NSOLO 18
‘Sakani Mulungu, Mbamun’gumana’
Paulu acinja njira yace yakumwaza mphangwa, pontho alonga pinthu pyakuti ale akhambvesera akhapidziwa mwadidi
Mphangwa zakubuluswa m’bukhu ya Mabasa 17:16-34
1-3. (a) Thangwi yanji mpostolo Paulu adzudzumika kakamwe ku Atena? (b) Tinapfundzanji na pidacita Paulu?
PAULU ali wakudzudzumika kakamwe. Iye ali ku Atena, ku Gresya nzinda wakuti Sokrate, Platao na Aristotele akhapfundzisa ndzeru za anthu. Anthu a ku Atena akhafuna kakamwe pya uphemberi. Iwo akhalambira madzimunthu mazinji akuti akhagumanika m’mbuto zonsene zikhaenda Paulu. Madzimunthu anewa akhagumanika m’matemplo, mbuto zapakweca na m’miseu. Paulu akhadziwa kuti Yahova Mulungu wandimomwene, asaipirwa na anthu analambira madzimunthu. (Eks. 20:4, 5) Ninga Yahova, atumiki ace akukhulupirika asanyanyasirwambo na madzimunthu.
2 Pinthu pidaona Paulu mu ndzidzi ukhapita iye m’bazari, pikhali pyakudzumatirisa. Bazari ineyi ikhadadzala na madzimunthu akunyanyasa a mulungu wawo Herme, iwo akhaikhwa pankhomo cifupi na nsuwo ukulu. M’bazari mukhali na mbuto zizinji zakulambira. Kodi mpostolo Paulu mbadamwaza tani mphangwa kuna anthu akuti akhalambira madzimunthu? Kodi iye mbadakhala wakukhurudzika na wacilemedzo mbanyerezera cinthu cakuti anthu akhafuna kulonga na iye mbadatsandzaya naco? Kodi iye mbadakwanisa kuphedza anthu toera asake Mulungu wandimomwene mban’gumana?
3 Pa Mabasa 17:22-31, ife tisagumana mafala adalonga Paulu kuna anthu adapfundza kakamwe a ku Atena. Iye akhalonga munjira yakutundusa na yacilemedzo. Ife tingapfundza citsandzo ca Paulu, pinatiphedza toera kulonga mphangwa zakuti anyakubvesera athu asazidziwa; pyenepi pinaaphedza toera kunyerezera pidapfundza iwo.
Kupfundzisa ‘pa Bazari’ (Mabasa 17:16-21)
4, 5. Kodi Paulu amwaza kupi mphangwa ku Atena, pontho anthu a kweneko akhali na makhaliro api?
4 Paulu aenda ku Atena paulendo wace waciwiri waumisionaryo mu caka 50 P.K.K. a Pikhadikhira iye Sila na Timoti toera afike buluka ku Bhereya, Paulu “atoma kupfundzisa Ayuda mu sinagoga,” ninga pikhacita iye mwandzolowero. Iye aendambo kamwaza mphangwa ‘pa bazari,’ yakuti iye mbadakwanisa kucedza na anthu akakhala ku Atena akuti nee akhali Ayuda. (Mabasa 17:17) Bazari ya ku Atena ikhali ikulu kakamwe, pontho ikhali cifupi na nthunda inacemerwa Akropoli. Kusiyapo kugula na kugulisa pinthu, anthu akhacita pinthu pizinji pa bazari ineyi. Bazari ineyi ikhali mbuto yakufunika kakamwe ikhagumanyikana anthu mu nzinda. Bukhu inango yalonga kuti ineyi ikhali mbuto yakuti “anyamalonda, anyandale, anyakudziwisa pya filozofiya na anyakulemba akhagumanyikana penepo.” Anthu a ku Atena akhakomerwa kakamwe kugumanyikana pa mbuto ineyi toera kucedza pya mapfundziro.
5 Paulu agumana anthu akunentsa kakamwe pa bazari. Thangwi mwa anthu anewa akhalipo a Epikureu na a Estoiko, akuti akhali anthu akhakhulupira pinthu pyakusiyana. b A Epikureu akhakhulupira kuti umaso waoneka mwasusudeu. Iwo akhakhulupira kuti: “Nee tisafunika kugopa Mulungu; nee tisafunika kugopa kufa; tinakwanisa kukhala na pinthu pyadidi; pontho tinakwanisa kupirira pinthu pyakuipa.” A Estoiko akhakhulupira kuti mphyakufunika kukhala na cidziwiso na luso yakubvesesa. Mbwenye iwo nee akhakhulupira kuti Mulungu ndi wandimomwene. Misoka ineyi miwiri ene nee ikhakhulupira pya kulamuswa muli akufa pikhapfundzisa anyakupfundza a Yezu. Pisaoneka kuti misoka ineyi, ikhakhulupira pinthu pyakusiyana kakamwe na undimomwene ukhakhulupira Akristu wakuti ndi unoyu ukhapfundzisa Paulu.
6, 7. Kodi Agerego anango akupfundza kakamwe akhaona tani mphangwa zikhamwaza Paulu, pontho anthu asaona tani mphangwa zinamwaza ife lero?
6 Anyakudziwisa pya filozofiya Acigerego, akhaona tani mphangwa zikhamwaza Paulu? Anango akhaphatisira fala yakuti isabveka “nyakulongesa” peno “nyakulokota mbeu.” (Mabasa 17:18.) Thangwi ya fala ineyi, nyakudziwisa unango alonga: “Fala ineyi ikhaphatisirwa toera kulonga pya mbalame ing’ono yakuti ikhaenda mbidjonkhona na kudya mbeu, mukupita kwa ndzidzi yatomambo kuphatisirwa toera kulonga pya anthu akhaenda mbalokotera manyedzwa a cakudya na pinthu pinango pyakusowa basa pa bazari. Pontho mukupita kwa ndzidzi, fala ineyi yadzaphatisirwa mwakuphipirisa toera kulonga munthu akhagumanya mphangwa toera kuzilonga kuna anango, maseze iye nee asazibvesesa mwadidi.” Natenepa, amuna anewa akupfundza akhalonga kuti Paulu ndi dzemwa, pontho iye asalonga basi ene pinthu pidabva iye kuna anango. Ninga pinafuna ife kuona, Paulu nee abwerera nduli ngakhale akhapaswa madzina akuipa.
7 Pyenepi pisacitikambo lero. Kazinji kene, anthu asatipasa madzina akuipa basi ene thangwi yakukhala Mboni za Yahova, pontho thangwi yakukhulupira pinalonga Bhibhlya. Mwacitsandzo, apfundzisi anango asalonga kuti pinthu pyacita kusanduka, pontho iwo asalongambo kuti anthu onsene a maluso asafunika atawire pyenepi. Iwo asanyerezera kuti ale anakhonda kutawira cipfundziso ca kusanduka kwa pinthu nee ali na maluso. Anthu anewa adapfundza kakamwe asafuna kuti anango atione ninga ndife madzemwa thangwi tisapfundzisa pinalonga Bhibhlya, pontho tisapangiza kuti alipo adacita pinthu. Mbwenye ife nee tisagopa. Mbuto mwace, ife tisalonga mwacipapo kuti pinthu pyonsene pa dziko yapantsi pyacitwa na Yahova Mulungu.—Apok. 4:11.
8. (a) Ninji pidacita anthu anango adabvesera mphangwa zikhamwaza Paulu? (b) Bhibhlya ingalonga kuti Paulu aendeswa ku Areopago, pyenepi pisafuna kubvekanji? (Onani cidzindikiro capantsi pa tsamba 161.)
8 Anthu anango akhabvesera mphangwa zikhamwaza Paulu pa bazari acita pinthu mwakusiyana. Iwo alonga: “Tisaona ninga akupfundzisa pya alungu anango.” (Mabasa 17:18) Khala Paulu akhapfundzisadi pya alungu anango kuna anthu a ku Atena, umaso wace ukhali pangozwi. Thangwi mu pyaka pingasi nduli nyakudziwisa pya filozofiya akhacemerwa Sokrate apambizirwa kuti akhacitambo pinthu pibodzi pyene. Thangwi ya pyenepi na mathangwi anango, iye atongwa kuphiwa. Nee ndi pyakudzumisa kuti mwakukhonda dembuka, Paulu akwatwa mbaendeswa ku Areopago mbaphembwa toera afokotoze pipfundziso pyace pyakuti pikhaoneka ninga ndi pyacilendo kuna anthu a ku Atena. c Paulu mbadamwaza tani mphangwa kuna anthu akuti nee akhadziwa Malemba?
“Imwe Anthu a mu Atena, Ine Ndisaona” (Mabasa 17:22, 23)
9-11. (a) Kodi Paulu atoma kulonganji kuna anyakubvesera ace? (b) M’basa yathu yakumwaza mphangwa tinatowezera tani pidacita Paulu?
9 Kumbukani kuti Paulu akhadatsukwala na madzimunthu akhalambira anthu akhaona iye. Mbuto mwa kusandika anthu anewa akhalambira madzimunthu, iye apitiriza kukhala wakukhurudzika. Mwacilemedzo, Paulu ayesera kutundusa anthu akhambvesera, iye acita pyenepi pidatoma iye kulonga pinthu pyakuti iwo akhapidziwa. Iye alonga: “Imwe anthu a mu Atena, ine ndisaona kuti mu pinthu pyonsene, imwe musalemedza kakamwe alungu kupiringana pinacita anthu anango.” (Mabasa 17:22) Pikhali ninga Paulu akhalonga: ‘Ndisaona kuti imwe musakomerwa maningi na pya uphemberi.’ Mwandzeru, Paulu aasimba thangwi ya kufuna kwawo pya uphemberi. Iye akhadziwa kuti anthu anango akuti akhanyengezwa na pipfundziso pyauthambi, mbadakwanisa kutawira undimomwene. Mwandimomwene, Paulu adzindikira kuti iye ene acitambo “pinthu mwakukhonda dziwa na mwakusowa cikhulupiro.”—1 Tim. 1:13.
10 Buluka penepo, Paulu alonga kuti aona cinthu cikhapangiza kuti anthu a ku Atena akhakomerwa kakamwe na pya uphemberi, iye alonga kuti agumana guwa idalembwa kuti: “Guwa ya Mulungu Wakukhonda Dziwika.” Mwakubverana na bukhu inango, “Agerego na anthu anango kazinji kene akhamangira maguwa ‘alungu akukhonda dziwika.’ Iwo akhacita pyenepi thangwi akhagopa kuti pakulambira, iwo mbadaduwala kulambira mulungu unango wakuti mbadaipirwa.” Guwa ineyi ikhapangiza kuti anthu a ku Atena akhakhulupira kuti Mulungu alipo, mbwenye iwo nee akhandziwa. Paulu aphatisira guwa ineyi toera kutoma kumwaza mphangwa zadidi. Iye alonga: “Ine ndisakumwazirani mphangwa thangwi ya Mulungu unoyu analambira imwe nee kundziwa.” (Mabasa 17:23) Mafala a Paulu akhali amphambvu maseze iye nee aalonga mwapakweca. Iye nee akhamwaza mphangwa thangwi ya alungu anango ninga pikhapambizirwa iye. Mbwenye Paulu akhafokotoza pya Mulungu wandimomwene wakuti iwo nee akhandziwa.
11 Tinatowezera tani Paulu mu ndzidzi unamwaza ife mphangwa? Tingakhala akuonesesa mwadidi, panango tinadzindikira cinthu cinapangiza kuti munthu anacedza na ife asakomerwa kakamwe na uphemberi, panango thangwi ya kumuona mbaphatisira cinthu ca uphemberi, peno thangwi n’nyumba mwace peno kunja kwa nyumba yace kuli na cinthu cinapangiza kuti iye asakomerwa na uphemberi. Panango tinalonga: ‘Ndisaona kuti imwe musakomerwa kakamwe na uphemberi. Ndisakomerwa kucedza na anthu anakomerwa na uphemberi.’ Tingadzindikira pinakhulupira munthu anacedza na ife, pisaoneka kuti panango tinalonga pinthu pyakuti iye anakomerwa napyo. Pontho tisafunika kukumbuka kuti cifuno cathu nee ndi kutonga anthu thangwi ya pinakhulupira iwo. Tiri na abale na alongo azinji akuti kale iwo akhakhulupirambo pipfundziso pya uphemberi wauthambi.
Yeserani kusaka pinthu pyakuti anyakubvesera anu asapidziwa, pontho phatisirani pinthu pyenepi toera kuaphedza kupfundza undimomwene wa Bhibhlya
Mulungu “Nee Ali Kutali na M’bodzi na M’bodzi wa Ife” (Mabasa 17:24-28)
12. Kodi Paulu acinja tani njira yakumwaza mphangwa kuna anyakubvesera ace?
12 Kodi Paulu mbadapitiriza kumwaza mphangwa kuna anthu a ku Atena mbaphatisira pinthu pyakuti iwo akhapidziwa? Paulu akhadziwa kuti ale akhambvesera akhadziwa mwadidi pya filozofiya Yacigerego, mbwenye iwo nee akhadziwa Malemba, ndi thangwi yace iye acinja njira yace yakumwaza mphangwa. Pakutoma, iye alonga thangwi ya pipfundziso pya m’Bhibhlya mbakhonda kupangiza kuti pyenepi pikhabuluka m’Malemba. Caciwiri, iye acitisa anthu akhambvesera kunyerezera kuti iye akhabvesesa mabvero awo, pontho apangiza kuti akhali ninga iwo pidaphatisira iye mafala akuti “ife.” Cacitatu, iye aphatisira mabukhu Acigerego toera kupangiza kuti pinthu pikhapfundzisa iye pyalembwambo m’mabukhu anewa. Cincino tendeni tione mafala a mphambvu a Paulu. Ndi undimomwene upi wakufunika udalonga iye thangwi ya Mulungu wakuti anthu a ku Atena nee akhaudziwa?
13. Paulu afokotoza tani pinthu pidacitwa kudzulu na pa dziko yapantsi, pontho ninji pidabvekesa iye?
13 Mulungu acita kudzulu na dziko yapantsi. Paulu alonga: “Mulungu adacita dziko na pinthu pyonsene piri mwenemu, nakuti iye ndi mwanaciro wa kudzulu na dziko yapantsi, iye nkhabe kukhala m’matemplo adamangwa na manja a anthu.” d (Mabasa 17:24) Pinthu pyonsene piri kudzulu na pa dziko yapantsi nee pyacitika pyokha. Mulungu wandimomwene ndiye Adacita pinthu pyonsene. (Mas. 146:6) Iye ndi Wankulu Kakamwe kudzulu na pantsi, pontho iye nee anakwana m’matemplo adacitwa na anthu. Iye ndi wakusiyana na Atena peno alungu anango akuti asafuna maguwa na matemplo toera iwo akhale na mbiri. (1 Ama. 8:27) Paulu apangiza pakweca kuti Mulungu wandimomwene ndi wamphambvu kakamwe kupiringana alungu onsene anagumanika m’matemplo akucitwa na anthu.—Iza. 40:18-26.
14. Paulu apangiza tani kuti Mulungu nkhabe kunyindira ciphedzo ca anthu?
14 Mulungu nkhabe kunyindira anthu toera kukhala m’maso. Anthu akuti akhalambira madzimunthu akhabalikisa madzimunthu awo na nguwo zakubalika, akhabweresa miyoni yakudhula peno pyakudya na pyakumwa. Iwo akhanyerezera kuti madzimunthu anewa akhafuna pinthu pyenepi. Mbwenye anthu anango akuti akhapfundzisa ndzeru za anthu Acigerego akuti akhabvesera pikhalonga Paulu panango akhakhulupira kuti mulungu nee akhafuna ciphedzo ca anthu. Khala unoyu ndi undimomwene, iwo panango aphedzera pidalonga Paulu kuti Mulungu “nkhabe funa kuphedzwa na munthu ninga munthu wakusowa cinthu.” Inde, nkhabepo cinthu cakuti Mulungu acisowa! Mbwenye iye asapasa anthu pinthu pinafuna iwo, pinthu pyenepi ndi “umaso, muya na pinthu pyonsene,” kuphatanizambo dzuwa, madzi na mataka adidi toera kulima. (Mabasa 17:25; Gen. 2:7) Natenepa, Mulungu wakuti asatipasa pinthu pyonsene, nee asafuna cinthu kubulukira kuna ife.
15. Paulu alonganji thangwi ya anthu a ku Atena akuti akhaoneka ninga akufunika kakamwe kupiringana anthu akuti nee akhali Agerego? Pontho tisapfundzanji na pidacita Paulu?
15 Mulungu acita anthu. Agerego akakhala ku Atena akhakhulupira kuti iwo akhali akufunika kakamwe kupiringana anthu a madzindza anango. Mbwenye Bhibhlya isatipanga kuti nee tisafunika kudzikuza thangwi ya dzindza yathu peno dziko yathu. (Dheu. 10:17) Paulu alonga undimomwene unoyu mwaluso na mwandzeru. Pidalonga Paulu kuti “kubulukira kwa munthu m’bodzi basi, Mulungu acita anthu a madzindza onsene,” anthu akhali penepo atoma kunyerezera. (Mabasa 17:26) Iye akhalonga pya Adhamu analongwa m’bukhu ya Genesi, wakuti ndi baba wa madzindza onsene. (Gen. 1:26-28) Nakuti anthu onsene ali na baba m’bodzi ene, nkhabepo dzindza peno dziko yakufunika kakamwe kupiringana inango. Onsene akhabvesera pikhalonga Paulu akwanisa kubvesesa mabvekero a pikhalonga Paulu. Pidacita Paulu pisatipfundzisa pinthu pyakufunika kakamwe. Maseze tisafunika kukhala aluso na akulinganira pakumwaza mphangwa, ife nee tisafunika kucinja undimomwene wa Bhibhlya basi ene toera anthu atawire mphangwa zathu.
16. Ndi cipi cifuniro ca Mulungu kuna anthu?
16 Mulungu asafuna kuti anthu akhale dhuzi na iye. Ngakhale ale akhapfundzisa pya filozofiya akuti akhabvesera pikhalonga Paulu kutomera kale akhalongezana kakamwe na anthu toera kulonga kuti thangwi yanji tacitwa, iwo cipo akwanisa kufokotoza mwadidi. Mbwenye Paulu, apangiza pakweca kuti ndi cipi cifuniro ca Mulungu na anthu, pidalonga Paulu kuti anthu asake “Mulungu, aphambasire toera kunsaka mbanʼgumana, thangwi mwandimomwene iye nee ali kutali na mʼbodzi na mʼbodzi wa ife.” (Mabasa 17:27) Pyenepi pikhapangiza kuti mbapidakwanisika kudziwa Mulungu wakuti nee akhadziwika na anthu a ku Atena. Undimomwene ndi wakuti Mulungu nee ali kutali na ale akuti mwandimomwene asafuna kun’gumana na kudziwa pizinji thangwi ya iye. (Mas. 145:18) Mwandimomwene Paulu aphatisira fala yakuti “ife,” toera kupangiza kuti iye akhafunikambo ‘kusaka na kugumana’ Mulungu.
17, 18. Thangwi yanji anthu asafunika kukhala dhuzi na Mulungu, pontho tinapfundzanji na njira idaphedza Paulu anyakubvesera ace?
17 Anthu asafunika kudziwa Mulungu. Thangwi ya Iye, Paulu alonga: “Ife tiri na umaso, tisafamba, pontho tiripo.” Anyakudziwisa anango akale alonga kuti Paulu akhalonga mafala a Epimenides. Iye akhali nyakulonga poema wa ku Kreta adakhala pyaka pizinji nduli wakuti akhali munthu wakufunika m’misambo ikhacitwa ku Atena. Paulu alonga pontho kuti thangwi yanji anthu asafunika kukhala dhuzi na Mulungu: “Ninga mudalongera anyakulemba anu anango kuti: ‘Thangwi ifembo ndife anace.’” (Mabasa 17:28) Anthu asafunika kupibva kuti ali dhuzi na Mulungu thangwi iye akhali baba wa munthu wakutoma adabala anthu onsene ali pa dziko yapantsi. Toera kuphedza anyakubvesera ace, Paulu aphatisira luso mbalonga mafala anagumanika m’mabukhu Acigerego akuti anyakubvesera ace akhaalemedza kakamwe. e Ninga Paulu, midzidzi inango tinakwanisa kuphatisira pang’ono mabukhu akudziko ninga ma enciclopédias, peno mphangwa zinango zakunyindirika za kudziko. Mwacitsandzo, mphangwa zakunyindirika zinafuna ife kugumana m’mabukhu anango akulemedzwa zinakwanisa kuphedza anthu anango akuti nee ndi Mboni za Yahova toera adziwe matomero a misambo na maphwando anango akuti asacitwa m’mauphemberi authambi.
18 Pidalonga iye mpaka mu ndzidzi unoyu, Paulu alonga undimomwene wakufunika kakamwe thangwi ya Mulungu, pontho acinja mafalace mwaluso toera kuphedza anyakubvesera ace. Kodi mpostolo Paulu akhafuna kuti anyakubvesera ace a ku Atena acitenji pakumala kubva mphangwa zace zakufunika? Mwakukhonda dembuka, iye aapanga pikhafunika iwo kucita.
‘Anthu mu Mbuto Zonsene Asafunika Atcunyuke’ (Mabasa 17:29-31)
19, 20. (a) Paulu afokotoza tani kuti nee tisafunika kulambira madzimunthu? (b) Ale akhabvesera Paulu akhafunika kucitanji?
19 Paulu akhali dzololo toera kuphedza anyakubvesera ace acite macinjo. Toera kugomezera pontho mabukhu Acigerego adalonga iye pakutoma, Paulu alonga: “Nakuti ndife ana a Mulungu, nee tisafunika kunyerezera kuti Mulungu unoyu ndi ninga ouro, parata, mwala peno ninga cinthu cidacitwa mwakubverana na udziwisi peno na manyerezero a anthu.” (Mabasa 17:29) Khala Mulungu acita anthu, Iye anakhala tani dzimunthu yakucitwa na anthu? Na mafala anewa, Paulu apangiza kuti kulambira dzimunthu kunacita anthu ndi pinthu pyakusowa ndzeru. (Mas. 115:4-8; Iza. 44:9-20) Pidalonga iye kuti “nee tisafunika,” Paulu akhafuna kuti anyakubvesera ace atawire uphungu udapereka iye.
20 Paulu apangiza pakweca pinthu pyakuti anyakubvesera ace akhafunika kupicita: “Mulungu nee atsalakana midzidzi ineyi ikhacita anthu pinthu mwakukhonda dziwa [iwo nee akhadziwa kuti Mulungu nee akhakomerwa anthu angalambira madzimunthu]; mbwenye cincino iye asapanga anthu onsene, mu mbuto zonsene kuti asafunika atcunyuke.” (Mabasa 17:30) Anyakubvesera ace anango panango aipirwa pidalonga iye kuti iwo akhafunika kutcunyuka. Mbwenye mafala amphambvu adalonga iye apangiza kuti iwo apaswa umaso na Mulungu, pontho mbadatawirira okha mulando thangwi ya njira ikhaphatisira iwo umaso. Iwo akhafunika kusaka Mulungu, kudziwa undimomwene thangwi ya iye na kukhala m’maso mwakubverana na pinafuna Mulungu. Kuna anthu a ku Atena, mafala anewa akhapangiza kuti akhafunika kudziwa kuti kulambira madzimunthu ndi madawo, pontho akhafunika kusiya kucita pyenepi.
21, 22. Ndi mafala api a mphambvu adamalisa kulonga Paulu, pontho mafala anewa asabvekanji kuna ife lero?
21 Pakumalisa Paulu alonga mafala awa amphambvu: “[Mulungu] akhazikisa ntsiku yakuti anadzaphatisira munthu adasankhula iye toera kutonga dziko yonsene yapantsi mwakulungama. Iye apangiza kuna anthu onsene kuti anacitadi pyenepi pidamulamusa iye muli akufa.” (Mabasa 17:31) Ndzidzi unoyu wakuti iwo akhadziwa pya Ntsiku Yakutonga ya Mulungu iri kufika, iwo akhali na mathangwi onsene toera asake, pontho agumane Mulungu wandimomwene! Paulu nee alonga dzina ya Ntongi adasankhulwa. Mbwenye Paulu alonga mafala anewa thangwi ya Ntongi unoyu: Iye akhali munthu wakuti adzaphiwa, pontho alamuswa muli akufa na Mulungu!
22 Mafalace akumalisa ndi akufunika kakamwe kuna ife lero. Tisadziwa kuti Ntongi adasankhulwa na Mulungu ndi Yezu Kristu adalamuswa muli akufa. (Juw. 5:22) Ife tisadziwambo kuti Ntsiku Yakutonga inadzakhala ya pyaka 1000, pontho ntsiku ineyi iri kufendedza mwakucimbiza. (Apok. 20:4, 6) Ife nkhabe kugopa Ntsiku Yakutonga ya Mulungu, thangwi tisadziwa kuti ntsiku ineyi inabweresa nkhombo zizinji kakamwe kuna ale anaoniwa kukhala akukhulupirika. Cidikhiro cathu cakutsandzayisa ca ntsogolo cinakwanisika basi ene thangwi ya cirengo cikulu cidacitika cakuti ndi kulamuswa muli akufa kwa Yezu Kristu!
‘Anango Akhala Anyakupfundza’ (Mabasa 17:32-34)
23. Anthu akhatawira tani mphangwa zikhamwaza Paulu?
23 Anthu atawira mwakusiyana mphangwa zikhalonga Paulu. “Anango atoma kunseka” pidabva iwo pya kulamuswa muli akufa. Anango apangiza makhaliro adidi, mbwenye nee acita cisankhulo ca kutcunyuka mbakhala anyakupfundza. Iwo alonga: “Tinadzakubvesera pontho thangwi ya pyenepi.” (Mabasa 17:32) Anango atawira mwadidi: “Anthu anango atowera Paulu, mbakhala anyakupfundza. Mwa iwo akhalipo Dhioniziyo, wakuti akhali nyakutonga miseru pa thando ya Areopago, nkazi anacemerwa Dhamari na anango.” (Mabasa 17:34) Pyenepi pisacitikambo mu utumiki wathu. Anthu anango panango anatiseka, anango ali na makhaliro adidi mbwenye nee anacita cisankhulo toera kutumikira Yahova. Mbwenye tisakomerwa kakamwe, anango angatawira mphangwa za Umambo mbakhala Akristu.
24. Tisapfundzanji na mafala adalonga Paulu ku Areopago?
24 Tinganyerezera mafala a Paulu, tinakwanisa kupfundza pizinji thangwi yakufokotoza pinthu munjira yakuphata ntima na kuaphedza toera aone kuti pinapfundzisa ife mphyandimomwene. Ife tinapfundzambo kuti tisafunika kukhala akupirira na kulonga mwacilemedzo na anthu adidi anakhulupira pipfundziso pya uphemberi wauthambi. Ife tinakwanisambo kupfundza cinthu cakufunika kakamwe: Cipo tisafunika kusiya kupfundzisa undimomwene wa Bhibhlya basi ene toera kukomeresa anyakubvesera. Natenepa, tingatowezera pidacita mpostolo Paulu, tinadzakhala apfundzisi adidi kakamwe m’basa yathu yakumwaza mphangwa. Kusiyapo pyenepi, akulu a mpingo anakwanisa kukhala apfundzisi adidi kakamwe mu mpingo. Tingacita pyenepi, tinadzakhala akuthema kakamwe toera kuphedza anango ‘toera kusaka Mulungu mban’gumana.’—Mabasa 17:27.
a Onani bokosi yakuti “ Atena Ukhali Nzinda Wakubvekera Kakamwe mu Ndzidzi Wakale.”
b Onani bokosi yakuti “ Nsoka wa Epikureu na wa Estoiko.”
c Areopago ikhali nthunda yakuti ikhali mucisa ca Akropoli, ndi pa mbuto ineyi yakuti atsogoleri a ku Atena akhagumanyikana kazinji kene. Fala yakuti “Areopago” isabveka atongi peno nthunda. Natenepa, anyakudziwisa nee akhadziwa mwandimomwene khala Paulu aendeswa pa nthunda ineyi, peno khala aendeswa pa nsonkhano wa atongi ku mbuto inango, panango pa bazari.
d Fala Yacigerego yakuti isathumburuzwa toera kulonga “kudzulu na dziko yapantsi” ndi koʹsmos. Agerego angaphatisira fala ineyi asafuna kulonga pinthu pinaona ife kudzulu na pa dziko yapantsi. Kazinji kene koʹsmos isaphatisirwa m’Bhibhlya toera kulonga anthu. Panango Paulu toera kukhuya mitima ya anyakubvesera ace Acigerego aphatisira fala ineyi toera kubvekesa mabvekero anewa pa vesi ineyi.
e Paulu alonga khundu ibodzi ya Os Fenômenos yakuti ndi poema inalonga pya astronomiya yakulembwa na Estoiko Arato. Mafala mabodzi ene asagumanika m’mabukhu anango Acigerego, kuphatanizambo mu Hino a Zeus, yakuti yalembwa na Estoiko Kleanto.
