereka ndandanda wa mitemo kuna anyabasa anu. Khala nyamalwa asanduza pidalembemwe, kodi mbamudacitanji? Kodi mbamudalinganiza tayu pidacinjwa? Mwa njira ibodzibodzi, Mulungu nkhabe kulekerera kuti anthu acinje undimomwene wa Mafala ace, Bibilya.

¹⁰ Anthu adayesera kucinja pipfunziso pya Mafala a Mulungu hadapembera tayu. Tingayeseza Bibilya inaife lero na Mabibilya akale, iwo ali sawasawa. Pyenepi pisapangiza kuti Bibilya na kupita kwa piaka hidacinjwa tayu.