1. Ndi kulandana kupi kulipo pakati pa Akristu a mu ndzidzi wa apostolo na Mboni za Yahova lero?

 IWO akhamwaza mphangwa mwaphinga. Mwakucepeseka iwo atawira ciphedzo na citsogolero ca nzimu wakucena. Iwo nee asiya kumwaza mphangwa mu ndzidzi ukhatcingwa iwo. Pontho Mulungu aapasa nkhombo zizinji. Ndi pyenepi pidacitika kuna Akristu a mu ndzidzi wa apostolo, pontho ndi pibodzi pyene pinacitika kuna Mboni za Yahova lero.

2, 3. Ninji pinacitisa kuti bukhu ya Mabasa ikhale yakupambulika kakamwe?

² Mwandimomwene, mphangwa zinagumanika m’bukhu ya Mabasa a Apostolo yakuti ndi bukhu ya m’Bhibhlya iri na mphangwa zizinji zakuti zakuwangisani, pontho zathimizira cikhulupiro canu! Bukhu ineyi ndi yakupambulika thangwi ndiyo basi inalonga thangwi ya pinthu pidacita Akristu a mu ndzidzi wa apostolo pidamala Yezu kuenda kudzulu.

³ Bukhu ya Mabasa isalonga pya anthu akukwana 95, pisa 32, mizinda 54 na ntsuwa 9. Iyo isalonga pya anthu akupwazika, atsogoleri a mauphemberi akudzikuza, anyandale akudzikuza, anyakutcinga aukali. Mphangwa zinagumanika m’bukhu ineyi zisalonga pya abale na alongo athu a mu ndzidzi wa apostolo, akuti akhamwaza mphangwa zadidi mwaphinga mwakukhonda tsalakana nyatwa zikhathimbana na iwo.

4. Thangwi yanji tisapibva kukhala dhuzi na mpostolo Paulu, Tabhita, na mboni zakukhulupirika za mu ndzidzi wakale?

⁴ Mu pyaka cifupi na 2.000 nduli, mpostolo Pedhru na Paulu, dotoro wakufunika Luka, nyakupasa mwakudzala manja Bharnabhe, nyacipapo Estevau, mulongo wacitsalakano Tabhita, nyakutambira alendo Lidhya na mboni zinango zizinji zakukhulupirika, aphata basa mwaphinga. Maseze iwo akhala m’maso kale kakamwe, tisapibva kukhala dhuzi na iwo. Thangwi yanji? Thangwi ninga iwo, Yezu atipasambo  basa yakucita anyakupfundza. (Mat. 28:19, 20) Kucita basa ineyi ndi mwai ukulu kakamwe kuna ife!

5. Kodi atowereri akutoma a Yezu atoma kupi kumwaza mphangwa?

⁵ Nyerezerani basi basa idapasa Yezu atowereri ace. Iye alonga: “Nzimu wakucena ungabwera kuna imwe, munadzatambira mphambvu, penepo munadzakhala amboni anga mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:8) Pakutoma, nzimu wakucena wapasa mphambvu anyakupfundza toera akhale amboni “mu Yerusalemu.” (Mabasa 1:1–8:3) Buluka penepo, na citsogolero ca nzimu wakucena, iwo apereka umboni “ku Yudeya konsene na ku Samariya.” (Mabasa 8:4–13:3) Pakumalisa, iwo amwaza mphangwa zadidi “mpaka kunkhomo kwa dziko yapantsi.”—Mabasa 13:4–28:31.

6, 7. Pakumwaza mphangwa, ndi pinthu pipi pyakuti ife tiri napyo mbwenye Akristu a mu ndzidzi wa apostolo nee akhali napyo?

⁶ Abale na alongo anu mu ndzidzi unoyu nee akhali na Bhibhlya yonsene toera kuphatisira mu ndzidzi ukhamwaza iwo mphangwa. Bukhu ya Mateu nee ikhagumanika mpaka mu caka 41 P.K.K. Matsamba anango a Paulu alembwa mu ndzidzi wakuti bukhu ya Mabasa ikhadzati kumala mu caka 61 P.K.K. Natenepa, Akristu a mu ndzidzi wa apostolo nee akhali na Bhibhlya yawo ene. Pontho nee akhali na mabukhu akusiyana-siyana toera kupasa ale akhamwazira iwo mphangwa. Ndimomwene kuti mbadzati kukhala anyakupfundza a Yezu, Akristu Aciyuda akhabva kulerwi kwa Malemba Acihebheri m’masinagoga. (2 Akor. 3:14-16) Ngakhale tenepo, iwo akhafunika kupfundza mwadidi malemba, thangwi basi ene akhafunika kulonga malemba ale akhakumbuka iwo.

⁷ Azinji a ife lero ali na Bhibhlya na mabukhu mazinji akubuluswa m’Bhibhlya. Tiri kucita anyakupfundza thangwi yakumwaza mphangwa zadidi m’madziko akukwana 240 mu pilongero pizinji.

8, 9. (a) Nzimu wakucena waphedza anyakupfundza a Yezu toera kucitanji? (b) Kodi m’bandazi wakukhulupirika na wandzeru asacitanji na ciphedzo ca nzimu wakucena?

⁸ Yezu pidapanga iye anyakupfundzace toera kupereka umboni, iye aapanga: “Nzimu wakucena ungabwera kuna imwe, munadzatambira mphambvu.” Mukutsogolerwa na nzimu wakucena, atowereri a Yezu mbadamwaza mphangwa pa dziko yonsene yapantsi. Na ciphedzo ca nzimu wakucena, Pedhru na Paulu awangisa atenda, abulusa madimonyo, pontho alamusa anthu adafa! Mbwenye nzimu wakucena wapasa mphambvu Akristu a mu ndzidzi wa apostolo toera akwanise kucita basa yakufunika kakamwe. Nzimu wakucena waphedza apostolo na anyakupfundza anango toera kuphedza anango kukhala na cidziwiso candimomwene cinatsogolera ku umaso wakukhonda mala.—Juw. 17:3.

 ⁹ Pa ntsiku ya Pentekoste 33 P.K.K., anyakupfundza a Yezu alonga “pilongero pyakusiyana-siyana ninga mukhatsogolerwa iwo na nzimu wakucena.” Pyenepi pyaaphedza toera kumwaza mphangwa thangwi ya “pinthu pyakudzumatirisa pya Mulungu.” (Mabasa 2:1-4, 11) Ife lero nee tisalonga pilongero pinango mwacirengo. Mbwenye na ciphedzo ca nzimu wakucena wa Mulungu, m’bandazi wakukhulupirika na wandzeru asacita mabukhu akubuluswa m’Bhibhlya mu pilongero pizinji. Mwacitsandzo, makopya mazinji kakamwe a Ncenjezi na a Lamukani! asadhindwa miyezi yonsene, pontho saiti yathu ya jw.org iri na mabukhu akubuluswa m’Bhibhlya na mavidhyu mu pilongero pyakupiringana 1.000. Pyenepi pyonsene pisatiphedza toera kumwaza mphangwa thangwi ya “pinthu pyakudzumatirisa pya Mulungu” kuna anthu a madziko onsene, a madzindza onsene na a pilongero pyonsene.—Apok. 7:9.

10. Kutomera caka 1989, ninji pidacitika thangwi ya kuthumburuzwa kwa Bhibhlya?

¹⁰ Kutomera mu caka 1989 m’bandazi wakukhulupirika na wandzeru asafuna kakamwe kuti Bhibhlya ya Dziko Ipswa igumanike mu pilongero pizinji kakamwe. Bhibhlya ineyi yathumburuzwa mu pilongero pyakupiringana 200, pontho Mabhibhlya akupiringana mamiliyau 240 adhindwa, pontho anango mazinji asapitiriza kudhindwa. Basi ene ndi Mulungu na nzimu wace wakucena anaphedzera kuti Bhibhlya igumanike kuna anthu azinji.

11. Ninji pisacitwa toera mabukhu a Mboni za Yahova athumburuzwe?

¹¹ Basa yakuthumburuza iri kucitwa na Akristu akuperekeka azinji kakamwe mupisa na m’madziko akupiringana 150. Pyenepi nee ndi pyakudzumisa kuna ife, thangwi pa dziko yapantsi nkhabepo nsoka unango wakuti usatsogolerwa na nzimu wakucena toera ‘kupereka umboni wakukwana’ pa dziko yonsene yapantsi thangwi ya Yahova Mulungu, Mambo Waumesiya adasankhula iye na Umambo wace udatoma kutonga kudzulu!—Mabasa 28:23.

12. Ninji pidaphedza Paulu na Akristu anango toera kucita basa yakupereka umboni?

¹² Paulu pidapereka iye umboni kuna Ayuda na anthu a madzindza anango ku Antiyokiya wa ku Pizidhya, “onsene akuti mitima yawo ikhafuna kutawira undimomwene unapasa umaso wakukhonda mala, atoma kukhulupira.” (Mabasa 13:48) Kunkhomo kwa bukhu ya Mabasa, Luka alemba kuti Paulu “akhamwaza mphangwa za Umambo wa Mulungu . . . na cipapo consene, nee kupingizwa.” (Mabasa 28:31) Mpostolo Paulu akhamwaza kupi mphangwa? Iye akhali ku Roma wakuti ukhali nzinda ukhatonga madziko onsene! Mwakukhonda tsalakana khala akhacita nkhani peno kuphatisira njira zinango toera kumwaza mphangwa, anyakupfundza a Yezu a mu ndzidzi wa apostolo acita basa yawo yakumwaza mphangwa na ciphedzo ca nzimu wakucena.

13. Thangwi yanji tisafunika kucita phembero tingatcingwa?

¹³ Atowereri akutoma a Yezu pikhatcingwa iwo, iwo aphemba Yahova toera  aapase cipapo. Mphapo ninji pidacitika? Iwo adzala na nzimu wakucena mbalonga mafala a Mulungu mwacipapo. (Mabasa 4:18-31) Ife tisacitambo phembero toera kuphemba udziwisi na mphambvu toera tipitirize kupereka umboni mwakukhonda tsalakana kutcingwa. (Tiya. 1:2-8) Nakuti Mulungu asatiphedza na nzimu wace, ife tisakwanisa kupitiriza kumwaza mphangwa za Umambo. Nkhabepo cinthu, nee kutcingwa peno kumenywa, cakuti cinakwanisa kutipingiza kumwaza mphangwa. Tingatcingwa tisafunika kuphemba nzimu wakucena, udziwisi na cipapo toera timwaze mphangwa zadidi.—Luka 11:13.

14, 15. (a) Ninji pidacitika thangwi “yakutcingwa kudatoma mu ndzidzi udaphiwa Estevau”? (b) Kodi mu ntsiku zathu, anthu ku Sibherya apfundza tani undimomwene?

¹⁴ Estevau apereka umboni mwacipapo mbadzati kuphiwa na anyamalwa ace. (Mabasa 6:5; 7:54-60) “Kutcingwa kakamwe” kudaoneka mu ndzidzi unoyu, anyakupfundza onsene kusiyapo apostolo abalalika mu Yudeya onsene na ku Samariya. Mbwenye pyenepi nee pyalimirisa basa yakupereka umboni wakukwana. Filipi aenda ku Samariya ‘kamwaza mphangwa thangwi ya Kristu,’ pontho anango atawira kukhala anyakupfundza. (Mabasa 8:1-8, 14, 15, 25) Kusiyapo pyenepi Bhibhlya isalonga: “Ale adabalalika thangwi yakutcingwa kudatoma mu ndzidzi udaphiwa Estevau, aenda mpaka ku Fenisya, ku Xipre na ku Antiyokiya, mbwenye iwo akhamwaza mphangwa kuna Ayuda basi. Mbwenye amuna anango pakati pawo a ku Xipre na a ku Sirene, aenda ku Antiyokiya mbatoma kucedza na anthu akhalonga Cigerego, mbaamwazira mphangwa zadidi za Mbuya Yezu.” (Mabasa 11:19, 20) Nakuti mu ndzidzi unoyu Akristu akhatcingwa mbakakamizwa kubuluka mupisa pyawo, iwo amwazambo mphangwa zadidi za Umambo mupisa pinango pizinji.

¹⁵ Mu ntsiku zathu, pinthu pibodzi pyene pyacitikambo ku União Sovietika wakale. Makamaka mu pyaka 1950, Mboni za Yahova zizinji zaendeswa nkaidi ku Sibherya. Nakuti iwo akhadabalaliswa, mphangwa zadidi kweneko zamwazwa mbuto zizinji kakamwe. Mbapidakhala pyakunentsa toera Mboni za Yahova zizinji zikwanise kobiri toera kucita ulendo wa nsindzo wa makilometru 10.000 toera kumwaza mphangwa zadidi! Mbwenye ndi utongi udaphedza toera iwo afike mpaka kweneko. M’bale unango alonga: ‘Mukupita kwa ndzidzi mautongi aphedza toera anthu azinji a mitima yadidi a ku Sibherya apfundze undimomwene.’

16, 17. Bukhu ya Mabasa isapangiza tani kuti Yahova asapasa nkhombo basa yakumwaza mphangwa?

¹⁶ Akristu a mu ndzidzi wa apostolo apaswa nkhombo kakamwe na Yahova. Paulu na anango abzwala mbeu mbaithirira, “mbwenye Mulungu ndiye adapitiriza kuikulisa.” (1 Akor. 3:5, 6) Mphangwa zinagumanika m’bukhu ya Mabasa zisapangiza kuti anthu azinji kakamwe asakhala atumiki a Yahova  thangwi iye asapasa nkhombo basa yakumwaza mphangwa. Mwacitsandzo, “mafala a Mulungu akhapitiriza kumwazika, anyakupfundza akhapitiriza kuthimizirika kakamwe mu Yerusalemu.” (Mabasa 6:7) Thangwi ya kumwaza mphangwa kudacita Akristu mbuto zizinji kakamwe, “mipingo yonsene ku Yudeya, ku Galileya na ku Samariya ikhali mu ndzidzi wa ntendere, mbikhala yakuwanga. Nakuti mipingo yonsene ikhabvera Yahova mbitambira cibalangazo ca nzimu wakucena, anyakupfundza akhapitiriza kuthimizirika.”—Mabasa 9:31.

¹⁷ Ku Antiyokiya wa ku Sirya, Ayuda na ale akhalonga Cigerego abva undimomwene kubulukira kuna amboni acipapo. Bhibhlya isalonga: “Kusiyapo pyenepi, djanja ya Yahova ikhali na iwo, natenepa anthu azinji akhulupira, mbatowera Mbuya.” (Mabasa 11:21) Bukhu ya Mabasa isalonga tenepa thangwi ya nzinda unoyu: “Mafala a Yahova akhapitiriza kumwazika, anthu azinji mbakhulupira.” (Mabasa 12:24) Thangwi ya basa yakumwaza mphangwa idacita Paulu na anango kuna anthu a madzindza anango, “mafala a Yahova akhapitiriza kumwazika mwamphambvu kakamwe, mbakunda mipingizo.”—Mabasa 19:20.

18, 19. (a) Thangwi yanji tisadziwa kuti “djanja ya Yahova” iri na ife? (b) Longani citsandzo cinapangiza kuti Yahova asaphedza mbumba yace.

¹⁸ “Djanja ya Yahova” iri na ifembo lero, thangwi anthu azinji anamwazira ife mphangwa asatawira, pontho asapereka umaso wawo kuna Mulungu mbabatizwa. Kusiyapo pyenepi, na ciphedzo ca Mulungu ife tisakwanisa kupirira tingatcingwa, ngakhale tingatcingwa kakamwe tisapitiriza kumwaza mphangwa ninga pidacita Paulu na Akristu anango a mu ndzidzi wa apostolo. (Mabasa 14:19-21) Yahova Mulungu anadzatiphedza ndzidzi onsene. ‘Manja ace akuti asakhala kwenda na kwenda’ anadzatiphedza mu nyatwa zonsene zinafuna kuthimbana na ife. (Dheu. 33:27) Kumbukanimbo kuti “thangwi ya dzina yace ikulu,” Yahova cipo anadzakusiyani.—1 Sam. 12:22; Mas. 94:14.

¹⁹ Mwacitsandzo, onani pinthu pidacitikira banja ya m’bale Harald Abt, pyakuti pisatiphedza kuona kuti Yahova asaphedza mbumba yace. Nakuti iye akhapitiriza kupereka umboni, Anazi antumiza ku mazunde a ku Sachsenhausen mu ndzidzi wa Nkhondo Yaciwiri ya pa Dziko Yonsene Yapantsi. Mu mwezi wa Maio 1942, Gestapo aenda panyumba pa nkazace Elsa, mbakwata mwanawo wantsikana. Elsa aikhwa nkaidi pontho aendeswa m’mazunde mazinji. Mulongo Elsa alonga: “Pyaka pidakhala ine nkaidi, anthu a ku Alemanya andipfundzisa cinthu cakufunika kakamwe. Cidapfundza ine ndi cakuti nzimu wa Yahova unakwanisa kukupasani mphambvu kakamwe mungathabuka kakamwe na mitcingo! Mbandidzati kuendeswa nkaidi, ine ndikhadaleri tsamba ya mulongo unango mbalonga kuti mu ndzidzi unatcingwa ife kakamwe, nzimu wakucena wa Yahova usatibalangaza kakamwe. Ine nee ndikhatawira kuti unoyu ndi undimomwene. Mbwenye pidaikhwa ine nkaidi, ndadzindikira kuti  pidalonga iye pikhali pyandimomwene. Mwandimomwene pyenepi pyacitika kuna ine. Ndi pyakunentsa kukhulupira khala tidzati kuthimbana na mitcingo, mbwenye pyenepi pyacitika kuna ine.”

20. Kodi Paulu akhacitanji pikhali iye panyumba ikhaonerwa iye, pontho pyenepi pisawangisa tani abale na alongo athu anango?

²⁰ Bukhu ya Mabasa isamala na mafala akuti Paulu “akhamwaza mphangwa za Umambo wa Mulungu” mwacipapo. (Mabasa 28:31) Nakuti iye akhali nkaidi yakukhonda buluka panyumba, natenepa iye nee akwanisa kumwaza mphangwa ku Roma nyumba na nyumba. Ngakhale tenepo, iye apitiriza kumwaza mphangwa kuna ale akhaenda kamuona. Lero abale na alongo athu anango nee asakwanisa kubuluka panyumba thangwi ya utenda, kukalamba, peno nyatwa zinango. Ngakhale tenepo, ufuni wawo kuna Mulungu na cifuno cawo cakupereka umboni cisapitiriza kukhala cakuwanga kakamwe. Ife tisacita phembero thangwi ya iwo, pontho tinakwanisa kuphemba Babathu wakudzulu toera aaphedze toera akwanise kucedza na ale akuti asafuna kupfundza thangwi ya Mulungu na cifuniro cace.

21. Thangwi yanji basa yakumwaza mphangwa isafunika kucitwa mwakucimbiza?

²¹ Azinji a ife anakwanisa kumwaza mphangwa nyumba na nyumba, kuphatanizambo njira zinango toera kucita anyakupfundza. Natenepa, m’bodzi na m’bodzi wa ife asafunika kucita pyonsene pinakwanisa iye toera akhale m’mwazi mphangwa wadidi mbapereka umboni wakukwana “mpaka kunkhomo kwa dziko yapantsi.” Basa ineyi isafunika kucitwa mwakucimbiza kakamwe thangwi tisaona “cidzindikiro” cinapangiza kuti tiri kukhala mu ntsiku zakumalisa. (Mat. 24:3-14) Nee tisafunika kuluza ndzidzi na pinthu pinango. Natenepa uno ndi ndzidzi ‘toera kucita pizinji m’basa ya Mbuya.’—1 Akor. 15:58.

22. Mu ndzidzi unadikhira ife ntsiku ya Yahova, kodi tisafunika kukhala dzololo toera kucitanji?

²² Mu ndzidzi unadikhira ife ‘kufika kwa ntsiku ya Yahova, yakuti ndi ikulu na yakugopswa kakamwe’ tendeni tipitirize kupereka umboni mwacipapo na mwakukhulupirika. (Yoeli 2:31) Tinakwanisa kugumana anthu azinji ninga a ku Bhereya akuti “atambira mafala a Mulungu na ntima onsene.” (Mabasa 17:10, 11) Natenepa tisafunika tipitirize kupereka umboni wakukwana mpaka basa ineyi ifike kunkhomo. Pinadzakhala ninga tapangwa mafala awa: “Wacita mwadidi, ndiwe nyabasa wadidi na wakukhulupirika!” (Mat. 25:23) Tingacita khundu yathu m’basa yakucita anyakupfundza, mbatipitiriza kukhala akukhulupirika kuna Yahova, tinadzakhala akutsandzaya kwenda na kwenda thangwi yakukhala na mwai wakuphedzera basa ‘yakupereka umboni wakukwana’ thangwi ya Umambo wa Mulungu!