M’mwazi Mphangwa Wakufunika:

Nyerezerani kuti ndimwe m’bodzi wa apostolo ali pa Phiri ya Milivera. Yezu aonekera pana imwe. Mbwenye mbadzati kuenda kudzulu iye alonga: “Munadzatambira mphambvu, penepo munadzakhala amboni anga mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:8) Kodi imwe mbamudacitanji?

Panango imwe mbamudadzudzumika khala Yezu akupangani toera kucita basa ineyi ikulu. Panango munabvundzika: ‘Pinakwanisika tani kuti ife anthu akucepa lero timwaze mphangwa “mpaka kunkhomo kwa dziko yapantsi”?’ Panango musakumbuka cenjezo idapereka Yezu pa masiku a ntsiku ikhafuna kuphiwa iye: “Bitcu nee ndi nkulu kupiringana mbuyace. Khala iwo anditcinga, iwo anadzakutcinganimbo; khala iwo abvera mafala anga, anadzabverambo mafala anu. Mbwenye iwo anadzakucitirani pinthu pyenepi pyonsene thangwi ya dzina yanga, thangwi iwo nkhabe kundziwa Ule adandituma.” (Juw. 15:20, 21) Munganyerezera mafala anewa, panango munabvundzika: ‘Ndinakwanisa tani kupereka umboni wakukwana ndingatcingwa?’

Lero tiri m’makhaliro mabodzi ene. Ninga Mboni za Yahova, ife tisafunika kumwaza mphangwa “mpaka kunkhomo kwa dziko yapantsi,” kuna “anthu a madzindza onsene.” (Mat. 28:19, 20) Tinacita tani basa ineyi mu ndzidzi unatcingwa ife?

Bukhu ya Mabasa a Apostolo iri na mphangwa zinapangiza kuti Yahova aphedza tani apostolo na Akristu anango a mu ndzidzi wawo toera akwanise kucita basa yakumwaza mphangwa. Bukhu ino inaleri imwe inadzakuphedzani toera kudziwa pinthu pizinji pidacitika kuna Akristu anewa, pontho munaona kuti iwo atsandzaya kakamwe thangwi yakuthambaruka mwakucimbiza kwa basa yakumwaza mphangwa. Imwe munadzumatirwa kakamwe mungaona kulandana kwa basa idacita Akristu a mu ndzidzi wakale na a mu ndzidzi wathu. Imwe munaonambo kuti pidalandana nee ndi basa inacita ife basi, mbwenye njira ikhamwaza iwo mphangwa yalandanambo na yathu. Munganyerezera mwadidi mphangwa zenezi, munadzakhala na cinyindiro consene cakuti Yahova Mulungu akupitiriza kutsogolera gulu yace pa dziko yapantsi.

Ife tisadikhira, pontho tisacita phembero toera mu ndzidzi unapfundza imwe bukhu ya Mabasa muwangise cinyindiro canu cakuti Yahova anadzakuphedzani, pontho iye anadzaphatisira nzimu wace wakucena toera kukupasani mphambvu toera kupirira pakutcingwa. Mungaphatisira pinafuna kupfundza imwe m’bukhu ino, munadzawangiswa toera kupitiriza ‘kupereka umboni wakukwana’ thangwi ya Umambo wa Mulungu na kuphedzambo anango toera adziwe Yahova mbakhala na cidikhiro cakukhala na umaso kwenda na kwenda.—Mabasa 28:23; 1 Tim. 4:16.