1. Ninji pikhadziwa Paulu, Luka na Aristarko pyakuti pyaapasa cinyindiro?

 MU CAKA 59 P.K.K., Paulu, Luka na Aristarko akhacita ulendo buluka ku ntsuwa ya Medhiteraneo ya Malta kuenda ku Italya na bote ikulu yakuti ikhathukula pyakudya. Kudomu yakutsogolo kuli na cidzindikiro ca “Ana a Zeu.” Paulu akhapitiriza kukhala nyankaidi, pontho akhaonerwa na nyankhondo. (Mabasa 27:2) Mwakusiyana na anyakufambisa bote ineyi, amwazi mphangwa anewa nee akhanyindira kutsidzikizwa na ana a mulungu Wacigerego Zeu, akuti ndi Kastori na Poluxi. (Mabasa 28:11) Paulu na andzace akhatumikira Yahova wakuti ndi Mulungu adapanga Paulu kuti mbadapereka umboni ku Roma, pontho mbadaenda kaonana na Sezari.—Mabasa 23:11; 27:24.

2, 3. Kodi bote idakwira Paulu yapita na kupi, pontho mbani adaphedza Paulu paulendo wace?

² Pakupita ntsiku zitatu kutomera pidafika iwo ku Sirakusa, nzinda wakubalika wa Sisilya wakuti ukhali wakufunika kakamwe ninga Atena na Roma, bote yaenda ku Rejyo ku sul kwa Italya. Nsindzo buluka ku cisa ca Rejyo mpaka ku mbuto yakutsama mabote ya Puteoli ku Italya (dhuzi na ku Napoli wa cincino) ndi makilometru 320, mbwenye mphepo ikhabuluka ku sul yagwinya bote mwakucimbiza kakamwe mbifika ku Puteoli pa ntsiku yaciwiri pakubuluka ku Rejyo.—Mabasa 28:12, 13.

³ Paulu akhali kunkhomo kwa ulendo wace wakuenda ku Roma, kukhafuna iye kuonana na Ntongi Wankulu Nero. Paulendo wace onsene “Mulungu wacibalangazo consene” akhali na Paulu. (2 Akor. 1:3) Ninga pinafuna ife kupfundza, Yahova apitiriza kuphedza Paulu, pontho Paulu apitiriza kukhala waphinga m’basa yace ya umisionaryo.

4, 5. (a) Kodi Paulu na andzace atambirwa tani ku Puteoli, pontho ninji pidacitisa nyakuonera kutawirisa Paulu kukhala pabodzi na abale? (b) Maseze akhale nkaidi, Akristu anaphedzeka tani angapangiza makhaliro adidi?

⁴ Ku Puteoli, Paulu na andzace ‘agumana abale, iwo adembetera toera akhale pabodzi na iwo mu ntsiku zinomwe.’ (Mabasa 28:14) Abale  a ku Puteoli apangiza citsandzo cadidi kakamwe cakutambira alendo! Tiri na cinyindiro consene cakuti kutambira alendo kudacita iwo kwaacitisa kutambira nkhombo zizinji kakamwe zauzimu na cibalangazo cidatambira iwo kuna Paulu na axamwali ace. Mphapo thangwi yanji Paulu akhali na ufulu kakamwe maseze akhali nyankaidi? Panango Paulu apangiza nkhaliro wadidi wakuti wacitisa nyakuonera Waciroma anyindire Paulu.

⁵ Sawasawa lero, atumiki a Yahova akuti ali nkaidi kazinji kene asapaswambo ufulu na miyai thangwi yakupangiza makhaliro Acikristu. Mwacitsandzo, ku Romenya mamuna m’bodzi adatongwa kukhala nkaidi mu pyaka 75 thangwi ya kuba, atoma kupfundza Bhibhlya mbacita macinjo makulu mu umaso wace. Anyakuonera aona macinjo adacita iye, mban’nyindira toera aende ku nzinda kagula pinthu toera piphatisirwe nkaidi, mbwenye pakuenda kagula pinthu pyenepi nee akhaperekerwa na nyakuonera. Mwandimomwene, makhaliro adidi asapasa mbiri Yahova.—1 Ped. 2:12.

6, 7. Kodi abale a ku Roma apangiza tani ufuni wandimomwene kuna Paulu?

⁶ Pakubuluka ku Puteoli, Paulu panango afamba na miyendo cifupi na makilometru 50 mpaka ku nzinda wa Kapuwa, kudagumanika Nseu wa Apiyo, wakuti ndi nseu wakuenda ku Roma. Nseu unoyu wakuti wasasanywa mwadidi ukhaphedza toera kuona mwadidi mbuto zakubalika za Italya kuphatanizambo makhundu anango a Bara ya Medhiteraneo. N’khundu-n’khundu mwa nseu unoyu muli na miti na madzi akuti asagumanika makilometru 60 kubuluka ku Roma. Pa mbuto ineyi ndipo pali na Nsika wa Apiyo. Luka alemba kuti abale a ku Roma “pidabva iwo kuti tiri kufika,” anango a iwo aenda mpaka pa Nsika wa Apiyo, mbwenye anango akhaadikhira Panyumba Zitatu  Zinafikira Alendo, ineyi ikhali mbuto yakupuma ya nsindzo wa makilometru 50 buluka ku Roma. Iwo akhali na ufuni kakamwe!—Mabasa 28:15.

⁷ Nsika wa Apiyo nee ukhali wakuthema toera anyakucita ulendo akuti aneta kakamwe apume. Nyakulonga poema m’bodzi akhacemerwa Horácio alonga kuti mbuto ineyi yakucitira malonda, “ikhali na anyakufambisa mabote azinji, pontho anyakutsalakana mbuto zakugona akhatsalakana mwakuipa kakamwe anthu.” Iye alemba kuti “madzi akhaphatisirwa akhali akupswipa kakamwe.” Pontho iye akhonda kudya pa mbuto ineyi! Mwakukhonda tsalakana pyenepi, abale a ku Roma akhatsandzaya kudikhira Paulu na axamwali ace toera aaperekere pakuenda ku Roma.

8. Thangwi yanji Paulu apereka takhuta kuna Mulungu ‘pidaona iye abale ace’?

⁸ Bhibhlya isalonga kuti Paulu ‘pidaona iye abale ace,’ iye “apereka takhuta kuna Mulungu, mbawanga manungo.” (Mabasa 28:15) Mwakukhonda penula, basi ene thangwi yakuona abale anewa akufunika, akuti anango a iwo akhadziwika na Paulu, iye awanga manungo mbabalangazwa. Thangwi yanji Paulu apereka takhuta kuna Mulungu? Paulu akhadziwa kuti ufuni ndi khundu ya nsapo wa nzimu wakucena. (Agal. 5:22) Sawasawa lero, nzimu wakucena usakulumiza Akristu toera acite pyonsene pinakwanisa iwo toera kuphedza anango na kuabalangaza.—1 Ates. 5:11, 14.

9. Tinatowezera tani pidacita abale adaenda kaonana na Paulu?

⁹ Mwacitsandzo, nzimu wakucena usakulumiza abale na alongo toera akhale na nsambo wakutambira alendo na kutsalakana pyakufuna pya ayang’aniri a cisa, amisionaryo na anango anatumikira m’basa yakupambulika ya ndzidzi onsene. Bvundzikani: ‘Ndinakwanisa kucita pizinji toera kuphedzera mu ndzidzi unabwera muyang’aniri wa cisa mu mpingo wathu ninga kutambira iye na nkazace? Ndinakwanisa kucita masasanyiro toera ndibuluke nawo m’basa ya m’munda?’ Natenepa imwe munatambira nkhombo zizinji kakamwe. Nyerezerani kutsandzaya kudakhala na abale a ku Roma pikhabva iwo Paulu na andzace mbakalonga pinthu pidaacitikira mu umaso.—Mabasa 15:3, 4.

10. Kodi Paulu akhali m’makhaliro api ku Roma, pontho iye acitanji pakupita ndzidzi pang’ono pidafika iye kweneko?

¹⁰ Paulu na andzace pidafika iwo ku Roma, “Paulu atawiriswa toera kukhala ekhene panyumba, mbaonerwa na nyankhondo m’bodzi.” (Mabasa 28:16) Ale akhaikhwa nkaidi yapanyumba kazinji kene akhamangirirwa na maunyolo kuna nyakuonera toera iwo akhonde kuthawa. Maseze Paulu akhadamangwa na maunyolo, iye apitiriza kumwaza mphangwa zadidi mwaphinga. Na thangwi ineyi pakumala kupuma mu ntsiku zitatu, iye acemeresa Ayuda akubvekera a ku Roma toera andziwe, pontho aamwazire mphangwa.

11, 12. Pakulonga na Ayuda andzace ku Roma, ninji pidalonga Paulu pyakuti pyaacitisa kufuna kubvesera?

 ¹¹ Paulu alonga: “Abale anga, maseze nee ndacita cinthu cakuipa kuna anthu peno kuswa miyambo ya ambuyathu, ine ndamangwa ku Yerusalemu, mbandiperekwa mʼmanja mwa Aroma. Pidamala iwo kundicita mibvundzo, iwo akhafuna kundisudzula, thangwi nee aona cinthu cinapangiza kuti ndathema kuphiwa. Mbwenye pidakhonda Ayuda, ine ndaphemba toera ndidzatongwe na Sezari, mbwenye nee pisabveka kuti ndisafuna kusumira mbumba yanga.”—Mabasa 28:17-19.

¹² Paulu pidacemera iye Ayuda kuti “abale anga,” Paulu ayesera kuapangiza kuti iye akhali m’bodzi wa iwo, pontho acita pyenepi toera Ayuda anewa akhonde kukhala na tsankhulo. (1 Akor. 9:20) Kusiyapo pyenepi, iye aafokotozera kuti cifuniro cace nee cikhali kupasa mulando Ayuda anewa, mbwenye basi ene aphemba toera akatongwe na Sezari. Mbwenye Ayuda a ku Roma nee akhadziwa kuti Paulu akhadaphemba toera kutongwa ku Roma. (Mabasa 28:21) Bukhu ibodzi isalonga kuti thangwi yanji Ayuda a ku Yudeya nee adziwisa Ayuda akhali ku Roma thangwi ya Paulu. Bukhu ineyi isalonga: “Ndi bote idakwira Paulu idatoma kufika ku Italya pakupita ndzidzi wakutonthola, pontho aimiriri a utongi Waciyuda a ku Yerusalemu nee mbadakwanisa kufika nakweru peno kutumiza tsamba thangwi ya pyenepi.”

13, 14. Kodi Paulu alonga tani pya mphangwa za Umambo, pontho tinatowezera tani pidacita iye?

 ¹³ Penepo Paulu alonga pinthu pyakuti pyacitisa Ayuda anewa kufuna kudziwa pizinji. Iye alonga: “Na thangwi ineyi, ine ndakucemerani toera kukudziwisani kuti ndamangwa na maunyolo awa thangwi ya cidikhiro ca Izraeli.” (Mabasa 28:20) Mphangwa zacidikhiro zikhamwaza Akristu zikhalonga pya Mesiya na Umambo wace. Akulu a mbumba Aciyuda atawira: “Ife taona kuti mphyadidi tibve pinanyerezera iwe, thangwi mwandimomwene, ife tisadziwa kuti uphemberi upswa unoyu usalongwa mwakuipa konsene kwene.”—Mabasa 28:22.

¹⁴ Tingakhala na mwai wakumwaza mphangwa zadidi, tinakwanisa kutowezera Paulu mbatilonga pinthu pyakuti pinacitisa anthu kunyerezera peno kucita mibvundzo yakuti inacitisa anthu kufuna kudziwa pizinji thangwi ya Bhibhlya. Tinakwanisa kugumana maonero adidi kakamwe m’bukhu Raciocínios à Base das Escrituras, Beneficie-se da Escola do Ministério Teocrático, na bhruxura Wangisirani Toera Kuleri Mwadidi na Kupfundzisa. Imwe munakhala mpfundzisi wadidi kakamwe mungaphatisira mwadidi maonero anewa.

15. Ndi pinthu pipi pinai pyakuti tinakwanisa kupipfundza thangwi ya njira yakumwaza mphangwa idaphatisira Paulu?

¹⁵ Paulu acita masasanyiro toera aonane pontho na Ayuda pa ntsiku inango, “iwo mbabwera azinji kakamwe” panyumba idafikira Paulu. Paulu aafokotozera Malemba “kutomera namacibese mpaka namasiku . . . mbapereka umboni wakukwana kuna iwo thangwi ya Umambo wa Mulungu. Iye aphatisira Mwambo wa Mose na mabukhu a Aprofeta.” (Mabasa 28:23) Ife tinapfundza pinthu pinai pidaphatisira Paulu pakumwaza mphangwa. Cakutoma, iye aikha manyerezero ace ku Umambo wa Mulungu. Caciwiri, iye acitisa anyakubvesera ace akhale na cifuno cakutawira mphangwa za Umambo. Cacitatu, iye aphatisira Malemba toera anyakubvesera ace anyindire mphangwa zace. Cacinai, iye aikha patsogolo pifuno pya ale akhamwazira iye mphangwa thangwi apereka umboni “kutomera namacibese mpaka namasiku.” Ceneci ndi citsandzo cadidi kakamwe kuna ife! Ndi nkhombo zipi zidakhala na iye? “Anango atoma kukhulupira,” maseze anango nkhabe. Luka alemba kuti anthu atoma kulongezana unango na ndzace ‘mbatoma kubuluka.’—Mabasa 28:24, 25a.

16-18. Thangwi yanji Paulu nee adzumatirwa pidakhonda Ayuda anango a ku Roma kubva mphangwa zace, pontho tisafunika kukhala na mabvero api anthu angakhonda mphangwa zathu?

¹⁶ Paulu akhadziwa mwadidi kuti pyenepi mbapidacitika thangwi pikhadancitikira kale nduli. Natenepa iye nee adzumatirwa pidaona iye anango mbakhonda komerwa na mphangwa zace. (Mabasa 13:42-47; 18:5, 6; 19:8, 9) Mu ndzidzi ukhabuluka ale adakhonda mphangwa zace, Paulu aapanga: “Nzimu  wakucena walonga kuna ambuyanu kubulukira mwa mprofeta Izaiya kuti: ‘Ndoko kuna anthu awa, mbuapanga: “Mwandimomwene imwe munadzabva, mbwenye nee munadzapibvesesa, mwandimomwene imwe munadzayang’ana, mbwenye nee munadzaona cinthu. Thangwi mitima ya anthu awa ndi yakuuma.”’” (Mabasa 28:25b-27) Fala idaphatisirwa toera kuthumburuza “yakuuma” isapangiza ntima wakukhuma wakuti usapingiza mphangwa za Umambo zikhonde kupita muna iwo. (Mabasa 28:27) Pikhali pyakutsukwalisa kakamwe kuna anthu anewa kukhonda undimomwene wa Mafala a Mulungu!

¹⁷ Mafala akumalisa adalonga Paulu kuna Ayuda anewa akusowa cikhulupiro akhali awa: ‘Anthu a madzindza anango, mwandimomwene anadzazibvesera.’ (Mabasa 28:28; Mas. 67:2; Iza. 11:10) Mwandimomwene, Paulu akhadziwa mwadidi pikhalonga iye, thangwi iye aona anthu azinji a madzindza anango mbatawira mwadidi mphangwa za Umambo!—Mabasa 13:48; 14:27.

¹⁸ Ninga Paulu, ife nee tisafunika kutsukwala anthu angakhonda mphangwa zadidi zinamwaza ife. Mbwenye tisafunika kudziwa kuti panango angasi anatawira kupita na njira ya umaso. (Mat. 7:13, 14) Anthu a ntima wadidi angacita cisankhulo cakulambira Yahova, ife tisatsandzaya kakamwe na iwo, pontho tisaacita bweraniko mu mpingo Wacikristu.—Luka 15:7.

19. Paulu acitanji pikhali iye panyumba ikhaonerwa iye?

¹⁹ Mafala akumalisa adalonga Luka m’bukhu ya Mabasa ndi akuwangisa kakamwe kuna ife. Iye alonga: “Paulu amala pyaka piwiri kweneko panyumba ikhalipa iye toera kukhala, iye akhatambira mwadidi anthu onsene akhabwera kudzamuona, akhamwaza mphangwa za Umambo wa Mulungu kuna iwo, mbaapfundzisa pya Mbuya Yezu Kristu na cipapo consene, nee kupingizwa.” (Mabasa 28:30, 31) Paulu apangiza citsandzo cadidi cakutambira alendo, cikhulupiro na phinga!

20, 21. Ndi anthu api adaphedza Paulu pikhali iye ku Roma?

²⁰ M’bodzi mwa anthu adatambira Paulu mwadidi ndi mamuna anacemerwa Onesimo, bitcu adathawa ku Kolose. Paulu aphedza Onesimo toera akhale Nkristu, natenepa adzakhala m’bale “wakukhulupirika na wakufunika” kuna Paulu. Paulu akhafuna kakamwe Onesimo, pontho Paulu akhaona Onesimo ‘ninga mwanace.’ (Akol. 4:9; Filim. 10-12) Onesimo abalangaza kakamwe Paulu! a

²¹ Anthu anango aphedzekambo na citsandzo cadidi ca Paulu. Kuna anthu a ku Filipi, iye alemba: “Pidandicitikira, pyaphedza toera mphangwa zadidi  ziende kutsogolo, thangwi anyakuonera onsene a mambo wa ku Roma na anthu anango onsene abva kuti ine ndamangwa na maunyolo thangwi ya Kristu. Cincino, abale azinji mwa Mbuya, ali na cinyindiro thangwi yakumangwa kwanga na maunyolo, pontho onsene asapangiza cipapo kakamwe, mbalonga mafala a Mulungu mwakukhonda gopa.”—Afil. 1:12-14.

22. Ndi pinthu pipi pinango pidacita Paulu pikhali iye ku Roma?

²² Maseze Paulu akhaonerwa na nyakuonera panyumba ikakhala iye ku Roma, iye aphatisira ndzidzi unoyu toera kulemba matsamba akufunika kakamwe akuti cincino asacita khundu ya Malemba Acigerego Acikristu. b Matsamba anewa aphedza kakamwe Akristu a mu ndzidzi wa apostolo akuti ndiwo adalemberwa matsamba anewa. Ife tisaphedzekambo na matsamba adalemba Paulu, thangwi uphungu udalemba iye usaphedza kakamwe lero ninga mu ndzidzi udalembwa iwo.—2 Tim. 3:16, 17.

23, 24. Ninga Paulu, Akristu lero asapangiza tani kuti asapitiriza kukhala akutsandzaya maseze aikhwe nkaidi thangwi ya cikhulupiro cawo?

²³ Maseze nee pisalongwa m’bukhu ya Mabasa, Paulu abuluswa nkaidi pakupita pyaka pinai. Iye akhala nkaidi pyaka piwiri ku Sezareya, pontho pyaka pinango piwiri akhala nkaidi ku Roma panyumba ikhaonerwa iye na nyankhondo. c (Mabasa 23:35; 24:27) Mbwenye iye akhali wakutsandzaya, pontho akhacita pyonsene pikhakwanisa iye toera kutumikira Yahova. Munjira ibodzi ene lero, Mboni za Yahova zakuti zisaikhwa nkaidi thangwi ya cikhulupiro cawo, zisapitiriza kukhala zakutsandzaya mbapitiriza kumwaza mphangwa. Onani citsandzo ca Adolfo wakuti  aikhwa nkaidi ku Espanya thangwi cikhulupiro cace nee cantawirisa kuenda kunkhondo. Nyakuonera alonga: “Tisadzumatirwa na iwe. Ife tacita pyonsene toera umaso wako nkaidi ukhale wakunentsa kakamwe, mbwenye tingacita pyenepi, iwe usatsandzaya, pontho usalonga na ife mwacilemedzo.”

²⁴ Mukupita kwa ndzidzi, anyakuonera adzanyindira kakamwe Adolfo mbasiya nsuwo wa kaidi ikhali iye wakufunguka. Midzidzi inango anyankhondo akhaenda kancita mibvundzo thangwi ya Bhibhlya. Nyakuonera m’bodzi akhaenda kazinji kene mu kaidi ikhali Adolfo toera kuleri Bhibhlya, mu ndzidzi wakuti Adolfo akhaonera ku nsuwo toera akhale na cinyindiro cakuti nee m’bodzi akumuona. Natenepa nyankaidi ndiye akhali “nyakuonera”! Natenepa, citsandzo cadidi cinapangiza Mboni za Yahova zakukhulupirika ninga iye cisaticitisa kupangiza ‘cipapo kakamwe, mbatilonga mafala a Mulungu mwakukhonda gopa,’ mwakukhonda tsalakana makhaliro akunentsa.

25, 26. Cifupi na pyaka 30, ndi profesiya ipi ya Yezu idaona Paulu mbikwanirisika, pontho profesiya ineyi isakwanirisikambo tani mu ntsiku zathu?

²⁵ Bukhu ya Mabasa isalonga pya mphangwa zadidi thangwi ya Akristu akuti acita pyonsene pinakwanisa iwo toera kumwaza mphangwa zadidi! Pontho bukhu ineyi isamalisa na citsandzo cadidi ca Paulu wakuti apitiriza ‘kumwaza mphangwa zadidi za Umambo wa Mulungu’ kuna onsene akhaenda kamuona mu ndzidzi ukhali iye nkaidi yapanyumba. Mu kapitulu yakutoma, ife tisaleri pya basa idapasa Yezu atowereri ace pidalonga iye kuti: “Munadzatambira mphambvu, penepo munadzakhala amboni anga mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:8) Mbapidzati kupita pyaka 30, mphangwa za Umambo ‘zikhadamwazwa kuna anthu onsene pa dziko yapantsi.’ d (Akol. 1:23) Pyenepi pisapangiza kuti nzimu wakucena wa Mulungu ndi wamphambvu kakamwe!—Zak. 4:6.

²⁶ Lero nzimu wakucena wa Mulungu usapasa mphambvu Akristu akudzodzwa na “mabira anango” toera apitirize ‘kupereka umboni wakukwana thangwi ya Umambo wa Mulungu’ m’madziko akukwana 240! (Juw. 10:16; Mabasa 28:23) Kodi imwe musacita pyonsene pinakwanisa imwe m’basa ineyi?