NSOLO 11
‘Akhala Akutsandzaya Mbadzala na Nzimu Wakucena’
Tisapfundzanji na citsandzo ca Paulu pikhakhonda anthu kubvesera mphangwa zadidi zikhamwaza iye
Mphangwa zakubuluswa m’bukhu ya Mabasa 13:1-52
1, 2. Ndi munjira ipi basa ya umisionaryo ya Bharnabhe na Saulo ikhali yakusiyana na amisionaryo anango, pontho basa yawo yakwanirisa tani Mabasa 1:8?
IKHALI ntsiku yakutsandzayisa kakamwe mu mpingo wa Antiyokiya, thangwi mwa aprofeta onsene na apfundzisi onsene a mu mpingo unoyu, adasankhulwa na nzimu wakucena toera kumwaza mphangwa zadidi m’pisa pyakutali akhali Bharnabhe na Saulo. a (Mabasa 13:1, 2) Ndimomwene kuti amuna anango akuthema akhadatumwa kale toera kuenda kamwaza mphangwa zadidi m’pisa pyakutali, mbwenye m’pisa pidatumwa iwo toera kuenda mukhali kale na Akristu. (Mabasa 8:14; 11:22) Mu ndzidzi unoyu, Bharnabhe na Saulo pabodzi na Juwau Marko wakuti akhali mphedzi wawo, mbadatumwa toera aende m’pisa pyakuti anthu akhadzati kubva mphangwa zadidi.
2 Cifupi na pyaka 14 nduli, Yezu akhadapanga atowereri ace: “Munadzakhala amboni anga mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:8) Kutumwa kwa Bharnabhe na Saulo toera kutumikira ninga amisionaryo kwaphedza toera kukwanirisa profesiya ya Yezu! b
Asankhulwa Toera “Kuphata Basa” (Mabasa 13:1-12)
3. Ninji pikhacitisa kuti mu ndzidzi wa apostolo pikhale pyakunentsa kucita maulendo?
3 Lero thangwi yakukhala na makaru na ndeka anthu asakwanisa kucita ulendo mu nsindzo wakulapha mu ndzidzi wakucepa. Mbwenye mu ndzidzi wa apostolo nee kukhali na makaru peno ndeka. Kazinji kene pakucita ulendo iwo akhafamba na miyendo, pontho akhacita pyenepi m’miseu yakuti nee ikhali mwadidi. Anthu akhafamba ntsiku yamumphu m’makilometru 30 na miyendo, nsindzo unoyu ukhanetesa kakamwe! c Natenepa Bharnabhe na Saulo akhadziwa kuti ulendo mbudakhala wakunentsa. Pikhaphemba kuwangisira kakamwe na ndzidzi toera kucita ulendo unoyu, mbwenye iwo akhali dzololo toera kuenda.—Mat. 16:24.
4. (a) Mbani adasankhula Bharnabhe na Saulo, pontho abale anango acitanji? (b) Tinaphedzera tani ale anatawira miyai yakutumikira mu gulu ya Yahova?
4 Mphapo thangwi yanji nzimu wakucena wasankhula basi ene Bharnabhe na Saulo toera “kuphata basa”? (Mabasa 13:2) Bhibhlya nkhabe longa. Pinadziwa ife ndi pyakuti ndi nzimu wakucena udasankhula amuna anewa. Aprofeta na apfundzisi a ku Antiokiya acita pyonsene pikhakwanisa iwo toera kuphedza Bharnabhe na Saulo toera akwanise kucita mwadidi basa yawo. Iwo nee akhacitira bibvu Bharnabhe na Saulo. Nyerezerani cibalangazo cidakhala na Bharnabhe na Saulo mu ndzidzi wakuti abale acita jejuu na phembero pabodzi na iwo, pontho “aasandzikira manja, mbaasiya toera aende.” (Mabasa 13:3) Ife tisafunikambo kucita pyonsene pinakwanisa ife toera kuphedza ale anatambira miyai mu mpingo, kuphatanizambo amuna adakhazikiswa ninga ayang’aniri mu mpingo. Ife nee tisafunika kukhala na bibvu na ale anatambira miyai ineyi, mbwenye tisafunika kupangiza “kukoma ntima kakamwe na ufuni kuna iwo thangwi ya basa yawo.”—1 Ates. 5:13.
5. Fokotozani pinthu pidacitika pakumwaza mphangwa ku Xipre.
5 Pakumala kufamba na miyendo mpaka ku Seleusya, nzinda wakuti ukhatsama mabote dhuzi na Antiyokiya, Bharnabhe na Saulo aenda na bote mpaka ku ntsuwa ya Xipre, wakuti ukhali ulendo wa makilometru cifupi 200. d Bharnabhe wakuti akhali wa ku Xipre, akhali wakutsandzaya kakamwe thangwi yakumwaza mphangwa zadidi kuna anthu a cisa cidakulira iye. Pidafika iwo mu nzinda wa Salamina n’khundu mwa ntsuwa, mwakucimbiza iwo “atoma kumwaza mafala a Mulungu m’masinagoga a Ayuda.” e (Mabasa 13:5) Bharnabhe na Saulo acita ulendo m’makhundu onsene a cisa ca Xipre mbamwaza mphangwa m’mizinda mikulu mu ndzidzi ukhafamba iwo. Pyenepi pisapangiza kuti iwo afamba nsindzo wa makilometru 160!
6, 7. (a) Kodi Serjio Paulu akhali ani, pontho thangwi yanji Bhari-Yezu ayesera kumpingiza kubvesera mphangwa zadidi? (b) Kodi Saulo acitanji kuna Bhari-Yezu?
6 Mu ndzidzi unoyu anthu a ku Xipre akhalambira alungu authambi. Mu ndzidzi udafika Bharnabhe na Saulo ku Pafo, kumadokero a ntsuwa, iwo adzindikira kuti pinthu nee pikhali mwadidi. Iwo agumanikana na “Bhari-Yezu, wakuti akhali ng’anga na mprofeta wauthambi.” Pontho “iye akhali pabodzi na ntongi Serjio Paulu, munthu waudziwisi.” f Mu ndzidzi unoyu, Aroma azinji akulemedzeka na audziwisi ninga Serjio Paulu mbadaphemba ciphedzo ca ng’anga peno ca ale anakhulupira pya nyenyezi toera aaphedze kucita pisankhulo pyakufunika. Mbwenye Serjio Paulu, adzumatirwa na pinthu pya Umambo, pontho “iye akhafuna kakamwe kubva mafala a Mulungu.” Bhari-Yezu wakuti akhadziwikambo na dzina yakuti Elima yakuti isabveka “Ng’anga” nee akomerwa na pidacita Serjio Paulu.—Mabasa 13:6-8.
7 Bhari-Yezu akhaida mphangwa za Umambo. Iye akhadziwa kuti njira ibodzi yakucitisa Serjio Paulu akhale kukhundu yace ndi ‘kupeusa ntongi unoyu toera akhonde kukhulupira Mbuya.’ (Mabasa 13:8) Mbwenye Saulo nee atawirisa kuti Bhari-Yezu apingize Serjio Paulu kubva mphangwa zadidi. Mphapo Saulo acitanji? Bhibhlya isalonga: “Saulo, anacemerwambo Paulu, adzala na nzimu wakucena, iye ayang’ana Elima soo, mbalonga: ‘Iwe munthu wakunyengeza, wakudzala na ntundu onsene wa pinthu pyakuipa, mwana wa Dyabo, iwe nyamalwa wa pinthu pyonsene pyakulungama, unasiya lini kugongonyesa njira zakulungama za Yahova? Bvesera: Djanja ya Yahova iri pana iwe, unadzakhala boliboli, mbukhonda kuona ceza ca dzuwa mu ndzidzi ungasi.’ Penepo pene, iye aona nkhungwi na cidima. Iye atoma kuzungulira, mbasaka munthu toera am’phate nkono.” g Kodi Serjio Paulu acitanji pidamala iye kuona cirengo ceneci? “Ntongi pidaona iye pinthu pidacitika, adzakhala nyakukhulupira, thangwi iye adzumatirwa kakamwe na pipfundziso pya Yahova.”—Mabasa 13:9-12.
Ninga Paulu, ife tisatsidzikiza undimomwene mwacipapo tingatcingwa
8. Tinatowezera tani cipapo ca Paulu lero?
8 Paulu nee akhagopa Bhari-Yezu. Munjira ibodzi ene, apingizi angayesera kufewesa cikhulupiro ca anthu anafuna kutibvesera, ife tinapangiza cipapo mbatitsidzikiza mphangwa zadidi za Umambo. Mbwenye mafala athu asafunika “adzipe ninga akuikhwa munyu.” (Akol. 4:6) Mu ndzidzi ubodzi ene, tisacita pinthu pinakwanisa ife toera kuphedza anthu anafuna kubva mphangwa za Umambo toera apitirize kupfundza pya Yahova, ngakhale anthu anango aipirwe na pyenepi. Ninga Bhari-Yezu, mauphemberi authambi asayesera “kugongonyesa njira zakulungama za Yahova.” Natenepa nee tisafunika kugopa kulonga pinthu pyakuipa pinalonga iwo na pinacita iwo. (Mabasa 13:10) Ninga Paulu, ife tisafunika kulonga undimomwene mwacipapo, kuphedza ale anafuna kudziwa pizinji. Lero Mulungu nee asatipasa mphambvu yakucita pirengo ninga pidacita Paulu, mbwenye ife tiri na cinyindiro consene cakuti Iye anaphatisira nzimu wace toera anthu a mitima yadidi adziwe undimomwene.—Juw. 6:44.
“Mafala Toera Kuwangisa” (Mabasa 13:13-43)
9. Kodi Paulu na Bharnabhe apangiza tani citsandzo cadidi kuna ale anatsogolera mu mpingo lero?
9 Paulu, Bharnabhe na Marko abuluka ku Pafo mbacita ulendo na bote wa nsindzo cifupi na makilometru 250 mpaka ku Perje ku Azya Menori. Buluka penepo, nyakulemba acinja njira yace yakulonga thangwi ya amuna anewa. Pa Mabasa 13:13 pasalonga kuti “Paulu na andzace.” Pyenepi pisapangiza kuti akhatsogolera nsoka unoyu akhali Paulu. Bhibhlya nkhabe longa kuti Bharnabhe akhali na bibvu na Paulu. Mwakusiyana na pyenepi, amuna anewa awiri apitiriza kuphata basa pabodzi toera kukwanirisa cifuniro ca Mulungu. Paulu na Bharnabhe ndi citsandzo cadidi kuna abale akuti ali na miyai yakutumikira mu ntsiku zathu. Ife nee tisafunika kuoneka ninga akufunika kakamwe kupiringana anango, thangwi tisakumbuka mafala a Yezu: “Monsene ndimwe abale.” Iye athimiza: “Munthu anadzikuza anadzacepeswa, mbwenye ule anacepeseka anadzakuzwa.”—Mat. 23:8, 12.
10. Fokotozani ulendo wakubuluka ku Perje mpaka ku Antiyokiya wa ku Pizidhya.
10 Pidafika iwo ku Perje, Juwau Marko asiya Paulu na Bharnabhe mbabwerera ku Yerusalemu. Bhibhlya nkhabe kulonga kuti thangwi yanji iye abuluka mwakucimbiza. Paulu na Bharnabhe apitiriza na ulendo wawo wakubuluka ku Perje kuenda ku Antiyokiya wa ku Pizidhya, wakuti ndi nzinda wa mu provinsya ya Galasya. Unoyu ukhali ulendo wakunentsa thangwi nzinda wa Antiyokiya wa ku Pizidhya ukhagumanika pa mapiri akulapha cifupi na metru 1.100. Toera kufika kweneko iwo akhafunika kukwira mapiri, pontho pyenepi pikhali pyakugopswa thangwi kazinji kene mambava akhabera anthu akhacita maulendo. Kusiyapo pyenepi, pisaoneka kuti Paulu mu ndzidzi unoyu akhali kale na nyatwa ya ungumi. h
11, 12. Pikhalonga Paulu mu sinagoga ku Antiyokiya wa ku Pizidhya, iye acitanji toera anthu apitirize kubvesera mphangwa zace?
11 Ku Antiyokiya wa ku Pizidhya, Paulu na Bharnabhe apita mu sinagoga pa ntsiku ya Sabudu. Bhibhlya isalonga: “Pidamala kulerwi Mwambo na mabukhu a Aprofeta pamaso pa anthu onsene, atsogoleri a sinagoga apanga Paulu na Bharnabhe: ‘Abale, khala muli na mafala toera kuwangisa nawo mbumba iyi, alongeni.’” (Mabasa 13:15) Paulu alamuka toera kulonga.
12 Pakutoma kwene Paulu alonga mafala awa: “Imwe Aizraeli na imwembo anango munagopa Mulungu.” (Mabasa 13:16) Pyenepi pisapangiza kuti iye akhalonga na Ayuda na ale adapita mu uphemberi Waciyuda. Anthu anewa akhadzati kutawira Yezu ninga Mesiya. Mphapo Paulu aaphedza tani? Pakutoma, Paulu alonga pinthu pidacita Yahova kuna dzindza ya Izraeli. Iye afokotoza kuti Yahova ‘akuza tani mbumba ineyi pikhali iyo ninga alendo mu dziko ya Ejitu,’ pontho kuti pidabuluswa iwo mu ubitcu Mulungu ‘apirira tani macitiro awo’ mu pyaka 40. Kusiyapo pyenepi, Paulu afokotozambo kuti Yahova aaphedza tani kukunda mbapita mu Dziko Yakupikirwa, pontho kuti Yahova apereka tani ‘dziko kuna iwo ninga unthaka.’ (Mabasa 13:17-19) Anango asalonga kuti Paulu akhalonga pinthu pyakuti anthu akhadamala kale kupibva mu ndzidzi ukhalerwi Mwambo pa ntsiku ineyi ya Sabudu. Khala unoyu ndi undimomwene, tisakwanisa kubvesesa kuti Paulu akhadziwa “kuphedza anthu a makhaliro onsene.”—1 Akor. 9:22.
13. Tinacitanji toera kukhuya mitima ya anyakubvesera athu?
13 Ninga Paulu, tisafunikambo kulonga munjira yakuti anthu anafuna kutibvesera. Mwacitsandzo, tingadziwa pinakhulupira anyakubvesera athu, tinakwanisa kucedza nawo pinthu pyakuti ndi pyakufunika kuna iwo. Ife tinakwanisa kulonga nawo mavesi a m’Bhibhlya akuti iwo asaadziwa kale. Midzidzi inango mphyadidi kuphemba munthu toera aleri mavesi anewa m’Bhibhlya yace ene. Tisafunika kuphatisira njira zakusiyana-siyana toera tikwanise kucitisa anyakubvesera athu afune kupfundza thangwi ya Yahova.
14. (a) Kodi Paulu atoma tani kulonga mphangwa zadidi thangwi ya Yezu Kristu, pontho iye alonganji toera anthu apitirize kubvesera mphangwa zace? (b) Mwinji wacitanji na pidalonga Paulu?
14 Buluka penepo, Paulu afokotoza kuti amambo a Izraeli akhali anthu a dzindza idabalwa Yezu. Iye afokotozambo kuti Juwau M’batizi akhunganya tani njira toera anthu atawire ‘mpulumusi Yezu.’ Pontho Paulu alonga kuti Yezu aphiwa tani, pontho alamuswa tani muli akufa. (Mabasa 13:20-37) Paulu atoma na mafala awa: ‘Tisafuna mudziwe kuti ife tikumwaza mphangwa kuna imwe zakuti anthu analekererwa madawo basi ene kubulukira mwa Yezu. Munthu anan’khulupira, Mulungu anakwanisa kumuona ninga wakulungama.’ Natenepa Paulu apanga anyakubvesera ace kuti thangwi yanji akhafunika kubvesera mwadidi pikhalonga iye: “Citani mphole-mphole toera pinthu pidalembwa m’Mabukhu a Aprofeta pikhonde kucitika kuna imwe. Iwo alonga: ‘Imwe anthu anapwaza pinthu pinacita ine, imwe munadzapiona mbamudzumatirwa napyo. Penepo imwe munadzafa, thangwi imwe cipo munadzakhulupira pinthu pinacita ine mu ntsiku zanu, maseze munthu akufokotozereni cibodzi na cibodzi.’” Pidamala Paulu kulonga mafala anewa, iye adzumatirwa na pidacita anthu. Bhibhlya isalonga: “Anthu aadembetera toera afokotoze pinthu pyenepi pa Sabudu inafuna kudza.” Pidamala nsonkhano mu sinagoga, “Ayuda azinji na anthu adapita mu uphemberi Waciyuda akuti akhalambira Mulungu, atowera Paulu na Bharnabhe.”—Mabasa 13:38-43.
“Tiri Kuenda Kamwaza Mafala Anewa Kuna Anthu a Madzindza Anango” (Mabasa 13:44-52)
15. Ninji pidacitika pa Sabudu idatowera thangwi ya pidalonga Paulu?
15 Pa Sabudu idatowera, “anthu azinji a mu nzinda” agumanyikana toera kubvesera pikhalonga Paulu. Mbwenye Ayuda anango nee akomerwa, iwo “atoma kupokanya Paulu, mbaxola pinthu pikhalonga iye.” Mwacipapo, iye na Bharnabhe aapanga: “Pikhafunika kuti imwe mukhale anthu akutoma kupangwa mafala a Mulungu. Mbwenye nakuti imwe musaakhonda, mbamupangiza kuti ndimwe akukhonda thema kutambira umaso wakukhonda mala, cincino ife tiri kuenda kamwaza mafala anewa kuna anthu a madzindza anango. Thangwi Yahova atipanga kuti: ‘Ine ndakusankhulani toera mukhale ceza kuna anthu a madzindza anango, toera mumwaze mphangwa zacipulumuso mpaka kunkhomo kwa dziko yapantsi.’”—Mabasa 13:44-47; Iza. 49:6.
“Iwo atoma kutcinga Paulu na Bharnabhe . . . Anyakupfundza akhapitiriza kukhala akutsandzaya kakamwe, mbadzala na nzimu wakucena.”—Mabasa 13:50-52
16. Kodi Paulu na Bharnabhe acitanji pidaabulusa Ayuda kunja kwa nzinda?
16 Ale akuti nee akhali Ayuda akomerwa kakamwe na pikhabva iwo, natenepa “anthu onsene akuti mitima yawo ikhafuna kutawira undimomwene unapasa umaso wakukhonda mala, atoma kukhulupira.” (Mabasa 13:48) Mu ndzidzi wakucepa, anthu azinji mucisa ceneci abva mafala a Yahova. Anthu a madzindza anango akomerwa kakamwe, mbwenye Ayuda nee akomerwa. Paulu na Bharnabhe alonga kuti Ayuda akhali akutoma kubva mphangwa zadidi thangwi ya Mesiya, mbwenye iwo ankhonda. Na thangwi ineyi, Mulungu nee mbadatawirabve ulambiri wawo. Ayuda akulumiza akazi akubvekera na amuna akulemedzwa a mu nzinda toera asandukire Paulu na Bharnabhe, natenepa iwo “atoma kutcinga Paulu na Bharnabhe, mbaathamangisa mucisa cawo.” Kodi Paulu na Bharnabhe acitanji? Iwo “agubudza pfumbi ya manyalo awo, mbaenda ku Ikoniyo.” Kodi pyenepi pikhabveka kuti ku Antiyokiya wa ku Pizidhya nee mbakudaoneka Akristu? Nee pang’ono pene! Anyakupfundza adasala “akhapitiriza kukhala akutsandzaya kakamwe, mbadzala na nzimu wakucena.”—Mabasa 13:50-52.
17-19. Tinatowezera tani pinthu pidacita Paulu na Bharnabhe, pontho pyenepi pinatiphedza tani toera tipitirize kukhala akutsandzaya?
17 Tinakwanisa kupfundza pizinji na pidacita anyakupfundza anewa akuti apitiriza kukhala akutsandzaya maseze akhatcingwa. Ife nee tinasiya kumwaza mphangwa, maseze anthu apidzo ayesere kutikhondesa kupanga anango thangwi ya Umambo wa Mulungu. Tinakwanisambo kupfundza na pinthu pidacitika mu ndzidzi wakuti anthu a mu nzinda wa Antiyokiya wa ku Pizidhya athamangisa Paulu na Bharnabhe toera abuluke mu nzinda. Iwo “agubudza pfumbi ya manyalo awo.” Iwo nee acita pyenepi thangwi yakuipirwa na anthu akakhala mu nzinda unoyu. Mbwenye pidacita iwo pikhapangiza kuti Paulu na Bharnabhe acita pinthu pidaaphemba Yahova toera kucita kucitira anthu anewa, pontho Paulu na Bharnabhe nee akhalibve na mulando ku pinthu pikhafuna kucitikira anthu anewa. Iwo akhadziwa kuti nee mbadafunika kukakamiza anthu toera kukhulupira Yezu. Cinthu cibodzi cakuti iwo mbadakwanisa kucita basi ene cikhali kupitiriza kumwaza mphangwa zadidi. Ndi pyenepi pidacitisa iwo kuenda ku Ikoniyo!
18 Natenepa anyakupfundza apswa a ku Antiyokiya asala okha mwakusowa ciphedzo ca Paulu na Bharnabhe. Iwo mbadakhala na anthu akuti akhaatcinga. Mbwenye kutsandzaya kwawo nee kukhali thangwi yakunjipa kwa anthu adatawira undimomwene. Yezu alonga: “Anyakutsandzaya ndi ale anabva mafala a Mulungu mbaaphatisira!” (Luka 11:28) Natenepa anyakupfundza a ku Antiyokiya wa ku Pizidhya akhali akutonga toera apitirize kubvera ntemo wa Yezu.
19 Ninga Paulu na Bharnabhe, ife tisadziwa kuti basa yathu ndi kupitiriza kumwaza mphangwa zadidi. Anthu anamwazira ife mphangwa ndiwo anafuna kusankhula khala anatawira kubva mphangwa zathu peno nkhabe. Iwo angakhonda kubva mphangwa zathu, tinakwanisa kutowezera pidacita Akristu a mu ndzidzi wa apostolo. Maseze tingatcingwa, ife tinakwanisa kupitiriza kukhala akutsandzaya tinganyerezera kufunika kwa mphangwa zadidi na kutawirisa kuti Mulungu atitsogolere na nzimu wace wakucena.—Agal. 5:18, 22.
a Onani bokosi yakuti “ Bharnabhe—‘Mwana Wacibalangazo.’”
b Mu ndzidzi unoyu basa yakumwaza mphangwa ikhadafika m’mbuto zakutali, pontho mipingo ipswa ikhadakhazikiswa m’mbuto zenezi zakutali. Mwacitsandzo, mpingo ubodzi ukhali ku Antiyokiya wa ku Sirya, nsindzo wa makilometru 550 ku norti kwa Yerusalemu.
c Onani bokosi yakuti “ Kucita Maulendo mu Ndzidzi wa Apostolo.”
d Mu ndzidzi unoyu, makhaliro akudambo angakhala mwadidi, iwo mbadakwanisa kucita ulendo na bote m’makilometru 160. Mbwenye kudambo kungakhonda kukhala mwadidi, ulendo wawo ukhakwata ndzidzi uzinji kakamwe.
e Onani bokosi yakuti “ Masinagoga a Ayuda.”
f Xipre akhatongwa m’manja mwa Roma wakuti asankhula governadhori toera atongembo ntsuwa ineyi.
g Kutomera mu ndzidzi unoyu kuenda kutsogolo, Saulo akhadziwika na dzina yakuti Paulu. Anthu anango asalonga kuti iye akwata dzina Yaciroma toera kulemedza Serjio Paulu. Mbwenye Paulu apitiriza kuphatisira dzina ineyi pidabuluka iye mu Xipre. Pyenepi pisapangiza kuti iye nee aphatisira dzina ineyi toera kulemedza Serjio Paulu. Iye asankhula kuphatisira dzinace Yaciroma thangwi iye atumwa toera akhale ‘mpostolo kuna anthu a madzindza anango.’ Iye panango aphatisirambo dzina yakuti Paulu thangwi dzinace Yacihebheri yakuti Saulo ikhali ninga fala Yacigerego yakuti ikhali na mabvekero akuipa.—Aroma 11:13.
h Tsamba idatumiza Paulu kuna Agalata yalembwa pakupita pyaka pizinji. Mu tsamba ineyi, Paulu alonga: “Ine ndakwanisa kukumwazirani mphangwa zadidi paulendo wakutoma thangwi ya utenda wanga.”—Agal. 4:13.
