MULUNGU WA MPHAMBVU YONSENE ndi Mwanaciro wa kudzulu na pantsi ponsene. Umaso wathu wa cincino na wa ntsogolo usanyindira kwa iye. Iye ali na mphambvu ya kupasa muoni na ya kupokosera. Ali na mphambvu ya kupasa umaso na ya kubulusa umaso. Tingakhala na citawiro cace, pinadzakhala pyadidi kuna ife; tingakhonda khala na citawiro cace, pinadzakhala pyakuipa kuna ife. Mphyakufunika tani kuti kulambira kwathu kukhale kwakutawirika kwa iye!

Anthu asalambira m’njira zakuinjipa. Khala relijiau ndi ninga njira, kodi njira zonsene za relijiau ntsakutawirwa na Mulungu? Nkhabe, nkhabe tayu. Yezu, mprofeta wa Mulungu, apangiza kuti pali njira ziwiri basi. Iye alonga kuti: “Ukulu na wakufumbuka ndi nseu unatsogolera ku cifudzo, azinji asaenda na unoyu; mbwenye wakucepa ndi nsuwo na wakupapanula ndi nseu unatsogolera ku umaso, na akucepa ndiwo anaugumana.”—Mateyu 7:13, 14.

Pana mitundu miwiri basi ya marelijiau: ibodzi inatsogolera ku umaso na inango inatsogolera ku cifudzo. Cifuno ca bruxura ino ndi kukuphedzani towera mugumane njira inatsogolera ku umaso okhonda mala.