NSOLO 4
“Anthu Ene Pyawo Akuti Nee Apfundza”
Apostolo acita pinthu mwacipapo, natenepa Yahova aapasa nkhombo
Mphangwa zakubuluswa m’bukhu ya Mabasa 3:1–5:11
1, 2. Ndi cirengo cipi cidacita Pedhru na Juwau dhuzi na nsuwo wa Yerusalemu?
NAMAULO dzuwa ikhapangiza ceza pana mwinji. Ayuda aphinga na anyakupfundza a Kristu apita mu templo. “Ndzidzi wakucita phembero” ukhadasala pang’ono toera ukwane. a (Mabasa 2:46; 3:1) Pakati pa mwinji, Pedhru na Juwau aenda kukhundu ya nsuwo wa templo unacemerwa Wakubalika. Mu ndzidzi wakuti anthu akhacedza, pontho mu ndzidzi wakuti dzumbi yakufamba kwa anthu ikhabveka, kwabvekambo fala ya munthu wakugwesera wakuti abalwa wakulamala. Iye akhaphemba-phemba pinthu.—Mabasa 3:2; 4:22.
2 Mu ndzidzi wakuti Pedhru na Juwau akhafendedzera dhuzi, nyakuphemba-phemba unoyu aphatisira mafala mabodzi ene toera kuaphemba kobiri. Pedhru na Juwau alimira, mbacitisa munthu unoyu kunyerezera kuti mbadapaswa cinthu. Pedhru alonga: “Ine nkhabe parata nee ouro, mbwenye ndinakupasa ciri na ine. Mu dzina ya Yezu Kristu wa ku Nazareti, ine ndinakupanga kuti, lamuka ufambe!” Nyerezerani kudzumatirwa kudakhala na mwinji pidaona iwo Pedhru mbaphata djanja ya mamuna unoyu wakulamala, mbakwanisa kukhala dzololo peno wakulimira paulendo wakutoma mu umaso wace! (Mabasa 3:6, 7) Nyerezerani kutsandzaya kudakhala na mamuna unoyu pidaona iye kuti awangiswa, pontho kuti akutoma kufamba ekhene na miyendo yace! Mwakukhonda penula, iye atoma kunumpha-numpha mbasimba Mulungu mwakugaluza kakamwe!
3. Ndi muoni upi wakupambulika udatambira mwinji pabodzi na munthu adalamala?
3 Thangwi yakudzumatirwa na cirengo ceneci, mwinji wathamanga mbuenda pana Pedhru na Juwau pa khonde ya Salomoni. Mbuto ineyi ikhali ibodzi ene ikhapfundzisa Yezu, Pedhru apanga mwinji mabvekero andimomwene a cirengo cikhadamala iye kucita. (Juw. 10:23) Iye apasa mwinji na mamuna wakuti akhadamala kwene kuwangiswa muoni wakufunika kakamwe kupiringana parata peno ouro. Muoni unoyu ukhali ukulu kakamwe kupiringana kukhala na ungumi wadidi. Muoni unoyu ukhali mwai wakutcunyuka, wa kulekererwa madawo awo na wakukhala anyakupfundza a ule “Anatsogolera Anthu ku umaso” adasankhulwa na Yahova wakuti ndi Yezu Kristu.—Mabasa 3:15.
4. (a) Kodi kuwangiswa kudacitwa nyakulamala kwatomesa uviyaviya upi? (b) Ndi mibvundzo ipi miwiri yakuti tinaitawira?
4 Ikhali ntsiku yakutsandzayisa! Munthu awangiswa, mbakwanisa kufamba. Anthu anango azinji apaswa mwai wakuwangiswa mwauzimu toera akwanise kucita pinthu mwakubverana na cifuniro ca Mulungu. (Akol. 1:9, 10) Kusiyapo pyenepi, pinthu pidacitika pa ntsiku ineyi pyacitisa kuti atowereri akukhulupirika a Kristu akhonde kubverana na anthu a cidzo akuti mbadayesera kuapingiza toera acimwane kubvera ntemo wa Yezu wakumwaza mphangwa za Umambo. (Mabasa 1:8) Tisapfundzanji na njira idaphatisira Pedhru na Juwau akuti akhali “anthu ene pyawo akuti nee apfundza” toera akwanise kupereka umboni kuna mwinji? b (Mabasa 4:13) Pontho tinapangiza tani cipapo ninga cidapangiza Pedhru, Juwau na anyakupfundza anango mu ndzidzi ukhatcingwa iwo?
Nee “Tamuwangisa na Mphambvu Zathu” (Mabasa 3:11-26)
5. Tisapfundzanji na njira idalonga Pedhru kuna mwinji?
5 Pedhru na Juwau akhala dzololo pakati pa mbumba, pontho iwo akhadziwa kuti panango anango mwa anthu akhali penepo akhadaphemba toera Yezu aphiwe mu ntsiku zingasi nduli. (Marko 15:8-15; Mabasa 3:13-15) Nyerezerani cipapo cidakhala na Pedhru pidalonga iye kuti mamuna wakulamala akhadawangiswa mu dzina ya Yezu. Pedhru nee abisa undimomwene. Iye alonga mwacipapo mulando ukhali na anango pakati pa mwinji thangwi yakuphedzera kwawo kuphiwa kwa Kristu. Mbwenye Pedhru nee akhali wakuipirwa kakamwe na anthu anewa, thangwi iwo ‘akhadacita pyenepi thangwi yakukhonda dziwa.’ (Mabasa 3:17) Iye alonga nawo ninga abale mbaikha manyerezero ace ku mphangwa zadidi za Umambo. Iwo mbadatcunyuka mbapangiza cikhulupiro kuna Kristu, mbadatambira “midzidzi yacibalangazo” yakubuluka kuna Yahova. (Mabasa 3:19) Munjira ibodzi ene, tisafunika kukhala acipapo pakumwaza mphangwa zakutonga kwa Mulungu kunafuna kucita iye ntsogolo. Mu ndzidzi ubodzi ene, nee tisafunika kulonga mwaukali, mwanthonga peno kusandika anthu. Mbwenye ale anamwazira ife mphangwa zadidi tisafunika kuaona ninga abale, pontho ninga Pedhru, ife tisaikha manyerezero athu ku mphangwa zadidi za Umambo.
6. Pedhru na Juwau apangiza tani kucepeseka?
6 Apostolo anewa akhali anthu akucepeseka. Iwo nee apasika mbiri thangwi ya cirengo cidacita iwo. Pedhru apanga mwinji: “Thangwi yanji musatiyangʼana ninga kuti tamuwangisa na mphambvu zathu peno thangwi yakutumikira kwathu Mulungu?” (Mabasa 3:12) Pedhru na apostolo anango akhadziwa kuti pinthu pyadidi pikhacita iwo mu utumiki pikhakwanisika basi ene na mphambvu za Mulungu, tayu na mphambvu zawo. Na thangwi ineyi, mwakucepeseka iwo apereka mbiri yonsene kuna Yahova na Yezu thangwi ya pidacita iwo.
7, 8. (a) Ndi muoni upi wakuti tinakwanisa kupasa anthu? (b) Kodi pikiro ‘ya ‘kusasanyira papswa pinthu pyonsene’ ikukwanirisika tani lero?
7 Ife tisafunikambo kukhala akucepeseka pakucita basa yakumwaza mphangwa za Umambo. Ndimomwene kuti lero nzimu wa Mulungu nkhabe kupasa Akristu mphambvu zakuwangisa anthu mwacirengo. Ngakhale tenepo, tinakwanisa kuphedza anthu toera akulise cikhulupiro kuna Mulungu na Kristu mbatambirambo muoni ubodzi ene udapereka Pedhru kuna mwinji wakukhala na mwai wa kulekererwa madawo awo na kupaswa cibalangazo na Yahova. Pyaka pyonsene, pikwi pizinji pya anthu asatawira muoni unoyu mbakhala anyakupfundza a Kristu.
8 Mwakukhonda penula, ife tikukhala mu ndzidzi wakuti Pedhru aucemera “ndzidzi wakusasanyira papswa pinthu pyonsene.” Toera kukwanirisa mafala adalonga “Mulungu kubulukira mwa aprofeta ace akukhulupirika akale,” Umambo wa Mulungu wakhazikiswa kudzulu mu caka 1914. (Mabasa 3:21; Mas. 110:1-3; Dhan. 4:16, 17) Pakupita ndzidzi ungasi, Kristu aphedza anyakupfundzace toera kusasanyira papswa ulambiri wandimomwene pa dziko yapantsi. Pyenepi pyacitisa kuti anthu azinji acite khundu ya paraizu yauzimu, mbacita khundu ya anthu anafuna kudzatongwa na Umambo wa Mulungu. Iwo adula uunthu wakale na wakupswipisika wa dziko ‘mbabvala uunthu upswa udacitwa mwakubverana na cifuno ca Mulungu.’ (Aef. 4:22-24) Sawasawa na kuwangiswa kwa mamuna ule wakulamala, basa yakutsandzayisa yakumwaza mphangwa nee isacitwa na mphambvu za anthu, mbwenye isacitwa na ciphedzo ca nzimu wa Mulungu. Ninga Pedhru, mwacipapo tisafunika kuphatisira mwadidi Mafala a Mulungu toera kupfundzisa anango. Tingakwanisa kuphedza anthu kukhala anyakupfundza a Kristu nee tisafunika kuona kuti tacita pyenepi na mphambvu zathu, mbwenye tisafunika kudziwa kuti basi ene pyakwanisika na mphambvu za Mulungu.
“Ife Nee Tinasiya Kulonga” (Mabasa 4:1-22)
9-11. (a) Ndi mabvero api adakhala na atsogoleri Aciyuda pidabva iwo mphangwa zikhamwaza Pedhru na Juwau? (b) Kodi apostolo akhali dzololo toera kucitanji?
9 Nkhani idacita Pedhru na kuwangiswa kwa mamuna wakulamala adanumpha mbakhuwa mwakutsandzaya pyacitisa anthu azinji kudzumatirwa. Natenepa nyakuonera templo adakhazikiswa toera kuonera mbuto ya pa templo pabodzi na akulu a anyantsembe ayesera kufufudza toera kudziwa pyenepi mwakucimbiza. Panango amuna anewa akhali Asadhuki akuti akhali a nsoka ubodzi wa uphemberi wakuti ukhali wakupfuma, pontho ukhali na cidzo kakamwe kukhundu ya ndale akuti akhawangisira toera akhale pa ntendere na Aroma. Iwo nee akhatawirambo miyambo yakulemedzwa kakamwe na Afarisi, pontho akhapwaza cikhulupiro cakulamuswa kwa anthu muli akufa. c Nyerezerani kuipirwa kudakhala na iwo pidagumana iwo Pedhru na Juwau mu templo mbapfundzisa anthu mwacipapo kuti Yezu alamuswa muli akufa!
10 Anyakutcinga aipirwa mbaikhisa Pedhru na Juwau nkaidi, pontho mangwana mwace aaendesa ku Thando Yakutongera Miseru ya Ciyuda mwakuakakamiza. Atongi anewa akuipa akhaona Pedhru na Juwau ninga “anthu ene pyawo akuti nee apfundza,” pontho akuti nee akhali na ufulu wakupfundzisa mu templo. Iwo nee akhadapfundza maxikola akudziwika a uphemberi. Mbwenye cipapo cawo na cinyindiro cikhali na iwo pyadzumatirisa kakamwe anyakutonga pa Thando Yakutongera Miseru. Ninji pidaphedza Pedhru na Juwau toera kulonga mwadidi? Thangwi ibodzi ndi yakuti iwo “akhali pabodzi na Yezu.” (Mabasa 4:13) Mpfundzisi wawo akhadaapfundzisa mwadidi kakamwe mwakusiyana na pikhacita apfundzisi a mwambo.—Mat. 7:28, 29.
11 Thando Yakutongera Miseru yatonga kuti apostolo akhafunika kusiya basa yawo yakumwaza mphangwa. Mu ndzidzi unoyu, ntemo wakukhazikiswa pa thando ukhalemedzwa kakamwe thangwi m’masumana mangasi basi nduli, pa ntsiku idaendeswa Yezu pa thando ineyi, anyakutonga miseru alonga: “Iye athema kuphiwa.” (Mat. 26:59-66) Ngakhale tenepo, Pedhru na Juwau nee agopa. Patsogolo pa amuna anewa akupfuma, akupfundza mwadidi, pontho a cidzo kakamwe, Pedhru na Juwau aapanga mwakukhonda gopa na mwacilemedzo: “Longani ndimwe khala mphyakuthema pamaso pa Mulungu kubvera imwe mbatikhonda kubvera Mulungu. Mbwenye ife nee tinasiya kulonga pinthu pidaona ife na pidabva ife.”—Mabasa 4:19, 20.
12. Ninji pinafuna kutiphedza toera kukulisa cipapo na cinyindiro?
12 Kodi imwe munakwanisambo kupangiza cipapo ceneci? Ndi mabvero api anakhala na imwe mungakhala na mwai wakupereka umboni kuna anthu akupfuma, akupfundza mwadidi, pontho a mphambvu kakamwe a ncisa canu? Munacitanji m’baleanu, ndzanu wa kuxikola peno wakubasa angakusingirirani thangwi ya pinakhulupira imwe? Kodi imwe munagopa? Khala munagopa, dziwani kuti munakwanisa kumalisa mabvero anewa. Pikhali Yezu pa dziko yapantsi, iye apfundzisa apostolo ace kuti anatsidzikiza tani pikhulupiro pyawo mwacinyindiro na mwacilemedzo. (Mat. 10:11-18) Pidalamuswa iye muli akufa, Yezu apikira kuna anyakupfundzace kuti mbadapitiriza kukhala na iwo “ntsiku zonsene mpaka kumala kwa makhaliro a dziko.” (Mat. 28:20) Yezu asatsogolera “m’bandazi wakukhulupirika na wandzeru” toera kutipfundzisa kuti tinatsidzikiza tani pinthu pinakhulupira ife. (Mat. 24:45-47; 1 Ped. 3:15) Tisatambira cipfundziso ceneci pa misonkhano ya mpingo ninga nsonkhano wa Umaso Wathu Wacikristu na Utumiki na mabukhu akubuluswa m’Bhibhlya ninga misolo inagumanika mu saiti jw.org pa khundu yakuti “Kutawirwa Kwa Mibvundzo ya Bhibhlya.” Kodi imwe musaphatisira mwadidi masasanyiro anewa? Mungacita pyenepi, cipapo na cinyindiro canu cinathimizirika. Pontho, ninga apostolo cipo munatawirisa nee cinthu cibodzi cikupingizeni kulonga pya undimomwene wauzimu wakudzumatirisa ‘udaona imwe na udabva imwe.’
Lekani kutawirisa nee cinthu cibodzi cikucimwaniseni kulonga undimomwene wakutsandzayisa udapfundza imwe
“Onsene Aphembera . . . Kuna Mulungu” (Mabasa 4:23-31)
13, 14. Tisafunika kucitanji tingatcingwa, pontho thangwi yanji?
13 Mwakukhonda dembuka pidabuluswa iwo nkaidi, Pedhru na Juwau agumanyikana na abale anango a mu mpingo. Onsene “aphembera . . . kuna Mulungu,” mbamphemba toera akhale na cipapo toera kupitiriza kumwaza mphangwa. (Mabasa 4:24) Pedhru akhadziwa mwadidi kuti tingafuna kucita cifuno ca Mulungu nee tisafunika kunyindira basi ene mphambvu zathu. Masumana mangasi nduli, iye akhadalonga mwacinyindiro kuna Yezu: “Ngakhale kuti onsene akuthaweni, ine cipo ndinadzakuthawani!” Mbwenye ninga pikhadalonga Yezu, mwakukhonda dembuka Pedhru agopa anthu mbakhonda xamwali wace na mpfundzisi wace. Natenepa Pedhru apfundza na madodo ace.—Mat. 26:33, 34, 69-75.
14 Toera kukhala mboni wa Yezu imwe musafunika kucita pizinji kupiringana kukhala na cifuno basi. Anyakutcinga angayesera kufudza cikhulupiro canu, peno angayesera kukupingizani kumwaza mphangwa, towezerani citsandzo ca Pedhru na Juwau. Citani phembero kuna Yahova toera akupaseni mphambvu, pontho sakani ciphedzo mu mpingo. Pangani akulu a mpingo na Akristu anango akukola mwauzimu nyatwa zinatamba imwe. Maphembero anacita abale athu anatipasa mphambvu toera kupirira nyatwa.—Aef. 6:18; Tiya. 5:16.
15. Thangwi yanji ale akuti akhadasiya pang’ono kumwaza mphangwa nkhabe funika kutsukwala?
15 Khala ndzidzi unango mwagopa mbamusiya kumwaza mphangwa, lekani kutsukwala. Kumbukani kuti apostolo onsene akhadasiyambo kumwaza mphangwa ndzidzi ungasi pidamala kwene Yezu kuphiwa, mbwenye mwakukhonda dembuka adzatoma pontho kumwaza mphangwa mwaphinga. (Mat. 26:56; 28:10, 16-20) M’mbuto mwakutawirisa kuti madodo adacita imwe kale akutsukwaliseni, kodi imwe munakwanisa kupfundza na madodo anu mbamuphatisira pidapfundza imwe toera kuwangisa anango?
16, 17. Tisapfundzanji na phembero idacitwa na atowereri a Kristu mu Yerusalemu?
16 Tisafunika kulonganji m’maphembero athu mautongi angatitcinga? Onani kuti anyakupfundza a Yezu nee aphemba toera akhonde kugumana pinentso. Iwo akhadziwa mwadidi cenjezo idapereka Yezu: “Khala iwo anditcinga, iwo anadzakutcinganimbo.” (Juw. 15:20) M’mbuto mwace, anyakupfundza anewa akukhulupirika aphemba Yahova toera ‘aone’ kuthabuswa kunacitwa iwo na anyakutcinga. (Mabasa 4:29) Anyakupfundza akhadziwa kuti cifuniro ca Mulungu cikhali cakufunika kakamwe. Iwo akhadziwa kuti pikhatcingwa iwo, pikhakwanirisa profesiya. Iwo akhadziwa kuti, nakuti Yezu akhadaapfundzisa kucita phembero, cifuniro ca Mulungu mbicidacitwa ‘pa dziko yapantsi’ mwakukhonda tsalakana pinthu pinafuna kulonga atongi a dziko.—Mat. 6:9, 10.
17 Toera kucita cifuniro ca Mulungu, anyakupfundza acita phembero kuna Yahova: “Phedzani atumiki anu toera apitirize kulonga mafalanu na cipapo consene.” Ndi ntawiro upi udapereka Yahova? Mwakukhonda dembuka “mbuto idagumanyikana iwo yatekenyeka, penepo onsene adzala na nzimu wakucena, mbatoma kulonga mafala a Mulungu mwacipapo.” (Mabasa 4:29-31) Nkhabepo cinthu cakuti cinakwanisa kupingiza toera cifuniro ca Mulungu cikhonde kucitika. (Iza. 55:11) Ngakhale mitcingo ikhale mikulu, peno nyamalwa akhale wamphambvu kakamwe, ife tingacita phembero kuna Mulungu wathu, tinakwanisa kukhala na cinyindiro cakuti iye anadzatipasa mphambvu toera tipitirize kumwaza mphangwa mwacipapo.
“Nee Wanyengeza Anthu, Mbwenye Wanyengeza Mulungu” (Mabasa 4:32–5:11)
18. Kodi Akristu a mu mpingo wa Yerusalemu akhacitanji kuna unango na ndzace?
18 Mpingo upswa udakhazikiswa mu Yerusalemu ukhali na anthu akupiringana 5.000. d Ngakhale kuti anyakupfundza abuluka m’mbuto zakusiyana-siyana, mbwenye iwo akhali na “ntima ubodzi ene.” Iwo akhali akuphatana na a manyerezero mabodzi ene. (Mabasa 4:32; 1 Akor. 1:10) Anyakupfundza akhacita pizinji kupiringana basi ene kuphemba Yahova toera apase nkhombo kuwangisira kwawo. Iwo akhawangisana mwacikhulupiro unango na ndzace, pontho akhapasana pinthu pingafunika. (1 Juw. 3:16-18) Mwacitsandzo, nyakupfundza Zuze wakuti apostolo akhancemera Bharnabhe, agulisa khundu ibodzi ya munda wace mbapereka kobiri ineyi na ntima onsene toera kuphedza anthu adabuluka kutali. Natenepa iwo mbadakwanisa kukhala mu ndzidzi uzinji mu Yerusalemu toera kupfundza pizinji thangwi ya cikhulupiro cawo cipswa.
19. Thangwi yanji Yahova apha Ananiya na Safira?
19 Banja ya Ananiya na Safira yagulisambo munda mbicita cakupereka. Ananiya na Safira alonga kuti apereka kobiri yonsene; mbwenye iwo ‘abisa ncibisobiso kobiri inango.’ (Mabasa 5:2) Yahova apha banja ineyi, iye acita pyenepi tayu thangwi kobiri idapereka iwo ndi yakucepa, mbwenye aapha thangwi cifuno cawo cakupasa cikhali cakuipa, pontho iwo akhali anyauthambi. Iwo ‘nee anyengeza anthu, mbwenye anyengeza Mulungu.’ (Mabasa 5:4) Sawasawa na ampfakafaka adasandika Yezu, Ananiya na Safira akhadzudzumika kakamwe na kusaka mbiri ya anthu, mbuto mwakukhala akutawirika kuna Mulungu.—Mat. 6:1-3.
20. Tisapfundzanji thangwi ya pinthu pinapasa ife Yahova?
20 Sawasawa ninga anyakupfundza akukhulupirika akuti akhapasa mwakudzala manja mu ndzidzi wa apostolo, pikwi na pikwi pya Mboni za Yahova asaphedzera basa yakumwaza mphangwa pa dziko yonsene yapantsi na pyakupereka pyawo mwakufuna. Nee m’bodzi wakuti asakakamizwa toera kuphatisira ndzidzi peno kobiri yace toera kuphedzera basa ineyi. Mwandimomwene, Yahova nkhabe funa kuti tintumikire mwakukhonda kufuna kwathu peno mwakukakamizwa. (2 Akor. 9:7) Tingapasa Yahova pinthu, iye nee asakomerwa na kunjipa kwa pinthu pyenepi, mbwenye asakomerwa na cinaticitisa kumpasa. (Marko 12:41-44) Ife nkhabe funika kukhala ninga Ananiya na Safira, kutumikira Mulungu toera tikhale akubvekera peno toera anango atipase mbiri. Mbwenye ninga Pedhru, Juwau na Bharnabhe tisafuna kuti kutumikira kwathu Yahova ndzidzi onsene kukulumizwe na ufuni wandimomwene kuna iye na kuna anthu andzathu.—Mat. 22:37-40.
a Maphembero akhacitwa mu templo pabodzi na ntsembe zikhaperekwa mu ndzidzi wakumacibese na wakumaulo. Ntsembe zikhaperekwa namaulo zikhacitwa mu “ndzidzi utatu wakumaulo.”
b Onani bokosi yakuti “ Pedhru Wakuti Akhali Nyakusodza Nyama za m’Madzi Adzakhala Mpostolo Waphinga,” na bokosi yakuti “ Juwau Akhali Nyakupfundza Wakuti Akhafuniwa na Yezu.”
c Onani bokosi yakuti “ Nyantsembe Wankulu na Akulu a Anyantsembe.”
d Mu caka 33 P.K.K., panango mu Yerusalemu mukhali na Afarisi akukwana 6.000, pontho Asadhuki akhali akucepa kakamwe. Panango ineyi ikhali thangwi inango idacitisa misoka ineyi miwiri kuona kuti akhapingizwa kakamwe na pipfundziso pya Yezu.
