NSOLO 26
“Nee M’bodzi wa Imwe Anadzafa”
Mu ndzidzi ukhathabuka Paulu m’Bara, iye apangiza cikhulupiro cakuwanga, pontho apangiza ufuni kuna anthu
Mphangwa zakubuluswa m’bukhu ya Mabasa 27:1–28:10
1, 2. Ndi ulendo upi ukhafuna kucita Paulu, pontho iye akhadzudzumika nanji?
Festo apanga Paulu: “Unaenda katongwa na Sezari.” Pakumala kubva mafala anewa, panango Paulu akhanyerezera pinthu pizinji pikhafuna kuncitikira angaenda katongwa na Sezari. Paulu akhala nkaidi mu pyaka piwiri; na thangwi ineyi, ulendo wace wakuenda ku Roma ukhali macinjo makulu kuna iye. (Mabasa 25:12) Mbwenye pinthu pikhanyerezera Paulu m’maulendo ace na bote pisaphataniza pizinji kupiringana mphepo yadidi na kudoka kwa dzuwa. Natenepa Paulu panango adzudzumika kakamwe thangwi ya ulendo wakulapha, pontho adzudzumikambo thangwi ya pikhafuna kuncitikira pakulonga na Sezari.
2 Paulu akhadakhala kale pa “ngozwi m’bara” m’maulendo mazinji. Mwacitsandzo, iye apulumuka katatu pidalobzweka bote, midzidzi inango akakhala masiku amumphu na ntsiku ibodzi padzulu pa bara. (2 Akor. 11:25, 26) Kusiyapo pyenepi, ulendo ukhafuna kucita iye mbudakhala wakusiyana kakamwe na maulendo ace aumisionaryo akuti nee akhali nyankaidi. Paulu mbadacita ulendo ninga nyankaidi, pontho mbudakhala ulendo wa nsindzo ukulu kakamwe wa makilometru akupiringana 3.000 wakubuluka ku Sezareya mpaka ku Roma. Kodi mbadapulumuka paulendo unoyu ukhafuna kucita iye? Maseze apulumuke, kodi iye mbadatongwa kuphiwa angafika ku Roma? Kumbukani kuti iye mbadatongwa na utongi wamphambvu kakamwe wa Sathani mu ndzidzi unoyu.
3. Kodi Paulu akhali dzololo toera kucitanji, pontho tinapfundzanji mu nsolo uno?
3 Mwa pyonsene pidaleri imwe thangwi ya Paulu, kodi musanyerezera kuti iye aluza cidikhiro peno adzudzumika thangwi ya pinthu pikhafuna kuncitikira? Nee pang’ono pene! Iye akhadziwa kuti anathimbana na nyatwa, mbwenye nee akhadziwa kuti ndi nyatwa ipi ikhafuna kuthimbana na iye. Paulu akhadziwa kuti kudzudzumika na pinthu pyakuti nkhabe kupidziwa kuti pinacitika tani nee mbakudamphedza. Iye akhadziwambo kuti angadzudzumika kakamwe mbadaluza kutsandzaya kukhali na iye m’basa yakumwaza mphangwa. (Mat. 6:27, 34) Paulu akhadziwa kuti cifuniro ca Yahova kuna iye cikhali kubandza miyai yonsene toera kumwaza mphangwa zadidi za Umambo wa Mulungu, kuphatanizambo kumwazira mphangwa amambo a dziko. (Mabasa 9:15) Paulu akhali dzololo toera kucita basa idapaswa iye mwakukhonda tsalakana pinthu pikhafuna kuncitikira. Ife tisafunikambo kucita pibodzi pyene. Cincino tendeni tidinge pinthu pidacitika mu ndzidzi ukhacita Paulu ulendo wakuenda ku Roma, pontho tinaona kuti tinapfundzanji na pidacita iye.
“Mphepo Ikhabuluka Kunaenda Ife” (Mabasa 27:1-7a)
4. Ndi bote ipi idatoma kukwira Paulu pa ulendo wace, pontho axamwali akhaenda na iye akhali ani?
4 Paulu na anyankaidi anango akhaonerwa na nyakuonera Waciroma anacemerwa Julyo, wakuti asankhula kukwira bote inathukula malonda yakuti ikhadafika ku Sezareya. Bote ineyi ikhabuluka ku Adhrameto, yakuti ndi mbuto yakutsama mabote ya ku oeste kwa Azya Menori kukhundu inango ya nzinda wa Mitileni pa ntsuwa ya Lesbho. Pakubuluka ku Sezareya, bote ineyi mbidaenda na ku norti, buluka penepo mbidaenda ku oeste toera kutcitisa malonda na kuthukula anango. Bote ineyi nee yacitwa toera kukwata anthu ninga anyankaidi. (Onani bokosi yakuti “ Maulendo Akucitwa M’madzi na Mabote Anathukula Malonda”) Mwakutsandzayisa, nee ndi Paulu basi akhali ninga nyankaidi mu bote ineyi. Pisaoneka kuti mwenemu mukhali na abale awiri Acikristu akuti ndi Aristarko na Luka. Ndi Luka adalemba mphangwa zenezi. Ife nkhabe dziwa khala uwiri wawo akhadalipa kobiri toera kukwira peno akhali ninga atumiki a Paulu.—Mabasa 27:1, 2.
5. Kodi mbani adagumana Paulu ku Sidhoni, pontho tisapfundzanji na pyenepi?
5 Pakumala ntsiku yamumphu mbakacita ulendo m’bote wa makilometru 110 kukhundu ya norti, bote yalimira ku Sidhoni kukhundu ya Sirya. Pisaoneka kuti mu ndzidzi unoyu Julyo nee atsalakana Paulu ninga nyankaidi, panango thangwi Paulu akhali munthu wa dziko ya Roma wakuti mulando wace ukhadzati kuoneka. (Mabasa 22:27, 28; 26:31, 32) Julyo atawirisa Paulu atcite toera akaonane na abale ace Acikristu. Abale na alongo atsandzaya kakamwe toera kutsalakana Paulu thangwi akhadakhala nkaidi mu ndzidzi uzinji! Panango imwe musasaka miyai toera kupangiza nkhaliro ubodzi ene wakutambira alendo. Mungakhala na nsambo wakutambira alendo, imwe munabalangazwambo.—Mabasa 27:3.
6-8. Kodi iwo aenda kupi pidabuluka iwo ku Sidhoni, ndi mwai upi wakumwaza mphangwa udakhala na Paulu kweneko?
6 Pidabuluka iwo ku Sidhoni, bote yapitiriza kuenda na n’khundu-n’khundu mbifika ku Silisya dhuzi na nzinda udabalwa Paulu wa Tarso. Luka nee alongabve pya mbuto inango idalimira bote, maseze iye apangiza kuti akhali pangozwi pidalonga iye kuti “mphepo ikhabuluka kunaenda ife.” (Mabasa 27:4, 5) Mwakukhonda tsalakana makhaliro akudambo, tisakwanisa kunyerezera Paulu mbabandza miyai yonsene toera kumwaza mphangwa zadidi. Mwandimomwene, iye amwazira mphangwa anyankaidi na anthu anango akhali m’bote ineyi kuphatanizambo anyakufambisa bote na anyankhondo, kusiyapo pyenepi, iye amwazirambo mphangwa anthu akhagumana iye pa mbuto zonsene zikhatsama bote na mbuto zikhalimira bote ineyi. Ninga Paulu, ife tinakwanisambo kubandza miyai yonsene toera kumwaza mphangwa.
7 Buluka penepo, bote yafika pa mbuto inatsama mabote ya ku Mira ku sul kwa Azya Menori. Kweneko Paulu na andzace akhafunika kukwira bote inango toera kufika ku Roma kunaenda iwo. (Mabasa 27:6) Mu ndzidzi unoyu, ndi Aejito akhagulisira Aroma pinthu pikhalima iwo, pontho mabote a ku Ejitu akhathukula pinthu pyenepi mbapitcitisa pa mbuto ya Mira. Julyo aona bote ineyi mbapanga anyankhondo na anyankaidi toera akwire bote ineyi. Bote ineyi ikhali ikulu kakamwe kupiringana yakutoma. Iyo ikhadakwiza mitolo mizinji ya tirigu, pontho mukhali na anthu akukwana 276 kuphatanizambo anyakufambisa bote, anyankhondo, anyankaidi na ale akhacitambo ulendo wakuenda ku Roma. M’bote ineyi mukhali na anthu azinji kakamwe, pontho tiri na cinyindiro cakuti Paulu amwaza mphangwa zadidi kuna anthu azinji mwenemo.
8 Mbuto yakutowera idalimira iwo ikhali Kinidho, ku sudoeste kwa Azya Menori. Mphepo ingakhala yadidi, bote mbidakwanisa kufamba nsindzo unoyu pa ntsiku ibodzi basi. mbwenye Luka alonga kuti “pidapita ntsiku zizinji mbatikafamba pang’ono-pang’ono, tafika mwakunentseka ku Kinidho.” (Mabasa 27:7a) Pyenepi pyacitika thangwi makhaliro akudambo acitisa kuti kufambisa bote kukhale kwakunentsa. (Onani bokosi yakuti “ Mphepo Yakugopswa ya ku Medhiteraneo,” pa tsamba 238.) Nyerezerani kudzudzumika kudakhala na anthu m’bote mu ndzidzi ukhayesera bote kukunda mphepo ikhabuluka kukhundu ikhaenda iwo na mabimbi a m’bara.
“Tikhamenywa Kakamwe na Condzi” (Mabasa 27:7b-26)
9, 10. Ndi nyatwa zipi zidathimbana na iwo dhuzi na ku Kreta?
9 Kutomera ku Kinidho ntsogoleri wa anyakufambisa bote akhafuna kuenda na ku oeste, mbwenye Luka wakuti aona pidacitika alonga kuti ‘tacimwana kuenda kutsogolo thangwi ya mphepo.’ (Mabasa 27:7b) Bote pikhathaukirana iyo na ntunda, mphepo yamphambvu ikhabuluka ku norti yagwinya bote toera iyende kukhundu ya sul mwakucimbiza kakamwe. Ninga pidacitika ku ntsuwa ya Xipre, yakuti ikhadatsidzikiza bote ku mphepo yakugopswa, paulendo unoyu ntsuwa ya Kreta yacita pibodzi pyene. Bote pidamala iyo kupita na ku Salmone kukhundu ya leste ya Kreta, makhaliro akudambo akhali pontho mwadidi. Thangwi yanji? Thangwi bote ikhali kukhundu inango ya ntsuwa yakuti nee ikhamenya maningi mphepo. Nyerezerani kukhurudzika kudakhala na anthu mu ndzidzi unoyu wakucepa thangwi nee akhamenywabve maningi na mphepo! Mbwenye anyakufambisa bote akhadziwa kuti bote ingapitiriza m’bara anapitiriza kukhala pangozwi thangwi ndzidzi wakutonthola ukhali dhuzi. Iwo akhali na mathangwi adidi toera kudzudzumika.
10 Luka alonga undimomwene uyu: “Pidafamba ife mwakunentseka n’khundu-n’khundu mwa ntsuwa, [ya Kreta], tafika pa mbuto inacemerwa Magombe Adidi.” Maseze akhatsidzikizwa n’khundu-n’khundu mwa ntsuwa, pikhali pyakunentsa kufambisa bote. Pakumalisa iwo afika pa mbuto yadidi mbaponya nangula toera kulimira, panango ndi pacisa cikhali dhuzi mbadzati kufika kukhundu ya norti. Iwo akhala penepo mu ndzidzi ungasi? Luka alonga kuti akhala kweneko “ntsiku zizinji,” mbwenye ndzidzi uzinji udakhala iwo penepo pyaacitisa kukhala pangozwi. Mwezi wa Setembro/Outubro, pikhali pyakugopswa kucita ulendo na bote.—Mabasa 27:8, 9.
11. Kodi Paulu apereka uphungu upi kuna ale akhali m’bote, pontho ndi cisankhulo cipi cidacitwa?
11 Anyakucita ulendo anango panango asaka kudziwa kuna Paulu thangwi ya luso ikhali na iye yakucita ulendo m’bara ya Medhiteraneo. Iye aapanga kuti nee akhafunika kupitiriza kufamba. Iye alonga kuti tingapitiriza kufambisa bote “tinadzaluza pinthu pizinji,” panango tinadzaluzambo umaso wathu. Natenepa, nyakufambisa bote pabodzi na mwanaciro bote akhafuna kupitiriza na ulendo wawo panango ndi thangwi yakuti iwo akhafuna kugumana mbuto yakutsidzikizika mwakucimbiza. Iwo apanga Julyo toera apitirize na ulendo wawo, azinji a iwo alonga kuti mbadakwanisa kufika ku Fenisya, mbuto ineyi ikhali kutali na pakhali iwo. Panango mbuto ineyi ikhali ikulu kakamwe, pontho ikhali yadidi yakuti iwo mbadakwanisa kukhala penepo mu ndzidzi wakuthondola. Natenepa, mphepo yakubuluka ku sul ingatoma kumenya pang’ono-pang’ono, iwo mbadakwanisa kucita ulendo wawo.—Mabasa 27:10-13.
12. Pidabuluka iwo ku Kreta ndi ngozwi zipi zidathimbana na iwo, pontho anyakufambisa bote acitanji toera kucalira ngozwi?
12 Buluka penepo, “mphepo ikulu” yatoma kucitika. Mudapita ndzidzi ungasi, iwo agumana mbuto yakutsidzikizika n’khundu-n’khundu mwa “ntsuwa ing’ono inacemerwa Kaudha.” Ntsuwa ineyi ikhali pa ntunda cifupi na makilometru 65 ku Magombe Adidi. Ngakhale tenepo, bote ikhali pa ngozwi ya kuendeswa na mphepo ku sul, mbicita cidengwa dhuzi na Afrika. Toera kucalira pyenepi, anyakufambisa bote, akwiza bote ing’ono m’bote ikulu. Kucita pyenepi pikhali pyakunentsa kakamwe thangwi bote ing’ono ikhadadzala na madzi. Iwo amanga bote na nkhambala toera kuitsidzikiza. Iwo agwisa nkhambala zinango toera kubweza nguwo zinafambisa bote mbawangisira kakamwe toera kupita pana condzi. Pidathimbana na iwo pikhali pyakugopesa kakamwe! Ngakhale kuwangisira konsene kudacita iwo nee kwaphedza, pontho bote yapitiriza ‘kumenywa kakamwe na condzi.’ Pa ntsiku yacitatu, iwo ataya m’madzi pyombo pinango pyakufambisa napyo bote toera bote ipitirize kuberuka.—Mabasa 27:14-19.
13. Makhaliro akhali tani m’bote mu ndzidzi ukhacitika condzi?
13 Anthu akhali m’bote ineyi akhagopa kakamwe. Mbwenye Paulu na axamwali ace akhali na cinyindiro cakuti anapulumuka. Yezu akhadapasa kale cinyindiro Paulu kuti iye anadzapereka umboni ku Roma, pontho mukupita kwa ndzidzi anju alongambo pya pikiro ineyi. (Mabasa 19:21; 23:11) Natenepa masiku na masikati m’masumana mawiri condzi cikhapitiriza. Thangwi ya madzi akhabvumba pabodzi na makole akhacitisa dzuwa na nyenyezi pikhonde kuoneka, nyakufambisa bote nee akhakwanisa kudziwa mbuto ikhali iwo na khundu ikhaenda iwo. Pontho nee pikhakwanisika kudya cinthu. Thangwi ya kutonthola, kubvumba kwa madzi na kugopa pyenepi pyacitisa anthu kukhonda kubva njala.
14, 15. (a) Pikhalonga iye na anthu ali m’bote, thangwi yanji Paulu abwereza pontho kulonga cenjezo idapereka iye pakutoma? (b) Tisapfundzanji na mphangwa zacidikhiro zidalonga Paulu kuna anthu anewa?
14 Paulu alimira mbaacenjeza ninga pidalonga iye nduli, mbwenye nee alonga kuti ‘ine ndakupangani kale.’ Mbwenye m’makhaliro anewa apangiza kuti uphungu ukhadapereka Paulu ukhali wadidi. Buluka penepo iye alonga: “Ine ndisakuwangisani toera mukhale na cipapo, thangwi nee m’bodzi wa imwe anadzafa, mbwenye bote inaluzika.” (Mabasa 27:21, 22) Mafala anewa abalangaza kakamwe ale akhambvesera! Paulu akomerwambo kakamwe thangwi Yahova akhadampasa mphangwa zacidikhiro toera kupanga anthu akhali m’bote. Mphyadidi kakamwe kukumbuka kuti Yahova asatsalakana anthu onsene. Mpostolo Pedhru alemba: “Yahova . . . nkhabe funa kuti munthu afudzwe, mbwenye asafuna kuti anthu onsene atcunyuke.” (2 Ped. 3:9) Natenepa, tisafunika kucita mwakucimbiza kakamwe basa yakumwaza mphangwa zacibalangazo za Yahova kuna anthu azinji kakamwe! Umaso wa anthu wakuti ndi wakufunika kakamwe kuna Yahova uli pangozwi.
15 Panango Paulu apereka umboni kuna anthu azinji m’bote thangwi ya ‘cidikhiro mu pikiro idacita Mulungu.’ (Mabasa 26:6; Akol. 1:5) Mbwenye onsene pidadzindikira iwo kuti mbadalobzweka m’bote, Paulu aapanga mphangwa zacidikhiro zakuti iwo mbadapulumuka. Iye alonga: “Masiku, anju wa Mulungu wanga . . . aonekera pana ine, mbalonga: ‘Paulu, leka kugopa. Iwe usafunika ulimire pamaso pa Sezari. Pontho, Mulungu anadzapulumusa iwe na anthu onsene ali paulendo pabodzi na iwe.’” Paulu aapanga: “Natenepa khalani na cipapo amunamwe, thangwi ine ndisakhulupira Mulungu kuti pinadzacitika sawasawa ninga mudapangirwa ine. Mbwenye bote yathu iyi, inadzalobzweka cifupi na ntsuwa inango.”—Mabasa 27:23-26.
“Onsene Akwanisa Kupulumuka Mbafika Mwadidi Kuntunda” (Mabasa 27:27-44)
“Iye . . . apereka takhuta kuna Mulungu pamaso pa onsene.”—Mabasa 27:35
16, 17. (a) Ndi mu ndzidzi upi udacita Paulu phembero, pontho ndi maphindu api adaoneka? (b) Pidalonga Paulu pyakwanirisika tani?
16 Pidapita masumana mawiri akunentsa kakamwe, mu ndzidzi udagwinywa bote na mphepo mu nsindzo wa makilometru 870, anyakufambisa bote akhanyerezera kuti akhali dhuzi na kuntunda, panango thangwi iwo akhabva mabimbi mbakagwera kuntunda. Iwo aponya nangula nduli mwa bote toera iyo ikhonde kukwatwa na mabimbi, iwo acitambo pyenepi toera bote ifike mwadidi kuntunda. Mu ndzidzi unoyu, iwo ayesera kubuluka m’bote, mbwenye anyankhondo nee aatawirisa. Paulu apanga ntsogoleri wa anyankhondo pabodzi na anyankhondo: “Amuna awa angakhonda kupitiriza m’bote ino, imwe nee munapulumuka.” Bote nee ikhakwatikabve na mabimbi, natenepa Paulu aphemba onsene toera adye mbaapasa pontho cinyindiro cakuti mbadapulumuka. Buluka penepo Paulu “apereka takhuta kuna Mulungu pamaso pa onsene.” (Mabasa 27:31, 35) Paulu apangiza citsandzo cadidi kuna Luka, Aristarko na kuna Akristu lero, pidacita iye phembero yakupereka takhuta kuna Mulungu. Kodi maphembero anacita imwe pamwinji ndi akuwangisa na akubalangaza anango?
17 Pidamala Paulu kucita phembero, ‘onsene akhala na cipapo, mbatoma kudya.’ (Mabasa 27:36) Iwo alulupisa pontho bote pidaponya iwo tirigu m’bara toera bote ipitirize kuberuka mwadidi padzulu pa madzi toera ifike kuntunda. Pidaca kunja, anyakufambisa bote agwanda nangula, abulusa pyakucapa napyo bote pikhali nduli mwa bote, pontho afungula pang’ono nguwo yakutsogolo kwa bote toera iyo ikwanise kukwatwa na mphepo mpaka kufika kuntunda. Buluka penepo, bote yatcerera, pidadhima iyo matcetca akhali pantsi pa madzi m’bara, pontho domu yakutsogolo yapita m’matcetca mbitoma kusweka. Anyankhondo anango anyerezera kupha anyankaidi onsene toera akhonde kuthawa, mbwenye Julyo nee aatawirisa kucita pyenepi. Iye apanga onsene toera asambirire mpaka kuntunda. Pidalonga Paulu pyacitikadi: Anthu onsene akukwana 276 akhali m’bote apulumuka. Mwandimomwene, “onsene akwanisa kupulumuka mbafika mwadidi kuntunda.” Mphapo iwo akhali kupi?—Mabasa 27:44.
“Apangiza Kukoma Ntima Kakamwe” (Mabasa 28:1-10)
18-20. Kodi anthu a ku Malta apangiza tani “kukoma ntima kakamwe,” pontho ndi cirengo cipi cidacitika?
18 Iwo apulumukira pa ntsuwa ya Malta, ku sul kwa Sisilya. (Onani bokosi yakuti “ Kodi Ntsuwa ya Malta Isagumanika Kupi?”) Anthu akakhala mu ntsuwa ineyi akuti akhalonga cilongero cinango “apangiza kukoma ntima kakamwe” kuna iwo. (Mabasa 28:2) Iwo agasa moto toera kuphedza anthu anewa akuti akhadatota, pontho akhatetemera na mphepo. Moto waaphedza toera apisirwe mwakukhonda tsalakana kutonthola peno kubvumba kwa madzi. Buluka penepo pacitika cirengo.
19 Paulu akhafuna kakamwe kuphedza anango. Natenepa iye agumanya nkhuni toera kuikha pa moto. Pakucita pyenepi, yabuluka nyoka yakugopswa yampyangirira mbiluma nkono wace. Anthu a ku Malta akhanyerezera kuti iye akhatcunyuswa na Mulungu. a
20 Anthu a ku Malta adaona kulumwa kudacitwa Paulu akhanyerezera kuti padalumwa iye ‘mbapadabzwimba.’ Mwakubverana na bukhu inango, fala Yacigerego idaphatisirwa pa vesi ineyi ndi “fala inaphatisirwa na madotoro.” Nee ndi pyakudzumisa kuona dotoro Luka kuphatisira fala ineyi. (Mabasa 28:6; Akol. 4:14) Mbwenye Paulu agubudza nyoka ineyi yakugopswa m’manja mwace, iyo yagwa pantsi mbikhonda kum’phekesa.
21. (a) Ndi mphangwa zipi zakunyindirika zidalemba Luka pa khundu ineyi? (b) Ndi cirengo cipi cidacita Paulu, pontho anthu a ku Malta acitanji?
21 Mwanaciro wa minda ya ntsuwa ineyi wakuti akhacemerwa Pubhliyo akakhala ncisa ceneci. Panango iye akhali ntongi Waciroma pa ntsuwa ya Malta. Luka asacemera mamuna unoyu ninga “ntongi wa ntsuwa.” Ndi mafala mabodzi ene adalembwa adagumanwa pa ntsuwa ineyi ya Malta. Iye atambira Paulu na andzace ninga alendo mu ntsiku zitatu panyumba pace. Mbwenye babace Pubhliyo akhabva kupha. Luka alonga utenda ukhali na babace Pubhliyo. Iye alemba kuti mamuna unoyu “akhali pa bonde thangwi akhadaferuka, pontho akhaphandza ciropa,” iye aphatisira fala inalonga madotoro toera kulonga dzina ya utenda unoyu. Paulu acita phembero mbatsandzika manjace kuna mamuna unoyu mbawangiswa. Anthu a mu cisa ceneci pidaona iwo cirengo ceneci adzumatirwa kakamwe mbabweresa anthu anango akuti akhabva kupha toera awangiswembo, pontho abweresa miyoni mizinji kuna Paulu na andzace. Kusiyapo pyenepi, aapasa pyonsene pikhafuna iwo kuphatisira paulendo wawo.—Mabasa 28:7-10.
22. (a) Kodi mpfundzisi wa universidhadhe asimba tani mphangwa zidalemba Luka thangwi ya ulendo wakuenda ku Roma? (b) Tinapfundzanji mu nsolo unatowera?
22 Mphangwa zidadinga ife thangwi ya ulendo wa Paulu mpaka pano ndi zakunyindirika kakamwe. Mpfundzisi m’bodzi alonga: “Mphangwa zidalemba Luka . . . zagomezerwa mwadidi kakamwe m’Bhibhlya. Mphangwa zidalemba iye zinalonga pya kufambiswa kwa mabote mu ndzidzi wa apostolo ndi zakudzumatirisa kakamwe, pontho mphangwa zidafokotoza iye thangwi ya makhaliro a ku oriente kwa Medhiteraneo ndi zakunyindirikambo kakamwe.” Panango Luka alemba mphangwa zenezi mu ndzidzi ukhacita iye ulendo na Paulu. Khala ndi tenepo, pinthu pinango pidacitika patsogolo pace, nkati mwa ulendo unoyu, pyacitisa Luka kulemba mphangwa zinango zizinji. Ninji pikhafuna kucitikira Paulu na andzace mbadafika ku Roma? Tendeni tione.
a Anthu a kweneko pidadzindikira iwo nyoka ineyi, pisapangiza kuti mu ndzidzi unoyu pa ntsuwa ineyi pakhali na nyoka zizinji zakugopswa. Mu ntsiku zino nyoka zenezi nee zisagumanikabve ku Malta thangwi yakucinja kwa makhaliro akudambo pakupita pyaka pizinji kutomera mu ndzidzi ukhali Paulu pa ntsuwa ineyi. Panango pa ntsuwa ineyi pali na anthu azinji kakamwe, pyenepi pyacitisa nyoka zenezi kukhonda kuonekabve.
