NSOLO 14
“Tonsene Tabverana Toera Kusankhula Amuna Angasi”
Mathubo akutonga acita tani cisankhulo cakufunika thangwi ya nkandzo wa kusidzwa, pontho cisankhulo ceneci caphedza tani toera mipingo ikhale yakuphatana
Mphangwa zakubuluswa m’bukhu ya Mabasa 15:13-35
1, 2. (a) Ndi mibvundzo ipi yakufunika yakuti mathubo akutonga a mu Yerusalemu akhafunika kuitawira? (b) Ninji pidaphedza abale anewa toera kucita cisankhulo cadidi?
ANTHU onsene akudikhira na ntima onsene cisankhulo cinafuna iwo kucita. Apostolo na akulu a mpingo ali mu sala mu Yerusalemu mbakayang’anisana unango na ndzace. Abale akhafunika kutawira mibvundzo inalonga thangwi ya kusidzwa. Kodi Akristu asafunika kubvera Mwambo wa Mose? Kodi Yahova akhaona Akristu Aciyuda kukhala akusiyana na Akristu a madzindza anango?
2 Amuna akuti akhatsogolera afufudza mphangwa zizinji thangwi ya pyenepi. Iwo alonga pya maprofesiya a m’Mafala a Mulungu, kuphatanizambo mafala akunyindirika adalonga anthu akuti apangiza kuti Yahova akhatawira Akristu a madzindza anango. M’bodzi na m’bodzi wa iwo alonga pinthu pikhadziwa iwo thangwi ya pyenepi. Iwo akhali na mphangwa zonsene zikhafuna iwo toera kucita cisankhulo. Pontho akhali na cinyindiro consene cakuti ndi cisankhulo ceneci cikhafuna Yahova toera iwo acite. Kodi amuna anewa mbadatawira citsogolero ca nzimu wa Yahova?
3. Tinapfundzanji m’bukhu ya Mabasa kapitulu 15?
3 Amuna anewa akhafunika kukhala na cikhulupiro na cipapo kakamwe toera kutawira citsogolero ca nzimu wakucena thangwi ya pyenepi. Atsogoleri auphemberi Aciyuda mbadaaida kakamwe thangwi ya cisankhulo cikhafuna iwo kucita. Anthu anango akuti akhafuna kuti mbumba ya Mulungu ibvere Mwambo wa Mose panango mbadakhonda cisankhulo cidacita mathubo akutonga. Kodi mathubo akutonga mbadacitanji? Tendeni tione. Tinapfundzambo kuti amuna anewa apangiza tani citsandzo cakuti cisatowezerwa na Mathubo Akutonga a Mboni za Yahova lero. Ceneci ndi citsandzo cakuti ife tisafunika kucitowezera tingafuna kucita pisankhulo peno tingathimbana na nyatwa mu umaso wathu.
“Pyenepi Pisabverana na Mafala a Aprofeta” (Mabasa 15:13-21)
4, 5. Ndi mavesi api a m’Mafala a Mulungu adalonga Tiyago?
4 Nyakupfundza Tiyago wakuti akhali m’bale wace Yezu atoma kulonga. a Pisaoneka kuti mu ndzidzi unoyu ndiye akhatsogolera nsonkhano unoyu. M’mafalace, iye agomezera cisankhulo cikhafuna kucita nsoka unoyu. Tiyago apanga anthu adagumanika pa nsonkhano unoyu: “Simiyau afokotoza mwadidi kuti cincino Mulungu atoma kutawira anthu a madzindza anango, mbasankhula anango pakati pawo toera acemerwe na dzina yace. Pontho pyenepi pisabverana na mafala a Aprofeta.”—Mabasa 15:14, 15.
5 Mafala adalonga Simiyau peno Simau Pedhru na mphangwa zakunyindirika zidalonga Bharnabhe na Paulu panango zacitisa Tiyago kukumbuka Malemba akuthema akuti akhabvekesa mwadidi pyenepi. (Juw. 14:26) Natenepa iye alonga: “Pyenepi pisabverana na mafala a Aprofeta.” Tiyago alonga mafala anagumanika pa Amosi 9:11, 12. Bukhu ineyi ikhacita khundu ya Malemba Acihebheri akuti kazinji kene akhacemerwa “Aprofeta.” (Mat. 22:40; Mabasa 15:16-18) Tiyago pidalonga iye mafala anagumanika pa Amosi 9:11, 12, iye aphatisira mafala akusiyana na ale anagumanika m’bukhu ya Amosi lero. Panango Tiyago alonga mafala anagumanika mu Septuagint, yakuti ikhali bukhu idathumburuzwa kubulukira Mucihebheri kudza Mucigerego.
6. Kodi Malemba aphedza tani abale anewa toera kudziwa cifuniro ca Mulungu?
6 Kubulukira kuna mprofeta Amosi, Yahova alonga kuti mbudafika ndzidzi wakuti Iye mbadalamusa ‘nyumba ya Dhavidhi,’ pyenepi pikhabveka kuti banja ya amambo ndiyo ikhafuna kubala Umambo wa Mesiya. (Ezek. 21:26, 27) Kodi pyenepi pikhabveka kuti Yahova mbadapasa pontho nkhombo basi ene Ayuda? Nkhabe. Profesiya isalonga kuti “anthu a madzindza onsene” mbadagumanywa pabodzi mbakhala mbumba ‘yakucemerwa na dzina ya Mulungu.’ Kumbukani kuti Pedhru akhadamala kwene kufokotoza kuti Mulungu nee asiyanisa cinthu “kuna ife [Akristu Aciyuda] na iwo [Akristu a madzindza anango], mbwenye acenesa mitima yawo thangwi ya cikhulupiro cawo.” (Mabasa 15:9) Natenepa, cifuniro ca Mulungu ndi cakuti Ayuda na anthu a madzindza anango atambire Umambo. (Aroma 8:17; Aef. 2:17-19) Maprofesiya a m’Bhibhlya cipo alonga kuti Akristu Aciyuda akhafunika kusidzwa peno kupita mu uphemberi Waciyuda mbadzati kutambira Umambo.
7, 8. (a) Ndi maonero api adapereka Tiyago? (b) Kodi Tiyago akhakakamira kuti akhali na ufulu wakupanga abale cisankhulo cikhafunika iwo kucita? Fokotozani.
7 Thangwi ya undimomwene wakubveka mwadidi wa maprofesiya na pidalonga Pedhru, Bharnabhe na Paulu, Tiyago alonga: “Natenepa, cisankhulo canga ndi ici: Nee tisafunika kunentsa anthu a madzindza anango anabwera kuna Mulungu, mbwenye tisafunika kualembera tsamba toera acalire pinthu pidaperekwa ninga ntsembe kuna madzimunthu, acalire ulukwali, acalire kudya nyama idabumbunyulwa khosi, pontho acalire ciropa. Thangwi kutomera kale kakamwe anthu asapfundzisa pya matongero anewa anagumanika m’Mabukhu a Mose mu nzinda ubodzi na ubodzi, thangwi asalerwi mwakugaluza m’masabudu onsene m’masinagoga.”—Mabasa 15:19-21.
8 Tiyago wakuti ndiye akhatsogolera nsonkhano unoyu alonga: “Natenepa, cisankhulo canga ndi ici.” Kodi iye akhakakamira kuti ali na cidzo toera kupanga abale anango thangwi ya cisankhulo cikhafunika iwo kucita? Nee pang’ono pene! Fala Yacigerego yakuti “cisankhulo canga ndi ici” irimbo na mabvekero akuti “ndiri kudinga” peno “maonero anga ndi awa.” Tiyago nee akhacitira nsoka cisankhulo. Mbwenye akhapereka maonero ace akuti ninji pikhafunika iwo kucita mwakubverana na pyonsene pidabva iwo, kuphatanizambo pinalonga Malemba thangwi ya nkhani ineyi.
9. Kodi maonero a Tiyago aphedza tani?
9 Kodi maonero a Tiyago akhali adidi? Pisaoneka kuti akhali adidi thangwi mukupita kwa ndzidzi apostolo na akulu a mpingo aphatisira maonero anewa. Ndi nkhombo zipi zidakhala na iwo? Nkhombo ibodzi ndi yakuti maonero adapereka Tiyago nee ‘mbadakhala akunentsa’ kuna Akristu a madzindza anango, thangwi iwo nee mbadafunika kubvera Mwambo wa Mose. (Mabasa 15:19) Nkhombo inango ndi yakuti cisankhulo ceneci mbicidapangiza cilemedzo ku cikumbuntima ca Akristu Aciyuda, akuti pyaka pyonsene akhabvesera ‘Mwambo wa Mose mbukalerwi mwakugaluza m’masabudu onsene m’masinagoga.’ b (Mabasa 15:21) Mwandimomwene, maonero a Tiyago mbadaphedza Akristu Aciyuda na a madzindza anango toera akhale na uxamwali wakuwanga kuna unango na ndzace. Mbwenye cakufunika kakamwe ndi cakuti mbadakomeresa Yahova Mulungu thangwi cisankhulo ceneci cikhabverana na cifuniro cace. Ineyi ikhali njira yadidi kakamwe toera kumalisa nkandzo wakuti ukhapingiza ntendere na kubverana pakati pa mpingo onsene wa mbumba ya Mulungu! Pontho ndi citsandzo cadidi kakamwe kuna mpingo Wacikristu lero!
Albert Schroeder mbakacita nkhani pa nsonkhano wa gawo wa madziko onsene mu caka ca 1998
10. Kodi Mathubo Akutonga lero asatowezera tani mathubo akutonga a mu ndzidzi wa apostolo?
10 Nsolo udamala walonga kuti ninga mathubo akutonga a mu ndzidzi wa apostolo, Mathubo Akutonga a Mboni za Yahova lero asanyindira Yahova wakuti ndi Ntongi Wankulu Kakamwe Kudzulu na Pantsi na Yezu Kristu wakuti ndi Nsolo wa mpingo toera kusaka citsogolero mu pisankhulo pyonsene pinacita iwo. c (1 Akor. 11:3) Iwo asacita tani pyenepi? Albert D. Schroeder, wakuti atumikira ninga m’bodzi wa Mathubo Akutonga kutomera mu caka 1974 mpaka kumala kwa umaso wace pa dziko yapantsi mu caka ca 2006, alonga: “Mathubo Akutonga asagumanyikana masumana onsene Ncitatu, asatoma nsonkhano wawo na phembero mbaphemba citsogolero ca nzimu wakucena wa Yahova. Mathubo Akutonga asacita pyonsene toera pinthu pyonsene pinacedza iwo na pisankhulo pyonsene pinafuna kucita iwo pikhale pyakubverana na pinalonga Mafala a Mulungu, Bhibhlya.” Munjira ibodzi ene, Milton G. Henschel, wakuti atumikira mu pyaka pizinji ninga m’bodzi wa Mathubo Akutonga wakuti amalisa basa yace pa dziko yapantsi mu caka 2003, acita mbvundzo wakufunika kakamwe kuna anyakupfundza a turma 101 ya Xikola ya Bhibhlya ya Jiliyadhi ya Torre de Vigia. Iye abvundza: “Kodi pa Dziko Yapantsi iripo gulu inango yakuti atsogoleri ace asafufudza Mafala a Mulungu, Bhibhlya mbadzati kucita pisankhulo pyakufunika kakamwe?” Ntawiro ndi wakuti nkhabepo gulu inango.
‘Atumizwa Amuna Adasankhulwa’ (Mabasa 15:22-29)
11. Kodi cisankhulo ca mathubo akutonga cafikiswa tani m’mipingo?
11 Mathubo akutonga mu Yerusalemu acita cisankhulo cibodzi cene thangwi ya kusidzwa. Toera kudziwisa mipingo thangwi ya cisankhulo cidacitwa, iwo akhafunika kupicita munjira yadidi na yakuwangisa toera abale akwanise kukhala akuphatana. Iwo mbadacita tani pyenepi? Bhibhlya isalonga: “Apostolo, akulu a mpingo na abale onsene mu mpingo, abverana kusankhula amuna pakati pawo toera aatumize ku Antiyokiya pabodzi na Paulu na Bharnabhe; iwo atumiza Yuda anacemerwa Bharsabha na Sila, amuna anewa akhali na basa yakutsogolera pakati pa abale.” Kusiyapo pyenepi, mathubo akutonga alemba tsamba mbaitumiza na iwo toera ikalerwi m’mipingo yonsene ya ku Antiyokiya, Sirya na ku Silisya.—Mabasa 15:22-26.
12, 13. Ndi nkhombo zipi zidaoneka thangwi (a) ya kutumiwa kwa Yuda na Sila? (b) ya tsamba ya mathubo akutonga?
12 Ninga “amuna akhali na basa yakutsogolera pakati pa abale,” Yuda na Sila akhali akuthema toera kuimirira mathubo akutonga. Abale anewa anai mbadalonga pakweca kuti mphangwa zidabwera na iwo nee zikhali ntawiro thangwi ya nkhani ya kusidzwa, mbwenye zikhali pitsogolero pipswa pidabuluka kuna mathubo akutonga. ‘Amuna anewa adasankhulwa’ mbadaphedza Akristu a madzindza anango toera akhale akuphatana kakamwe na Akristu akuti akhali Ayuda a ku Yerusalemu. Kutuma amuna anewa cikhali cisankhulo candzeru, pontho pikhapangiza ufuni! Mwakukhonda penula, pyenepi pyabweresa ntendere pakati pa mbumba ya Mulungu.
13 Pa tsamba pakhali na pitsogolero pyakubveka mwadidi kuna Akristu akuti nee akhali Ayuda, tayu basi thangwi ya nkandzo wakusidzwa, tsamba ineyi ikhalongambo kuti iwo akhafunika kucitanji toera akhale akutawirika kuna Yahova na kutambira nkhombo zace. Khundu yakufunika kakamwe ya tsamba ineyi ikhalonga tenepa: “Nzimu wakucena watiphedza toera kucita cisankhulo cakuti nee tisafunika kukupasani ntolo unango, kusiyapo pinthu ipi pyakufunika: Kuti mupitirize kucalira pinthu pidaperekwa ninga ntsembe kuna madzimunthu, ciropa, nyama idabumbunyulwa khosi, na ulukwali. Mungacalira mwadidi pinthu pyenepi, umaso wanu unakufambirani mwadidi. Tambirani mwanyikiro wathu!”—Mabasa 15:28, 29.
14. Ninji pinapangiza kuti pinakwanisika kuna mbumba ya Yahova kuphata basa mwakubverana mu dziko ino yakugawika?
14 Lero, Mboni za Yahova ndi anthu akuphatana kakamwe. Maseze iwo ndi anthu akupiringana 8.000.000 m’mipingo yakupiringana 100.000 pa dziko yonsene, iwo asakhulupira pinthu pibodzi pyene, pontho asaphata basa ibodzi ene. Mphapo iwo asakwanisa tani kukhala akuphatana mu dziko ino yakuti anthu asasankhulana, pontho nkhabe kubverana? Ife tisakhala akuphatana kakamwe thangwi ya pitsogolero pyakubveka mwadidi pinapereka Yezu Kristu, wakuti ndi Nsolo wa mpingo, kubulukira kuna “m’bandazi wakukhulupirika na wandzeru,” akuti ndi Mathubo Akutonga. (Mat. 24:45-47) Ife tisakhalambo akuphatana na abale onsene pa dziko yapantsi tingabvera na ntima onsene pitsogolero pya Mathubo Akutonga.
“Atsandzaya Kakamwe Thangwi ya Mafala Akuwangisa” (Mabasa 15:30-35)
15, 16. Mipingo yacitanji na cisankhulo ca mathubo akutonga, pontho thangwi yanji?
15 Bukhu ya Mabasa isalonga kuti abale adabuluka ku Yerusalemu pidafika iwo ku Antiokiya, “agumanya nsoka onsene wa anyakupfundza, mbaapasa tsamba.” Kodi abale kweneko apibva tani pidatambira iwo pitsogolero pya mathubo akutonga? “Pidamala iwo kuileri [tsamba], atsandzaya kakamwe thangwi ya mafala akuwangisa adatambira iwo.” (Mabasa 15:30, 31) Kusiyapo pyenepi, Yuda na Sila “apasa cipapo abale mbaawangisa na mafala mazinji.” Nakuti Bharnabhe, Paulu, na anango akhadziwisa pya cifuniro ca Mulungu, iwo adzacemerwa “aprofeta.”—Mabasa 13:1; 15:32; Eks. 7:1, 2.
16 Pisaoneka pakweca kuti Yahova apasa nkhombo cisankhulo ca mathubo akutonga. Pyenepi pyaphedza toera mipingo yonsene iwangiswe. Thangwi yanji mipingo yawangiswa? Yawangiswa thangwi mathubo akutonga apereka pitsogolero pyakubveka mwadidi pa ndzidzi wakuthema. Pitsogolero pyenepi pikhabverana na Mafala a Mulungu, pontho iwo akhaphedzwa na nzimu wakucena. Iyo yawangiswambo thangwi abale adatumwa na mathubo akutonga toera kuenda kadziwisa mipingo pya cisankhulo cidacitwa, akhali aufuni na antsisi.
17. Ndi munjira ipi ayang’aniri a cisa lero alandana na Paulu, Bharnabhe, Yuda na Sila?
17 Mathubo Akutonga a Mboni za Yahova, lero asaphatisira njira ibodzi ene; iwo asapereka pitsogolero kuna abale pa dziko yonsene pa ndzidzi wakuthema. Mathubo Akutonga angacita pisankhulo, iwo asadziwisa mipingo cisankhulo cidacita iwo munjira yadidi na yakubveka. Midzidzi inango, Mathubo Akutonga asaphatisira ayang’aniri a cisa toera kupereka pitsogolero pyenepi. Abale anewa akuperekeka asaenda m’mipingo yakusiyana-siyana toera kupereka pitsogolero pyakubveka na kuwangisa mipingo. Ninga Paulu na Bharnabhe, iwo asamala ndzidzi uzinji mu utumiki ‘mbapfundzisa na kumwaza mphangwa zadidi za mafala a Yahova.’ (Mabasa 15:35) Ninga Yuda na Sila, iwo asawangisa abale “na mafala mazinji,” pontho asaapasa mphambvu.
18. Atumiki a Mulungu asafunika kucitanji toera atambire nkhombo zace?
18 Mphapo pisakwanisika tani kuti mipingo yonsene pa dziko ipitirize kukhala mu ntendere na yakuphatana mu dziko yakuti anthu azinji ndi akugawana? Kumbukani mafala awa adalemba mpostolo Tiyago pidapita ndzidzi ungasi: “Udziwisi wakudzulu, pakutoma ndi wakucena, buluka penepo, wantendere, wakulinganira, usakhala dzololo toera kubvera . . . Kusiyapo pyenepi, nsapo wa ulungami usabzwalwa m’makhaliro a ntendere pakati pa anthu anakhazikisa ntendere.” (Tiya. 3:17, 18) Nee tisadziwa khala Tiyago akhanyerezera pya nsonkhano ku Yerusalemu pidalemba iye mafala anewa. Mbwenye m’bukhu ya Mabasa kapitulu 15, ife tapfundza kuti basi ene tinatambira nkhombo za Yahova tingakhala akuphatana na tingabvera pitsogolero pya abale anatitsogolera.
19, 20. (a) Ninji pinapangiza kuti mpingo wa Antiyokiya ukhali na ntendere na kubverana pidamala iwo kutambira tsamba ya mathubo akutonga? (b) Paulu na Bharnabhe mbadacitanji kutomera penepo?
19 Abale pidadziwa iwo cisankhulo cidacita mathubo akutonga, mpingo wa ku Antiyokiya wadzakhala wakubverana na wantendere. Mbuto mwa kuida abale adabuluka ku Yerusalemu, abale a ku Antiyokiya akhapereka takhuta kakamwe thangwi yakucedzerwa na Yuda pabodzi na Sila. Bhibhlya isalonga: “Iwo amala ntsiku zingasi kweneko, buluka penepo abale aasiya toera abwerere muntendere kuna ale adaatuma,” pyenepi pisabveka kubwerera ku Yerusalemu. d (Mabasa 15:33) Tisakwanisa kukhala na cinyindiro cakuti abale a ku Yerusalemu atsandzayambo na mphangwa zidabweresa amuna anewa awiri thangwi ya ulendo wawo. Thangwi ya udidi wakukhonda kuathema wa Yahova, iwo amalisa kucita basa yawo munjira yadidi kakamwe!
20 Pidamala kutsalakanwa nkandzo unalonga pya kusidzwa, Paulu na Bharnabhe apitiriza ku Antiyokiya. Iwo mbadafunika kutsogolera basa yakumwaza mphangwa. Lero, ayang’aniri a cisa asacitambo pibodzi pyene angacedzera mipingo. (Mabasa 13:2, 3) Ninga Paulu na Bharnabhe, kukhala na ayang’aniri a cisa lero ndi nkhombo kuna mbumba ya Yahova! Kodi Yahova aphatisira tani Paulu na Bharnabhe, pontho ndi nkhombo zipi zakuthimizirika zidapasa Yahova amwazi mphangwa anewa aphinga? Tinapfundza pyenepi mu nsolo unatowera.
Lero Akristu asaphedzeka na pipfundziso pinatambira iwo kubulukira kwa Mathubo Akutonga na aimiriri awo
a Onani bokosi yakuti “ Tiyago—‘M’bale wace Mbuya.’”
b Mwaluso Tiyago alonga mabukhu adalembwa na Mose. Mabukhu anewa ali na Mwambo wa Mose na mphangwa zinapangiza kuti ndi cipi cifuniro ca Mulungu kuna anthu onsene. Mphangwa zenezi zalembwa mu ndzidzi wakuti Mwambo wa Mose ukhadzati kukhazikiswa. Mwacitsandzo, maonero a Mulungu thangwi ya ciropa, upombo na kulambira madzimunthu asaoneka mwadidi kakamwe m’bukhu ya Genesi. (Gen. 9:3, 4; 20:2-9; 35:2, 4) Munjira ineyi, Yahova apangiza mitemo yakuti anthu onsene akhafunika kuibvera mwakukhonda tsalakana khala ndi Ayuda peno anthu a madzindza anango.
c Onani bokosi yakuti “ Mathubo Akutonga Lero.”
d Pa vesi 34, Mabhibhlya anango asaikha fala yakuti isapangiza kuti Sila apitiriza ku Antiyokiya. Mbwenye pisaoneka kuti mafala anewa athimizirwa mu ndzidzi wakuti bukhu ya Mabasa ikhadamala kulembwa kale.
