Mambo unango wa Bhabhilonya akhali Dhariyo wa ku Medhi. Dhariyo aona kuti Dhanyeli akhali munthu wakupambulika. Iye aikha Dhanyeli ninga nkulu wa amuna onsene akhaphatira mambo. Amuna anewa akhala na ntcanje na Dhanyeli mbafuna kumupha. Iwo akhadziwa kuti Dhanyeli akhaphembera kuna Yahova katatu pa ntsiku. Natenepa, iwo aenda kalonga na Dhariyo: ‘Mambo, khazikisani mwambo wakuti anthu onsene asafunika phembera kuna imwe basi. Munthu onsene anakhonda kubvera mwambo anadzaponywa mu djenje ya nkhalamu.’ Dhariyo akomerwa na maonero anewa, mbakhazikisa mwambo unoyu.

Mudabva Dhanyeli kukhazikiswa kwa mwambo upswa, iye aenda kunyumba kwace. Iye agodama kutsogolo kwa janela yakufunguka mbaphembera kuna Yahova. Amuna akuipa apita n’nyumba yace mban’gumana akucita phembero. Mwakucimbiza iwo aenda kapanga Dhariyo: ‘Dhanyeli nee asakubverani. Iye asaphembera kuna Mulungu wace katatu pa ntsiku.’ Dhariyo akhafuna Dhanyeli, pontho nee akhafuna kuti aphiwe. Ntsiku ineyi yonsene Dhariyo akhanyerezera kuti anapulumusa tani Dhanyeli. Mbwenye mambo nee mbadakwanisa kucinja mwambo udakhazikisa iye. Iye apanga amuna ace toera kuponya Dhanyeli n’djenje ya nkhalamu.

 Masiku anewa Dhariyo nee akwanisa kugona thangwi adzudzumika kakamwe na Dhanyeli. Namacibese mwace, iye aenda pa djenje mbacemera Dhanyeli: ‘Mulungu wako akupulumusa?’

Dhariyo abva fala ya Dhanyeli. Iye atawira: ‘Anju wa Yahova afunga milomo ya nkhalamu. Izo nee zandiphekesa.’ Dhariyo akomerwa kakamwe! Iye apanga anthu toera abuluse Dhanyeli n’djenje. Dhanyeli nee akwarunywa na nkhalamu. Buluka penepo, mambo alonga: ‘Ponyani n’djenje amuna adapambizira Dhanyeli.’ Mudaponywa amuna anewa n’djenje, adyiwa na nkhalamu mbadzati fika n’djenje.

Dhariyo atumiza mphangwa kuna anthu ace onsene: ‘Anthu onsene asafunika kulemedza Mulungu wa Dhanyeli. Iye apulumusa Dhanyeli toera kukhonda dyiwa na nkhalamu.’

Kodi usacita phembero kuna Yahova ntsiku zonsene, ninga pidacita Dhanyeli?