NSOLO 9
“Mulungu Nkhabe Tsankhulo”
Akristu atoma kumwaza mphangwa kuna anthu a madzindza onsene
Mphangwa zakubuluswa m’bukhu ya Mabasa 10:1–11:30
1-3. Kodi Pedhru aoneswanji na Yahova, pontho thangwi yanji ife tisafunikambo kudziwa mabvekero a pinthu pidaona iye?
MU CAKA 36 P.K.K., Pedhru akhali mu nzinda wa Jope. Kweneko iye akhala ntsiku zizinji ninga mulendo panyumba ya Simau. Simau akakhala dhuzi na bara, pontho akhaphata basa na nthembe za pinyama. a Anthu akhacita basa ineyi akhaoniwa mwakuipa na Ayuda, pontho anthu azinji nee mbadatawira kukhala dhuzi na anyakucita basa ineyi. Mbwenye Pedhru nee akhanyerezera ninga anthu anewa. Natenepa Yahova akhafuna kuphedza Pedhru toera abvesese kuti Iye akhali wakusowa tsankhulo. Natenepa, Pedhru pidaenda iye pakhonde yandzulu toera kucita phembero, Yahova ampfundzisa cinthu cakufunika kakamwe.
2 Mu ndzidzi ukhacita Pedhru phembero, Mulungu ancitisa kuona nguwo ikulu mbikagwa buluka kudzulu yakuti ikhali na pinyama nkati mwayo. Pyenepi pikhali pinyama pyakuti Ayuda nee akhatawiriswa kudya. Kuona basi pinyama pyenepi mbapidadzudzumisa kakamwe munthu wa dzindza ya Ayuda. Fala idabuluka kudzulu yapanga Pedhru toera aphe, pontho adye pinyama pyenepi. Mbwenye Pedhru alonga: “Ine cipo ndadya kale cinthu cakukhondeswa na cakupswipa mwakubverana na Mwambo.” Mbwenye Pedhru apangwa katatu mafala awa: “Pinthu pidaceneswa na Mulungu, leka kupicemera pyakupswipa.” (Mabasa 10:14-16) Pedhru adzudzumika kakamwe toera kudziwa mabvekero a pinthu pidaona iye, mbwenye Yahova amphedza toera kubvesesa mabvekero a pinthu pyenepi.
3 Masomphenya adaoneswa Pedhru akhabvekanji? Lero tisafunikambo kubvesesa masomphenya adaoneswa Pedhru thangwi masomphenya anewa anatipfundzisa cinthu cakufunika kakamwe thangwi ya maonero a Yahova kuna anthu. Toera tikwanise kumwaza mphangwa zadidi za Umambo wa Mulungu mwakukwana, tisafunika kuona anthu ninga munaaonera Yahova. Cincino tendeni tione kuti ninji pidacitika mbadzati kuoneka masomphenya anewa na pakumala kuoneka kwa masomphenya anewa toera tikwanise kubvesesa mabvekero a pinthu pidaona Pedhru pa ntsiku ineyi.
“Ndzidzi Onsene Iye Akhacita Maphembero Akudembetera Mulungu” (Mabasa 10:1-8)
4, 5. Kodi Kornelyo akhali ani, pontho ninji pidacitika mu ndzidzi ukhacita iye phembero?
4 Pedhru nee akhadziwa kuti ntsiku ibodzi nduli ku Sezareya, kwakuti ndi nsindzo wa makilometru 50 kubuluka ku Jope, mamuna m’bodzi wakucemerwa Kornelyo aoneswambo masomphenya na Mulungu. Kornelyo wakuti akhali nyankhondo Waciroma “akhali munthu wakulambira Mulungu.” b Iye akhalimbo mamuna wa citsandzo cadidi thangwi “iye na anthu onsene a panyumba pace akhagopa Mulungu.” Kornelyo nee akhali Muyuda, pontho nee akhatowezera cikhulupiro ca Ayuda; iye nee akhali wa dzindza ya Yuda. Mbwenye akhapangiza ntsisi mbaphedza Ayuda akuti akhafuna ciphedzo ca pinthu pyakumanungo. Mamuna unoyu “ndzidzi onsene . . . akhacita maphembero akudembetera Mulungu.”—Mabasa 10:2.
5 Mu ndzidzi utatu wakumaulo, Kornelyo akhacita phembero pidaoneswa iye masomphenya a anju mbampanga: “Mulungu abva maphembero ako, pontho iye aona ciphedzo cinapereka iwe kuna anyakutcerenga.” (Mabasa 10:4) Na citsogolero ca anju, Kornelyo atuma amuna toera akacemere mpostolo Pedhru. Ninga munthu wa dzindza inango, Kornelyo mbadakhala munthu wakutoma wa anthu a madzindza anango kukhala Nkristu.
6, 7. (a) Longani citsandzo cinapangiza kuti Mulungu asatawira maphembero a anthu anafuna kudziwa undimomwene thangwi ya iye. (b) Tisapfundzanji na citsandzo ceneci?
6 Kodi lero Mulungu asatawira maphembero a anthu anafuna kudziwa undimomwene thangwi ya iye? Onani citsandzo cibodzi. Nkazi m’bodzi wa ku Albhaniya atambira revista ya A Sentinela yakuti iri na nsolo unalonga pya kukuza ana. c Nkazi unoyu apanga Mboni wa Yahova adagogodza nsuwo wace: “Musadziwa kuti ndikhacita phembero kuna Mulungu toera kuphemba ciphedzo cakukuza ananga? Mulungu akutumani! Pidalonga imwe, mwandimomwene pyakhuya kakamwe ntima wanga!” Nkazi unoyu pabodzi na anace atoma kupfundza Bhibhlya, pontho mukupita kwa ndzidzi mamunace atomambo kugumanika pa pfundziro.
7 Pyenepi pisacitika kazinji kene mu pisa pyakusiyana-siyana, mbwenye nee pisacitika mwasusudeu. Pyenepi pisapangizanji? Cakutoma, Yahova asatawira maphembero anacita anthu akuti asafuna kakamwe kundziwa. (1 Ama. 8:41-43; Mas. 65:2) Caciwiri, ife tiri na ciphedzo ca aanju m’basa yathu yakumwaza mphangwa.—Apok. 14:6, 7.
‘Pedhru Akhadzudzumika Kakamwe’ (Mabasa 10:9-23a)
8, 9. Kodi Mulungu apanga Pedhru toera acitenji, pontho Pedhru atawira tani?
8 Pikhali iye pakhonde yandzulu, ‘Pedhru akhadzudzumika kakamwe’ thangwi ya pinthu pidaona iye. Mu ndzidzi unoyu, amuna adatumwa na Kornelyo afika panyumba ya Simau. (Mabasa 10:17) Khala Pedhru akhonda kudya cakudya cakuti Ayuda nee akhatawiriswa kudya, kodi iye mbadatawira kuenda pabodzi na amuna anewa kunyumba kwa mamuna wakuti nee akhali Muyuda? Mulungu aphatisira nzimu wace wakucena toera kucitisa Pedhru adziwe kuti Iye akhafuna kuti Pedhru aende. Iye apangwa tenepa: “Ona, amuna atatu asakusaka. Natenepa, lamuka, tcita toera uende pabodzi na iwo. Leka kupenula, thangwi ndine adaatuma.” (Mabasa 10:19, 20) Mwandimomwene, pinthu pidaona Pedhru pyamphedza, natenepa iye akhali dzololo toera kubvera citsogolero ca nzimu wakucena wa Mulungu.
9 Pedhru pidadzindikira iye kuti anju apanga Kornelyo toera atume amuna anewa, Pedhru aapanga toera apite n’nyumba “mbakhala nawo ninga alendo ace.” (Mabasa 10:23a) Mpostolo Pedhru akhadatoma kucinja manyerezero ace pidadziwa iye cifuniro ca Mulungu.
10. Kodi Yahova asatsogolera tani mbumba yace, pontho ndi mibvundzo ipi yakuti tisafunika kuicita?
10 Mpaka lero, Yahova asapitiriza kuphedza mbumba yace toera kubvesesa cifuniro cace mwapang’ono-pang’ono. (Mis. 4:18) Yahova asaphatisira nzimu wace toera kutsogolera “m’bandazi wakukhulupirika na wandzeru.” (Mat. 24:45) M’midzidzi inango pasaoneka macinjo thangwi ya njira yakubvesesa kwathu Mafala a Mulungu peno tisacinja njira yakucita pinthu mu gulu ya Yahova. Natenepa mphyadidi kubvundzika: ‘Kodi ndiri dzololo toera kutawira macinjo anewa? Kodi ndisatawira citsogolero ca nzimu wakucena wa Mulungu?’
Pedhru “Aapanga Toera Abatizwe” (Mabasa 10:23b-48)
11, 12. Kodi Pedhru acitanji pidafika iye ku Sezareya, pontho ninji pidapfundza iye?
11 Mangwana mwace, Pedhru na amuna anango apfemba, atoma kucita ulendo kubuluka ku Jope kuenda ku Sezareya. Mwa amuna anewa, atatu akhali ale adatumwa na Kornelyo, pabodzi na ‘abale atanthatu’ Aciyuda. (Mabasa 11:12) Nakuti Kornelyo akhadikhira Pedhru, iye agumanya “abale ace na axamwali ace apantima” akuti akhalimbo a dzindza inango. (Mabasa 10:24) Pidafika iye, Pedhru acita cinthu cakuti cipo anyerezera kale kuti mbadacicita: Iye apita n’nyumba ya munthu wakukhonda kusidzwa! Pedhru afokotoza: “Imwe musadziwa mwadidi kuti Ayuda nkhabe kutawiriswa na mwambo toera kufendedzera peno kukhala pabodzi na munthu wa dzindza inango, mbwenye Mulungu andipangiza kuti nee ndisafunika kulonga munthu kuti ndi wakukhonda cena peno wakupswipiswa.” (Mabasa 10:28) Mu ndzidzi unoyu Pedhru abvesesa kuti masomphenya akhadaoneswa iye akhafuna kumpfundzisa pizinji kupiringana basi ene kuntawirisa kudya pyakudya pyakuti pikhakhondeswa na mwambo. Iye nee akhafunika ‘kulonga munthu kuti ndi wakukhonda cena, ngakhale munthu wa dzindza inango.’
“Kornelyo akhaadikhira, iye akhadagumanya abale ace na axamwali ace apantima.”—Mabasa 10:24
12 Anthu onsene panyumba ya Kornelyo akhali dzololo toera kubva pikhafuna kulonga Pedhru. Kornelyo alonga: “Cincino ife tiri pamaso pa Mulungu toera kubva mafala onsene adakupangani Yahova toera kualonga.” (Mabasa 10:33) Nyerezerani mabvero anafuna kukhala na imwe khala munthu anafuna kudziwa Mulungu mbakupangani mafala ninga anewa! Pedhru alonga mafala awa amphambvu: “Cincino ndisabvesesa mwadidi kuti Mulungu nkhabe tsankhulo, mbwenye m’madzindza onsene, munthu anan’gopa mbacita pinthu pyakulungama ndi wakutawirika kuna iye.” (Mabasa 10:34, 35) Pedhru apfundza kuti Mulungu nkhabe kupasa nkhombo anthu a dziko ibodzi kupiringana dziko inango, dzindza peno ntundu ubodzi kupiringana unango. Natenepa, Pedhru aafokotozera thangwi ya utumiki wa Yezu, kufa kwace na kulamuswa kwace muli akufa.
13, 14. (a) Anthu a madzindza anango pidakhala iwo Akristu, kodi pyenepi pikhapangizanji? (b) Thangwi yanji nee tisafunika kutonga anthu anamwazira ife mphangwa?
13 Buluka penepo, pacitika cinthu cakuti cikhadzati citika kale: “Pedhru pikhapitiriza iye kulonga pyenepi,” nzimu wakucena watsanulwa kuna anthu anewa “a madzindza anango.” (Mabasa 10:44, 45) Ndi ulendo unoyu basi unalonga Mafala a Mulungu kuti nzimu wakucena watsanulwa kuna anthu mbadzati kubatizwa. Pedhru adzindikira kuti pyenepi pikhapangiza kuti Mulungu akhatawira anthu anewa toera akhale atumiki ace. Natenepa iye “aapanga [Ajentiyu] toera abatizwe.” (Mabasa 10:48) Anthu anewa a madzindza anango pidatawira iwo kukhala Akristu mu caka 36 P.K.K., pikhapangiza kuti ndzidzi ukhaona Mulungu Ayuda ninga dzindza yakupambulika ukhadamala. (Dhan. 9:24-27) Pa ndzidzi unoyu, Pedhru aphatisira xavi yacitatu yakuti ikhali xavi yakumalisa mwa “maxavi a Umambo.” (Mat. 16:19) Xavi ineyi yapasa mwai anthu a madzindza anango toera kukhala Akristu akudzodzwa na nzimu wakucena.
14 Tingamwaza mphangwa zadidi lero, tisadzindikira kuti “Mulungu nkhabe tsankhulo.” (Aroma 2:11) Iye asafuna kuti “anthu a mitundu yonsene apulumuswe.” (1 Tim. 2:4) Natenepa, ife cipo tisafunika kutonga anthu thangwi ya maonekero peno makhaliro awo. Basa yathu ndi yakupereka umboni wakukwana thangwi ya Umambo wa Mulungu, basa ineyi isaphataniza kumwaza mphangwa kuna anthu onsene, mwakukhonda tsalakana dzindza yawo, dziko yawo, maonekero awo peno uphemberi wawo.
“Iwo Akhurudzika, Asimba Mulungu” (Mabasa 11:1-18)
15, 16. Thangwi yanji Akristu anango Aciyuda alongezana na Pedhru, pontho iye afokotoza tani pinthu pidacita iye?
15 Pedhru akhafuna kakamwe kuenda ku Yerusalemu toera kupanga abale pinthu pidacitika. Mbwenye mphangwa zakuti anthu a madzindza anango ‘atawira mafala a Mulungu’ zikhadafika kale kweneko iye mbadzati kufikako. Pakupita ndzidzi wakucepa pidafika iye ku Yerusalemu, “anyakuphedzera mwambo unalonga pya kusidzwa atoma kumulongera.” Iwo akhali akutsukwala thangwi Pedhru akhadapita ‘n’nyumba mwa anthu akukhonda sidzwa, mbadya pabodzi na iwo.’ (Mabasa 11:1-3) Iwo nee aipirwa thangwi anthu anewa atawira kukhala Akristu. Mbwenye Ayuda anewa akhakakamira toera anthu a madzindza anango abvere Mwambo wa Mose, kuphatanizambo ntemo unalonga thangwi yakusidzwa toera alambire Yahova mwakutawirika. Pyenepi pisapangiza pakweca kuti Akristu anango Aciyuda nee akhakwanisa kusiya kubvera Mwambo udapereka Mulungu kuna Mose.
16 Pedhru afokotoza tani pyenepi? Mwakubverana na Mabasa 11:4-16, iye alonga pinthu pinai pinapangiza kuti ndi Mulungu adantsogolera toera kucita pyenepi: (1) masomphenya adaoneswa iye (Vesi 4-10); (2) citsogolero cidatambira iye ca nzimu wakucena (Vesi 11, 12); (3) anju adaonekera kuna Kornelyo (Vesi 13, 14); na (4) kutsanulwa kwa nzimu wakucena kuna anthu a madzindza anango. (Vesi 15, 16) Pedhru amalisa kulonga mafalace na mbvundzo wakufunika kakamwe: “Khala Mulungu aapasa [anthu a madzindza anango adatawira kukhala Akristu] muoni ubodzi ene [nzimu wakucena] udapereka iye kuna ife [Ayuda] anakhulupira Mbuya Yezu Kristu, ndine ani ine toera kupingiza Mulungu?”—Mabasa 11:17.
17, 18. (a) Kodi Akristu Aciyuda akhafunika kucita macinjo api? (b) Thangwi yanji midzidzi inango pisanentsa kukhala akuphatana mu mpingo, pontho ndi mibvundzo ipi yakuti tisafunika kuicita?
17 Akristu anewa Aciyuda pidamala iwo kubva pikhalonga Pedhru, iwo akhafunika kucita cisankhulo. Kodi iwo mbadasiya nsambo wakusankhulana, buluka penepo mbatawira na ntima onsene anthu a madzindza anango kukhala Akristu andzawo? Bhibhlya isalonga: “Pidabva iwo [apostolo na Akristu anango Aciyuda] pyenepi, iwo akhurudzika, asimba Mulungu, mbalonga: ‘Mphyadidi, cincino Mulungu asafunambo kuti anthu a madzindza anango atcunyuke toera agumane umaso.’” (Mabasa 11:18) Nakuti iwo acinja manyerezero awo, mpingo wapitiriza kukhala wakubverana.
18 Sawasawambo lero, panango pinakhala pyakunentsa kuna atumiki a Yahova kupitiriza kukhala akuphatana thangwi iwo abuluka ‘m’madziko onsene, madzindza onsene, mbumba zonsene na pilongero pyonsene.’ (Apok. 7:9) M’mipingo yonsene musagumanika anthu a madzindza onsene na a makhaliro akusiyana-siyana. Natenepa mphyadidi kubvundzika: ‘Kodi ndakwanisa kubulusa muntima mwanga mabvero akuida anthu a dzindza inango? Mwakusiyana na anthu a dziko akuti asaona kukhala akulu kupiringana anango, kodi ndiri dzololo toera ndikhonde kutsalakana abale na alongo anga Acikristu munjira ineyi?’ Kumbukani madodo adacita Pedhru (Kefa) mu pyaka pingasi pidatowera. Pidaona iye kuti anthu a madzindza anango akhaoniwa munjira yakuipa, iye ‘apambulika’ pa nsoka wa Akristu a madzindza anango mbasandikwa na Paulu. (Agal. 2:11-14) Tisafunika kucita mphole-mphole kakamwe toera tikhonde kunyerezera kuti ndife akufunika kakamwe kupiringana anango basi ene thangwi ndife akusiyana na iwo.
“Anthu Azinji Akhulupira” (Mabasa 11:19-26a)
19. Kodi Akristu Aciyuda a ku Antiyokiya atoma kumwaza mphangwa kuna ani, pontho ndi nkhombo zipi zidakhala na iwo?
19 Pidamala iwo kubvesesa citsogolero ca Mulungu, kodi Akristu atoma kumwaza mphangwa kuna anthu a madzindza anango? Onani pinthu pidacitika ku Antiyokiya wa ku Sirya. d Mu nzinda unoyu mukhali na Ayuda azinji, pontho iwo nee akhaidana kakamwe na anthu a madzindza anango akakhala mwenemo. Natenepa, Antiyokiya cikhali cisa cadidi toera kumwaza mphangwa kuna anthu a madzindza anango. Ndi mu nzinda unoyu wakuti anyakupfundza anango Aciyuda akhadatoma kumwaza mphangwa zadidi kuna “anthu akhalonga Cigerego.” (Mabasa 11:20) Iwo nee amwazira mphangwa basi ene Ayuda akuti akhalonga Cigerego, mbwenye akhamwazirambo mphangwa anthu a madzindza anango. Yahova apasa nkhombo basa yawo, natenepa “anthu azinji akhulupira.”—Mabasa 11:21.
20, 21. Ndi munjira ipi Bharnabhe apangiza kukhala wakucepeseka, pontho tinatowezerambo tani citsandzo cace mu utumiki wathu?
20 Toera kumwaza mphangwa kuna anthu akuti akhali dzololo toera kubva mphangwa zadidi, mpingo wa ku Yerusalemu watuma Bharnabhe toera aende ku Antiyokiya. Anthu azinji kakamwe akhafuna kubva mphangwa zadidi, natenepa iye mbadacimwana kuamwazira mphangwa ekhene. Natenepa tisakwanisa kudziwa kuti thangwi yanji Bharnabhe aphatisira Saulo toera am’phedze kumwaza mphangwa kuna anthu anewa thangwi Saulo mbadakhala mpostolo kuna anthu a madzindza anango. (Mabasa 9:15; Aroma 1:5) Kodi Bharnabhe mbadaona Saulo ninga nyamalwa? Nee pang’ono pene, thangwi mwakucepeseka Bharnabhe adzindikira kuti akhafuna ciphedzo. Natenepa iye aenda ku Tarso toera kuonana na Saulo, mbabwerera naye ku Antiyokiya toera am’phedze. Iwo akhala ku Antiyokiya caka camumphu mbakawangisa cikhulupiro ca anyakupfundza mu mpingo wa kweneko.—Mabasa 11:22-26a.
21 Tinatowezera tani kucepeseka kwa Bharnabhe mu utumiki wathu? Ife tonsene tiri na makhaliro na maluso akusiyana. Mwacitsandzo anango asakwanisa mwadidi kupereka umboni mwantsusukano peno nyumba na nyumba, mbwenye asacimwana kucita maulendo akubwereza peno kutomesa mapfundziro a Bhibhlya. Khala musafuna kuthimizira maluso anu toera kucita maulendo akubwereza peno kutomesa mapfundziro a Bhibhlya, phembani anango toera akuphedzeni. Mungacita pyenepi, imwe munakhala mpfundzisi wadidi wa Bhibhlya, pontho munakomerwa kakamwe na basa yakumwaza mphangwa.—1 Akor. 9:26.
Kutumiza “Ciphedzo Kuna Abale” (Mabasa 11:26b-30)
22, 23. Kodi abale a ku Antiyokiya acitanji toera kupangiza kuti akhafuna abale na alongo awo, pontho mbumba ya Mulungu lero isapangiza tani ufuni ubodzi ene?
22 Ndi ku Antiyokiya kudatoma “anyakupfundza kucemerwa Akristu, mukutsogolerwa na Mulungu.” (Mabasa 11:26b) Dzina ineyi idapaswa iwo na Mulungu ikhabverana mwadidi na ale akuti akhafuna kutowezera citsandzo ca Kristu. Anthu a madzindza anango pidakhala iwo Akristu, kodi iwo na Ayuda mbadapangiza ufuni kuna unango na ndzace? Onani basi pinthu pidacitika mu ndzidzi udaoneka njala ikulu kakamwe mu caka 46 P.K.K. e Mu ndzidzi wakale, akhagwerwa na njala kazinji kene akhali atcerengi, akuti nee akhali na kobiri idakoya iwo peno cakudya cinango cakuthimizirika. Mu ndzidzi unoyu wa njala, Akristu Aciyuda akuti akakhala ku Yudeya, akuti azinji a iwo akhali akutcerenga akhafuna kakamwe cakudya na pinthu pinango pyakufunika. Pidadziwa iwo kuti abale awo akhafuna ciphedzo, abale a ku Antiyokiya kuphatanizambo Akristu a madzindza anango atumiza “ciphedzo kuna abale a ku Yudeya.” (Mabasa 11:29) Iwo apangiza ufuni wandimomwene kuna abale na alongo awo!
23 Pyenepi ndi sawasawa na pinacita mbumba ya Mulungu lero. Tingadziwa kuti abale athu a m’madziko anango peno pisa pinango asafuna ciphedzo, ife tisaaphedza na ntima onsene. Makomiti a Mafiliali asakhazikisa mwakucimbiza Komiti Yakupereka Ciphedzo toera kutsalakana abale na alongo athu akuti panango agwerwa na pidengwa pyacibaliro, kuphatanizambo pyondzi, piteketeke na tsunami. Tingaphedza abale athu anafuna ciphedzo, tisapangiza kuti ife mwandimomwene tisaafuna.—Juw. 13:34, 35; 1 Juw. 3:17.
24. Tinapangiza tani kuti tisabvesesambo mabvekero a masomphenya adaoneswa Pedhru?
24 Ninga Akristu andimomwene, tisadziwa kuti ndi pyakufunika kakamwe kupfundza na pinthu pidacitikirwa na Pedhru pikhali iye mu khonde ya ndzulu ku Jope. Ife tisalambira Mulungu wakusowa tsankhulo. Yahova asafuna kuti tipereke umboni wakukwana thangwi ya Umambo. Tinacita pyenepi tingamwaza mphangwa kuna anango mwakukhonda tsalakana kudabuluka iwo, peno mwakukhonda tsalakana kuti anthu anango asaaona tani. Natenepa, ife tisafunika kumwaza mphangwa kuna anthu onsene akuti asatibvesera toera iwo akwanise kucita macinjo mbatumikira Yahova.—Aroma 10:11-13.
Abale athu angafuna ciphedzo, tisacita pyonsene toera kuaphedza
a Ayuda anango akhapwaza anthu akuti basa yawo ikhali ya kuphata pinyama pyakufa mbabulusa nthembe na kuisasanyira. Basa ineyi ikhaphatanizambo kuphata pinthu pinango pyakununkha pyakuti pikhali pyakufunika toera kucita basa ineyi. Iwo akhaoniwa kuti nee athema kuenda mu templo, pontho mbuto yawo ya basa ikhafunika kukhala nsindzo wa metru zakupiringana 20 na nzinda. Panango ndi pyenepi pidacitisa kuti nyumba ya Simau ikhale “n’khundu mwa bara.”—Mabasa 10:6.
b Onani bokosi ya nsolo wakuti “ Kornelyo na Nyankhondo Waciroma.”
c Nsolo wakuti “Conselhos Confiáveis Para Criar Filhos,” usagumanika mu A Sentinela ya 1.° de Novembro de 2006, tsamba 4 mpaka 7.
d Onani bokosi yakuti “ Antiyokiya wa ku Sirya.”
e Nyakulonga pinthu pya mu ndzidzi wakale Waciyuda anacemerwa Jozefo alonga kuti “njala ineyi ikulu” yaoneka mu ndzidzi wa utongi wa Ntongi Klaudhyo (41-54 P.K.K.).
