NSOLO 23
“Bveserani mu Ndzidzi Unafokotoza Ine”
Paulu atsidzikiza cikhulupiro cace pamaso pa mwinji wakuti ukhali wakuipirwa na pa Thando Yakutongera Miseru
Mphangwa zakubuluswa m’bukhu ya Mabasa 21:18–23:10
1, 2. Thangwi yanji Paulu aenda ku Yerusalemu, pontho ndi nyatwa ipi ikhafuna kutamba iye kweneko?
PAULU akhafamba m’miseu ming’ono ya mu Yerusalemu yakuti ikhapita na anthu azinji. Mu pyaka pizinji, Yerusalemu ikhali mbuto ikulu ikhaphatisira anthu toera kulambira Yahova. Anthu azinji mwenemo akhali akudzikuza kakamwe thangwi ya nzinda unoyu na dzindza yawo. Paulu akhadziwa kuti Akristu azinji mu nzinda unoyu akhapitiriza kubvera Mwambo wa Mose, pontho akhadzati kutawira njira ipswa yakulambira ikhaapfundzisa Yahova. Natenepa Paulu pikhali iye ku Efeso, iye acita masasanyiro toera kuenda ku Yerusalemu toera kuphedza Akristu akhali kweneko. Iye nee aenda basi ene toera kupereka kobiri kuna abale a ku Yerusalemu, mbwenye akhafunambo kuaphedza toera kucinja maonero awo akuphonyeka. (Mabasa 19:21) Umaso wace ukhali pangozwi, ngakhale tenepo iye aenda basi kweneko.
2 Paulu athabuka na nyatwa zizinji kakamwe ku Yerusalemu. Abale anango akakhulupira uthambi udabva iwo na anthu thangwi ya Paulu. Pontho ale akuti akhaida Paulu abweresa nyatwa zizinji kakamwe kuna Paulu. Iwo am’pambizira, am’menya, pontho ayesera kumupha. Pinthu pyenepi pyonsene pyacitisa Paulu kutsidzikiza cikhulupiro cace. Paulu apangiza kucepeseka, cipapo na cikhulupiro pakuthimbana na nyatwa zenezi. Citsandzo cace cisatipfundzisa kuti tinatowezera tani pidacita iye tingathimbana na nyatwa zibodzi zene lero.
Iwo “Atoma Kusimba Mulungu” (Mabasa 21:18-20a)
3-5. (a) Mbani adagumanyikana na Paulu ku Yerusalemu, pontho ninji pidalongwa pa nsonkhano unoyu? (b) Tisapfundzanji na nsonkhano udacita Paulu na akulu a mpingo a mu Yerusalemu?
3 Pakupita ntsiku ibodzi pidafika iye ku Yerusalemu, Paulu na andzace aenda kaonana na akulu a mpingo a mpingo unoyu. Mphangwa zenezi nee zisalonga pya apostolo a Yezu; panango iwo akhadaenda kamwaza mphangwa m’mbuto zinango za dziko yapantsi. Mbwenye Tiyago m’bale wa Yezu akhali mwenemo. (Agal. 2:9) Panango ndi Tiyago adatsogolera nsonkhano mu ndzidzi wakuti “akulu a mpingo onsene akhali penepo” na Paulu.—Mabasa 21:18.
4 Paulu amwanyika akulu a mpingo “mbatoma kuafokotozera pinthu pyonsene pidacita Mulungu pakati pa anthu a madzindza anango kubulukira m’basa yace yakumwaza mphangwa.” (Mabasa 21:19) Kubva mphangwa zenezi pyawangisa kakamwe abale anewa. Ife tisatsandzayambo lero tingabva mphangwa thangwi yakuthambaruka kwa basa yakumwaza mphangwa m’madziko anango.—Mis. 25:25.
5 Mu ndzidzi unoyu, Paulu panango alonga pya kobiri idabweresa iye pidabuluka iye ku Europa. Abale anewa akomerwa kakamwe, pontho apereka takhuta thangwi yakudziwa kuti abale awo anakhala mbuto zakutali akhapangiza ufuni kuna iwo. Abale anewa pidamala iwo kubva mphangwa zidalonga Paulu “iwo [akulu a mpingo] atoma kusimba Mulungu”! (Mabasa 21:20a) Abale athu lero akuti asathabuka na pidengwa, peno ale akuti asabva kupha kakamwe asatsandzayambo, pontho asapereka takhuta kuna abale awo angaaphedza, mbaabalangaza.
Azinji Akhapitiriza ‘Kubvera Mwambo Mwaphinga’ (Mabasa 21:20b, 21)
6. Ndi nkandzo upi udadziwa Paulu?
6 Buluka penepo, akulu a mpingo apanga Paulu kuti abale a ku Yudeya akhadzudzumika thangwi ya pinthu pidabva iwo thangwi ya iye. Iwo alonga: “M’bale, imwe musadziwa kuti pana pikwi na pikwi pya Ayuda akuti atoma kukhulupira, pontho onsene asabvera Mwambo mwaphinga. Mbwenye iwo abva kuti imwe musapfundzisa Ayuda onsene pakati pa anthu a madzindza anango toera akhonde kubvera Mwambo wa Mose, mbamuapanga toera akhonde kusidza anawo nee kutoweza miyambo idakhazikiswa.” a—Mabasa 21:20b, 21.
7, 8. (a) Ndi manyerezero api akuphonyeka akhali na Akristu azinji a ku Yudeya? (b) Thangwi yanji kunyerezera kwawo pyakuphonyeka nee pikhapangiza kuti akhali anyakusandukira?
7 Thangwi yanji Akristu azinji akhapitiriza kukakamira kubvera Mwambo wa Mose, maseze Mwambo unoyu ukhadasiya kale kuphata basa mu pyaka pyakupiringana 20? (Akol. 2:14) Mu caka 49 P.K.K., apostolo na akulu a mpingo adagumanyikana mu Yerusalemu atumiza kuna mipingo tsamba inapangiza kuti Akristu a madzindza anango nee akhafunikabve kusidzwa na kubvera Mwambo wa Mose. (Mabasa 15:23-29) Mbwenye tsamba ineyi nee yalonga pya Akristu Aciyuda, akuti azinji a iwo nee abvesesa kuti nee akhafunikabve kubvera Mwambo wa Mose.
8 Maseze Akristu anewa Aciyuda nee akhabvesesa munjira yadidi, iwo akhapitiriza kukhala Akristu akukhulupirika. Mbadzati kukhala Akristu, iwo nee akhalambira alungu authambi; pontho pidakhala iwo Akristu, iwo nee atowezera misambo yauthambi ya mauphemberi. Mwambo unoyu wakuti ukhali wakufunika kakamwe kuna Akristu anewa Aciyuda acita kuupaswa na Yahova. Iwo nee apaswa na madimonyo peno nee cikhali cipfundziso cakuphonyeka. Mwambo ukhacita khundu ya cibverano cakale, mbwenye Akristu akhacita khundu ya cibverano cipswa. Natenepa, Yahova nee akhaaphembabve kuti abvere Mwambo wa Mose toera ulambiri wawo ukhale wakutawirika kuna Iye. Akristu Aciyuda akuti akhakakamira toera anthu abvere Mwambo wa Mose nee akhanyindira masasanyiro mapswa toera kulambira Yahova. Yahova akhapangiza pinthu pipswa thangwi ya njira yakuthema ya kumulambira, pontho iwo akhafunika kutawira pyenepi. b—Yer. 31:31-34; Luka 22:20.
‘Anadziwa Kuti Pinthu Pikhalonga Anthu Mphyauthambi’ (Mabasa 21:22-26)
9. Paulu akhapfundzisanji thangwi ya Mwambo wa Mose?
9 Anthu akhadabva mphangwa zakuti Paulu akhapfundzisa Ayuda pakati pa madzindza anango kuti “akhonde kusidza anawo nee kutoweza miyambo idakhazikiswa.” Paulu amwaza mphangwa zadidi kuna anthu a madzindza anango, pontho iye aafokotozera cisankhulo cidacitwa cakuti iwo nee akhafunika kubvera Mwambo. Iye alongambo kuti ale akhakakamira kuti anthu a madzindza anango asidzwe na kubvera Mwambo wa Mose akhali akuphonyeka kakamwe. (Agal. 5:1-7) Paulu amwazambo mphangwa zadidi kuna Ayuda akhali m’mizinda idaenda iye. Mwandimomwene iye afokotozera Ayuda akham’bvesera kuti kufa kwa Yezu kwacitisa Mwambo wa Mose usiye kuphata basa, pontho Mulungu nee akhaaphembabve toera kubvera mwambo kuti akhale anthu akulungama.—Aroma 2:28, 29; 3:21-26.
10. Paulu apangiza tani kuti akhali na maonero akulinganira thangwi wa Mwambo na kusidzwa?
10 Mu ndzidzi ubodzi ene, Paulu nee asandika ale akuti akhafuna kupitiriza kutowezera misambo inango Yaciyuda, ninga yakukhonda kuphata basa pa ntsiku ya Sabudu na kukhonda kudya pinthu pinango. (Aroma 14:1-6) Pontho iye nee akhazikisa mitemo thangwi ya kusidzwa. Mbwenye Paulu aphemba Timoti toera asidzwe. Paulu nee akhafuna kuti Ayuda akhonde Timoti thangwi pai wace akhali N’gerego. (Mabasa 16:3) Munthu akhafunika kusankhula ekha khala anasidzwa peno nkhabe. Paulu apanga anthu a ku Galasya: “Kusidzwa na kukhonda kusidzwa nkhabe basa kuna iwo, mbwenye cinafunika ndi kukhala na cikhulupiro cinatsogolerwa na ufuni.” (Agal. 5:6) Natenepa, pikhali pyakuipa munthu angasidzwa thangwi yakubvera Mwambo, peno kulonga kuti munthu asafunika kusidzwa toera akhale wakutawirika kuna Yahova. Kucita pyenepi pikhapangiza kuti munthu akhali wakusowa cikhulupiro.
11. Akulu a mpingo apanga Paulu toera acitenji, pontho ninji pyakuti iye nee mbadapicita? (Onanimbo cidzindikiro capantsi.)
11 Natenepa, maseze pinthu pidabva Akristu anewa thangwi ya Paulu pikhali pyauthambi, Akristu Aciyuda akhapitiriza kudzudzumiswa na pyenepi. Na thangwi ineyi, akulu a mpingo apanga Paulu toera acite ipi: “Ife tiri na amuna anai adacita pikiro kuna Mulungu. Kwatani amuna anewa, muceneseke pabodzi na iwo mwakubverana na mwambo, pontho mulipe ndimwe pyonsene pinafunika toera iwo acingise tsisi yawo. Penepo onsene anadziwa kuti pinthu pikhalonga anthu thangwi ya imwe, mphyauthambi, mbaona kuti imwe musatoweza pitsogolero, pontho musabverambo Mwambo.” c—Mabasa 21:23, 24.
12. Paulu apangiza tani kuti akhali dzololo toera kubvera pitsogolero pya akulu a mpingo?
12 Paulu mbadakwanisa kulonga kuti nkandzo ukulu nee ndi mphangwa zauthambi thangwi ya iye, mbwenye ndi thangwi Akristu Aciyuda anewa akhakakamira kuti iwo akhafunika kupitiriza kubvera Mwambo wa Mose. Mbwenye iye akhali dzololo toera kucita pidaphembwa iye na akulu a mpingo, mu ndzidzi ubodzi ene mbakhonda kucita pinthu pyakuti nee pisabverana na pinafuna Mulungu. Ndzidzi unango nduli, iye alemba: “Kuna ale anatoweza mwambo, ndakhala ninga munthu anatoweza mwambo, maseze ine nee ndisatsogolerwa na mwambo, ndacita pyenepi toera ndikwanise kuphedza ale anatsogolerwa na mwambo.” (1 Akor. 9:20) Mu ndzidzi unoyu, Paulu acita pidaphembwa iye na akulu a mpingo mbakhala “ninga munthu anatoweza mwambo.” Pidacita Paulu ndi citsandzo cadidi kakamwe lero cakuti tisafunika kubvera pinapangwa ife na akulu a mpingo, tayu kukakamira kucita pinthu pinafuna ife.—Aheb. 13:17.
Khala cisankhulo nee cikhaphonyana na midida ya mʼBhibhlya, Paulu akhabvera. Kodi imwe musacitambo pyenepi?
“Iye Nee Athema Kukhala M’maso!” (Mabasa 21:27–22:30)
13. (a) Thangwi yanji Ayuda anango atomesa uviyaviya mu templo? (b) Paulu apulumuswa tani?
13 Pinthu nee pyafamba mwadidi mu templo. Pikiro idacita amuna anai pidafika iyo kunkhomo, Ayuda a ku Azya aona Paulu, mbampambizira kuti akhapitisa anthu a madzindza anango mu templo, pyenepi pyatomesa uviyaviya. Mbidakhala kuti nkulu wa anyankhondo Aciroma nee aphedza Paulu, iye mbadamenywa mpaka kufa. Ngakhale tenepo, nkulu unoyu wa anyankhondo aikhisa Paulu nkaidi. Kutomera ntsiku ineyi, Paulu akhala nkaidi pyaka pyakupiringana pinai. Ngakhale tenepo umaso wace ukhapitiriza kukhala pangozwi. Ntsogoleri wa anyankhondo pidabvundzisa iye Ayuda kuti thangwi yanji akhamenya Paulu, iwo ampambizira pinthu pinango. Nakuti anthu akakhuwa kakamwe, ntsogoleri wa anyankhondo nee akhakwanisa kubva mwadidi. Pakumalisa, anyankhondo aendesa Paulu kutali na mwinji unoyu wakuti ukhali wakuipirwa. Paulu na anyankhondo Aciroma pikhafuna iwo kupita pa mbuto inakhala anyankhondo, Paulu apanga ntsogoleri wa anyankhondo: “Ndaphata miyendo, nditawiriseni toera ndilonge na mbumba.” (Mabasa 21:39) Ntsogoleri unoyu antawirisa, natenepa Paulu atoma kutsidzikiza cikhulupiro cace mwacipapo.
14, 15. (a) Paulu afokotozanji kuna Ayuda? (b) Ntsogoleri wa anyankhondo Aciroma acitanji toera kudziwa kuti thangwi yanji Ayuda akhaida Paulu?
14 Paulu atoma kulonga: “Bveserani mu ndzidzi unafokotoza ine kuti pinthu pyacitika tani.” (Mabasa 22:1) Paulu aphatisira Cihebheri, natenepa iwo akhurudzika. Iye aafokotozera mwadidi kuti thangwi yanji mu ndzidzi unoyu iye ndi ntowereri wa Kristu. Pakucita pyenepi, Paulu alonga pinthu pyakuti Ayuda mbadapifufudza angafuna. Paulu akhadapfundziswa na mpfundzisi wakudziwika kakamwe Gamaliyeli, pontho iye alonga kuti akhatcinga atowereri a Kristu, anthu anango akhali penepo akhadziwa mwadidi pyenepi. Mbwenye pikhaenda iye ku Dhamasku, iye aona masomphenya a Kristu wakuti akhadalamuswa muli akufa mbakalonga na iye. Anthu akhacita ulendo na Paulu aona ceza, pontho abva mafala, mbwenye iwo nee abvesesa mafala adalongwa. (Mabasa 9:7; 22:9) Buluka penepo, andzace aperekera Paulu wakuti akhali boliboli mpaka ku Dhamasku. Ananiya wakuti akhadziwika kakamwe na Ayuda akakhala ncisa ceneci acitisa Paulu toera atome pontho kuona mwacirengo.
15 Paulu aapangambo kuti pidabwerera iye ku Yerusalemu, Yezu aonekera kuna iye mu templo. Pidabva iwo pyenepi, Ayuda atoma kuipirwa kakamwe, natenepa iwo akhuwa: “Mupheni munthu unoyu, thangwi iye nee athema kukhala m’maso!” (Mabasa 22:22) Toera kupulumusa Paulu, ntsogoleri wa anyankhondo acitisa kuti Paulu aendeswe pa mbuto inakhala anyankhondo. Ntsogoleri wa anyankhondo akhafuna kudziwa kuti thangwi yanji Ayuda akhaipirwa kakamwe na Paulu. Natenepa, iye apanga anyankhondo toera akwapule Paulu toera adziwe pinthu pidacita iye. Natenepa, anyankhondo pikhafuna iwo kukwapula Paulu, iye aapanga kuti iye akhali munthu wa dziko ya Roma, pontho aabvundzisa khala iwo akhali na ufulu wakunkwapula mwakubverana na ntemo Waciroma. Mboni za Yahova lero zisaphatisirambo mitemo yakusiyana-siyana toera kutsidzikiza cikhulupiro cawo. (Onani bokosi yakuti “ Ntemo Waciroma na Anthu a mu Dziko ya Roma,” na bokosi yakuti “ Kuwina Miseru mu Ntsiku Zathu.”) Ntsogoleri wa anyankhondo pidabva iye kuti Paulu akhali munthu wa mu dziko ya Roma, iye aona kuti mbadasaka njira inango toera kugumana mphangwa zizinji. Mangwana mwace, iye aphemba anthu a mu Thando Yakutongera Miseru toera agumanyikane kuti adziwe mathangwi adacitisa Paulu kupambizirwa.
“Ine Ndine Nfarisi” (Mabasa 23:1-10)
16, 17. (a) Longani pinthu pidacitika mu ndzidzi udalonga Paulu pa Thando Yakutongera Miseru. (b) Paulu pidamenywa iye apangiza tani kuti akhali wakucepeseka?
16 Pidatoma iye kufokotoza kuna Thando Yakutongera Miseru, Paulu alonga: “Abale anga, ndinakwanisa kulonga pamaso pa Mulungu kuti cikumbuntima canga cisandipanga kuti mpaka lero, ine nee ndacita cinthu cakuipa.” (Mabasa 23:1) Iye nee akwanisabve kulonga pinthu pinango. Bhibhlya isalonga: “Pidabva iye pyenepi, nyantsembe wankulu Ananiya apanga ale akhali dhuzi na Paulu toera amʼmenye pamulomo.” (Mabasa 23:2) Pyenepi pikhali pyakuipa kakamwe! Pikhapangizambo kuti nyantsembe wankulu akhali na tsankhulo. Iye akhanyerezera kuti Paulu akhalonga uthambi, pontho nee akhali na ufulu wakutsidzikizika! Na thangwi ineyi, Paulu ampanga: “Bvesera, Mulungu anadzakutcunyusa iwe mpfakafaka. Iwe wakhala pantsi toera kunditonga mwakubverana na Mwambo, mphapo mu ndzidzi ubodzi ene iwe usaswa Mwambo mbupanga anthu toera andimenye?”—Mabasa 23:3.
17 Anthu anango akhali penepo aipirwa, mbwenye nee aipirwa thangwi ya pinthu pidacitikirwa na Paulu, mbwenye aipirwa thangwi ya pidalonga Paulu! Iwo abvundza Paulu: “Kodi iwe ukutikana nyantsembe wankulu wa Mulungu?” Penepo pene, Paulu apangiza kucepeseka, pontho alemedza Mwambo. Iye alonga: “Abale anga, ine nee ndikhadziwa kuti iye ndi nyantsembe wankulu. Thangwi pyalembwa kuti: ‘Leka kulonga mwakuipa ntongi wa mbumba yako.’” d (Mabasa 23:4, 5; Eks. 22:28) Natenepa Paulu atoma kulonga nawo munjira inango. Iye akhadziwa kuti Thando Yakutongera Miseru ikhaimirirwa na Afarisi na Asadhuki, natenepa iye alonga: “Abale anga, ine ndine Nfarisi, mwana wa Afarisi. Ine ndiri kutongwa thangwi ndisakhulupira pya kulamuswa kwa anyakufa.”—Mabasa 23:6.
Ninga Paulu, ife tisasaka njira yadidi toera kulonga na anthu a mauphemberi anango
18. Thangwi yanji Paulu alonga kuti akhali Nfarisi, pontho tinatowezera tani pidacita iye?
18 Thangwi yanji Paulu alonga kuti akhali Nfarisi? Thangwi iye akhali “mwana wa Afarisi” peno wa banja yakuti ikhali mu uphemberi unoyu. Natenepa anthu azinji akhapitiriza kumuona ninga Nfarisi. e Mphapo thangwi yanji Paulu alonga kuti iye akhali Nfarisi mu ndzidzi wakuti Afarisi akhakhulupira pinthu pyakuphonyeka thangwi yakulamuswa kwa anyakufa? Afarisi akakhulupira kuti khundu ibodzi ya manungo isapitiriza kukhala m’maso munthu angafa, pontho umaso wa anthu akulungama usakhala pontho m’maso m’manungo mwa anthu. Paulu nee akakhulupira pipfundziso pyenepi. Iye akhakhulupira cipfundziso cakulamuswa kwa anthu muli akufa ninga pikhapfundzisa Yezu. (Juw. 5:25-29) Ngakhale tenepo, Paulu akhali na maonero mabodzi ene na Afarisi akuti kuli na cidikhiro ca anthu akufa, pyakuti pikhali pyakusiyana na pikhapfundzisa Asadhuki, thangwi iwo nee akhakhulupira pya cidikhiro cantsogolo. Tinakwanisa kugumana njira yakulonga na anthu akuti ali na pikhulupiro pyakusiyana na pyathu. Iwo asakhulupira mulungu wawo, mbwenye ife tisakhulupira Mulungu wakuti ndi mwanaciro Bhibhlya. Ngakhale tenepo, iwo na ife tisakhulupira kuti Mulungu alipo.
19. Thangwi yanji nsonkhano wa pa Thando Yakutongera Miseru nee wamala mwadidi?
19 Pinthu pidalonga Paulu pyacitisa Thando Yakutongera Miseru igawike. Bhibhlya isalonga: “Watoma uviyaviya ukulu, apfundzisi anango a mwambo a mu nsoka wa Afarisi, alamuka mbatoma kulonga mwakuipirwa kakamwe, mbati: ‘Ife nee tisaona cinthu cakuipa cidacita munthu uyu, mbwenye khala nzimu peno anju alonga na iye . . . ’” (Mabasa 23:9) Asadhuki nee akakhulupira pya aanju, natenepa pidabva iwo thangwi ya aanju, iwo aipirwa kakamwe! (Onani bokosi yakuti “ Asadhuki na Afarisi.”) Uviyaviya wadzathimizirika mbapicitisa ntsogoleri wa anyankhondo Aciroma abwere pontho dzabulusa Paulu penepo. (Mabasa 23:10) Mbwenye Paulu akhapitiriza kukhala pangozwi. Ninji pikhafuna kucitika na Paulu mu ndzidzi unoyu? Tinapfundza pyenepi mu nsolo unatowera.
a Nakuti kweneko kukhali na Akristu azinji Aciyuda, panango kweneko kukhali na mipingo mizinji yakuti ikhacita misonkhano m’manyumba mwa abale.
b Pakupita pyaka pingasi, mpostolo Paulu alemba tsamba yace kuna Ahebheri mbafokotoza kuti cibverano cipswa cikhali cadidi kakamwe kupiringana cibverano cakale. Mu tsamba ineyi, iye apangiza pakweca kuti cibverano cipswa capitira mbuto cibverano cakale. Pinthu pidalemba Paulu pyaphedza kakamwe Akristu toera akwanise kutawira Ayuda akuti akhaazonda. Kusiyapo pyenepi, njira idafokotoza iye yawangisa cikhulupiro ca Akristu anango akuti akhalemedza kakamwe Mwambo wa Mose.—Aheb. 8:7-13.
c Anyakudziwisa anango alonga kuti amuna anewa akhadacita pikiro yakukhala Nazireu. (Num. 6:1-21) Mwambo wa Mose, wakuti ukhacitisa amuna anewa kucita pikiro ineyi, ukhadasiya kuphata basa. Ngakhale tenepo, Paulu panango adzindikira kuti nee ndi pyakuipa amuna anewa angakwanirisa pikiro idacita iwo kuna Yahova. Natenepa nee mbipidakhala pyakuipa Paulu angalipa pinthu pinafuna iwo, buluka penepo mbaaperekera. Ife nee tisadziwa mwadidi pinthu pidapikira amuna anewa toera kucita. Mbwenye kazinji kene, Anazireu akhapereka ntsembe toera iwo aceneseke m’madawo awo, pontho tinakwanisa kukhala na cinyindiro cakuti Paulu nee aatawirisa kucita pyenepi. Pidamala Yezu kupereka umaso wace waungwiro ninga ntsembe, ntsembe ya pinyama nee ikhaphimbirabve madawo. Ife nee tisadziwa pinthu pidacita Paulu, mbwenye tinakwanisa kukhala na cinyindiro cakuti Paulu nee mbadacita cinthu cakuti mbacidadzudzumisa cikumbuntima cace.
d Anthu anango alonga kuti panango Paulu nee akhadziwa kuti akhali nyantsembe wankulu adapanga anthu toera am’menye, thangwi Paulu nee akhakwanisa kuona mwadidi. Panango ndi thangwi akhala ndzidzi uzinji kutali na Yerusalemu, pontho nee akhadziwa kuti nyantsembe wankulu mu ndzidzi unoyu akhali ani. Panango Paulu nee akhakwanisa kuona kuti mbani adapereka ntemo pakati pa mbumba toera amenywe.
e Mu caka 49 P.K.K., pidagumanyikana apostolo na akulu a mpingo toera kudziwa khala anthu a madzindza anango asafunika kubvera Mwambo wa Mose peno nkhabe, Akristu anango akhali penepo akuti akhadziwika ninga ‘a mu nsoka wa Afarisi akhadatoma kukhulupira.’ (Mabasa 15:5) Pyenepi pisapangiza kuti mbadzati kukhala Akristu, iwo akhali Afarisi.
