Pidamala Yezu kubatizwa, nzimu wakucena wancitisa kuenda n’thando. Iye nee adya cinthu mu ntsiku 40, natenepa akhali na njala kakamwe. Buluka penepo, Dyabo abwera dzayesera Yezu mbampanga: ‘Khala ndiwedi Mwana wa Mulungu, panga miyala iyi toera ikhale mikate.’ Mbwenye Yezu antawira mukuphatisira Malemba: ‘Pyalembwa kuti munthu nee asakhala maso basi ene na cakudya. Asafunika kubvesera pyonsene pinalonga Yahova.’

Buluka penepo, Dyabo ayesera Yezu kaciwiri: ‘Khala ndiwedi Mwana wa Mulungu, numpha buluka padzulu pa templo. Pyalembwa kuti Mulungu anadzatuma aanju ace toera kukugampha.’ Mbwenye Yezu aphatisira pontho Malemba: ‘Pyalembwa kuti iwe nee usafunika kuyesera Yahova.’

Buluka penepo, Sathani ayesera Yezu kacitatu. Iye apangiza Yezu maumambo onsene a dziko na upfumi na mbiri yawo mbalonga: ‘Ndinakupasa maumambo onsene awa na mbiri yawo ungandilambira kabodzi basi.’ Mbwenye Yezu atawira: ‘Coka Sathani! Pyalembwa kuti usafunika kulambira basi ene Yahova.’

Pakumalisa, Dyabo abuluka mbaenda pyace. Aanju abwera mbapasa Yezu cakudya. Pakumala pyenepi, Yezu atoma basa idatumwa iye na Yahova yakumwaza mphangwa zadidi za Umambo. Anthu akhakomerwa na pinthu pikhapfundzisa Yezu. Na thangwi ineyi, iwo akhantowera konsene kukhaenda iye.