Kusiyapo kuwangisa atenda na kulamusa anthu muli akufa, Yezu akhakwanisambo kutonga mphepo na madzi. Pidamala iye kucita phembero pa phiri, Yezu ayang’ana Bara ya Galileya mbaona condzi peno mphepo ikulu. Apostolo ace akhali m’bote, mbakathimbana na mabimbi. Yezu atcitha pa phiri mbatoma kufamba padzulu pa madzi mbaenda kuna bote. Apostolo agopa mudaona iwo munthu mbakafamba padzulu pa madzi. Mbwenye Yezu aapanga: “Ndine pano. Lekani gopa!”

Pedhru alonga: ‘Mbuya, khala ndimwedi ndicemereni, ndibwere kuna imwe mbandifamba padzulu pa madzi.’ Yezu ampanga: “Bwera.” Pakati pa condzi, Pedhru abuluka m’bote mbafamba padzulu pa madzi mbaenda kuna Yezu. Pikhali iye cifupi na Yezu, Pedhru ayang’ana condzi mbagopa. Iye atoma kulirima. Pedhru akhuwa: ‘Mbuya, ndipulumuseni!’ Yezu aphata nkono wa Pedhru, mbalonga: ‘Thangwi yanji wapenula? Cikhulupiro cako ciri kupi?’

Yezu na Pedhru akwira m’bote. Mwakucimbiza condzi camatama. Usadziwa pidalonga apostolo pidamala iwo kuona pyenepi? Iwo alonga: ‘Mwandimomwene, ndimwe Mwana wa Mulungu.’

Unoyu nee ukhali ulendo ubodzi udatonga Yezu mphepo. Pa ndzidzi unango, Yezu na apostolo ace akhawambuka bara ya Galileya. Iye akhagona nduli mwa bote. Mu ndzidzi ukhagona iye, condzi catoma. Mabimbi akhamenya bote, iyo mbidzala na madzi. Apostolo alamusa Yezu, mbakhuwa: ‘Mpfundzisi, ife tinafa, tiphedzeni!’ Yezu alamuka mbapanga bara: “Matama, pfulika.” Pa ndzidzi unoyu, mphepo na bara yamatama. Yezu abvundza apostolo ace: “Kukhulupira kwanu kuli kupi?” Iwo atoma kulonga kuna unango na ndzace: ‘Ngakhale mphepo na bara pisam’bvera!’ Apostolo apfundza kuti anganyindira Yezu mwakukwana, iwo nee anadzagopa cinthu.